ديوان ريم شمر ... ( غروب )

16-03-2020, 03:54 PM

..

يا فرح عمري و سنيني المقبلات
الشوق يجمعنا لو الأيام تباعدنا

في القلب الغلا يحفر العلامات
عهد(ن) نصونه من يوم تعاهدنا

الريم ربي حفظها من كل الملمات
بنت الكرام اللي في قربها تشرفنا

إن مر طيفي على ديارها بسكات
تقدير و إحترام و الحب يجمعنا

شامخه دوم على روس الطويلات
من طرف ناظرها بالوفا دوم تسعدنا

ما الوم خافقي بأنفاسها حي ما مات
جعل ربي يحفظها و يشفي مواجعنا

تدرين كل ما جيتي جتني السلامات
بالقلب صوتك يزرعها تروي مرابعنا
:
ابيات الاديب خليل الحرف
رديت عليها بالابيات هذي وليدة اللحظه
..

لي صاحبٍ بأقصى المعاليق مامات
غلاه من بد الخلايق ... لحوحي
..
اللي ذبحني يخطف القلب بسكات
حتى تعلى واستحل الصروحي
..
أنا أشهد انه حايز(ن) للعلامات
ان طال ليل البعد قبلي ينوحي
..
الكل يشهد له ولافيه زلات
هذا عشيري بالملامح سموحي
..
ميرالبلاء لاغاب والشوق مرات
يفضح شعور بالضماير يلوحي
..
ماهمنا حكي القفى والروايات
من يتبع العذال همّه .يفــوحي

ريم شمر
..

17-03-2020, 03:41 PM

ردي على الشاعر نجم ضاوي :

أيقنت أن الـــرد منك .. ملغم
يا مرحبا بالرد واللي لفى فيه
:
غير الغوالي يا عشيري محرم
من عقب خلك طاري العشق ناسيه
:
تبي الصراحه بالقصايد تجيم
مـره تقول اهواه مـره تعاديه
:
هذا نصيبك في هواهم متيم
تمشي مع العالم بفكر(ن) يحاتيه

:
رد الشاعر نجم ضاوي

::

أنا . . عن التفكير . . أصبح . مغيم
لا زارني الهوجاس . . عذبه قوافيه

هذا قصيدي . . والقصد منك اتعلم
ياللي غرامك صدق المشاعر محليه

يا ريم شمر . . عذب القصيد اتكلم
قافك جبرني بهاجس الشعر احاكيه

بس الصراحه . . مالي حد فيه اهتم
ولا لي حبيب ن في الحقيقه . اراعيه

هذي هواجس .. شاعر ن وانتي اعلم
عن هاجس . الشاعر .. لا جت بلاويه

..
ردي على هالابيات
::
يانجم فكري رفيع ماهو غشيم
أميز الهاجوس واعرف خوافيه
..

يا مسرج الجزلات منك أتعلم
اللي مضي بالعمر لابد نرميه
..

يغويك جن الشعر تصبح متيم
تبدع من الابيات شي تحاكيه
..
تصور الاحلام فيها ..تكلم
عذب القصيد مرتب في معانيه
:
تبني من القيفان شعر مزعم
الله يديم الصالحه في تواليه
..
بعض الكلام اللي نقوله يسمّم
سود النوايا كل شي تراعيه
..
وختامها شرفتني يا... غليم
محظوظ قاف الريم يوم(ن) تماريه

صح لسانك شاعرنا والله يسعده
..

19-03-2020, 11:05 AM

..

\
أبيات الشاعر \ نجم ضاوي
..

أنا أشهد إن الرد جاني مخضرم
القاف يشهد متزن في معانيه
\

ضربتني بالرد . . ضربة . . معلم
زود معاناتي . .على ما ..اعانيه
\

قلت علا الريح .. والموج . أغنم
لقيت بحرك عالي (ن)في موانيه
\

قافك دواء . . يقرأه عاشق متيم
أصبحت في ذاتي . . أردد أغانيه
\

ياعل بطن ن قد حمل فيك يسلم
ويا زين حظه من سكنتي محانيه

..

