عـشــانـكـ بـس ..!!

22-02-2010, 06:58 PM

طق الباب .. ودخل ابوها ..

التفتت له وابتسمت

ابو اصيل : بسّك من هاللاب تب عيونك بتروح فيها ..

.... : شسوي كل واجباتي عليه ,, اللي يبي الحاسب يتحمل ..

قعد على سريرها وقال وهو يتأمل الغرفه لانه مادخلها من زمان : بيطلعون اخوك بكره ان شاء الله ,, ابيك تذاكرين له لأن الامتحانات جايه واخوك مهو حول الدراسه زي منتي عارفه ومانبيه يرسب ..

... (كالعاده ..! وحنا عندنا غير اصيل اصلا ..؟ ) : ان شاء الله

..... : مع ان نايف ولد خالتك حالف انه يكمل معه بالانجليزي ,, بس ماودي نكلف عليه واخوك ماينعطى وجه ..

( حرّ .. شكل المكيف انطفى ..! او ان خلايا جسمي هي اللي احترقت , لما انذكر اسم نايف ) : ايه اكيد احراج في الولد ..

(ماظني اني قلت كلمه غلط .. ليه ابوي يطالعني كذا ويبتسم ..! نظراته غريبه .. ؟! )

.> ماتدرين انه يفكر في نايف وابو نايف .. شكله ناوي يفتح معاه الموضوع ,, نايف عاجبه بقوه .. وهذي بنته ومستحيل يفرط فيها لأي احد ) .!

ابتسمت ,, جات ريماس ونطت لحظن ابوي : بابااااااااااااا انت ليه ماتجي غرفتي ؟ بس كله عند هنوف

..... : بجي عندك , بس انا جيت اسولف شوي مع هنوف

.... : بابا اصلا هنوف ماتبي تسولف او تلعب مع احد بس قاعده مع هذا (وتأشر على اللاب تب بحقد )

ابتسم ابوها : ليه ماتلعبين مع اختك ..

..... : والله العب معها واسولف احيان ,, بس بسم الله عليها لعبها مايخلص ,, وانا وراي اشغال

ريماس بقهر : نصابه كذذذذابه (وتطلع لسانها )

هنوف انقهرت وعظت على شفايفها : طيب انا نصابه بس لاتلعبين بالسي دي بيدينك يخرب , جيبيه ..

تودي يدها لورا : لأ مابي , أبي العب فيه كيفي

هنوف طالعت ابوها : لاتلومني اذا جات غرفتي وطردتها ,, شوف اسلوبها معاي

..... : ريماس حبيبتي عيب , عطي اختك السي دي

(بس كذا عيب ! هاوشها رافعه صوتها علي وانا اختها الكبيره , لا وتتدلع بعد )

صاحت .. يالله ! اكرهها لاصارت كذا

ابتسمت وانا كاتمه غيظي : بابا بسوي شاهي تبغى ؟

.... : ايه حطي لي فيه حبق

(تدخل امي الغرفه ,, ماشاء الله العايلة الكريمه مجتمعه عندي ) ..

..... : ماشاء الله انت هنا , (وتلتفت لريماس اللي لازقه لابوها ) .. وشفيها ؟

.... بعصبيه : فيها دلع ومياعه وماحبها تلعب في اغراضي ,, امس مخربه علي سي ديين فيهم work sheets واضطريت انقلهم مره ثانيه

ابوها :طيب ولو بس مايسوى تهاوشينها كذا

امها : ايه ليه تكسرين بخاطر البنت خليها تفداها السي ديات ولا عطيها شي خربان تلعب فيه

ريماس وصياحها يزيد وتشاهق : اسوّي فيها اشكال .. في الأرض .. وسيّاره .. والله ما أخربهم < وعلى كثر العابها جايه تاخذ اغراضي ..

طلعت هنوف معصبة .. < ينرفزها دلع اهلها الزايد لاختها

يمكن هي ما تدري ان اختها تبي تحتك فيها وفي اغراضها وتنال اهتمامها .. وتخليها تلتفت لها .. مع ان هنوف دايم تحن عليها وتهتم فيها ,, بس أكثر مايعصبها وينرفزها ,, دلعها الزايد وعنادها ,, ودايم تفسلها بأسلوبها .. مره قعدت في المجلس لما كان نايف يدرس اصيل .. وعندت ماتبي تطلع ...,, وطبعا نايف لأنه طيب ومجامل درجه اولى لو ع حساب نفسه جابها وجلسها جمبه ,,

نايف وهو يشرح لأصيل ويده اليسار على رجول ريماس يوقف حركتهم : ريماس حبيبتي انا ماعرف اتكلم واحد يهز او يحرك شي قدامي

.... : طيب انا بس العب

..... : ممكن تلعبين بهدوء , يعني تقرين مجله ,, تروحين تجيبين فله عروستك أي شي

..... : لأ انا ابغى العب هنا مو على كيفك

اصيل يقطعهم : ريمااس عيب نايف اكبر منك , وبعدين احمدي ربك هو اللي جايبك جمبه والله انتي ماتنعطين وجه

..... : الا انعطى وجهين بعد ..

< رغم ان نايف تضايق من اسلوب ريماس .. الا انه ضحك على هواشهم ,, (هالبنت مو طالعه علىاختها الكبيره ابد !)

اصيل بتهديد : والله الحين اذا ماقمتي بضربك وبقص شعرك هذا

قامت من على الكنب ,, وقبل لاتطلع طلع صياحها

نايف : لا لا لا تبكين حرام عليك ليه كذا (ويمسك ريماس وهو يودي شعرها ورا اذانها ) خلاص حبيبتي شوفي خلينا نخلص اول مذاكره وبعدين انا بلعب معك , الحين انتي شرايك تروحين تذاكرين مثلنا ؟

ابتسمت برضا وطلعت من المجلس وهي توجه نظرات حاقده لاخوها اصيل

22-02-2010, 06:59 PM

ومن المطبخ اللي كانت هنوف واقفه تسوي الشاهي .. الى مطبخ نوره .. (ام اسيل وريهام )

عبد الله : وين البنات ؟

نوره وهي منشغله بالأكل : بغرفهم

.... : انزين , قولي لريهام ترى رفضت اللي تقدم لها

تنزل الملعقه اللي بيدها وتلتفت عليه : وليه ؟ البنت مابعد عطتنا راي ..

.... : لا بس طلع الولد مقتدر ماديا

..... : واذا مقتدر ؟

..... : لا حنا نبي واحد فوق المقتدر .. يعني بالعربي فلوسه كثيره

..... : طيب الفلوس ماتشتري السعاده ..

..... : ولو , البنت لو كان زوجها غني وعطاها فلوس .. اكيد انها ان شاء الله مارح تنسانا ,, وبتذكرنا بكم ميه نصرف فيها احوالنا

تغطي القدر الي على الفرن : هه ,, الحمد لله مو ناقصنا شي

.... : زيادة الخير خيرين ..

< ولأنه مالتفت على وراه ,, وكان سادّ باب المطبخ الصغير بكامل جسمه , مانتبه لريهام اللي سمعت كل اللي دار بينهم وطلعت للغرفه تركض ,, وعبرتها في حلقها ... تنط درجتين درجتين .. (كنها تبي الدرج يقصر ) !

ومن درج بيت عبد الله .. الى الدرج الصغير اللي في بيت ضاوي ,, كان واقف في نصه تقريبا .. ويفكر بعمق .. (كيف فكر انه بيكلم عمه .. قبل لايكلم ابوه ..؟ )

حس بيد على ظهره ,, انتفض لما طلع من سرحانه ..

امه : خير ياولدي فيك شي ؟

ضاوي : لا بس وقفت افكر , الا ابوي وينه

..... : طالع , يمكن يجي بعد ساعتين بالكثير

(نزل من الدرج وطلع بيروح يلهّي نفسه بأي شي .. الا انه يفكر بهالموضوع ) ...

..... بدا اسوداد الليل يخف .. (قريب الشمس بتشرق .. وتعلن دخول يوم الاربعاء ) طلع سالم من المسجد وهو يقدّم عصاته قدامه .. وصل للبيت وصار يدق على باب السواق بعصاته : عبد الحكيم ,, عبد الحكييييم

طلع السواق بوزاره : نأم بابا

.... يأشر على المسجد بعصاته : بس نوم نوم , ليه مارحت المسجد ماسمعت الفجر يأذن ؟

..... : لا والله بابا انا مايسمع ..

..... : طيب قوم صل بعدين كمل نوم ,, (وقال وهو يدخل ويترك عصاته عند الباب لانه حافظ البيت عدل ) : والله مايندرى عن اسلامكم ذا حتى الصلاه على كيفكم

وصل لغرفة امه .. لما حست فيه واقف عند الباب .. علت صوتها شوي وهي تكبر .. عشان يسمعها ويعرف انها قامت تصلي

ابتسم ودخل غرفته .. قرب للسرير وقال بهمس : ناديه .. ندّو ..

..... : هممممم

..... : قومي اذن الفجر .. شوي بتطلع الشمس

..... : هاااااااااااااا ه ؟ امس ؟ لا مارحت امس

يضحك عليها سالم ويجلس على السرير ويقول وهو يلعب بشعرها : لا قومي صلي ..

..... : تعععععبانه سالم بعدين وخر

يرفع البطانيه ومصرّ الا يصحيها كالعاده .. (سالم لازم يصحي الكل في البيت للصلاه .. )

تنكمش ناديه وتفتح عيونها ببطء وبكل تعب : سالم .. كم الساعه ؟

.....: 5 الا ربع ..

