عـشــانـكـ بـس ..!!

24-02-2010, 10:50 PM

اليوم .. ملكة ولاء وعبد الملك .. شي ينتظره الكل .. على احر من الجمر ..

بنوقف الساعه على 6 المغرب .. وندور على ابطالنا ..

- بندر وضاوي يدخلون الشقه .. ويضحكون على منظر عبد الملك اللي سرحان ويدور بالصاله .. وباين مرتبك ..
-
ضاوي يبتسم وبيده كرتون بيتزا هت : يللا تراك ماتغديت

بندر هو الثاني : بنراقبك .. تاكل على الاقل ثلاث قطع ..

انصرع عبد الملك : خاف ربك ...

ضحكوا على شكله وتركهم ضاوي رايح للمطبخ لما حس بأنهم بيتكلمون..

بندر بصوت واطي : منتيب صاحيه يامنيره ..

قرب له عبد الملك وبصوت واطي : شسوي .. والله محتاس وأبوها هو اللي طلب مني انها تكون بأقرب وقت يبي يفرح ببنته .. واذا انا مستعد نفسيا مدري شلون بتصرف مع البنت .. وبعدين امي طيبه خوفتني ..

ربت على كتفه : ماعليك من امي طيبه تبالغ , البنت مافيها شي .. هي ماوافقت الا برغبتها مستحيل يغصبها ابوها .. وهو قال لك هالكلام بنفسه ..

تنهد عبد الملك .. وهو يتذكر كلام ابو ياسر .. وكيف ان ولاء كانت رافضه فكرة الزواج نهائيا .. واكيد بسبب مرضها .. والحين الحمد لله ..

.. احساسك وليد اللحظه على قولتهم , كل شي بيكون اوكي ان شاء الله ..

ابتسم عبد الملك وهو يفرك يدينه ببعض : طيب

..... : قدامي يامنيره .. يلااااا !

- سلمى جالسه وعزوز قدامها .. داخله جو تقول له قصه .

امممم , فيه فيل .. وذبانه .. يتسابقون

ضربها عزوز وهو معصب : لأ .. للللللللللللللللأ

انقهرت سلمى : هاااي ليه تضرب ..؟ منتب كفو احد يقول لك قصه

سالم من عند الباب : سلمى الله يهداك .. هذي قصه ؟ ع الاقل قلتي له قصة ليلى والذيب

ضحكت سلمى بغباء : تغيير

ابتسم وجلس جمبها : مارديتي علي , وش اقول للرجال ؟

يقال لها سلمى استحت ونزلت راسها : عادي انا مايفرق معاي اذا انت تبي مو مشكله

بدا سالم يعصب شوي : سلمى هذا زواج ,, واحد خاطبك اقول لك شرايك وتردين هالرد ؟

..... : مدري (وسكتت )

.... دارت عينه على وجهها : يعني موافقه ؟

هزت راسها بإيه .. وابتسم لها سالم وطلع من الغرفه , اما هي راحت لامها علطول

ناديه بنعومه : سلوم شرايك هذا ولا هذا ؟ (وترفع الفستانين لوجهه )

ابتسم سالم وتنهد بحب : الأصفر .. احب هاللون ..

ابتسمت ناديه وعلقت الفستان .. والتفتت تتأمل عزوز وهو بحضن ابوه , وضحكت له ..

عزوز ببراءة ابوه : ماما .. أمّه (عمه) يييع .. لللللللأ

ضحكوا ثنينهم .. فقربت ناديه له وجلست جمبهم : لا عيب حبيبي هذي عمه سلمى حلوه

عصب عزوز واكفهر وجهه الصغير بطريقه مضحكه : للللللأ .. ييييع لألألأ

ضحكت نادية مع سالم .. وهي بزياااااده ماقدرت تمسك نفسها .. استغرب سالم شكلها تذكرت شي ..

....... : من زمان عن هالضحكه الحلوه ..

ضحكت وهي تبعد عنه : تدري .. بقول لك شي بس لاتعصب

ابتسم سالم : قولي

..... : عزوز .. (وتأشر عليه ) راقبه ودقق فيه .. مايذكرك بشي اذا عصب ؟

..... حاول يعرف : امممم لا ..

...... : برئ ,, ونظراته بريئة .. زي ابوه عيونه معبره .. واذا عصب (ضحكت ) اذا عصب يصير سالم الثاني ههههههههههههههههههه سالم مصغر والله العظيم

ضحك سالم وهو يتوعدها : لا ؟ طيب تشوفين شغلك بعدين ..

اخذت ناديه فستانها وتوجهت لغرفة التبديل وهي تضحك

.... : وين ؟

..... : بروح ابدل

ضحك : طيب بدلي هنا عادي ..

بعناد : لا .. مابي .. (وتأشر على عزوز )

..... : آآآخ منك اصبري تجين اليوم , شغلك عندي

راحت بسرعه وهي تضحك ووجهها مولع

- عذبه ..مازال مخها يشتغل .. اخيرا لقت فكره جنونيه .. ! فكره متهوره ..! وخطيره وجريئه بعد .. بس الحين الوقت مو مناسب .. لازم تتزوج روعه عشان تضمن انها ماتعرف وتخرب عليها ,, حتى لو ماكانت ساكنه عندهم .. وبرضوعشان لاصار شي يصير لهم سوا ..!
-
- روعه .. في بيت ابو نايف .. ماسكه احمد وليان .. حاضنه الاثنين بحنان .. هنوف راحت المشغل تغير شوي بتسريحة شعرها وقصته .. ونايف اكيد مشغول .. وحتى اعتدال .. فعرضت هي عليهم انها تمسكهم وتنتبه لهم .. يمكن كذا ترد شوي من جمايلهم عليها .. دق الباب وطل منه ابو نايف باحلى ابتسامه

روعه بنعومه : هلا خالي .. حياك

ابو نايف دخل بهدوء عشان مايصحون التوأم : ناموا ؟

.... ابتسمت : ايه الحمد لله , مايخافون مني

رد لها الابتسامه وجلس جمبها : روعه بنتي .. انتي مرتاحه ؟

ابتسمت وهي تزم شفتها : خالي كل يوم تسألني نفس السؤال .. قلت لك والله مرتاحه بوجودي هنا .. واحسن من بيتنا .. ولولا الله ثم انتم كان انا متعذبه من زمان

قرب ابو نايف لها : طيب .. راشد مكلمني

انتفضت روعه وسكتت .. ماقدرت ترد ..

...... : يبي يتفق معاك .. على كم شي ..

..... : عادي .. انتوا سووا اللي تبون ..

...... بحزم : لا ! مو ناقصك شي عشان احد يتصرف فيك .. !

انحرجت : طيب ..
..... : شوفي هو قد قال لي عن العرس

روعه علطول : لا ,, عرس لا

..... : شفيك ؟ ليه ماتبين ؟

نزلت راسها باحراج وعيونها على اللي بيدها : خالي .. افهموني .. تخيل شكلي انزفّ بكرسيي ..

سكت ابو نايف لما حس ان هالشي بيجرحها وهي ضعيفه ,, قلبها مو قوي يتحمل كلام الناس وتعليقاتهم . وماتبي تحس بالشفقه من احد

انتبه لها تصيح فقام لها رفع راسها له : خلاص روعه .. اللي تبينه يصير , اكلم راشد بكره ان شاء الله واقول له

..... : ......

..... : روعه ,, خلاص.. لاتصيحين طيب ؟

ابتسمت وهي تمسح دموعها برقه , ورد لها الابتسامه .. ومشى للباب بيطلع

.... بصوت مبحوح : خالي

انتبه لها ولف جسمه ناحيتها .. قبل ما يسأل شافها منزله راسها ...

.... : خالي .. انا احبك , احبكم كلكم

ظل واقف بمكانه .. ومبتسم من براءة كلمتها ومشاعرها .. وقرب لها .. باسها على جبينها : واحنا كلنا نحبك

الهنوف وصلت من المشغل .. راحت تفتح شعرها وتنفضه في الهواء بحيويه .. بعد ماقصته وصبغته .. تغير شكلها وعطاها ستايل حلو

دخل نايف وصفر : اشوى انك زوجتي

ضحكت وهي تلفح شعرها بدلع : حلووو صح ؟ اشوى كنت خايفه ماتضبطه لي ..

ابتسم لها بحب : احنا مو قادرين عليك .. وانتي كل يوم تعذبيننا زياده , والحين تصبغ لي هالشعر وتبيني ما انهبل

ضحكت هنوف وهي تميل راسها بدلع : بسم الله عليك .. لاتنهبل .. بس ..غني لي

..... ضحك وعطلول جات في باله هالاغنيه : عارفه احلى حاجه فيكي إيه .. بتحلّي أي شيء عي***ي تجي فيه .. قمر ده إيه اللي تتساوي بيـــــــــــــــــــه .. تعالي أقول لك احلى حاجه فيكي إيه .. ولا انتي فاهمه قصدي واللي بالي فيه ..

