ديوان ريم شمر ... ( غروب )

20-05-2020, 06:22 AM

..
يارب يا معبود من كل الاجناس
ياالله طلبتك تحفظ أطراف حايل
:

تصونها من غير شرّ ولا باس
بلاء الكرونا ينقضي بالسّهايل

:

يسكن بها ناس مطانيخ وألماس
افعالهم ما هي بقول(ن) وقايل
:

ناس اذا حان الرخاء خير جلاس
وناس تشيل الحمل وقت الثقايل

:
أخص فيهم طيب الذكر والساس
سليل شمر من جدود أصايل

:
ابوي راعي العز للفخر نوماس
شيخ على العليا يروم الطوايل

:
له مجلس عامر ولا فيه هلاس
مايرتضي حكي القفى والرذايل

:

ربع الكلام اللي على هرج خناس
يقرض و لا هو ملتفت للحصايل

:
يغمز و يلمز بالبشر دوم بلاس
يطغي عليه الكذب شين الخصايل

:

أكثر علومه فبركة فعل وسواس
يضيق صدرك لا هرج بالعوايل

:
ودك على راسه تجازيه بالفاس
حتى يعرف الحق وجهه الضلايل

:
النقص والغيرة مرض صاب هالناس
شيئ يزود بالنفوس التحايل

:

المشكله قلبي به الشعر مقباس
والعمر مهما طال ما من صمايل

:
يارب تبعد عنّنا درب الادناس
وتختم نهايـة عمـرنا بالجمايل

:

حصريا لمنتدى همسات الغلا
الاحد \2020\مايو\10

قلم ريم شمر

وليدة اللحظة

نجـــ سهيل ـــم معجب بهذا

20-05-2020, 06:23 AM

..

..
مثل الرعد الفى علينا معدي
حرك رماد الشعر أوقد بناره
:
أرحب ياغيث بالسماء مستعدي
محمل(ن) بـالمزن حافظ مساره
:
أحترت بالأوزان ضيعت ردي
ما فيــه شي لايق ب أعتباره
:
ساطي بقاف(ن) مستعد التحدي
اذا أنطلق عدّى حدود الأشاره
:
شاعر يعقد الشعر به مستبدي
عجزت قوافينا تصد. انتصاره
:
الله عطاهـ الموهبه دون حدي
أشوف قافه فايز(ن) بالصداره
:
الشعر زاخر والهواجيس ضدي
قلّبتها و أخلفت فن المهاره
:
أن كنت تسأل ليه طبعي تصدّي
الحرص واجب في زمان النّعاره
:
أنا على ما قيل في جو جِدي
ما احب أجواء الهرج والجساره
:
اذا المسآئل تاخذ اسلوب ودي
حافظ على اللي دايم في وقاره
:
ان كان ودك تكسب الناس هدي
حاول تغاضى والتغاضي شطاره
:

مشكور ماقصرت ياعين جدي
قلدتني بـــ الشعــر تاج الاماره
:
ظروفنا صعبة عساها ..تقدي
كل ما يزين الوقت يقدح شراره
:
اختامها ليت الكرونا تعدي
اشوف كلن فاتح باب داره

حصريا لهمسات الغلا
18\ 9\1441

قلم ريم شمر

20-05-2020, 06:25 AM

.,

..

شعر الهجاء مابه مسبهة ولا غي
فيه الفُكاهة دون تجريح .. ذاتك

..
نقول شي فيك ضايقنا .. بشي
تعبير عن ضيقة ويمكن غلاتك

..
نمشي على النيّات بقلوبنا ضيّ
لا تعتبرها عنطزه في صفاتك

..
دايم على حسن الطبايع لنا فيّ
يكفيك رب الكون عارف نواتك

..
لاصار قلبك صافي مابغى شي
وش جاب في بالك اغير حياتك

..
كل على مبدأه شرواك ياخيّ
ثابت ولا شي يزعزع ثباتك

..
لو كان قافك غيمة كلها ميّ
قافي بسيط مخالف لمفرداتك

..
يقنص ويجمع بالقصايد و يشجي
يشوم عن شي يسبب .. غثاتك

..
تعصف بنا الافكار من غير ندري
مليون فكره ضايعة في شتاتك

..
تحاور الشّعار بأسلوب يسمي
تلقاه يتميلح ويجلب .. عناتك

..
اجمل كلام الناس لاصار يحوي
رآي وقناعه فاهم محتواتك

..
العقل من كثر الهواجيس يفري
حسبي على ناس تعدد خطاتك

..
لاصار مالك حظ وش عاد ترجي
صحيح ما ينفعك غير حسناتك

..
يالله يا معبود يا رازق الحيّ
اغفر ذنوب اللي يدور رضاتك

..
حصريا لهمسات الغلا

الاثنين 18 \ 5\2020

بقلم \ ريم شمر

27-05-2020, 12:04 AM

-

-

-

..

..

عيد الفطر اقبل علينا وهلي
يارب تجعل صومنا به شفاعات
:

العيد باكر والحجر صار كلي
عيد في بيتك لا تجيك الغرامات
:

هذي قوانين الوباء لا تملي
تفرض علينا نبتعد بالمسافات
:

بكره بعون الله يروح ويولي
بلاء الكرونا ونلتقي بالسهالات
:

لو ماالتقينا عيدنا جايز لي
نكشخ وندعي لاهلنا بالمسرات
:

كل عام وانتم في حياتي وظلي
ياجنتي ياعزوتي بالشديدات
:

العيد كله خير لو ما يسلي
يكفيك انك جالس في سلامات
:

يا الله طلبتك كل شر(ن) يزلي
تحفظ حكومتنا وسلمان بالذات

..