..... : طيب طيب بس شوي انام ..

ولأن سالم استغرب هالحركه على ناديه , هي دايم تقوم بنشاط للفجر .. قرب منها ولمس رقبتها وجبهتها : نادية عندك حراره

..... : احس برد مو حراراه ..

قام سالم وطفى المكيف .. وقف عند السرير وحس بناديه تنزل رجولها من على السرير بتقوم .. ولما وقفت قباله .. ماحس سالم الا وفجأه هي طايحه على صدره بكامل طولها

مسكها ومن خوفه ضمها زياده له : ناديه .. ناديه عمري فيك شي .. ناديه ردي (ولما استوعب انها طاحت عليها دايخه مو نعسانه صرخ ) يمّه تعالي

جات ام سالم مسرعه تركض ..

شافته حاضن ناديه وكل الخوف باين في عيونه (مع انه مايشوف فيهم , بس مازالوا يعبرون ) .. وكل علامات التعب على وجهها : حطها على السرير

قربت منها بتحاول تصحيها ..

سالم يلمس وجهها ويقول بارتباك وخوف : يمه وجهها نار ,, بدق على السواق وباخذها للمستشفى لبسيها عبايتها

..... : وش سواق تلقاه نايم

.... بعصبيه : نايم يقوم غصب عنه .. ولا نسيتي يمه اني ماقدر اسوق ؟

..... لا مانسيت روح بسرعه

< وكان الوقت يمر بسرعه .. إلا ان السواق كان اسرع وهو يسوق لين وصلوا للمستشفى ..

الدكتور : لا أطمن ان شاء الله مافيها شي

..... : وشلون مافيها شي انا لامسها حرارتها نار

...... : عارف اعطيناها خافض للحراره هي بس أخذت فايروس ومناعتها مش أوي ,,

< شكل كلام الدكتور ماطمن سالم لأنه شاف القلق في عيونه وحس به في حركة يدينه

...... : اطمن هي كويسه لو عايزين تشوفوها

(ماتكلم بس كان ينتظر الدكتور يأِشر على الغرفه )

دخل مع امه .. وعرف انه مو غلطان بالغرفه لأنه شم ريحة ناديه .. مميزه ولها تأثير خاص

قرب منها يشمها ويلمس شعرها بيديه .. مازال قلقان .. لمس رقبتها يتحسس حرارتها .. (شكلها مو ناوية تنخفض) .. !

ام سالم : تطمن , بتنخفض حرارتها ان شاء الله ..

.... : يقولون ارتفاع الحراره خطر

..... : لا ان شاء الله بتنخفض

......ببراءه : يمه .. أنا خايف عليها !

..... : ادري ياولدي ادري

..... : لا يمه .. انا خايف خايف .. والله خايف !

...... : ........

....... : يمه وين رحتي ؟

...... : انا هنا مارحت (وتمسك يدهـ )
..... : يمه شوفي وجهها تعبان مره ولا عادي ؟

..... تبي تهون عليه : لا عادي كأنها نايمه

...... : غيرتي نبرة صوتك .. شكلك تصرفيني يمه ولّا ؟ (ومد يده يتحسس حواجبها يشوف معقوده ولا لا )

(يدخل الدكتور : معليش مايصحّش تأعدو أكتر من كده .. )

يطلعون من الغرفه بأمر من الطبيب الصارم .. الا ان سالم تفكيره ظل معلق بالغرفه وماطلع معاه

ام سالم : متى نقدر نجي نشوفها ان شاء الله

..... : الصبح بإزن ربنا

22-02-2010, 07:01 PM

ركبوا السياره .. وطول الطريق ماتكلموا .. ام سالم تحب ناديه حيل وتعتبرها بنتها .. وغير كذا ضايق خلقها على سالم .. يحبها ويموت فيها .. وخايف عليها هالكثر

سالم كانت ملامحه صامته .. كل تفكيره ناديه ناديه ناديه .. خايف عليها موت .. يمكن لأنها دايم طبيعيه معاه وماقد مرضت ماشاء الله .. وهو من حبه لها مو متخيل يخسرها .. (يمكن كان حاط في باله انها انسانه ماتمرض او تتعب ابد )

..... : يمّه .. شكلي تعبتها بكثر طلباتي .!

التفتت لولدها على براءة سؤاله : ياولدي يقول لك عندها فايروس تقول تعبتها ؟

< احيانا تجينا أفكار طفوليه في مثل هالمواقف

..... : مدري , بس هي ماقد اشتكت من شي

..... : مو شرط ياولدي المرض يجي فجأه .. لاتخاف مافيها شي والدكتور بنفسه قايل لك ان حرارتها بتنخفض

.... بارتباك وخوف ملحوظ : طيب لانقول شي لأهلها لانها ان شاء الله بتطلع

.... : ان شاء الله (وهي تنزل من السياره )

وقفوا يفتحون الباب .. مانتبهوا للوقت الللي مر .. العصافير من وراهم تغرد .. والشمس أشرقت وبحراره خفيفه .. (وسالم ينتظر شمس الأمل تشرق في قلبه وتطمنه ان زوجته بخير )

دخل غرفته .. ومالحقته أمه قالت بتخليه بروحه ,, ولأنها خايفه ماجاها نوم .. فجلست في الصاله .. وحطت على المجد للقرآن .. تخلق جو ايماني .. يطمئن الروح شوي ,, وكان العفاسي يرتل

رفعت نظرها لباب غرفة سالم شافته واقف بطوله وأكبر علامة خوف طفل مرتسمه على وجهه

...... : يمّه .. أنا خايف !

...... : تعال ياولدي .. تعال

تقدم لها بخطوات مسرعه ورمى نفسه في حظنها ,, بكت بدون صوت لأنها مابغته يسمعها ويخاف ويظن ان فعلا فيه شي .. صارت تقول وهي تمسح على شعره : اسمع القران يطمنك ويريحك

(فعلا .. نام سالم وارتخت ملامحه المشدوده شوي .. بعدت شعره عن وجهه تتأمل البراءة اللي جعلها ربي في وجهه رغم كبر سنه .. وشافت دمعه متعلقه بنهاية الرمش .. حزنت عليه , ماستغربت لانها عارفه ولدها بداخله طفل صغير مايقدر يخبي احاسيسه .. )

< بس يمكن كانت تفكر أن دموعه راحت مع نظره ..!

(برغم صلابة بعض الرجال إلا أن بداخلهم طفل صغير .. لايظهر سوى في الأوقات الصعبة ) ..

وفي شقة عبد الملك وبندر .. كان الهدوء يعم المكان ..

صحى عبد الملك وهو يطالع الساعه .. دخل الحمام اخذ شور وبدل ملابسه , وقف عند المرايه يسرّح شعره الأسود والمتعرج شوي .. كان يضحك وهو يكلم نفسه

(والله وبيطلع لك خنافس ياعبد الملك .. يبي لك تحلق لاتروع اهلك )

راح لغرفة بندر يصحّيه .. وانفجر من الضحك لما شاف ضاوي نايم عندهم واشكالهم تنرحم ..

يبي يقومهم بطريقة خطيره ..

لازم لازم يقومون مروعين او منزعجين !

امممممم دوروا معاي اغنية حلوه ..!

وبصوت مدوّي ..

(الأغنية لراشد الفارس )

(أنا تعباااااااااااااااااااااااااان .. تكفى حس فيني .. أنا أنا تعلّق قلبي ويااااااااااااك

اذا ناوي تضيع لي سنيني .... أنا ضاااااااااااااااااااااااااايع ترا فيك وبلييييييييييييييييييييييااااااااااااااااااااااااا اااااك

ضاوي بانزعاج : ضعت في قريح قول آمين

يضحك : يحصل لك هالطرب على الصبح

..... : الا قول جرب اللهم ياكافي

..... : يؤ يؤ بسم الله علينا

(ويعلّي الصوت عند اذن بندر : انا تعبااااااااااااااااااااااااااااان تكفى حس فيني

..... : تعبت من اللي مانيب قايل وخر خلني انام

.....: اتوقع ان اليوم فيه دوام يعني , بعدين تعال انت وش جابك بيتنا تراك اذيتنا ؟

..... : جاي اشوف وجهك , جيت امس سهرت عندكم ومالي خلق ارجع ولأني أمون قلت مانيب راجع بيتنا مافيني اسوق , (وبعيون نعسانه ) والحين اطلع بكمل نومتي انا ماوراي جامعه

.... : تصدق شكلي مو رايح الجامعه .. ودي اجلس وانكد عليكم (ويبتسم بشرّ )

ضاوي وهو يهز بندر بخوف مصطنع : بسم الله علينا اخوك ضحك ضحكته الشريره

( عبد الملك بعض الأحيان تجي ابتسامته جانبية على الجهه اليمنى , خاصة اذا كان يفكر في شي ومو مركز , يمكن تبان غريبه الا ان البعض يشوفها جذابه وسبشل )

..... بندر وهو يعرك عيونه : سم بالله (ويأشر على اخوه ) واتفل على ابليس

يضحك ضاوي وسط نعاسه : وانت وش عندك على هالنشاط كل صبح ترا حتى المحاضرات ماتبدى 7وخاصة اخر المستويات

بندر بنوم : هذا الأهبل كل يوم كذا

يضحك عبد الملك ويروح للمطبخ ويتركهم .. وتوّهم غفوا مع الهدوء الا وينطلق صوت عبد الملك باستهبال : يللا ياحبايبي الفطار جاهز ,, سندوتشة جبن كرافت زي ماتحبّوا

بندر من الغرفه : عبد الملك قول آمين

..... : آمين

..... : جعلك العرس ان شاء الله

يدخل عبد الملك وهو يغني مسوي فيها بينتقم (عبد الملك صوته ثقيل شوي على بحه .. يعني بالكلام يطلع حلو بس بالغنا لأ .. يمكن على اغاني هاديه بس ) ..