صح لسان الشاعر نجم ضاوي
وهذا ردي عليها :

يا مرحبا واهلين رد(ن) منظم
بالشاعر اللي واضحٍ في تحديه

**

عن جملة الشعار قافه ...مقدم
جزل المعاني جباها في قوافيه

**
يقول حرف الريم يشفي متيم
يا سعد عين ساكنه في نواحيه

**

خربتها يا نجم وانت . تضيم
العيد جبته والاوادم تراعيه

**

بحر القصايد يا صديقي مغيم
ناس تحب الثرثره والمشاريه

**

ياصاحبي قدرك عزيز حشيم
كلن يفسر بالنوايا ...خوافيه

**

عزاه يا قلب كسير ...سقيم
يا الله تسعد نجم وترد غاليه

**
ريم شمر

..

/
/

20-03-2020, 11:07 AM

..

..
شفت الهدية فاخرة يوم ...مريت
سخرت جن الشعر في رد ينقال

**
يقول مفتون الشعر ذايع الصيت
شمر صناديق الذهب عبر الاجيال

**
أنشهد انك صافي المدح عديت
نسل الطنايا بالخطر ستر وظلال

**
هم لابتي في مدحهم جيت هليت
عدوهم يمشي على الجمر منثال

**
مهو قصور بالقبائل .... تماديت
بس الطنايا صيتهم سيل همال

**
لكن عن القيفان ياهيه ...صديت
النفس طابت والقدر شين الحال

**
سامرت نجم الليل بالصوت ونيت
هاضت خيوط الشعر يا طيب الفال

**
كله سبايب صاحب فيه ماريت
لا جيت برقد تحتزم ضيقة البال

**
كنت أحسب الهم ساعه وقفيت
مير البلاء حزني تزايد بالاهوال

**
وختامها يا منبع الطيب حييّت
أمطرت بالابيات والحرف يختال

**
أهديتني بعض القوافي... ورديت
منى جزيل الشكر يا ذرب الافعال

:

قلمي \ريم شمر
..

28-03-2020, 01:52 AM

..

..

يا مرحبا باللي لفى عقب ماغاب
يشعل فتيل القاف يجمر حطبها

**

أختار من بيض النوايا له أصحاب
لو راح دايـم صحبـته ما نكبّــها

**

لا غبت عنا يا نجم عندك اسباب
جفت حروف الشعر بيَّن تعبــها

**

ياسهيل في دار الغلا كلنا أغراب
لكن مــع الغيبـات نفقـد ذهبــها

**

الغالي اللي بالصداقه له حساب
متميز بأخلاق ربي وهبــها

**
الطّيب ساسه معتلي بين الاشناب
العمر يمضي والمراجل كسبها

**

عز الخوي ياسهيل مافيك مرتاب
تمطر على صرح القصايد سحبها

**
ياأخوي شفت الكون بالحيل منصاب
الناس مذعورة بشيء رهبــها

**

سبة كرونا بعثرت شمل الاحباب
مثل الشرارة تشتعل في خشبها

**

كلنٍ في بيته مختفي سكر الباب
ودهــ يعقـم مسكنه من لهبــها

**

الحال قشرا والمعازيب بأضراب
حتى المساجد قفلت في رجبــها

**

ياأخوي لاتشكي ولا تذكر عتاب
لكل ضايع مرتبش من غضبها

**
نورتنا ياقرم والقاف بك طاب
حيّ القوافي وحيّ منهو كتبها

**

وختامها يا الله يارب الالباب
ترجع مساجدنا ويرجع صخبها

.
.

حصريا لمنتدى همسات الغلا
ترحيب ورد على قصيدة الشاعر نجم سهيل (من بُعد وغياب )

الجمعة /27 /مارس /2020

..