- ولاء : شوفي وقسم بالله لو تضحكين مره ثانيه بتطلعين برا وكلكم وياها

بنت خالتها : ههههههههه شسوي شكلج يموت ضحك وانتي تحوطين بالغرفه

..... : اقول قوموا مو ناقصتهم كفايه اني خايفه ,, وهذيك الشي اللي اسمها كوافيره مدري وشو مابعد تبدا بمكياجي .. , اقول .. قوموا قوموا طلعوا برا

....شهقت : نهون عليج واحنا متعنين من الدمام عشانج اليوم ؟

...... زفرت : لا ماتهونون ,, بس بصراحه انتي بالذات زدتي قلقي وتوتري .. بس تطلين في وجهي وشلون شعورج وش تحسين فيه .. وكل ماسويت حركه ضحكتي .. والمشكله (تلتفت على بنات خالتها ) حماره كل شوي تذكرني بعبد الملك وبفشلتي الاخيره قدامه ..

..... : لا انتي مو فاهمه , بهالطريقه اخليج اوكي وبتحسين ان كل شي طبيعي ..

...... قالت بوجه معصب : شوفي .. لانخسر بعض اوكيه ؟

ضحكت وراحت تهج عند البنات : اوكييييييييييييييييييييييي

- روان بعناد : بروح
-
امها : مو على كيفك منتيب رايحه

روان بعصبيه وبدت تنقهر : ماما حرام عليك ملكة اخوي وابي اروح ومافيها شي

.... : لا , فيها .. هذا اللي انا خايفه منه انك تتعلقين فيهم , بس شسوي في أبوك يعاندني وياخذك لهم من وراي ..
..... : ماما ,, اخواني هذول

..... : قلت لك لا .. يعني لا ..

انقهرت روان .. واول ماطلعت امها من الغرفه اتصلت ببندر وهي كاتمه صيحتها : الو بندر

بندر بضحكه : يااهلا .. شخبارك روان ؟ (وانتبه لصوتها ) ليه ضايقه فيك شي ؟

..... : بندر امي مو راضيه اجي ملكة عبد الملك اليوم

..... : شنهو ! مو على كيفها .. انتي عندك ملابس ؟

..... وسط صياحها : عندي .. ويمديني ارتب نفسي بس هي مو راضيه

...... زفر : لاحووول , وابوي شقال ؟

..... : ماكلمته بس هو طالع اكيد مشغول مع ترتيبات الملكه

طالع بندر ساعته : الساعه 8 تكونين جاهزه , بمر عليك واخذك

خافت روان من ردة فعل امها : وامي ؟

..... : روان , امك لو درت اقل شي بتسويه وشو ؟ تضربك مثلا

..... ارتبكت : مدري .. بس بتتخانق مع بابا , لكن ضرب هي ماتضربنا ابد ..

..... : شوفي , بنقول لها ابوك مايدري .. وان كانها تقدر تطلع الشارع وراي .. تجي تتهاوش معاي انا ..

سكتت ,, فكمل بندر : يللا روحي البسي لاتتأخرين ,, ترا امشي واخليك ..!

ضحكت : طيب , شكرا

وراحت تررركض تتجهز

الاستراحه مليانه .. والجو حلو .. والكل حضر هالمناسبة الحلوه .. الليله قمرا .. والهوا يهب بهدوء حلو ..
هنوف دخلت الغرفه اللي فيها ولاء , وقالت بسخريه : اخبار (العانسه ولاء .. المحترمه ؟ )

ضحكت ولاء وقالت وصبعها يهدد هنوف : كل شي من ورا ولد خالتج هذا .. يمه يمه .. ويمه بعد .. يازين العنوسه

........ : ههههههههه تراه مايعض .. يللا انزلي

انصرعت ولاء ورجعت ورا : انزل وين ؟

.... : البقاله ,, وين يعني .. يللا ملوكي وصل

ارتجفت : لاتقولين اسمه طيب ؟ لاتقولين ..

ضحكت عليها .. ونزلت على طق رايق شوي .. وهادي بنفس الوقت .. وبكل ارتباك جلست بين الحريم .. ونظرات الكل تتفحصها , كانت جذابه بفستانها العنابي الطويل .. وشعرها الاسود اللي يفرض مفسه .. صح مافيه غير بيت طيبه , وبيتهم يعني بنات خالاتها .. بس ولو الموقف يربك ..

ابتسمت لما تذكرت انهم قبل ساعه .. جابوا لها الدفتر توقع .. طيحت القلم خمس مرات تقريبا .. لين اخر شي وقعت ..

< مابغينا .. !

اشتغلت الاغاني وقاموا البنات رقص على انواعه .. هي ماكانت تدري ان هاليوم بيجي , هي رافضته بكل جوارحها .. هالمره هي اللي تعيش هالموقف .. مع انها كل ماحلمت بهاليوم .. تنفض راسها وكأنه فعلا حلم ,, ماتبي تتخيل اصلا ..!

..... عصبت برجفه : هنوف لأ والله ترا بقوم وبطلع

ضحكت : يالخبله بيلبّسك قدامهم شفيها ؟ نبي نصوركم

...... ارتبكت : قدام هالشعب كله ؟ حتى البزارين والشغالات ؟ معليييييييييش لأ

.... : تبين يعني انتي وياه لحالكم مثلا ؟

انفجعت زياده : لا والله ؟ خلاص ماله داعي بس هو وانا وماما ..وامج وامه طيبه .. ماله داعي كل الناس تتفرج

..... ماعرفت تتصرف : كيفك والله امي طيبه مارح تخليك

..... : احسن بقوم الحين وافشلكم

..... رصت على يدها : اجلسي خلاص بكلم امي اشوف

مشت الهنوف من عند ولاء وهي تراقبها .. شوي رجعت وهي تهز راسها يعني مافي فايده منكم : حتى عبد الملك يقول محنا تلفزيون .. مالت عليكم ثنينكم

ابتسمت بانتصار ... : هذا اللي بقى بعد

مشوها للغرفه الثانيه .. وجلست بكل ربكه .. الحين عبد الملك بيدخل .. ياسلاام .. ! عساني ما أصيح بس .. !

ظلت منزله راسها وكأن الجاذبيه تجذبه لحاله لتحت .. يللا يادقايق مري بسرعه .. يللا يالحظات اركضي وخلي كل شي يخلص ..!

ماحست الا بزغاريط قويه ولولولولولوليييييييش , اكيد دخل .. اكيد ..!

ماقدرت ترفع راسها .. بس انتبهت لثوب يتحرك .. ويوقف قدامها .. وبوحده تهمس في اذنها : ارفعي راسك

تلقائيا رفعت راسها .. وشافته يبتسم وباين مستحي .. وحاولت تبتسم بس ماتدري هل طلعت ابتسامه منها او لا ..

طيبه في اذن عبد الملك : وجع ماتستحي انت .. سلم على البنت ..

24-02-2010, 10:51 PM

ابتسم عبد الملك لما عجبته حركتها .. ودق قلبه بقوه وهو يراقبها لأول مره يشوفها زين .. زي البزر مشت عليها .. لما حسّت وسبت نفسها على غباءها .. رجعت تضحك .. ورجع يضحك هو معاها

بالمجلس ..

روان وهي تجلس بأنوثه وترفع رجل على رجل : فيه اشاعه تقول انه يصير اخوي

اسيل : ادري اخوك بس يرفع ضغطي .. عمى يقهر مايحسّ ,, الله يعين البنت عليه

عصبت روان وهي تتأمل لبس اسيل .. اللي عباره عن بنطلون جنز غامق .. ومعاه بدي رصاصي لمااع .. وشعرها اللي طال شوي مستشور لبرا .. طبعا مكياج مافيه ..

هذي اسيل .. احسها مختلفه عنهم كلهم ؟ ليه كذا كنها ولد ..؟

قطعت ريهام تفكيرها وهي تسحبها : اررررررقصي يللاااا

روان بخجل : لا ماعرف

..... : خربطي أي شي ..

بعد محاولات قامت روان .. ومابقى احد جالس .. كلن يرقص .. شوي وشافوا ولاء تدخل عليهم وصرخوا كلهم : كلولولولولولولولووييييييييييييييييييييييش الف الصلاة والسلام عليك ياحبيب الله محمد

ولاء في مكانها : بنات امسكوني بطيح ,, خلاص تجمدت مدري احترقت .. مدري مدري

اسيل بسخريه : ليه وش سوا لك ؟

طيبه من وراها تمشي ولاء تبي تجلسها بكرسي بوسطم : من دخلت عليهم وهم يتضحكون الحمد لله والشكر

ضحكت ولاء على نفسها : ياربي شفيكم وقسمن ماعرف وش صار فيني

طيبه بسخريه : ولا مليك ماكني معطته دروس امس ..

ضحك الكل ورجعوا البنات يرقصون

روان لطيبه : يمه بندر مشى ؟

..... : لا قاعد مع الشباب ..

.... : وبابا وينه ؟ بتصل فيه

..... : ماعليك منتي رايحه الحين .. اقعدي وسعي صدرك واذا مشينا اخذناك معانا

..... : لا , اخاف امي تهاوشني .. هي ماتدري اني جيت .. وكلمتني تهاوش ..

طيبه بأمر تمد يدها : دقي عليها وهاتي الجوال ..