حصريا لهمسات الغلا
وليدة اللحظه
تقبل الله طاعتكم وعيدكم مبارك

السبت /30/رمضان /1441

-

-

-

07-06-2020, 10:08 PM

..

:

دار الشعر بالمنتدى محتله
كلن يشغل بالشعر دافوره

دام النفوس الصافيه والشله
الكل حاضر يفخر بجمهوره

ثارت طواريق الشعر منسله
يوم الشبح يعزف على موتوره

وده يجاري قافنا .. يوصله
واللي قرأ فاهم حدود الصوره

لا تظن اني يا شبح منذله
بشويش أركد لا تجيك خطوره

فوق الثريا نجمنا من دله.؟
عالي وصعبة تلحقه بغروره

يا مفصل القيفان حرفك كله
ماله شبيه مضيع ...دستوره

هندس وصمم بالخلا لك فله
كب الشعر وادبك مع الشحروره

اهجر طريق الشعر لا تندله
خلك من اللي عاليات سوره

واختامها يمكن خسرت الجوله
تقدر تحاول جدد المنشورة

لا تعقد النونه ترا ... نتسله
دقيت باب الريم شفت شروره

..

نجـــ سهيل ـــم معجب بهذا

20-08-2020, 06:03 AM

:

كثر الله خير هفوات الزمان
كل ما أظنت لي ظن يجوم

‏الفعل محسوب والهقوه بيان
ميرعندي رأي والراي محسوم

المحبة من طرف واحد جنان
كنك اللي بين نارين وتحوم

عيت عزومك على حظك تبان
ضاعت الحيلات والحال مهزوم

ماتطيق البعد والحسرة دخان
معتريك الهم في تل الحلوم

لو يطول الصد ماحان الاوان
أنت صامل منتظر حظٍ يزوم

الهوى والعشق مهو باللسان
المشاعر واضحه مثل النجوم

أن عطاك الوقت في حبه كيان
لا تكابر بالغلا خله .. يدوم

لو تغيب من العيون وبالمحان
أبشر بقلب على حبك ..غنوم

كثرت الاحلام والنية ضمآن
البشر من كثر ما فيها تلوم

ماعلى الدنيا مشاريه ورهان
الوفاء في هالزمن ظل معدوم

يا الله اني طالبك قبل الدفان
تغفر الزلات كل شي معلوم

..

غروب شمر

حصريا لهمسات الغلا
الاحد 14\6\2020

20-08-2020, 06:05 AM

:

:
‏أعيش دنيا ما بها شيء لايق
عمري قضيته بس ادور سلامه
‏
:

‏امنت بالله حاكم بالوثايق
‏ان السعاده بالحيـاة ابتسامـه

:

سامح وطنش لا تزيد الحرايق
الله خلق بالناس حب الزعامه

:

لا تلتفت للي يجيب العوايق
خله على مبدأه ضاع أهتمامه

:

لا صار رب الكون بيده طرايق
الرزق عنده لا تخاف انعدامه

:

أسلك طريق الخير لو كنت ضايق
درب العوج ما فيه غــير الندامه

:

الحـر يأخـذ موقفه بالحقايق
ما يسمع الكذاب راعي النمامه

:

أحد(ن) على كثر التفاكير رايق
أحد(ن) وهو مرتاح ذاع أنهزامه

:

لا تنحني هامتك لأجل الخلايق
لا تجرح المحتاج عطه أحترامه

:

لو شآن حظك لا تحير وتضايق
لا تعقد حجاجك تطيح بـ ملامه

:

وان زان وقتك تعتزي بالرفايق
كنّك مثل رش المطر من غمامه

:

يازين ذكر الله يجيب البرايق
سبّح وكبّر لا تعيش بظلامه

:
المعذرة لو كان بالحرف عايق
تقصيرنا من جهل مهو سقامه
:

يا الله عسنا من جهنم عتايق
في جنة الفردوس بعد أستقامه

حصريا لمنتدى همسات الغلا

الخميس

4\6\2020

..

غروب شمر

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
حيوان الضرنبول وتأثير على البيئة	مبارك آل ضرمان	( قسم الحيوانات والنباتات والاسماك )	8	19-03-2020 06:12 PM
تعرف عن أهم مميزات حيوان اللاموس	مبارك آل ضرمان	( قسم الحيوانات والنباتات والاسماك )	12	24-07-2018 09:37 AM
أسباب أنقراض حيوان الكوالا	مبارك آل ضرمان	( قسم الحيوانات والنباتات والاسماك )	7	13-07-2018 07:36 PM
إليكم معلومات عن حيوان الشنشيلا - مشاركتي بتنشيط الأقسام	مبارك آل ضرمان	( قسم الحيوانات والنباتات والاسماك )	6	08-02-2017 03:07 PM
حيوان شينشيلا ) القروب الاحمــــــــــــر	حنين الروح	( قسم الحيوانات والنباتات والاسماك )	22	11-05-2016 07:32 PM

الإهداءات

ديوان ريم شمر ... ( غروب )

ركن الاديبه غروب