ضاوي : شلون يعرس هذا بياخذ اثم في البنت , ماتشوف ابو الازعاج والصجه والدفاشه بعد , اكيد البنت كل يوم تلقاها بقسم في المستشفى , مره عظام مره قلب مره انف واذن وحنجره , وآخرتها في قسم النفسيه

..... : هه مايضحك , اقول انتوا ووجيهكم ترا فيه سلطه بالثلاجه لابغيتوا كلوا .. مع انكم مو كفو بس شسوي مايطاوعني قلبي لازم احسب غيري في كل شي , مع انكم أي شي

بندر يتطنز : ماشاء الله يامنيره تعرفين تصلحين سلطة بعد ؟ اجل ابي بكره سلطة يونانية

..... : الا تبي تبن انت ووجهك

بندر وضاوي : هههههههههههههههههههههههههههههههههههه

..... : انا طالع

.... : على وين منيرة اقعدي شوي

...... : بروح اشم هوى واتمشى شوي .. (ويرمي مخده على ضاوي ) وانت كم مره اقول لك لاتدخن عندنا ماحب ريحته ..

بندر يتطنز ويقول وهو يرجع ظهره ينسدح : ايه ترا منيره عندها ربو

..... : آسفين يامنيره ماراعينا شعورك

عبد الملك ينعّم صوته ويسبل بعيونه : ايه لازم تراعون شعورنا ترى احنا يالبنات حساسات وبسرعه نتأثر ومانحب الشباب اللي يدخنون يقهرونا ليتهم يبطلون .. نخاف يدمنون

بندر وهو يضحك على عبد الملك ,, صوته مايتنعم ابد : اعوذ بالله صوتها يروع هالمنيره , ولاجسمها تقول ولد

يفطس ضاوي ضحك ويرجع يحط المخده على راسه بحركه تدل على انه يبي يكمل نومته ,, يطلع عبد الملك ويتركهم .. وهو يكمل : أنا تعبااااااااااااااااااااااااااااااااااااااااااااااا ااااااان تكفى حس فيني ..
يمكن شخصياتنا ماحسوا بمرور الوقت لين صار المغرب .. الا سالم وأمه اللي كانوا مع نادية بالمستشفى ,, مازالت نايمه .. وهم فضلوا مايقولون لأحد لين تنخفض حرارتها .. خاصة أن اليوم يجتمعون العيله عند طيبه جدتهم ,,

كانت ام سالم جالسه جمب نادية من اليسار ., وسالم من اليمين .. وكل مامر وقت بسيط .. يلمسها ويتحسس ملامحها .. ويدعي انها تخف

22-02-2010, 07:02 PM

سالم ببراءه : يمه ,, يمه ينفع نجيب كماده فيها ثلج ونحطها على جبهتها يمكن تنخفض حرارتها ؟

امه بحزن : ياولدي مدري الحين العلاجات اسرع

(ولأنه مايشوف .. قرب منها وترك يده تستقر على جبهتها ..وصار يقرا عليها قرآن من السور اللي حافظهم ) ..

وصلت نوره مع بناتها بيت طيبه ,, ودخلت الصاله من الباب القريب .. اما اسيل وريهام مشوا لحد الباب الثاني .. عشان يضبطون اشكالهم قبل مايدخلون ..

عبد الملك كان واقف عند عداد الكهرب .. فاتح غطاته .. (شكله جالس يصلح شي او يتأكد من شي )

اسيل : ماشاء الله (الايدي العامله ) هنا ؟

يلتفت عليها ويسكر الغطا : انا كم اسم لي ؟ (ويعد باصابعه) الجليد , والايدي العامله .. وايش بعد ؟

..... : وووووالله حركات يعرف اسمائه بعد

..... يتطنز : بتسوون لي مجلد ,, مافي غيري في هالبلد

ولما وجه نظراته لريهام ضحكت وقالت : شخبارك عبد الملك؟

..... : تمام , بس وخري اختك لا أتهاوش معها

.... تضحك ريهام وتدخل داخل

< يعمري عليها قاهرتها حركة عبد الله فيها من امس .. مهي رايقة لأحد

اسيل بميانه : ابي افهم انت ليه كذا ؟

..... : كذا وشلون يعني ابي افهم

.... : مدري , معطي الناس وجه بزياده , مشغلينك ليل ونهار

طالعها بعيونه الكبيره باستغراب : وشفيكم عليّ فيها شي ّ؟ كل الناس تساعد اهلها

..... : طيب لو انا قلت لك مثلا جوالي خربان تصلحه لي ؟

..... : ليه وش شايفتني اشتغل عندك انا

..... : انت تحب تساعد

..... بغرور : مو أي احد

.... انقهرت : لا ياشيخ من زينك اصلا لو بحتاج شي مستحيل اطلب منك

ابتسم ابتسامته المايله : طيب لاتكلميني كذا

بندر من وراهم : وش فيك على بنت خالتي ؟

,,< ضاعت علوم البنت

عبد الملك بدون اهتمام وهو يلتفت للعداد مره ثانيه : ما يعجبني هالأسلوب ..

اسيل بضحكه : ياشيخ امزح معاك

..... : داري

بندر بابتسامه لأسيل : انا عارف اصلا انتي تطفشين بلد ! بعض الاحيان من جد اسلوبك يقهرررر

اسيل بدلع : لااا حرام عليك ,, وبعدين من زين اساليبكم انتم

يضحك الكل ..

عبد الملك : ساكت لك لأنك بنت خالتي والشكوى لله

.... : طيييب ماقلت لي وينك عن البرنامج من زماااان , اخوك ومقالاته مازالت تنزل بس انت ؟

..... : لا وقفت , احس تعبت وبصراحة طفشت , وغير كذا الامتحانات جايه

..... : تصدق امس وحده دقت على المذيع الثاني تقول وصلوا لعبد الملك سلاماتي

بندر : اسمها ولاء

.... : ايه

عبد الملك : ياذا الولاء مزعجه وتقهر

...... : ليه وش تقول لك هي

...... يقلدها : واهدي الأغنية الفلانية لك , وان شاء الله تعجبك

بندر : المشكله لو انه برنامج اغاني قلنا معليه بس ما لأم الاغنية دخل

يضحك الكل

اسيل : انا بدخل دااخل مت من الحر هنا

(ويدخلون الشباب مجلس الرجال)

دخلت وشافت اختها واقفه تضبط كحلها : سخيف

ريهام : مين ؟

..... : عبد الملك , بعض الاحيان ردوده تقهرني

..... : انتي تستفزينه

.... : لااا والله ؟

..... : تعرفينه حبوب وطيب وبالعكس دايم يخلق جوّ , بس اتوقع انتي تخلينه يوريك وجهه الثاني , تعرفين شخصيته انتي

صوت طيبة من الصاله : وينهي نادية ماشفتها ؟

اعتدال (امها) : مدري والله ماتصلت فيني اليوم , تلقينها شوي وبتجي ان شاء الله

طيبه : انزين ,, تراني ابي اسوي عزيمه باستراحه وبعزم عيلتنا وجيراننا بعد بمناسبة طلعة اصيل بالسلامه

اسماء (امه ) : ماله داعي يايمه

...... : له داعي وزي ماهو ولدك ولدي بعد , وان كان على الامتحانات نخليها في الاجازه ..

< شكلها عارفه بيستحون يردون لها طلب

على الكنبة الطويلة الي مقابله طيبه ,, كانوا قاعدين ريهام واسيل وهنوف ... والكنبة اللي بجمبها سلمى .. وفي هدوء معتاد مناقض للجو اللي هي فيه

هنوف وهي تلتفت على سلمى : ماتصلت ناديه فيكم اليوم ؟ ولا جات بيتكم ؟

..... : لا ماشفتها , وانا مارحت اليوم بيتنا , ان شاء الله انها بتجي ,, بس اكيد ,, تأخرت ,, واشغلها شي

(من جد نادية لها فقده وقعدتها تسوي جو بين البنات .. خاصة انها اقرب وحده لهنوف )

طيبه بعد ماسمعت البنات يسألون سلمى : اعتدال انا ماني مطمنه قومي واتصلي على بنتك

... تقوم اعتدال وتتصل بس ماتلقى رد , تروح لرقم سالم وتتصل فيه .. وبعد 4 رنات يرد (وبصوت طبيعي )

سالم : هلا والله , كيف حالكم ,, ايه الحمد لله , لا يا خالتي ناديه طيبه ان شاء الله ومافيها شي بس خذت فايروس وارتفعت حرارتها وهي نايمه الحين .. لا لا مافيه الا الخير ان شاء الله , أي وديتها المستشفى واعطوها خافض

سكرت اعتدال وهي مو مطمنه وقالت للكل التفاصيل ,,,بس ماحبت تشكك في كلام سالم وتزورهم خاصة انها تثق فيه , . (وكانت نادية محط تفكيرهم لليوم بطوله )

( حنونٌ بجنون ..! )

وفي الجهه الثانيه من الرياض .. كانت ولاء جالسه على الشي الوحيد اللي بقى في غرفتها .. مرتبه صغيره تنام عليها لأنهم نقلوا كل شي مع السرير للفيلا الجديده .. وكرتون صغير فيه بعض اغراضها الضروريه

كانت سانده ظهرها على الجدار .. ياسر وناصر كل واحد نايم بجنب منها ,, ماسكه بيدها أشعار مجمعتهم من دواوين .. وتقراه برواق .. وصلت لقصيدة لفيصل اليامي هي تحبها حيل .. ولأنها حافظتها حيل صارت ترددها قبل ماتوصل بعيونها للبيت اللي بعده ..