29-03-2020, 01:26 PM

**
بنت الاكابر على الاوزان مارتني ......
...........متميزة بالقصايد مهي شوية

**
لامن لفتني على الموضوع تمدحني.......
..........مغير أقلب بالحروف الهجائية

**
ودي برد على( تيماء) يجملني .........
..........شيء يشرف مثل غيمة سماوية

**
تجر لحن على الاوتار يطربني ........
.........تعانق النبض وتزخرف معانية

**
مرة تصف القوافي حيل تذهلني ........
........ومرة تفك الجُّب تكشف خوافية

**
كل ما زرعت الورد جتني تخاشرني .......
......... تدعم حروفي بردود خرافية

**
ليا نصتني تحط الرّد يدهشني ........
.......أبي أذكر الله من عيون الحسودية

**

أجمل حروفي بها الاحساس يجذبني ..........
............ لكل يأخذ من الدنيا نواصيّه

**
أطمح لـ شي في نفسي يراودني ........
.........أمشي معها على سلم الشفافية

**
حتى أتنفس اذا الهاجوس خاصمني ........
............أجلس بروضٍ في واحة جنوبية

**
يا هيّه ودي على بيروت تأخذني ..........
........ قصدي أتعلم ما اعوف السعودية

**
أبدل المود والاحلام تسبقني...........
.........يعني ينغير على قول السَّفرجية

**
أ زيل هم(ن) على الامتان مقلقني ..........
...........وأحيان ندبك على خطوة عسيرية

**
لا صاح قلبي على عمّان ودتني .........
..........أزور ( بتراء )معالمها تراثية

**
بيحت سدي على حظ معذبني .........
........ كل الزوايا تأخذني نواحية

**
يبقى وجودك يا تيماء يسعدني ...........
.... ......... تاج لـــــ غيري مبعدة ليالية

**

حياك ربي عسى هالزول يؤبشني ........
......... نبي نتكلم على نهج الدمشقية

حصريا لمنتدى همسات الغلا
الاحد \29 \مارس 2020

10-05-2020, 07:50 AM

..

::

الله على دنيا بها ما تبسمت........
........... دنيا شقية تختلف بالطبايع

ياكثرت ما عانيت حزن وتأكدت.....
.........أن المشاعر بين شاري وبايع

جربت أعيش بصدق لكن تندمت....
.......كل النفوس الصادقة في هلايع

لاهنت يا عود بكفة تعلمت .......
........أن الفضيلة راس مال البضايع

شيخ تسد بموقفك لا تحزمت.......
...........علمتنا طيب الأصول الرفايع

لو كنت غاضب يا عيوني وشديت .....
.........في قسوتك ذقت المحبة روايع

رغم السنين الماضية ما تندمت......
............ خير زرعته متسم بالطلايع

جعلتني أفخر اذا قيل من بنت ؟.......
...........أقول بنت الشيخ حلو الصنايع

روحي عسى تفداك ياابوي لا قلت....
...........لبيه يا ريم العيون الوسايع

تمضي ليالينا بحسك ولاشنت......
..............حتى لو الايام جابت فجايع

لو خانت وجيه الخلايق فلاخنت......
...........تسقي حنايا خافقك بالذرايع

وفيت مع ناس ردية وأيقنت.......
........ان الوفاء زرع يكيد الوضايع

أنا على نهج ابويه تدرست........
.........أن الوفا والصدق ساس الشرايع

الحظ لو عاند دروبي تطمنت.......
......في يوم يرجع يبتسم مهو ضايع

وختامها يا ناس جيت و تاقلمت.......
........رقيت مرقاب الخيول القلايع

الشعر يغريني وبه تسلطنت.......
........اجيب من جزل القصايد ضلايع

آخر كلامي يا جماعة ولا زلت......
.............اقول يا ربي تحفظ الودايع

قلم \\ ريم شمر
الخميس \ 16\4\2020

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
حيوان الضرنبول وتأثير على البيئة	مبارك آل ضرمان	( قسم الحيوانات والنباتات والاسماك )	8	19-03-2020 06:12 PM
تعرف عن أهم مميزات حيوان اللاموس	مبارك آل ضرمان	( قسم الحيوانات والنباتات والاسماك )	12	24-07-2018 09:37 AM
أسباب أنقراض حيوان الكوالا	مبارك آل ضرمان	( قسم الحيوانات والنباتات والاسماك )	7	13-07-2018 07:36 PM
إليكم معلومات عن حيوان الشنشيلا - مشاركتي بتنشيط الأقسام	مبارك آل ضرمان	( قسم الحيوانات والنباتات والاسماك )	6	08-02-2017 03:07 PM
حيوان شينشيلا ) القروب الاحمــــــــــــر	حنين الروح	( قسم الحيوانات والنباتات والاسماك )	22	11-05-2016 07:32 PM

الإهداءات

ديوان ريم شمر ... ( غروب )

ركن الاديبه غروب