خافت روان من ردة فعل امها .. لكنها ماقدرت ترفض طلب طيبه .. فمدت لها الجوال .. خذته طيبه وابتعدت .. وكلها ثواني رجعت ترده لها بعد ماكلمت : بتسهرين مع البنات .. كلنا بنجلس للفجر , الا اذا كنتي انتي ماودك ..؟

قالت بسعاده غااامره : لا والله ابي اجلس

ربتت على كتفها : روحي .. وسعي صدرك

حبت روان على راسها ودخلت فرحانه

اسيل بعد ماطلعوا الحريم للغرفه الثانيه .. راحت وجلست جمب ولاء : بنات ,, حرام خلونا نقول لها

ولاء استغربت : تقولون لي عن ايش .. ؟

اسيل بجديه : عن عبد الملك

ريهام وهنوف : وش فيه وش نقول لها ؟

اسيل بجديه اكبر : شوفوا .. حرام البنت تتزوجه كذا على عماها خلونا نوعيها .. اسمعي ياحبي.. عبد الملك هذا انسان بس جليد .. يعني باختصار مايحس .. اظاهر انك انتي اللي لازم تقدمين على الخطوات كلها .. يعني تتجرأين وتتلصقين فيه ويالله بعد .. لاتتوقعين بيجي يقول لك كلام حلو من نفسه .. طلعي كل شي من نفسك , ولا ترا زواجكم حطي عليه إكس

انصرعت ولاء من هالكلام وتغير وجهها , فردت هنوف بدفاع : لا يختي حرام عليك مو لهالدرجه .. اكيد بيتصرف معانا بطريقه .. ومعاها بطريقه

ريهام : انا بصراحه مع اسيل .. بس يمكن هي تبالغ شوي .. (وتحط عيونها بعيون ولاء ) عبد الملك من عرفناه .. صح وسيع صدر ويحب يستهبل .. بس اذا كان مع ربعه واخوياه .. اما معانا والله ثقيل دم .. ومايعبر ولايعطي اهتمام لأي احد .. هو صح طيوب وحبوب .. بس مدري تحسينه جامد ومو بسهوله يعبر عن مشاعره ..

طبعا ولاء سكتت .. والخوف بان في عيونها .. طريقة كلامهم خوفوها وهي مو ناقصه .. لو هي جريئه كان اوكي مافيه مانع .. بس هي بعد تستحي

روان اللي محد انتبه لوجودها : حرام عليكم .. والله هو يستحي بس ..

التفت الكل لها ..

اسيل : عشانه اخوك بتقولين كذا

روان بدفاع : لا .. صح هو مايشبه بندر وانا ماعرفتهم الامتأخر .. بس انا ما أشوفه كذا .. عادي والله وانتوا شفتوا كيف سلم علي ..

اسيل بعدما سرحت شوي في اسم بندر : انا اصلا يوم شفته يحبك على خدك ماصدقت .. قلت الولد دخله جني

ضحك الكل وسط عصبية روان الخفيفة : بسم الله عليه .. وبعدين حرام عليك .. اصلا من اول مره شافني .. وصورت معاهم ثنينهم وعادي جلست بوسطهم .. وماكشّ مني .. عادي كني من زمان اجلس معاهم

اسيل مصره على رايها وتقول بتحدي: طيب انتي اخته .. مدري بس اتوقع لو مثلا يعني مثلا .. تجين بتضمينه يمكن يدفك مايبي

سكتت روان والكل انتبه لها تقوم , اخيرا تكلمت وهي تصلح فستانها بثقه : لا , ضميته مره وما أبعدني .. بالعكس .. شدني له

سكتوا البنات وهم مصدومين

هنوف وكنها ماتبي تخوف ولاء : ترا والله ماهو قاسي لهالدرجه .. شفتي روان بنفسها قالت لك .. لانها اخته شي طبيعي بيكون حنون معاها .. هو كذا قدام الناس يستحي .. بس اذا مافيه غير ناس شوي عادي

ولاء بلعت غصتها وهي تركز وتحاول تتذكر كل مواقفه معاها : خلاص بنات لاتقولون شي عنه .. (وسكرت اذانها ) من زيني انا عاد والله اني افشّل .. .. خلاص اسكتوووواااا

ابتسمت لها روان ومشت .. وهي مقهوره من البنات ..

ريماس اللي كانت تلعب من بعيد .. جات ولصقت بولاء : ولاء انتي بتتزوجين عبد الملك .. صح ؟

ضحكت باحراج : ايه

لصقت فيها وهي تطالع اسيل وريهام بحقد : طيب ماعليك منهم انا سمعتهم ,, هو ترا مايخوف .. بس بيجلس جمبك

ضحكوا البنات .. واكثرهم هنوف اللي تذكرت يوم تقول لها ريماس نفس الكلام بملكتها

< ياليت كل البزارين هذي فكرتهم .. ولا يحرجوننا بأسألتهم ..

ولاء : خلاص طيب مارح اخاف

اسيل تكش ريماس بيدها : قومي تلايطي يابزر .. قليلة ادب تتسمع بعد .. محد طلبك تجين تدافعين عن عبد الملك من زينك انتي وياه

عصب ريماس وحطت يديها على خصرها : مالك دخل .. اصلا انا احب عبد الملك وهو مايخوف ... (ورجعت تلتفت لولاء ) ذاك اليوووووم انا ضعت في الشارع وهو اللي لقاني .. ماخلاني امشي بروحي قال لي تعالي انا بروح معاك البيت , وقلت له ماتخلي احد يلحقني يخوفني ..؟ قال لي لا انتي اذا صرتي معاي لاتخافين .. بعدين انا مسكت فيه وهو ماقال لي وخري ..

وبعدييييين (وتطالع اسيل بقهر ) يوم كنت بروح لبيتهم (تأشر على ولاء ) رحت اركض وجات سيارتهم كانت بتصدمني بس هو مسكني بقوه عشان ماأتعور وهو اللي طق في الرصيف وتعور مسكين. وجا ابوهم خلاه بالمجلس عشان يشوف ظهره وهو اصلا مارضى يدخل .. بعدين ابوهم قال لازم تدخل .. وانا جلست اصيح عشاني غبيه خليته يتعور .. بعدين هو قال لي خلاص لاتصيحين انا ماتعورت .. آآآآصلا عبد الملك احسن منك تفهمين .. ؟ احسن منك ..

سكتوا كل البنات مصدومين .. ريماس دخلت وسمعت اخر كلامهم ,, وشافت الاعتراض على عبد الملك بوجه اسيل ,, وماقدرت تسكت .. وبعضهم مايدرون عن سالفته الاخيره معاها

هنوف قامت لها بهدوء : خلاص اسكتي لاترفعين صوتك ,, اسيل تمزح ترا ..

اسيل خافت ان الخالات يوصل الكلام فضحكت : هههههههه امزح كلنا نحب عبد الملك .. بس انتي ليه كنتي تصارخين ؟ ترى لو درت امي طيبه انك قلتي هالكلام بتلشطك بعصايتها

خافت ريماس وغطت فمها بيديها .. ورمت لها نظره وطلعت

اسيل بقهر وهي تطالع هنوف : صح اختك ,, بس ماحبها ملقوفه خل تنقلع

ابتسمت هنوف وسكتت .. والتفتت على ولاء اللي باين سرحااااااااااانه في عالم اسمه عبد الملك .. بعد كل كلامهم عنه .. حست انها ربطت شي .. يوم تشوفه بالمجلس وريماس جاتهم تصيح .. كانت هذي السالفه اللي صايره .. !!

اهاااااا .. فهمت ..!

بس مين انت ياعبد الملك .. كل واحد يقول شي عنك ..؟

< ميـــــن انت .. ؟

وشهو احساسك .. ! وش اع*** انا ,, من وسط ناسك ..!

دخلوا بنات خالتها وقطعوا عليها تفكيرها .. وقاموا يكملون رقص ,,

اخيرا انفتح الباب ودخل اصيل بزفره كبيره : اخيـــرا .. ! اخيرا لحقت على هاليوم ..! اخيرا .. الحمد لله ,, الحمد لله .!

هنوف ضحكت : يالله يا أصيل .. قليل ادب تراك اطلع تكفى

اصيل بعناد : مااااانيب ,, امس اترجى امي اقول لها لايتغطون اول اشوفهم كلهم .. واحضر ملكة او عرس ولاء ..

غرق الكل بضحكاته ,, اما بنات خالاتها كانوا بيتغطون بس انتبهوا انه صغير .. ,, وهو مسك عقاله يرقص رقصه الاماراتي الحلو

هنوف تأشر على ولاء : البنت بتموت حرام عليك

ولاء باحراج : ياشيخ والله استحي اطلعععع

تقدم اصيل ومد يده يصافحها : مالي دخل , حالف ارقص بملكتك مثلما رقصت بعرس هنوف ,مبروك .. لأ لأ بصيح والله بصيح .. (وغطى وجهه بشماغه بشكل مضحك ) ..

ضحكت وصافحته ..