ياعمــــري الدنيا ماتسوى تنام وخاطرك زعلان

ولا به شي يستاهل يخلي قلبك يعاني

طلبتك كان لي خاطر ,, تبعد عنك الاحزان

فديت عيونك الحلوه تبسم لو علشاني

حبيبي صار لي مده اشوفك تايه وحيران

وانا والله لي شفتك حزين تزود احزاني

انا احبك ولا ودي تعيش بدنيتك ندمان

ترى الأيام محسوبه .. وتالي ذا العمر فاني

(هي ماتحب ,, ويمكن ماقد تمنت احد يقول لها القصيده ,, بس كانت دايم تهديها لنفسها ,, وتذكر نفسها بها .. قد ايش الواحد يحتاج أي كلمة تنسّيه ,, تواسيه ,, وأحيان على الدنيا (تقسّيه ..) ..!

رجعت بهالذاكره لقبل يومين .. لما كانت تقرا في نفس الأوراق .. ودخلت امها بحركه سريعه وقفلت الباب ..

ولاء : ماما ايش فيه ؟

امها بأسى : ابوك يعني وش فيه في هالبيت غير ابوك ؟ جاته الحاله وانا خفت على نفسي وطلعت

..... : ماما والله احس مايصلح نخليه لحاله ممكن يأذي نفسه

..... : هو قايل ذاك اليوم لاتجون في وجهي عشان ما أضركم

..... : بالعكس يمكن نقدر نمنعه او نوقفه

..... : لأ ,, ولاء والله لو تطلعين لأبوك الحين مارح ارضى عليك .. خليه هو راضي

(شكله ابو ياسر اكتشف ان زوجته تذوب له الدواء حقه في العصير وماصار يشربه ,, مو مقتنع ابد انه مريض )

< وهذا أكبر جزء في المشكله ..!

مارجعت لأرض الواقع .. الا لما حست بيد تمسك يدها ,, وانتفضت بخوف بكل قوتها ,,

طلعت من سرحانها ورفعت عيونها على صاحب اليد اللي ماسكه يدها ,, وأول شي وجهت انظارها له ,, كان لعيونه ..

شافت فيها الحنان والحب ,, ارتاحت ..!

ابو ياسر وهو يبتسم ويسحب يد بنته بهدوء من شعرها : ولاء لاتسحبين شعرك تراك بتطيّحينه كذا

..... : ماعرف اذا صرت افكر لازم غصب عني امد يدي له

....... بروقان : وش تفكرين فيه ؟

....(لا ماكنت افكر في احد ) : يعني ,, بيتنا الجديد , والامتحانات

....... يتربع على الأرض جمبها : ايييييه ان شاء الله بكره بالكثير ناقلين

...... : وووووالله ؟

..... : اول تقولين مانبي ننقل والحين فرحانه ؟

..... : ههههههه لا والله مو قادره اعيش في غرفة كذا فاقده غرفتي حيييل ..

يبتسم ويمد راسه يتأمل ياسر وناصر : الى متى بتدلعينهم ؟ شكلهم بيدخلون الثانوي وانتي مازلتي تنومينهم بحضنك ..!

....... : ههههه لا وين ,, خلاص بس يدخلون الابتدائي ان شاء الله وابعدهم عني

......: ايه بنشوف .. بس تدرين ,, انا مرتاح انهم متعلقين فيك .. تعرفين امك مو قريبه مره لهم مثلك

...... : .....

...... : والله الواحد مايدري وش يسوي

شافتها فرصه تفتح الموضوع : بابا .. قبل فتره .. ياسر سألني ,, اذا كان ,, يشبهك

تلعثم وبانت نظرة الأسى بعيونه : وش قلتي له ؟

..... : قلت له بعدك صغير ,, مدري من وين جايب هالأفكار ومين قايل له ,, بس شكله ماقتنع

..... : ان شاء الله بس يروحون المدارس بقول لهم ,, لأنهم بينتبهون لأسم الأبو غير ,, ومابيهم ينحرجون عند الطلبه .. (الجمعية تسجل اليتامى بأسماء معينه مثلا : ياسر عبد الله او ياسر عبد العزيز , بس مايجوز طبعا انه ينسب الولد له ,, سبب تسميته بأبو ياسر لأن كان عنده ولد صغير باسم ياسر ومات )

قام ابو ياسر من قعدته وابتسم وطلع من الغرفه ,, ورجعت ولاء تكمل في اللي تقراه

22-02-2010, 07:04 PM

(ومن الاوراق اللي في يد ولاء ,, ننتقل للأوراق اللي كان ماسكها ابو ضاوي في يده ,, ويراجعهم ..

ضاوي : يبه .. اكلمك انا

...... : ايييه وش تبي ؟

...... : قلت لك اللي ابي , يبه انت منت مركز معي , اترك اوراق الشغل شوي

...... : مركز معاك , بس ماني مرتاح لطلبك

..... : ليه يبه ؟

..... : مدري انت عارف ان علاقتي بعمك حلوه واذا رفضت بنته انا بزعل منه , لأني طلبته كذا مره في كم شي وردّني ,, وهالمره لازم يرضى

.... باستغراب ووجه متحطم : لهالدرجه يبه واثق انها بترفضني ؟

..... :لا مو قصدي , بس خلاص بكلمه لك ان شاء الله وبشوف

..... يحبه على راسه : تسلم يبه

(وراح غرفته وهو يفكر : ليه ابوه كان واثق ان هنوف او ابوها بيرفضون ,, ليه انا وشفيني .. يمكن البنت مخطوبه يعني ؟ او انا ما أناسب لها طيب ؟ وشالموضوع بالضبط )

دخلت امه الغرفه .. وظلت واقفه عند الباب تتأمله وهو يفكر ,, بس وجهها كان متجهم شوي

ضاوي لما التفت لها : هلا يمه . خير فيه شي

تدخل الغرفه وتسحب سيجارته وتطفيها في الصحن : فيه انك حشرتنا , ياولدي دخن برا

.... : يمه اعتقد اني فاتح الشباك وماجيت دخنت لكم في الصاله

..... : والله انا الغلطانه جايه غرفتك اطمن عليك ,, تصبح على خير

..... : وانتي من اهله ,,!

طفى اللمبه وانسدح على سريره ,, وراح في تفكير عميق ..

(وعلى سرير ثاني في مكان قريب بعدها بيوم ,, كانت عذبه جالسه تقرا مجله ,, وروعه تكتب على السرير اللي مقابلها

تدخل عايشه وتجلس على كرسي التسريحه : بنات ولد اسماء بيطلعونه من المستشفى

عذبه بملل : طيب ؟

..... : انا بروح ازورهم , بتجون معاي ؟

..... : لا

وتلتفت على روعه

< يعني يايمه حتى لو قلتيها مجامله تتوقعين بقول بروح , بنكد عليكم شي طبيعي , بتشيلون وتحطون فيني وبحس أني عاله عليكم

..... : اجل بروح بروحي , بسلم عليهم عند الباب وبطلع ,,

..... : براحتك

,,, طيب انتبهوا لاتجون المجلس عيال عمامكم بيمرون يسلمون بعد شوي

...... : ان شاء الله

(وتطلع من الغرفه)

عذبه بانزعاج : روعه سكتي عصفورك هذا ازعجنا أعوذ بالله

تلتفت روعه وتبتسم له و ترمي له بوسات ويسكت ,,

عذبه : اللهم لك الحمد (وتطالع ملابسها) , حلو اللي علي لو شافني نايف بالغلط ؟ لو مثلا ,, يعني لو

بدون اهتمام : ايه ,, عادي ..

..... : مارح يجتمعون اهلي اليوم ؟

.... تطالع الساعه : امممممم بعدها ماصارت 9 ,, اكيد بيجون بعد شوي ... (وتجلس على كرسيها وتمشّيه للمكتبه , وتشغل اللاب تب )

عذبه ببرود : بتفتحين النت ؟

..... : ايه لحد مايجون اهلي , طفش

..... : اجل انا بروح الصاله اقلب في التلفزيون شوي

فرحت روعه لأن اختها بتطلع من الغرفه : خلاص اذا جاو ناديني , بقفل الباب عشان ألبس

ابتسمت عذبه وطلعت ,, وحركت روعه عجلات كرسيها بسرعه وقفلت الباب راحت لأوسع جهه في الغرفه وكانت عباره عن لفّه بسيطه وفي نهايتها العصفور الاصفر الصغير .. ,, سمّت بالله ورفعت ظهرها من الكرسي بصعوبه ,, حست بتعب ورجعت نزلته على الكرسي

حست بأنفاسها تتلاحق ,, وبراسها يصدع وجسمها مشدود ,, نزلت رجلها اليمين على الأرض ووقفتها على اطراف الاصابع ..