نفخ صدره والتفت للبنات : اقول وش رايكم بكشختي اليوم ؟ ها تخطبون لي ؟

ريهام : ههههه نخطب لك بس انت اختار

24-02-2010, 10:52 PM

وقف ودار عليهم كلهم .. وحده وحده .. : يللا بنشوف مين احلى فستان فيكم

وقف اصيل مقابل ريهام يراقب فستانها الاسود الناعم : إيوه ,, ياحركات انتي .. دوري دوري اشوفه من ورا ..

ضربته على ذراعه وضحك رايح لناديه : اشووووف .. اموت ع الأصفر انا .. (وتلفت حولها وضحك لروان ) والليموني بعـــد ..

ناديه دفته : خلاص زودتها ترا,, اطلع ..

..... : لحظه لحظه .. (واشر على اسيل ) ماصبغتي وجهك ليه ؟ أها واثقه بجمالك الطبيعي ؟ (وضحك بسخرية ) ع الألق حطيتي ذيك السمكرا مدري شسمها

ضحك الكل .. اما اسيل قالت بعدم اهتمام : اسمها ماسكار ياحظي .. بعدين مالك شغل عطنا مقفاك

ماعطاها وجه وابتسم : طيب بطلع بس ام التفاحي اللي متخبيه ورا هنوف منهي ؟

هنوف ضحكت : هذي بنت خالة ولاء ..

اصيل يتكتف : اطلعي اشوفك

بعناد : مــــابي استحي .. مابي مابي مابي

ضحك : خبله مثل بنت خالتها ..

ولاء بيدها : يامعوّد اطلع

ريهام : والله لو درى عبد الملك انك دخلت شفتها بيذبحك ذبح .. وبيعلقك هنا بالاستراحه

خاف اصيل وضبط شماغه : لا لا تكفون لاتقولون له .. بطلع خلاااص .. (والتفت لروان ابتسم لها ,, وبعدها صرخ مقهووور ) ليه كلكم اكبر مني ليييييييييييييه ..

لين بدا الكل يرجع بعدما تأخر الوقت .. راحت روان ررركض لولاء .. وهمست لها : عادي لو عندك جوال تعطيني رقمه ..

ابتسمت لها : طبعا عادي ياحلوه , بس انا ما أقدر اطول ع الجوال يضرني .. فعندي خط ثابت بعرفتي .. بعطيك رقمه

فكرت شوي : طيب عادي تستخدمين الكمبيوتر ؟ يعني تحبين المسن اقدر اسولف معاك فيه ؟ لان بصراحه .. يعني (وانكمشت على نفسها متفشله ) احيان امي تتسمع على مكالماتي فما آخذ راحتي ..

ضحك لها : ياحبيبتي بالعكس بنبسط ,, بس هاه ! مو أي كلمه اقولها تروح لعبد الملك ؟

ابتسمت وكن فيه شي براسها : افكر

ضحكت : خلاص طيب .. انتي عطيني ايميلك واضيفك او العكس , عادي اللي تبين ..
ابتسمت روان ولفت بتمشي .. بس رجعت همست لها : ماعليك منهم .. امانه لايضايقك كلامهم طيب ؟

فهمت ولاء ان قصدها كلامهم عن عبد الملك .. فدخلت يدها فشعر روان وحاسته : ماعليج ياعسل انتي ,,

ابتسمت و لبست عبايتها واتصلت في بندر : هلا بندر .. ايه تجي تاخذني لاني اتصل على بابا مايرد ..

بندر : ياهلا ,, ايه يللا اطلعوا عند الباب

ردت بعدما أشرت لها نوره : تقول لك عمتي نوره عادي توصلهم لى طريقك ؟

.... : كم انتوا ؟

.... : بس انا .. وعمتي نوره واسيل

ابتسم بندر بألم غصب عنه : يلا انا برا ..

والتفت على ضاوي : تجي معي ؟

.... : وين ؟

.... : بوصل الاهل بعدين نمر مطعم ونسهر .. في شقتنا يعني لان شكل الاخ ما أكل زين . واذا قعد هنا بينهبل من سرحانه (يقصد عبد الملك )

ضحك ضاوي : مايخالف وصل الاهل اول , اخاف احراج عليهم ..

بجديه : ياشيخ المشوار ثلث ساعه حرام عليك .. ! وبعدين انت جاي معي بلا هبال .. قوم قوم ..

قام ضاوي وطلعوا سوا ..

في السياره .. اسيل بقمة سعادتها .. وبنفس الوقت .. قمة قهرها .. تبي بندر وماتبيه .. بي تكلمه وماتبي تكلمه .. تبي تكون قريبه منه وتبي تبعد بأي طريقه ..

< أبـــــيك لي .. وأبيني لك .. ! وأبي ترحل .. وأجي معك ..!

.. .. وبدون ماتسلم وتنتبه للشخص اللي جالس جمب بندر .. سكرت الباب واعتدلت بجلستها

بندر من المرايه بابتسامه : سلمي ترانا مو يهود

ابتسمت وهي تطالع ضاوي باستغراب وكنها مشبهه عليه : سلام

بندر لف راسه وابتسم : اسيل عادي .. هذا ضاوي ..

يبست اسيل في مكانها .. اما ضاوي ارتبك .. بس قال بدون مايطالعها : هلا اسيل شلونكم ؟

..... : الحــ... الحمد لله ..

نغزتها امها بكوعها لانها حست ان بنتها اشتغلت بالقز ومو حلوه ينتبه لها ..

24-02-2010, 10:53 PM

اخيرا وصلت روان .. وخافت لما شافت ضاوي جالس ,, لكن بندر طل براسه : اركبي ..

فتحت الباب اللي ورا ضاوي وركبت بكل خجل : السلام عليكم

رد الكل عليها , الا ضاوي اللي ماعرف مين هي فرد بصوت واطي .. ومسكوا الخط وبندر مشغل الراديو ويسولف مع ضاوي .. لأنه لو حاول يسولف مع خالته مابتعطيه وجه .. ومايبي روان واسيل يتكلمون قدام ضاوي .. صح مايقدر يوديهم ويرجع لضاوي .. بس عادي لو جمعهم .. مايدري ليه .. بس حس كذا

رفع بندر راسه للمرايه يراقب اسيل اللي صار لها ثواني تكح : فيك شي ؟

هزت راسها بلأ .. وبنفسها تلعن غباءها ..

تستاهلين .. عندك ربو وتدخنين بعد .. !!

بدت كحتها تزيد .. بندرفاهم ليه وهي الفتره الاخيره بس تكح .. فلفّ بالسياره ووقف عند محطه بنزين : اسيل اجيب لك مويه ..؟

ماردت عليه .. اسمها على لسانه عمل صدى في اذانها .. قهرها وخلاها تكح زياده

يسألها يعني مهتم فيها ؟ ولا شلون .. ؟

احتار بندر ووده يضرب اسيل مو وقتها تسكت وتعاند ,, ومسك الباب : بجيب

ضاوي فتح بابه : خلك انا اقرب ..

ونزل .. يمكن كان حاس انه غريب عنهم ,, وخصوصا وجود اسيل الغير متوقع اربكه شوي ..

نوره اول مانزل ضاوي قالت بقهر : وشلون تجيبه معنا احرجت البنت .. شف حتى هو مستحي مننا

بندر لف لها : هو جاي معاي وشلون اروح واخليه .؟ وبعدين اسيل بسم الله عليها مهيب منحرجه ولا شي .. عادي عندها الموضوع

انقهرت اسيل ورمته بنظره , ابتسم لها ببرود , لما وصل ضاوي مد علبة المويه .. وكملوا طريقهم ,,

ولما حس بقسوة نظراتها ,, وعنادها واصرارها كلما طاحت عينه بعينها من المرايه .. دخل سي دي ,, وترك الاغنية تشتغل .. رفع صوتها بندر .. وبنظرات ماقدر يفهمها ويلحظها غير اسيل .. قامت تركز في الكلمات ,, وكل احاسيس غريبه تحاوطها وتطوقها .. وتمر عليه هو الثاني .. تخليه يحط عينه على الشارع ,, وباله مع اغنية زياد برجي ..

أنا قلــــــبي عليكــ ..

مش منكــ خايف لا والله .. أنا خوفي عليكــ ,,

خايف عن قلبكــ تتخلى وأكتر من هيكــ ..

أنا قلــــــبي عليكــ ..

هالقسوه اللي طلت بعيونكــ جاااي من مييين ؟

من دنيا احلوت بعيونكــ مع ناس ثانيين

لكن ماعليكــ ببقى من بعيد بغني ..

أنا قلبي عليكــ ..

مشتاق كثير

مشتاق لحنية قلبكــ صدقني كثير

اكثر من حالي عم حبكــ أكثر بكثير ..

طمــــني عليكــ ..

طمني قلبي عليك يا أسيل .. ليه هالقسوه بعيونك ؟؟ من مين .. !

من دنيا احلوت بعيونك ,, مع ناس ثانيين ,,

احلوت دنيتك معاها ,, وسويتي كل اللي براسك ,, ومحد يدري ,, غيري انا ,, !

لاني غلطان .. لاني كاتم بصدري وماتكلمت .. وانتي ماتبين تريحيني ..

لاني بين نارين .. بنت عمتي .. ورفيقي ..!

تبين دنيتك تحلى زياده ,, وتسودين دنيتي .. مو كفايه كل ما أشوفك .. ودي اخذك لمكان مافيه غير انا وانتي .. ؟

اعاتبك وتعاتبيني .. ! نصارخ على بعض ونلوم بعض ..

قولي انا الغلطان .. قولي انا المذنب ..

قولي ان مالي حق اتحكم فيك ..! قولي مالي حق اراقب تصرفاتك ..

قولي اني مافيه شي يبرر تصرفاتي ..

غير اني احبك .. ! ومابي احد يتكلم عنك .. !

انا غيّرت عشان أحب ..! ماحبيت عشان أغير ..!

قولي مابينت لك هالحب .. لأنك انتي دفنتيه ..

لانك تحاولين تخمدينه بداخلي ,, تخبينه وتقصرين عمره ..

الحب مايقبل ..! يا إما أحب ,, وتحبين .. أو اجرح وتجرحين ..!

ماقدر اني اكون حبيب في بعض أحوال .. أنا أجي كلي .. أو أروح بعزتي كلي .. !

لا يابندر .. !

صح انا بنت عمتك .. بس .. مايحق لك .. مايحق لك تعاتب وتتهمني ..!

انا اللي حبيتك قبل .. !

ولما كسرتني .. حبيت دلع ..

ادري انت ضد فكرة حبي لها ..

لكني حاولت اسد فراغي بها .. وانا اشوف ان هذا مافيه شي ..!

وتعمدت احبها واطيح .. ! ولا ابغى اقوم .. !

مو بكيفك يوم انت حبيت .. جيت .. !

لانك بكلامك .. وبتسلطك , وبعنادك

تخليني اعاند ..!!

تخلي كل ذره فيني كانت تعشقك .. وتهيم بك ..

تكرهك .. !

ضاوي متلثم وتارك راسه للشباك .. بدون مايحاول يهتم بأحد .. مايدري ليه .. ؟

بعد ساعات في الشقه ..

(كش ملكــــ ..!)

بندر قام بكل سعاده يصرخ : كشيته , كشيته , ملك الشطرنج اليوم ماااااااااااااااااااااااااااااااااااااااااات ,, لا لا ماصدق .. اني قدرت اهزمه , شكله ما فكر صح اليوم , طول اللعبه سرحااان .. هههاي كش ملللللللللللللللك

عبد الملك سند ظهره للكنبه وابتسم : هالملك ميت من زمان ..!

بندر غمز له وبصوت واطي : من ايام الورده ها ؟

ضحك : مالك شغل ,, المهم ان الملك طاح , وطاح طيحة شينه ..

..... باستحقار : شفت اني هزمتك بجندي , ! لاحظ جندي .. ابسط واضعف مخلوقات البلاط الشطرنجي

سرح بهيام : حتى الورد .. اضعف مخلوقات البساط الأخضر .. والأنثى اضعف مخلوقات الكــ..

..... قاطعه : اسكت اسكت ,, ترانا مو بالبرنامج لاتتحمس وتتفلسف علينا ..

تنهد : تدري شلون , خلو اللعب لكم , انا بروح اناااااااام

ضاوي وقاصد يحرجه : وييين ,.؟ بدري .. ماسولفت لنا وش صار اليوم ..؟

..... تغير وجهه : خير ,,وش تبون اقول لكم ؟

ضحكوا عليه وكمل بندر: يعني , وش سولفتوا فيه .. ؟

ضحك عبد الملك ودخل غرفته : ولا بسولف ... احلموا ,, بروح اناااام

وكملوها الشباب سهره ........

اما عبد الملك مافارقته ابتسامته ,, حضن الورده بيده بكل رقه .. وضحك على نفسه ,, تركها على السرير وانسدح جمبها .. يطالع السقف .. ويسب نفسه .. ! الحين هو ذاك اليوم قط الميانه معها يوم تجي ببيتهم , والحين ماقدر حتى يتصرف صح .. ليه ؟

ايه .. ذاك اليوم بعبايتها ,, واليوم طالعه تجنن .. ضيعت حواسي ..

< معليه ياجماعه كل واحد احاسيسه على قده ..

في اليوم اللي بعده .. كانت الساعه عشر الصباح ,, الجو حلو .. انتبهت ريهام لهالشي من الهوا اللي يحرك الستاير .. ويدخل ع الغرفه كلها ..

راحت لمكتب سلطان تدوره ,, هو يجلس هناك أغلب الأوقات .. طلت براسها ماشافته واستغربت ..

رفعت شعرها ونزلت تقطع الصاله الواسعه , وبعدها المجلس الفخم .. أخيرا توصل للحديقة الصغيرة .. وتشوفه جالس وسرحان .. وباين مهموم ,, بيده كوب شاهي حليب, وشكله برد وهو ماشرب منه لسى ..

نغزها قلبها .. حست فيه شي .. مو جالس يفكر وبس ..

فضلت تبقى بعيده شوي ,, وتتكلم من هالمسافه اللي بينهم : سلطان ..

........ : .....

..... بصوت اعلى : سلطااااااان

التفت سلطان وشافها , ومر على وجهه شبح ابتسامه ..

قربت وجلست جمبه : شكلك متكدر ..خلنا نتكدر سوا ,,

ابتسم : ريهام ,, يضايقك لو تركنا الرياض ..؟

استغربت ريهام ولمعت عيونها ,, ورمشت بتوتر : ليه ؟

رفع ظهره واستدار لها : ريهام .. عمك , انسان طماع , ومارح يتركني بحالي , يوم يجيني البيت , ويوم يجي الشركة , وأحسه يبي يعرف كل شي عني ,, صدقيني مارح يكتفي باللي عنده ,, وانا بصراحه خايف على نفسي , وخايف عليك ..

وقف سلطان كلامه , لما شاف وجهها تغير ,, وكنها مقهوره او مفتشله من عمها ,, حز في خاطره ,

غصب عنها .. ماقدرت تداري دمعه خانتها ,, يمكن هي تظن نفسها قويه ,, بس شي يقهر ..!

مقهوره منه .. ليه تحس بفشيله قدام زوجها اللي المفروض يكون هو مسؤل عنها ويبنون حياتهم سوا ,, ليه لازم هو يتدخل في كل شي ,, ويحسسها بالاحراج قدام سلطان

مسك سلطان وجهها بيديه : اسمعيني ,, والله مو قصدي اضايقك بس هذي الحقيقة ,, عمك خلاني اخاف ..

دمعت : وين نروح طيب ؟ اهلي كلهم هنا ,, بنات خالاتي ماستغنى عن القعده معاهم , الجامعه صديقاتي هناك مقدر ...

قاطعها سلطان : ششششش اسمعيني وفكري .. , بنروح جدة ,, مو بعيد .. واذا تبين اجيبك هنا كل ويكند .. بس .. خلينا نعيش مرتاحين ..

سكتت ريهام وقامت من مكانها تمشي لداخل .. وهي تسحب رجليها سحب ,, وتركته يتبعها بنظرات كلها الم وندم .. مو ذنبه .. ومو ذنبها ..

< أحيان .. ودك تقطع كل روابطك بالناس اللي مايعجبونك ..!

ودي كذا اجيب خيوط أصفهم قدامي .. واسمي كل واحد باسم احد من الناس اللي اعرفهم .. واللي مايعجبني .. أقصه ..!

راشد : ياشيخ .. ازعاج وربي ماتخلي الواحد يرسم على راحته

محمد : ههههههه هذا جزاي اتطمن عليك وأشيّك .. يللا شد حيلك .. المعرض بعد خمسة ايام ..

ترك راشد لوحته وقام : يوووه لاتذكرني ,, خلني براحتي ..

...... : وشرايك اجل ؟ خير تبي يجي يوم المعرض وانت مارسمت غير كم لوحه ؟

..... : هههههههه لاتخاف .. رسمت اللي يكفي ,, بس حرام عليك سكر .. فيني مشاعر خلني افرغها بالرسمه ..

....... : ههههههههه طيب بسكر , بس بسألك شي .. من زمان بخاطري

..... : قووووول أسأل

..... : راشد ,, انت بتترك شغلك ؟ يعني معد بتشتغل بمعرض العطور معانا ؟

ابتسم : لا , مستحيل ,, من هنا بديت .. ومن هنا عرفتكم .. ماقدر اترك هالشغل لو لقيت شغل غيره ..

..... : الحمد لله , والله ظنيتك بتتخلى عننا ..

ضحك راشد وهو يفتح دولابه يطالع ملابس الشغل , ويسحب لوحه من لوحاته القديمه .. اللي كانت عباره عن بنت من خياله , تمسك عطر من عطور المحل , كان يعجبه حيل .. : لا تخاف , قلت لك مستحيل .. !

< طموحي يملي هالـــــعالم ..! وما بأهل الطموح قيـــــود ..!

24-02-2010, 10:55 PM

زحمه وازعاج .. وناس تبي تسلم .. وناس تضم .. وناس تبارك وتلولش .. هذي توصي وهذي تحذر ..

اخيرا .. تطلع هي من الحشد رافعه فستانها عن الارض بيديها بطريقة أميرية وباقة الورد مازالت مثبته في يدها .. وتمشي جمبه .. بكل خجل يكسيها ويكسيه ..