كررت نفس الحركه في رجلها الثانيه ..

الكناري يطالع فيها ويرفرف ,, كأنه خايف عليها ويبي يمنعها

رفعت ظهرها ثاني مره , وخلت يدينها تتركي على يدين الكرسي

اختل توازنها وطاحت ..! علا صوت عصفورها بصراخه الناعم

رفعت راسها وابتسمت له ,, ورجعت تجلس على الكرسي ,, وتحاول توقف ثانيه ..

قربت عند جدار ,, وسندت يديها له ,, ورفعت نفسها ,,

ورجعت طاحت ..

دمعت عينها واستسلمت ,, سندت ظهرها على كرسيها ومشت لحد قفص العصفور ,, تتلمسه بيديها

..... : خلاص بوقف هنا اليوم , تعبت .. بكره ان شاء الله احاول طيب ؟

< شكلها حاسه انها ماتهمّ احد غير عصفورها ..!

اما في بيت عبد الله ,, كان الكل في السياره ,, عبد الله جالس على اعصابه وشوي ويصارخ ,, طلعت اسيل تركض وعبايتها مفتوحه ,, وركبت بسرعه

عبد الله : لازم كل مره تتأخرون , انا قايل 9 كلكم في السياره , شوفوا الحين الساعه كم , و امك وينهي ؟

اسيل بطفش : تلبس عبايتها

..... : يتعب الواحد وهو يعيد كلامه , ماتفهمون , كلكم من اولكم لآخركم ماتراعون قيمة الوقت , الحين اذا رحنا السوق قلتوا بنقعد للساعه 12 ياويلكم

(تركب نوره و تسد اسيل اذانها وريهام كانت حاطه سماعات جوالها ومشغله الراديو )

عبد الله : وانتي ياريهام جبتي ملابسك اللي بتبدلينهم ولا نسيتيهم

ماترد ريهام لانها ماسمعته

يدزها واحد من اخوانها وتشيل السماعات : سم ؟

.... بعصبية : ايه ,, طبعا حاطت لنا ذا السماعات حتى الواحد مايعرف يكلمك

اسيل بصوت واطي : والله الواحد يروق على الردايو احسن من هالازعاج

عبد الله سمعها والتفت على نوره : بنتك هذي قليلة الأدب متى ناوية تربينها

..... : وش فيك عليها ؟

..... : وش فيني عليها ؟, اسمعي وش تقول ,, والله الشرهه علي انا مكمل الطريق ولا المفروض ارجعها البيت الحين

اسيل بدفاع : انا قصدي ازعاج اخواني , لازم يتهاوشون

..... : ايه هين ..!

(بعد مامشوا شوي , خذت اسيل جوالها وكتبت : صح انه عصب ,, بس مرتاحه لأني طلعتها , في قلبي من زمان وانا ابي اقولها له ) ومدت الجوال لريهام

قرت كلامها وكتبت : تتوقعين لما نتزوج بياخذ من مهرنا وبيخلينا نصرف عليه , تتوقعين يحرجنا مع ازواجنا ؟

ترد : انا وين وانتي وين ..!

كلن كان ضايق خلقه ذاك اليوم ,, بس يوم الجمعه عدى على خير (الا بالنسبه لهنوف ) , نادية طلعت من المستشفى وودوها للبيت والكل تطمن عليها , واصيل برضو طلع وتحسنت حالته

جا يوم السبت ,, وكانت هنوف جالسه على الكراسي اللي عند كافتيريا 21 .. ماسكه بيدها رسالة الجامعة ومسوّيه تقرا ,, ولا بالها اصلا مو في الجريده

حست بولاء واقفه عندها ورفعت راسها لها

ولاء وهي تفتح يدينها على مدّ الذراع وتسحب اكبر كمية من الهواء لصدرها بتفاؤل : حلو الجو اليوم مع انه حر شوي بس فيه نسمة هوا ,, أحس حتى العصافير رايقة ,, والحمام من الصبح وفي كل مكان يتمشى

هنوف بقهر : بس المشكله لاجاك شي يخليك ماتحسين بروعة الجو ,, شي ينكد عليك ويخرب عليك يومك

تبتسم وتحط يدها على راس هنوف : وش فيك ؟

...... : مقهوره !

.... تجلس مقابلها : ننقهر سوا ؟

هنوف وهي تعد على اصابيعها بحزن : 1- شغالتنا هجّت , 2- كل شي يصير من وراي وانا مدري

بنبرة هاديه : هنوف ياقلبي اذا على الشغاله يمكن خيره لكم , احسن من انها تجلس وتسوي لكم مشاكل , شوفي احنا ماعندنا شغاله والحمد لله أوضاعنا حلوه ومرتاحين ,, بس وش قصدك بالشي الثاني ؟

عقدت حواجبها وهي تنفض بلوزتها : بموت من الحر واحس مخنوقه , ندخل المبنى ونروح الدور ال3؟ هادي واقدر اتكلم فيه على راحتي ..

...... : يللا وين ماتبين ماعندي مانع ..

دخلوا المبنى ووقفوا عند المصعد ينتظرونه

هنوف : فيه وحده اعرفها , لو يكون ضايق خلقي وفيني اللي فيني لازم اذا شفتها ابتسم , واقدر اقول لها كل شي ,, الله يخليها لي (وفي بالها تقول : بالرغم من كل اللي فيها فهي انسانه متفائلة ورائعة وقوية .. )

< غالباً

ولاء عرفت انها تقصدها وقالت بابتسامه : عرّفيني عليها

يدخلون المصعد وهم يضحكون

وبدت هنوف تستعرض احداث يوم الجمعه

ضاوي كلم ابوه ,, ابوه كلم ابو اصيل بالموضوع

ابو اصيل : والله تدري اني مابي اردك ,, بس السالفه ومافيها (وقال له سالفته هو وابو نايف لما كانت هنوف صغيره )

ابو ضاوي : لو الولد يبيها كان تحرك وخطبها , مو يوم طلبها ولدي جيت تقول انها محجوزه ,؟ وشهوله مانشرتوا الخبر ؟ اكيد ان نايف هذا مايبيها

ابو اصيل : ياخوي صدقني هو مكلمني ويقول ان ولده موافق ويبي البنت بس ماله وجه عقب حادثة اصيل وحنا داخلين على اختبارات ماأبي اشغل بنتي

..... : قول قول انك ماتبي ولدي , ابي اعرف وش زوده عن ضاوي ,, ان كانه عشان ولدي يدخن يتركه وخلصنا

..... : ياخوي طول بالك ماقلنا شي بس حنا نبي نعطي البنت فرصه تختار ولاّ مو من حقها بعد ؟

..... : بلى ..

هنوف : شفتي ياولاء الموقف المحرج اللي انا فيه ؟ بالله عليك علميني شقول لأبوي الحين ؟

(طبعا هنوف للآن ماتدري بسالفة نايف بس ابوها قال لها ان ضاوي خطبها لأنه وعد اخوه , ماكان يبي يحطها بين خيارين ,, يبي يعرف رايها بضاوي )

..... : وابوك ليه يقول لك الحين الوقت مو مناسب ابد

..... : مدري عنه

..... : هنوف ,, هنوف حبيبتي اسمعيني (وتحط عيونها في عيونها ) انتي تبين ضاوي او لا ؟

...... والعبره تخنقها : لا ,, ما أحبه بس ما أكرهه , بس ليه يخطبني وهو عارف ردي ,, ليه يبي يحرجني مع ابوي وعمي ,, ضاوي مايناسب لي ,, وانا مستحيل بقدر اعطيه اللي يبي ,, احس اني ماقدر اتفق معاه لو وافقت وبتصير مشاكل .. شخصيته غريبه ومختلفه , وغير عن كذا , عمي حليو وطيوب , بس زوجته عصبية وانسانه متسلطه ولازم ترمي كلام وتنقد وانا مايعجبني هالاسلوب , واحنا صرنا في زمن اذا تزوجنا الرجال نتزوج اهله معاه , كثير اسمع ناس يقولون كذا

....... : ياعمري انتي ليه تكبرين الموضوع ارفضي وخلاص

..... : حاسه انه بتصير مشكله

..... : لا استغفر الله لاتقولين كذا

...... تبتسم وتمسح دمعتينها اللي طاحوا , وتقول لولاء اللي كانت تضحك : ابلشتك بضاوي ونايف داريه

تبتسم بخبث وهي تحضن شنطتها وتقدم راسها لقدام : امممممممممم مين اللي جاب طاري نايف .؟

هنوف توهقت وحمرت خدودها : مدري, انا قلت ؟ , شكلي صايره افكر فيه كثير

..... تستهبل : هل اسمع اعترافاً بالحب ؟

..... تضحك : لا عاد مو حب مره , بس احس فيه شي يشدني له , وبوجوده احس بشي غريب

....... : اها

..... : بتفهمين بعدين اذا حبيتي عبد الملك

..... تفتح عيونها ع الآخر : اووووووووووووووه من جدها صدقت تراني استهبل , روحي من زين ولد خالتك قلنا صوته حلو بس مو لدرجة أني احبه , خبله انا حتى مو من اهلي وماقد شفت وجهه

..... : تدرين هو دايم يسولف لجدتي وهي لازم تسمع برنامجه , فجات سألتني تقول صديقتك ولاء هي نفسها الماصله اللي تدق تتلزق في ولدي

تضحك بقوه : والله ناقصة عقل ادق عليه , أصلا انتي عارفتني استتفه اللي يدقون تبيني اسوي مثلهم , وبعدين ترى جدتك ماخذه مقلب في ولدها مدري براد بت ولا جورج كلوني على غفلة

.... تضحك هنوف : عاد عبد الملك ولا غيره , اذا حبيتي ساعتها بتجين تشتكين لي

تقول بكل جدية وألم : انتي تدرين يا هنوف ليه انا مستحيل اقدر احب أو افكر بهالشي حتى

ينكسر خاطرها على صديقتها ,, وتقول بابتسامه تبي تنسّيها السالفه : متى بتنقلون ؟

ولاء تضحك : هااااي يادبه لاتصرفين نبي نرجع لموضوع نايف

تسحب جريدة الجامعه من الشنطة وتدفن وجهها فيها تبي تغير السالفه ( مسوّية تقرا)

تمدّ ولاء يدها : عطيني آخر صفحه دامك مابعد توصلين لها (كعادتها تحب تقرا الجريده كل صفحه لحالها بعدين تجمعهم وتحطهم فوق بعض )

....... : تحبين تفصخين الجرايد انتي ...!

(في بيت سالم .. كانت الساعه تقريبا على العشر,, نادية طلعت من المستشفى ,, حراتها نزلت من 40 بس للأسف مانزلت الا درجة وحده ,, وسالم مازال خايف عليها

كانت نايمه وبكل تعب ... سالم جالس جنبها على طرف السرير وبيده فوطه صغيره غسلها بمويه بارده ,, ويحطها على جبهتها كل شوي

حست فيه بس من التعب ماتحركت ,, بعد فترة فتحت عيونها ,, وكان أول ماشافته وجه سالم ,, الوجه اللي تحبه وتموت فيه ,, تحسه كل يوم عن يوم يحلى ,, خذت لها دقيقتين وهي مفتحه عيونها تتأمل وجهه الابيضاني وعيونه المعبره اللي تلمع باهتمام ,, وعوارضه اللي طولت شوي بس زايد حلاهم

22-02-2010, 07:08 PM

..... لما حس انها صحت , مد يده لخدها : صحيتي ؟

...... : كيف عرفت ؟

......: حسيت فيك تفتحين عيونك , نادية انتي اخذتي الدوا قبل ماتنامين

.... تفكر : لا ,, تصدق ,, نسيت

..... بعصبية خفيفة : وانا اقول مانزلت حرارتك ليه

...... : خلاص باخذه الحين , بس بقوم اتروّش يمكن اتنشط (ولما قامت بتروح الحمام ,,, وقف سالم وصار يمشي وراها )

ناديه : وش فيك ؟

.... : اخاف تطيحين مثل المره الماضيه , وماأكون بجمبك امسكك , وتطيحين على شي حاد او أي شي

ابتسمت بحب , ودخلت الحمام

طلع سالم للصاله وجلس شوي مع امه , لما دخلت امه المطبخ رجع للغرفه , كانت ناديه توها طالعه ومبدله ملابسها

وقف في وجهها ولمس رقبتها : إيه كأنه الحين خفت الحراره؟

..... : أي احس شوي

..... : وين دواك ؟

.... مسكت يدينه بيديها الثنتين : سالم حبيبي , انت ليه نعسان مانمت زين امس ؟

...... : هاه ؟ بلى نمت بعد الفجر وصحيت 9

..... : مايكفي

..... : الا يكفي , وين دواك ماقلتي لي , شكلي لو بتركك على كيفك مارح تاخذينه

.... : سالم ,,سالم ياقلبي ترا كلها حراره انت ليه شايل هم

يمسك يديها اللي على رقبته : كذا , اخاف عليك من أي شي

..... : اممممم , عشان كذا مانمت الا متأخر وصحيت بدري ؟ وجالس بس كل همك انا وجبهتي والفوطه

يهز سالم راسه ببراءة

..... : عارف , حسيت اني طفله صغيره , والله ياسالم كثير علي اهتمامك هذا

…… : تتكلمين وكأنك تركتيني وماوقفتي جمبي ايام الحادث

…… : ايه بس مابي اتعبك معاي هذي كلها حراره وان شاء الله بتخف

.... : اششششش , لاتقولين كذا , هذا شي ينبع من حبي لك ,, بس انتي يزعجك اهتمامي ؟

..... : ابداً

..... : اجل الله يعينك , ماقلتي لي وش تبين تفطرين ؟

…… بدلع : عادي اي شي

….. امي في المطبخ بروح اساعدها , ندو ياويلك تقومين من السرير

….. : احب هالاسم , ويصير احلى اذا انت ناديتني فيه

….. : ياحظي

(ويمشي سالم عنها ,, ابتسمت ونادته وهو واقف عند الباب )

….. : سالم

….. : لبــــــــــــــــــــــيه

…(ترمي له بوسه ) : شكرا

….. يبتسم بقهر : ليه يعني مستخسرتها فيني , قولي تعال يمي وحطيها على خدي مو ترمينها في الهواء تضيع طريقها

…. تضحك : ههههه يقطع بليسك سالم انا امك ماحبها على راسها خايفه اعديها من الفايروس

يقول وهو ساند يده على الباب وبأكبر ابتسامه : ماعندي مانع تعديني , ابدا ماعندي مانع

…… : ساااالم جوعااااااااانه يللا وين الفطور

< يضحك ويروح المطبخ
(غـــــــــــــــــلا روحي )

يارب لك الحمد ولك الشكر على كل حال ,, يارب ,, تشفي سالم ,, وترجع له بصره ,, يارب ياقادر ياكريم ...يارب تخليه لي ولاتحرمني منه ..

سبحان الله , احس حبي لسالم كل يوم عن يوم يزيد ,, صايرة اتعلق فيه اكثر ,,احتاجه اكثر ,, وافقده اكثر ..

انا انكسرت ,, لما ناديته قبل شوي ,, وردّ : لبيه ..

ماكان يرد علي كذا ,, كنت اذا ناديته : سالم ..

يقول : عيونــــــــــه ..!

مره ناديته بعد الحادث بفترة ,, وقال (عيونه ) .,, سكت فتره ورجع قال : طيب قلبه , روحه ينفع ؟

أحس اني صايره قويه واواجه تعليقات الناس علي,, بس والله غصب علي , أحيان اضعف , مثل المره اللي كنت لابسه فيها وكاشخه ,, مدحتني سلمى أخته , يمكن كانت تفكر ان جملتها عاديه ,, بس والله اثرت فيني ..

(نادية طالعه غير اليوم , مسكين سالم كل هذا مخبى عنه ..! ليته يقدر يشوفك ..!)

لأ ,,, لأ مايهمني يشوفني , كثر مايهمني انه يحبني وشايلني في عيونه حتى من بعد مافقد نظرهم ,, مستحيل اقدر اتخيل دنيتي بدونه

(ولأن هذا الاسبوع الأخير قبل الامتحانات , الكل انشغل .. ابو اصيل مارد على ضاوي لأن هنوف ماردت عليه .. )

< شكل الموضوع بيطول

ضاوي اللي كان قاعد مع بندر في الشقه يتعشون هوت دوغ : يلعن ابو الفقر اللي تعانون منه وش ذا الثلاجه الفاضيه ؟

بندر بابتسامه : حنّا مانتغدى ونتعشى هنا , كل يوم بيت احد , مره عند امي مره ابوي ومره جدتي , واذا اشتهينا ياكثرها هالمطاعم

..... : ابوها من عيشه ياشيخ

..... : شفت شلون ؟

..... : انزين انا بطلع وانت ذاكر عشان تجيب الأول على الفصل طيب ؟

..... يضحك : طيب

اما عبد الملك ,, فكان مار يسلم على جدته , وقف سيارته الفولفو عند البيت , ولفت انتباهه ابو ياسر الي كان واقف عند باب الفيلا , ابتسم وراح يسلم عليه

..... : هلا والله , انت عبد الملك صح ؟

..... : ايه , كيف حالك ابو ياسر , ماشاء الله نقلتوا , عالبركه

..... : الله يبارك فيك تسلم

..... وبعدها بكم سالفه قال عبد الملك بذوق : لازم تشرفونا مره انت والاهل على العشاء

..... : لا أبد حنا الي ساكنين وانتم اللي تجونا

..... :يا أبو ياسر توّكم ساكنين واكيد ما أكتمل اثاثكم ومانبي نضيق عليكم , معليه هالمره علينا , وبعدين ترى خالي راشد اكيد بيزعل , من يومها وهو ينتظر يوم نقلتكم , وتعب وهو يسولف للوالده عنكم

..... : راشد خالك ؟ ظنيته اخوك ؟

..... : هههههه لا خالي , ليه أنا اشبهه ؟

..... : لا والله بس حسيتك من اهل البيت دايم اشوفك (قصده ان قريب حيل من طيبه وراشد كأنه اخوه )

دخل عبد الملك بابتسامه ويسلم على جدته وخاله ,,

يجلس على الكنبه جمب راشد ويلتفت على التلفزيون : يمه وشفيه التلفزيون يشوّش ؟

.... تسوي نفسها زعلانه : مدري صار لي ساعتين اقول له يقوم يشوف الدش في السطح مو راضي , من جلس وهو ياكل

..... : افا ياخالي ,, الله يهديك , كذا طيبه تهون عليك ؟

..... : لا ماتهون بس وشهوله اقوم اصلح لها وانت يا أخ (متعدد الاستخدامات) بتجي ؟

..... : دمك خفيف انتبه لاتطير

..... طيبه : وشسوي ماعندي احد يصلح لي اياه

يبتسم عبد الملك : تحبين تلمّحين , قولي ياعبد الملك انقلع فوق وصلّحه وانا أقول سمعاً وطاعه

..... : لا والله اني مستحيتن منك ماغير مشغلتك معاي

.... : لأه يمّه ماتئوليش كده , مايصحش ,, الله !