وماقدرت المصوره تفوت هاللقطه .. اللي تعتبر تعبير عن الخجل .. بس وضح فيها التناقض العجيب بين هيبته وثقله , وابتسامتها العفويه ..

.. ويلتقون عند السياره .. وين ماكان بندر موجود ياخذهم للمطار ..

في مكان ثاني .. عذبة .. مو قادره تصبر .. شالت اللحاف وانسدحت في فراشها تتقلب وتقلّب الفكره في راسها .. بكره ياهم يروحون يزورون خالهم يقال لهم يتصالحون معاه .. او يعزمون نايف وهنوف .. لازم تسوي اللي براسها بأقرب وقت .. هنوف نايف مايظلون مع بعض ..! هي خاربه خاربه ! اهلها يكرهونها اصلا .. يعني بالنهايه مارح تخسر بعض ..

اسماء طلعت من العرس بدري .. رايحه للبيت وكل همها ولدها ... عادته يتحمس للعروس .. وكله نشاط .. هالمره غريب .. الله يستر .. لايكون اللي في بالها .. لا استغفر الله شالتفكير يا أسماء

حركته وخلت وجهه يقابلها : اصيل .. (ولمست جبهته ) كيف الحين احسن ؟

رد بوجه جامد : زيـــ ـــــ ـــن

ماقتنعت اسماء .. الدكتور يقول مافيه شي .. الولد صابته عين ! اكيد ..

من بكره ان شاء الله نوديه لشيخ يقرا عليه

حسبي الله على اللي كان السبب

< مين السبب ؟

وعلى بعد كيلومترات كثيره .. وبعد ثواني اكثر .. تداخلت اصوات احزمة مقاعد الطيارة ... وسط الهدوء اللي كان غالب على رحلة اليوم لتركيا حامله معاها عبد الملك وولاء..

الكل يتجهز ويستعد لللاقلاع .. !...الا قلوبهم اللي أقلعت من زماااااان .. من اول ماشافوا بعض اليوم ..

كانت ساكته .. تراقبه من جمب ويده تمتد للطاوله اللي قدامه يرفعها لمكانها .. ويسند ظهره يعتدل في جلسته .. ماتشوف غير ساعته الفخمه .. ضحكت على نفسها ماتحب تلبس ساعات .. .. بس جا في بالها تعرف كم الوقت و استحت تسأله .. وكل ماحاولت تسرق نظره .. ينزل كم بلوزته يغطي الساعه ...وهو يرفع يده يحركها .. وساعه يمدها ياخذ جريده .. طلعت شياطينها على هالساعه والا تبي تعرف كم مر من الوقت .. ! فيه شي اسمه شاشه قدام يكتبون عليه الوقت .. بس شكلها اعجبتها ساعته السودا ..

اخيرا ابتسم عبد الملك ورفع كمه : الساعه 2 ..

رفعت راسها تستوعب .. حركتها غبيه وهو انتبه واصلا قاصد يحرك يده يضيع طواريها .. اكيد شكلها غبي

نزلت راسها تكتم ضحكتها بدون ماتتكلم , وابتسم هو الثاني يخفي ضحكته من حركتها العفوية ..

مر وقت .. استقرت فيه الطياره بتوازن في الجو .. تحلق بهدوء .. يشبه هدوء ركابها ..
متصورين انها مستحيه تحط راسها بارتياح ؟ عشان ماتنام بدون ماتحس وهو جمبها ؟

مسكين .. ! شكله مو حاس بنفســـه.. الجريده مازالت بيده .. وراسه يميل شوي ناحيتها .. وشكله كنه طفل لعب لعب .. وتعب .. !

ابتسمت .. اخ لو عندها كاميرا كان صورته وطالعت فيه على كيفها .. هي كذا تعودت على انها تحس بالامان عند أي رجل نايم .. لانه لو كان صاحي يسبب لها خوف .. الا اذا كان فيه ناس حولهم .. بهالطريقة تتطمن انها لو صار لها شي فيه احد ممكن يساعدها ..

< اطفال .. كل القلوب أطفـــــــال ..!

تطمنت .. ومدت يدها بهدوء تسحب الجريده منه .. وتطيح يده بهدوء قريب من حضنها .. خلتها تنتفض

نقلت انظارها بين كل شي يخصّه .. يده .. ساعته .. كم بلوزته اللي توها تقدر تشوفها .. شعره الاسود المرتب بلمعة جل .. وجهه .. خشمه .. شنبه ولحيته الصغيره المنتظمه مع قسمات وجهه ..

وش يسمّونها هالحركه ؟ مو سكسوكه كامله بس حلوه عليه ... !

واخيرا تستقر نظراتها على جفونه .. وتذكرها بأنها تغطي عيون هي جزء من سبب ربكتها واحراجها ..

ابتسمت بسعاده وانتصار .. اخيرا قدرت تشوفه على راحتها ..

رجعت راسها لورا تسترجع كل ذكرياتها ومواقفها معاه .. ولان الالم بجسمها .. والتعب وقلة النوم كانوا اقوى منها .. استسلمت هي الثانيه ..

مايدرون كم مر من الوقت .. هي لانها مو حاسه بارتياح كل شوي تفتح وتتطمن ان هي صحت قبل .. وترجع تغفي ..

بعد هالوقت اللي مر .. مرت الطياره بمطبات هوائيه .. كانت خفيفة في البدايه .. بس قدرت ولاء تصحى وتفتح عيونها .. والا بمطبه ثانيه اقوى ... تقرّب راس عبد الملك لكرسيها .. وترجّه ..وتفزعه , وتخليه اخيرا يفتح عيونه الكبار يستوعب .. وماكان فيه غير هي بوجهه .. ضحية نظراته الذبلانه اللي تذوب ..

...... : آآآآآآآآآآآآآآآآآآآآآآآآآآآآ يماااااااااااااه

ارتاع عبد الملك وحرّك يدينه في الهوا يسكتها .. وهي علطول سكرت فمها بيديها مفتشله من نفسها , ومن صراخها اللي التفتوا نص الطياره عليهم يشوفون وش الموضوع ..

لف ظهره لورا .. لوين ماكانوا بقية الركاب وابتسم بخجل منزل راسه ويده على شعره .. يعني عادي ماصار شي ..

ضحك اغلبهم .. وكانوا منوعين عرب واجانب .. كلهم حضروا المشهد الكوميدي اللي صار ..

اما هي مازالت سانده ظهرها للشباك تطالعهم تستوعب ان صرختها كانت عاليه.. ويديها تغطي نص وجهها من الفشيله .. ماتدري تصيح ولا تضحك على نفسها ؟ حرارتها تعدت درجة الغليان ..

واللي زادها انه التفت لها وكبس بعيونه يرمش مرتين .. ويبتسم .. ويرجع يسند ظهره للكرسي ..

وطبعا كل واحد يكلم الثاني في نفسه ..

" فشلتينا "

" شسوي .. ؟ احد يصحى على نظرة عيونك ومايرتاع " ؟

" وانا مختار اصحى أروعك ؟ انتي الله يهديك صراخك جاهز "

" شسوي اكره نفسي انا .. خلاص معد اصارخ بس انت لاتخوفني .. "

نزلت يديها تشبكهم بخجل .. ورجعت تعتدل بنفس وضعية عبد الملك .. وراسها كله للشباك .. مفتششششله منه بقوووووه ..

صحى ابو اصيل لصلاة الفجر متأخر .. وبسرعه طلع يلحق على الصلاه بدون ما يتأكد مين صاحي ومين نايم ..

ريماس بنته مانامت .. طلعت من غرفتها وراحت لغرفة اخوها .. فتحت اللمبة وشافته منسدح على السرير بكل خمول : اصيل .. اصيل ترا اذن الفجر

طالعها ورجع ينقل انظاره لكل مافي الغرفة بدون مايرد

هزته ريماس : اصيل عيب انت كبير قوم صل

...... : مـــ ـــــ ــافيني ........... حيل

عصبت ريماس : عيب تقول كذا ماما تقول لازم نجيب الخلق حق الصلاه .. قوووم (ومسكته من كتفه .. وعلطول تركت يدها ) ..

وبكل استغراب طفولي .. رجعت تلمس جبهته : اووووووووووووف اصيل انت حار

....... : طيـــــ ــــب

رجعت ريماس تلمسه مره ثانيه كنها مو مصدقه ارتفاع درجة حرارته .. و تقوم وترركض لباب غرفة امها وتدق لين تتعب .. اسماء كانت تصلي مو عارفه ترد ..

اخيرا تطلع اسماء بسرعه وجلال الصلاة مازال يغطيها .. وررركض لغرفة الولد

وشافت ريماس شوي وتصيح وهي تسحب اصيل من فانيلته : اصيييييل انت ماتاخذ الدوا ليش ؟

قربت اسماء ولمسته وعلطووول بان الخوف في عيونها .. ريماس انتبهت

...... : اصيل .. اصيل حبيبي اسمعني .. كيف تحس ؟

تحركت يده ببطء تنتقل من طرف السرير اليمين الى اليسار : أحـــــس .. تعــــ ـــــبان ..