.... تضحك : الله يخليك لي

.. راشد : ليه كذا ارمي لي دعوه لو تصقع في كتفي بس مو تسفهيني بالمره ..!

..... : لأ مافيه ,, لين تتسنع وتساعد امك ادعي لك

.... عبد الملك وهو رافع ثوبه يرقى الدرج : شكلها بتبطي مهي داعيتلك , لين تصير رايقة لك

..... : شف شغلك وانت ساكت ..

فتح عبد الملك باب السطح وهبّت عليه نسمة هوا سحبها لصدره ,, طلّ من فوق للشارع وضحك على نفسه .. (والله لو يشوفك احد يصورك ومن بكره وانت في البلوتوث عملية انتحاريه ) ..

يووووه الشوارع اللي بين البيوت صغيييره يادوب تمر فيها سياره وحده ,, ومن هنا صايره اصغر ..

(كان في السطح جهه مرتفعه شوي ,, والدش مركب عليها ,, رقى عبد الملك فوقها وصار يطالع الدش من كل الجهات يحاول يستكشف الخلل من وين .. )

كان الليل هادي ,, غريبه على مثل هذا اليوم .. مافيه ازعاج ولا حتى اصوات ناس تلعب في الشارع

هدوء ,, سكون ,, صمت شاحب

لا رفيق ,, لا صديق .. لاصوت صاحب

مدري لوين راحوا الناس

يم الوفا .. أو يم الاحساس ..

(الاغنيه لعبد المجيد)

نسى عبد الملك بقية مقاطع الاغنية .. فسكت مع انه كان يرددها في راسه وفجأه ,, حس عبد الملك بصوت خفيف ,, وبعيد شوي

..... : تصدقين ,, الجو رايق .. مدري ليه عندي احساس ان النجوم تتحرك , تولع وتطفي .. حتى القمر شكله اليوم جنان , .... ههههههه ايه عاد انا خربت الجو بازعاجي ,, حتى السوالف على أعلى مستوى رنين ,,

واختفى الصوت فجأه

< صاحبة الصوت استوعبت انها كانت في السطح وخافت صوتها يعلى زياده ويسمعها أي احد .. فدخلت داخل

ابتسم عبد الملك ,, واستوعب ان البنت حست ودخلت داخل ,, ورجع يكمل شغله ,,

يمكن كان بيت الجده طيبه هو اكثر بيت يتواجد فيه عبد الملك ,, الأخ بندر مايعرف يذاكر الا بصوت عالي , وضاوي متواجد 24 ساعه عندهم .. وعبد الملك على عكسه ,, فكان يروح عند جدته (يحسها اقرب له من امه وابوه ) ويجلس في غرفة خاله راشد (صح هو تزوج وطلع في شقه بس مازالت غرفته موجوده)

يوم الاثنين ,, كان عبد الملك في الجامعه ,, واقف عند طاوله صغيره يحرك كوب النسكافيه ويكب عليه السكر
ترك الكوب علشان يرد على جواله

..... طيبه : هلا يمه وشلون امتحانك ؟

..... : تمام , الحمد لله هذا مسك الختام

..... : اييييييييه زين زين الحمد لله , ان شاء الله تتخرج صدق وتجيب شهادة البكا .. البكالورين مدري وشهي

يضحك على جدته ويشيل الكوب ويجلس على اقرب طاوله : ياحلوك يمه وانتي مسوّيه فاهمه , هاه؟ ايه ان شاء الله ترى انا جايّك بعد شوي ناقصك شي ؟ ,, بسلم عليك وبعدها بروح الشقه واحتمال انام يومين اعوض نوم الامتحانات

..... : استغفر ربك , والصلاه ؟

.....: ايه يمه اكيد بقوم اصلي وبعدها برجع انام في سلام

.... : اشوى ,

(يسكر منها وهو يبتسم ,, والله حتى امي وهي امي مو حافظه اوقات امتحاناتي )

سلم على اخوياه وركب السياره ,, ودقايق الا هو عند بيت جدته ,, طفى السياره لكنه مانزل منها ,, لأنه كان حاط قصيده وماحب يطفيها , يبي يسمعها لآخرها

وصلت ولاء من الجامعه ,, (صايره تخاف ان ابوها يوصلها فأبوهم جاب سواق , لكن توه جديد ومتخلف , نزل البنت وراح لأبو ياسر في المستشفى اللي هو يشتغل فيه )

وقفت دقيقتين تحوس في شنطتها ,, وين المفتاح ؟ ولاء والله مالك داعي تنسينه اليوم اكيد امك نايمه , احسن تستاهلين وبتوقفين الحين في الحر لين تصحى امك من صوت الجرس ..

ورينا شطارتك واحرقي الجرس

ودقت الجرس ,, دقيقتين , ثلاثه محد يرد ...

وقفت خمس دقايق محد رد عليها

طلعت جوالها من الشنطه ,, طافي ,, من زود الغباء بالذات اليوم انسى اشحنه ..! ,,

سبت نفسها مليون مره على تخلفها وغباءها وحظها الشين الساعه 1 الا ربع يعني الشمس في نص السماء فوق راسها وهي ناسية المفتاح وناسيه تشحن جوالها قبل ماتطلع وشكل البيت مافيه احد , خلاص العبره وصلت في حلقها ودها تصيح , توهم جديدين ومايعرفون احد في الحي ,, غير بيت طيبه , وحتى هي كانت تعبانه يوم امها راحت تزورهم فما قد دخلت البيت ,, وغير كذا هي تستحي مستحيل تروح وتدق الباب

خافت اكثر لما سمعت صوت سياره تمشي وراها ,, وبعدين توقف وتطفي ماكينتها ,, ماقدرت تلتفت وظلت مصلّبه في مكانها

22-02-2010, 07:29 PM

وقف راشد سيارته وطلع منها في هدوء ,, راح لسيارة عبد الملك وفتح الباب اللي جمبه ودخل

عبد الملك : وجع والله افزعتني

..... : بسم الله عليك ,, وش عندك موقف مانزلت ؟

.... : ابي اكمل القصيده , بس تدري شكل مالي حظ فيها , بطفّيها وبعدين اروق عليها

.... : ايه طفها انا ما أحب القصايد ,, شوف (ويطلع من جيبه ورقه) حلو هذا العطر ؟

يشمه عبد الملك : حلو , بس ما كأنه خفيف؟ , ريحته كأنه نسائي

......: ايه هو نسائي بس عاجبني واشتريته , لاتعترض لا أكفخك

...... : والله ظنيتك شاريه للمدام

..... : لا لي أنا

..... : طيب طيب عليك بالعافيه

(يلتفت راشد على وراه )

... : عبد الملك هذول مو اهل ابو ياسر ؟

... يلتفت : اظن , بلى هذا بيته

...... : ترا هالبنت من اول ماوصلت وهي واقفه , شكل بيتهم فاضي مافيه احد

يلبس عبد الملك نظارته الشمسيه ويصلح شماغه : الله يستر عليها وش علينا منها ,,

راشد بأسى : حرام والله وش بيقول عنا ابو ياسر .. عبد الملك قوم قول لها تجي بيتنا وتكلم على اهلها شكل ماعندها جوال

..... : لا ياشيخ روح انت

..... : الحين بيوصله ابو ياسر خبر اننا موجودين وماتصرفنا , اكيد البنت شافتنا

..... : يوووه ياخالي تبي تروح روح انت ,, انا ماحب المواقف هذي وماعرف اتصرف فيها

يسكت راشد ويلتفت عبد الملك على بيت ابو ياسر ويشوف وحده معطتهم ظهرها , وحاطه شنطتها عند الباب ,, ولابسه عباية راس .. شكلها كبيره مو بنت صغيره ,, والاهم شكلها طفشانه ..

< شكلها ينرحم

عبد الملك باستسلام : أروح معك بس انت اللي تتكلم ..!

(ننتقل من هذا الحي ,, الى الحي اللي فيه بيت ابو ضاوي ,,

ضاوي وهو ماسك راسه : نايف ,, لا لا ما صدق ,, انتي متأكده نايف ؟

امه : ايه ياولدي ابوها يقول انها مسمّيه له وان كانك تبيها روح له وترخص منه

ضاوي باندهاش وهو مو مصدق : من متى وهي مسميه له انا اول مره اسمع بهالشي ,, لا مايصير ,, مايصير

.... : يصير عاد ولا مايصير ,, ابوك عصب على عمك وطلع من الصبح ,, كله عشانك وآخرتها تطلع مخطوبه

...... : طيب يمه علميني وش اسوي الحين . ؟

..... بأسلوب مقنع : مافيها شي ,, رح لنايف واطلبه ,, وخله يقول لك تمّ قبل لاتتكلم , وساعتها لاطلبت منّه مارح يردك .