خذت اسماء راس ولدها وحطته بحضنها تحاول تهديه : ماعليه تخف ان شاء الله .. ريماس حبيبيتي تعرفين الدوا خافض الحرارة ..؟ روحي جيبيه بسرعه

24-02-2010, 10:58 PM

قامت ريماس منصاعه فيما تكلم اصيل بكل خمول :مــــابي .. دوا .. يمّه .. ابي .. ألعب

أبي ألعب..!

مــابي دوا يمه .. أبي العب ..!

من سمعت كلامه خقتها العبره لكن حاولت ماتبين .. اول مره يتعب عليها احد من العيال بهالطريقة .. مخيفه !

بس ماقدرت تمسك نفسها اكثر .. خاصة لما نزلت عيونها له شافته يصيح بقهر, وبألم بس بدون صوت .. تعبان ومابيده شي ..

اللي صار له سرق منه نشاطه وطفولته اللي لسى ماندفنت .. وسرق حتى جزء من مراهقته وشبابه ..

ضمته لها .. بكل حنان .. بس كان جامد وماتجاوب معاها ..

وبناء على طلب اسماء .. راحت ريماس تركض تجيب مصحف

ومن بكره بيودونه لشيخ يقرا عليه ..

مافي علاج احسن من القران ..

روان برضو كانت سهرانه .. تتقلب في فراشها مو جايها نوم .. متوتره ومرتبكه .. هالمره اول مره يتهاوش مازن مع زوجته قدامهم .. ويرفع صوتها عليه وتبان شخصيته اللي دفنتها زوجته من سنين .. وطغت عليها ..

قامت ووقفت عند باب غرفتهم .. بس ماسمعت شي غير صوت المكيف ..

يأست ورجعت لغرفتها وقفلت الباب .. وفتحت اللاب تب .. تدعي ان بندر يكون موجود .. هو وعدها يدخل هالوقت .. يارب مايكون نسى ..

وتشوفه متصل وعلطول تكلـــــــمه ..

هــــذا حظي من على الدنيا وعيــــــت .. كل ما أضوي شمعــــه طفت .. :

بندرررررررررررررررررررر

(أبي أنـــــــــام الليل .. أنام الليل .. وأرتاحـــ .. ) :

بدا الازعاج

هــــذا حظي من على الدنيا وعيــــــت .. كل ما أضوي شمعــــه طفت .. :

حرام عليك انا ازعاج ؟ (فيس يصيح )

(أبي أنـــــــــام الليل .. أنام الليل .. وأرتاحـــ .. ) :

ههههههه امزح .. عسل على قلبي والله ..

هــــذا حظي من على الدنيا وعيــــــت .. كل ما أضوي شمعــــه طفت .. :

زين .. ترا انا ضايق خلقي وانت ؟

(أبي أنـــــــــام الليل .. أنام الليل .. وأرتاحـــ .. ) :

وانا برضو

هــــذا حظي من على الدنيا وعيــــــت .. كل ما أضوي شمعــــه طفت .. :

طيب قول انت اول .. ليه مو قادر تنام الليل وترتاح ؟

(أبي أنـــــــــام الليل .. أنام الليل .. وأرتاحـــ .. ) :

تعبان .. تعـــــــــــــــــــــــــــباااااااااان ,,

هــــذا حظي من على الدنيا وعيــــــت .. كل ما أضوي شمعــــه طفت .. :

بسم الله عليك بندر جد والله وشفيك ؟

(أبي أنـــــــــام الليل .. أنام الليل .. وأرتاحـــ .. ) :
ماعليك .. فيني شي من كل شي ...

هــــذا حظي من على الدنيا وعيــــــت .. كل ما أضوي شمعــــه طفت .. :

تحب ؟

*ضحك بندر من قلبه رغم الضيقه اللي يحس فيها

(أبي أنـــــــــام الليل .. أنام الليل .. وأرتاحـــ .. ) :

(فيس مطلع لسانه ) ضحكتيني , لا ياحضرة روان انا ما أتعب عشان شي اسمه حب .. مخليه لغيري

هــــذا حظي من على الدنيا وعيــــــت .. كل ما أضوي شمعــــه طفت .. :

طيب اجل وشو ؟

(أبي أنـــــــــام الليل .. أنام الليل .. وأرتاحـــ .. ) :

تفاعلات وتعقيدات غريبه مارح تفهمينها

هــــذا حظي من على الدنيا وعيــــــت .. كل ما أضوي شمعــــه طفت .. :

جربني يمكن افهم

(أبي أنـــــــــام الليل .. أنام الليل .. وأرتاحـــ .. ) :

خليها بالقلب تجرح .. ولاتطلع وتفضح .. انتي قولي وشفيك

هــــذا حظي من على الدنيا وعيــــــت .. كل ما أضوي شمعــــه طفت .. :

بابا صرخ اليوم .. على ماما اول مره يسويها .. وانا خايفه

(أبي أنـــــــــام الليل .. أنام الليل .. وأرتاحـــ .. ) :

معليـــه سوء تفاهم اكيد ويزول .. لاتخافين

هــــذا حظي من على الدنيا وعيــــــت .. كل ما أضوي شمعــــه طفت .. :

لا لا بندر والله تهاوشوا بسببي لان ماما ماكانت راضيه اروح لعرس عبد الملك

(أبي أنـــــــــام الليل .. أنام الليل .. وأرتاحـــ .. ) :

روان , كل اثنين لابد يجي يوم ويتهاوشون ويعيدون حساباتهم في حق بعض .. لاتخافين

هــــذا حظي من على الدنيا وعيــــــت .. كل ما أضوي شمعــــه طفت .. :

(فيس يصيح ) طيب بحاول

*قرا بندر كلامه الاخير وابتسم .. ماكان يقصد ابوه بس ..

هــــذا حظي من على الدنيا وعيــــــت .. كل ما أضوي شمعــــه طفت .. :

طييييييب انت ماقلت لي شفيك ؟

(أبي أنـــــــــام الليل .. أنام الليل .. وأرتاحـــ .. ) :

هههههه , فيني ان ضاوي صديقي .. بيستعجل الزواج وهو كان مقرره بعد 3 شهور يمكن ..

هــــذا حظي من على الدنيا وعيــــــت .. كل ما أضوي شمعــــه طفت .. :

لحظه .. مين ضاوي وزواج ايش ؟

(أبي أنـــــــــام الليل .. أنام الليل .. وأرتاحـــ .. ) :

ضاوي رفيقي اللي شفتيه بالسياره معاي ذاك اليوم .. وهو خطيب اسيل بنت عمتك , اليوم كلمه عمها وقال ان البنت مو زينه في حقها تظل مخطوبه طول هالفتره ..

هــــذا حظي من على الدنيا وعيــــــت .. كل ما أضوي شمعــــه طفت .. :

اهاااااا , طيب , هم اصلا ليه طولوا ؟ انا ماكنت ادري انه يصير صديقك مره

(أبي أنـــــــــام الليل .. أنام الليل .. وأرتاحـــ .. ) :
مدري , بس ضاوي توه يلقى شقه .. وراتبه على قده , بس ان امه خطبت له البنت لانها عاجبتها , والظاهر بنت عمتك ماعندها مانع في التأخير ,, بس عمهم الله يهديه مدري شلون يفكر

هــــذا حظي من على الدنيا وعيــــــت .. كل ما أضوي شمعــــه طفت .. :

زين واذا تزوج ؟ كل الناس بيتزوجون ؟؟

(أبي أنـــــــــام الليل .. أنام الليل .. وأرتاحـــ .. ) :

تدرين انا جالس وين ؟

(أبي أنـــــــــام الليل .. أنام الليل .. وأرتاحـــ .. ) :

في غرفة ملك .. على سريره .. تدرين هالشين له مكان محد يمليه

هــــذا حظي من على الدنيا وعيــــــت .. كل ما أضوي شمعــــه طفت .. :

(فيس يضحك )

(أبي أنـــــــــام الليل .. أنام الليل .. وأرتاحـــ .. ) :
لاتضحكين ,, وربي انا اللي حظي شين .. فجأه حسيت ان مالي احد غير اهلي وجيت بقرب منهم .. الكل ابتعد

هــــذا حظي من على الدنيا وعيــــــت .. كل ما أضوي شمعــــه طفت .. :

محد بعد عنك .. كلنا موجودين

24-02-2010, 11:00 PM

(أبي أنـــــــــام الليل .. أنام الليل .. وأرتاحـــ .. ) :

(فيس مبتسم ) طيب , اخوي وتزوج ومستحيل بشوفه كل يوم واسولف معاه , راشد اصلا دايم مشغول , وضاوي بياخذ بنت عمتك ويتسهلون ,, من بقى غير بندر ؟

هــــذا حظي من على الدنيا وعيــــــت .. كل ما أضوي شمعــــه طفت .. :

يالله يابندر .. اللي يسمعك يقول انهم بيهاجرون ..!