...... : مدري يمه , احس ماله داعي هالاسلوب , يعني من حقه لو هو طلبها أول وهو اكبر مني , انا اللي مفروض آكل تبن

..... : لا , من حقك انت بعد , مافيها شي انت ليه شايل هم اسلوبك ؟ بكيفه اهم شي انت تاخذ اللي تبي

..... بتردد : تشوفين كذا يمه ؟

..... باصرار : ايه اشوف ,, والافضل انك تروح له وهو عنده ناس عشان تحرجه معهم ,, (وتقول باستهزاء ) وبعدين هالنايف اللي مسوي نفسه مايرد احد ويخدم الكل مارح يحرج نفسه قدام مجلس كامل ويرد واحد من قرايبه

...... : طيب يمه الحين الوقت ظهر اذا قرب المغرب اروح له

.... : ايه صح الحين مايكون عنده احد ,, اصبر شوي اجل

راح ضاوي لغرفته وهو يفكر ويحس راسه بينفجر من التفكير , مو قادر يصبر وده الحين يروح لنايف ويتفاهم معاه , يبغى الوقت يعدي بأي طريقه ..

كل ماجات في باله صورة هنوف ,, تسمحها صورة نايف ..!

نايف .. كان جالس على السفره مع اهله .. وكانت نادية جايه تتغدى عندهم ,,

الجو كان هادي ,, الا من اعتدال اللي كانت تسولف مع ناديه شوي بين فترة والثانيه .. ابو نايف يرسل له نظرات ,, يقصد فيها انه يفاتح امه بالموضوع طالما ان نادية موجوده

نايف : يمه , ابوي يقول انه يبي يتزوج

شرقت اعتدال في عصيرها وانتفضت : وششششششششششششششششششو ؟

دخلوا نايف وناديه في نوبة من الضحك , قال ابو نايف : وهقتنا مع الحرمه ليه تعلمها انا ناوي بالسرّ

تضربه اعتدال على كتفه: بعد هالعشره .. ؟

يضحك ابو نايف : لا تخافين والله ما أسويها ,, احد عنده اعتدال ويدور غيرها .. (ويوطي صوته ) بس هذا ولدك بيتزوج ومستحي يقول لك

لمعت عيونها وقالت بفرح : صدق ؟ نايف لاتستهبل قولي لي والله جد تبي تتزوج ؟

.. يبتسم باحراج : انتي مادريتي وش القصه ؟

..... : وشو ؟

(ويقول لهم ابو نايف سالفته مع ابو اصيل لما كانت هنوف صغيره )

... ناديه باستغراب : طيب كيف محد درى ؟

..... : بيني وبين الرجّال وشهوله نكبر الموضوع ويمكن مايتوفقون ونظلمهم ؟

اعتدال وهي تطالع ولدها وتسأل سؤال هي عارفه اجابته : اصلا انت تبي هنوف حتى قبل لاتدري بهالسالفه صح ؟

ينحرج ويطلع الأكل بالملعقه برا الصحن بارتباك : لا .. مين قال ..

..... : انا اقوله , شف الله يعافيك وجهك من ينجاب طاريها عندك

..... ينحرج نايف ويسكت .. ويضحك عليه ابوه : هاه ؟ نكلم ابوها ؟

.... اعتدال : ايه خير البر عاجله

..... : لا ,, يعني .. مو الحين .. مدري

يلتفت ابو نايف على زوجته ويقول بتعقل : طيب يمكن الولد شايفها وما أعجبته ؟

يرتبك نايف ويخبط بيده كاس العصير وينكب على السجاده : لا... والله العظيم اني ماقد شفتها حتى بالغلط .. ماعرف شكلها الا يوم كانت صغيره

تكتم نادية ضحكتها على لخبطة نايف , وتقول اعتدال لولدها : انت ليه مو على بعضك ؟ خلاص نكلم امها ونخليك تشوفها ..

.....وهو يشبك اصابعه : يمه انا ماطلبت اشوفها مايحتاج .. انا ,, مو قصدي اني مابي .. انا

تضحك اعتدال : اول مره اشوف الولد مستحي كذا ..

ابو نايف يضحك : خلاص فهمنا (ويلتفت على اعتدال ) أي والله صدقتي شكله وهو مستحي غير ,, قومي كلمي اختك بس شوفي وش رايها بس لاتقولون للبنت , و ان شاء الله اذا جا ابوها من السفر يوم الاربعاء بكلمه

ابتسم نايف وحاول يكمل اكله لكن الملعقه توقف في نص الطريق وماتكمل , وغير كذا الصحن فضى لأن محتوياته كلها صارت في السفره ..

لما شاف ابوه قام , قام هو وراح غرفته وعطى ناديه اخته نظره بأنها تلحقه ..

دخلت نادية بأكبر ابتسامه .. وجلست على الكرسي الدوار .. تنتظره يتكلم

نايف : انتي اكثر وحده يهمني رايها

.....: امممم رايي في ايش ؟

.....: في وشو يعني في السالفة اللي قبل شوي

..... بمرح تسحب منه الكلام : تبي رايي في فكرة الزواج ولا فكرة الزواج من هنوف , ولا تبي رايي في هنوف ؟

..... : سمي بالله و عطينا كل اللي عندك

..... سحب كرسي المكتبه الثاني وجلس قبالها : قولي

...... : وشو كذا ماعرف انت أسالني وانا اجاوبك بس كذا ماعرف اقول ..!

...... حك راسه شوي وعض شفايفه بخفيف : بصراحه .. اشوف امي مبسوطه حيل وابوي عاجبه الموضوع وخاصة انها هنوف أحس لو غيرها كان ترددوا , بس انتي تحسينا نليق لبعض مثلا يعني .. ولا الناس بيقولون وش جاب لجاب مثلا , او مايصلحون لبعض ,, مدري

..... تبتسم : اصلا حتى انا كنت ادعي لك انك اذا فكرت تتزوج , تاخذ هنوف

..... ارتاح شوي : مشكله بعد هالسالفه اللي طلعوا لنا فيها انها مسمّيه لي

..... بنبره هاديه وحنونه : نايف مو انت تبيها ؟ وش يفرق معك لو كانت مسمّية لك من قبل او توّك الحين تبيها ؟

..... : .....

..... : وبعدين هي مارح تلاقي احسن منك

...... : واثقه انها بتوافق !

..... : مدري , نايف انت تدري هنوف قريبه مني حيل والحمد لله ,, بس على كثر الأشياء اللي نسولف فيها ماقد مره جابت طاريك ,, ولا تكلمت فيك .. يعني أتوقع مع بقية البنات عادي بس أنا لا

..... : ليه طيب وشو المانع ؟ تفكّر انك بتقولين لي ؟

..... تعتدل في جلستها : لا مو كذا ,, بس نظرا لتاريخكم , احس انها لو تكلمت يمكن انا اعلقها او اعطيها امل او انظر لها نظره ثانيه ,, او ,, مدري مدري صح اني احترم فيها هالشي بس هالبنت غريبه

يبتسم نايف باعجاب مع انه حس انها ماعادت تحبه : طيب ؟

..... : وشو اللي طيب ؟

...... يحاول يصيغ السؤال : انتي ,, يعني ,, كيف تشوفين هنوف ؟

ابتسمت نادية وقالت تبي تطفّشه : تأخرت على سالم لازم اروح , رجعني البيت

عصب نايف ومسك رقبتها بيده كأنه بيخنقها : والله مو وقتك انتي وسالم تبين تطلّعيني من طوري ؟

تضحك نادية برقه ويسكر نايف باب غرفته ويوقف وراه : لاتنرفزيني ! أنا سألتك سؤال وجاوبيني عليه ,, كيف تشوفين هنوف ؟

...... تجمع اصابع يديها بحركه تهدي اعصابه : مو مهم انا كيف اشوفها , المهم انت كيف تشوفها ..

سكت نايف وعطاها نظره ,, قامت ووقفت عند التسريحه تصلح خصلات شعرها تنتظره يتكلم

..... : ناديه انا ماخذت رايك فيها لأنك أختي بس ,, لأني احسها تشبهلك شوي في الشخصيه , وغير عن كذا انتي ياناديه ماشاء الله عليك مدري وش مسويه في سالم , ماشفت واحد يحب زوجته كثره , قلت تعطينا من خبراتك

استحت ناديه لأن نايف اول مره يقول لها هالكلام وماردت , شافها تلعب و تحرك رجولها في الارض وضحك عليها

..... : يعني تتوقعين هالشي مو واضح عليكم ؟ كل العايله ماعندهم كلام الا ناديه وسالم ,, حتى امي طيبه يقولون انها توصي سلمى تسوي مثلك عشان يحبها خالي , و حتى يوم ارتفعت حرارتك وجيتي بعدها عندنا , زوجك كسر جوالي وهو كل شوي داق يتطمن ويقول لي لاتطلع من البيت عشان لو احتاجت تروح المستشفى توديها ..

قامت ناديه بتطلع لانها انحرجت مره وهي ماتعرف تتكلم وهي مستحيه , خصوصا ان هالكلام قاعد يطلع من اخوها الكبير ..

..... يوقفها : طيب على الأقل قولي لي , هنوف تلبس زي كذا ؟ (ويأشر على ملابس ناديه )

الإهداءات

عـشــانـكـ بـس ..!!

(همســــات قصص وروايات)