(أبي أنـــــــــام الليل .. أنام الليل .. وأرتاحـــ .. ) :

إيه بيهاجرون ,, تدرين احسن لي اصادق اصيل عشان اضمن اني ما أبقى وحيد

هــــذا حظي من على الدنيا وعيــــــت .. كل ما أضوي شمعــــه طفت .. :

بندر

هــــذا حظي من على الدنيا وعيــــــت .. كل ما أضوي شمعــــه طفت .. :

اعقل عاد .. عندك امي طيبه

(أبي أنـــــــــام الليل .. أنام الليل .. وأرتاحـــ .. ) :

تطلع معاي ستاربكس امي طيبه ؟

هــــذا حظي من على الدنيا وعيــــــت .. كل ما أضوي شمعــــه طفت .. :

زين كوّن لك صداقات جديده

(أبي أنـــــــــام الليل .. أنام الليل .. وأرتاحـــ .. ) :

رواااااااااااان مابي اكون شي مابي .. انا حمار ماعرفت قيمة اهلي واستغليت اوقاتي معهم قبل لايتسهل كل واحد في حال سبيله , لاتقولين لي تزوج انا مو مستعد .

هــــذا حظي من على الدنيا وعيــــــت .. كل ما أضوي شمعــــه طفت .. :

بندر بندر لحظه .. سؤال فاصل

(أبي أنـــــــــام الليل .. أنام الليل .. وأرتاحـــ .. ) :

اسألي

هــــذا حظي من على الدنيا وعيــــــت .. كل ما أضوي شمعــــه طفت .. :

انت ليه ماتحب اسيل ؟

صعقه سؤالها ..

(أبي أنـــــــــام الليل .. أنام الليل .. وأرتاحـــ .. ) :

منين جايبه هالكلام ؟

هــــذا حظي من على الدنيا وعيــــــت .. كل ما أضوي شمعــــه طفت .. :

منك .. ارقى بالمحادثه فوق .. اذا تكلمت عنها تقول بنت عمتك .. ماكنها بنت عمتك انت بعد .. شكلك متضايق اصلا انها من قرايبك

*طول بندر مارد .. فكتبت هي

هــــذا حظي من على الدنيا وعيــــــت .. كل ما أضوي شمعــــه طفت .. :

عادي ترا انا ما أرتاح لها وتصرفاتها ماتعجبني ..

*كن بندر ارتاح شوي

(أبي أنـــــــــام الليل .. أنام الليل .. وأرتاحـــ .. ) :

أيوه ..حتى انا مارتاح لها

هــــذا حظي من على الدنيا وعيــــــت .. كل ما أضوي شمعــــه طفت .. :

افهم من كلامك .. ان مقالك الاخير انت كاتبه عنها ؟

(أبي أنـــــــــام الليل .. أنام الليل .. وأرتاحـــ .. ) :

هههههه مين قال لك

قامت روان واخذت الجريده اللي كانت محتفظه فيها .. وكتبت له مقطع من مقاله

هــــذا حظي من على الدنيا وعيــــــت .. كل ما أضوي شمعــــه طفت .. :

إلى حد أننا نشكّ في مصداقية أحاسيسنا .. لدرجة تجعلنا نتردد ونستوقف مشاعرنا ,, ونغلق قلوبنا حتى لاتهتمّ لأحد .. ولا تؤثر أو تعون أحد ..

هــــذا حظي من على الدنيا وعيــــــت .. كل ما أضوي شمعــــه طفت .. :

اكمل ؟

(أبي أنـــــــــام الليل .. أنام الليل .. وأرتاحـــ .. ) :

لا خلاص

هــــذا حظي من على الدنيا وعيــــــت .. كل ما أضوي شمعــــه طفت .. :

قول يللا هي وش سوت لك ؟

(أبي أنـــــــــام الليل .. أنام الليل .. وأرتاحـــ .. ) :

ماعليك .. بس المهم انتي انتبهي لقلبك .. لايصير طيّب ويخدم كل الناس ويبديهم عليك .. في النهاية انتي بتنجرحين لان محد يقدّر ..

< أنـــــــــــــــــــــــــا تعبان .. حسّ فيني ..

أنا .. تعلّق قلبي ويــّــــــــــاكـ ..

إذا ناوي .. تضيع لي سنيني ..

أنا ضايع ترا .. فيكــ وبليّاكــ ..

بعد ماطيّبوا خواطر بعض .. قام هو قفل الجهاز .. بدل .. رفع راسه للمطبخ وين ماكان عبد الملك يصحى هالوقت ويسوي له فطور ويتركه له .. عارف ان بندر كسول ومايحب يسوي شي بنفسه .. بس مايهون عليه ..

مشى بدون مايحس وفتح لمبة المطبخ ... فاااااضي من المكان اللي يوقف فيه عبد الملك دايم ..

ابتسم غصب عنه .. وراح للثلاجه يفتحها .. وكانت معبّيه لآخرها لان بندر دايم ينسى يتقضى ..

سكر الثلاجه وانتبه للورقه المعلقه على بابها : تطلع ما أفطرت ياويلك .. تشرب قهوه على جوع ياسواد ليلك ..

بلع غصته .. فعلا الواحد مايحس بقيمة الشي الا اذا فقده .. التفت على الطاوله فيه كيس ساندوتش وخبز .. جبن ومربى وهالأشياء ..

وضحك غصب عنه لما شاف اخوه تارك له صوره له ..

تذكرون يوم بكودو يصورونه وهو سرحان يلوّح بحبة البطاطس ..؟

هذي هي .. قال يمكن تفتح نفسيته .. ويضحك اذا شافها .. هو عارف ان بندر يهمل نفســـه وماياكل زين ..

سحب الكرسي اللي كان يجلس فيه عبد الملك .. وراح لعند الثلاجه يحاول يتصرف زي اخوه .. طلع تفاحه وعصير وكم شي قدامه .. واخذ ملعقه وجلس وامتدت يده للساندوتش يحشيه بجمود .. وبشبح ابتسامه تروح وتجي على وجهه ..

اخيرا خلص من مهمته الصعبه .. وركّز بعيونه على الطاوله اللي قدامه .. بعد الاشياء عن يدينه .. ومابقى غير صحن الفطورمقابله ..

تأمل الصحن لدقيقتين .. وبدال مايقربه له وياكل , دفّه بعيد .. وبكل يأس حط ذراعينه .. و ترك راسه على الطاولة ... ونام ..!

< شي من كل شي ..! هذا اللي تعب نفسيته .. كل شي بوقت واحد ..

عبد الملك .. كان شوي شايل هم اخوه .. هو يدري انه احيان مثل الطفل يحتاج احد يهتم فيه .. خاصة الكل التهى بهالوقت ..

بس قدر يتناسى ولازم مايتصل عليه هالفتره .. يمر كم يوم ع الاقل ..

حس بصوت حركة وراه .. وهو فاتح الشباك على اخره ومتكي عليه .. مره حلو منظر تركيا من الدور السابع : ولاء

..... : نعم ؟

التفت .. وسكر الشباك وهو يقول بابتسامة : ماتبين تقولين لي شفيك ؟

ارتبكت : مافيني شي ؟ (وجلست على اقرب كنبة لها )

..... : صار لنا ساعه من وصلنا الفندق .. وانتي خايفه .. مني ..

حاولت تصرف : مو خايفه .. ليش .. ليش اخاف ؟

ماقتنع عبد الملك .. مبين البنت خايفه اصلا تكلمه من بعيد لبعيد وتحاول قد ماتقدر ماتتواجد معاه بنفس المكان .. هو مايبي يحرجها بس مو معقوله ..

..... : متأكده مو خايفه ؟

هزت راسها بإيه .. فقرب عبد الملك يجلس على الكنبة اللي جمبها بس بعيد شوي وتقوم هي علطوول مرتاعه ..
...... : شفتي ؟ خايفه ..!

ماعرفت ترد .. هي خايفه موت بس مو عارفه كيف تقول له .. احيان في مثل هالمواقف .. نتحول لاطفال .. وننكر علطول ..

..... : لا مو خايفه مو خايفه مو خايفه

احتار عبد الملك ,, هو يحبها حيل والمفروض مايضيعون لحظه من حياتهم بعيدين عن بعض .. وبعد هو يستحي بس هالخوف لازم يزول اول .. واذا هو ماتجرأ وشلون بتقول له .. ؟

كانت واقفه قريبه للجدار .. وهو جالس ويدينه مرميه بين رجلينه .. ويتأمل ملامح وجهها .. واخيرا يقوم بسرعه وبحركه مفاجأه يقرب منها ..

وعلطول تغطي وجهها بيديها وتلصق للجدار بكل خوف : آآآآآآآآآآآآآآهئ .. لا لا لاااااااااا آآآآآآآآآآهئ

ارتاع عبد الملك واستغرب . هو قصده يختبرها مازالت خايفه او لا .. بس ماتوقع الموضوع لهالدرجه ...! البنت تصيح ..ميّته خوف ..

...... : ولاء هدي شوي .. آسف والله مو قصدي

...... : لا لاااااا آآآآآآآآآآآآآهئ وخر عني وخر

تراجع عبد الملك خطوتين لورا بكل خوف وربكه .. : خلاص والله بعدت مابقرّب .. خلاص ولاء .. خلاص

حاولت تمسك نفسها وتخفض صياحها .. وتهدى شوي .. بس مو قادره

حس انها هدت شوي فجرب يخطي خطوه لقدام .. ورجعت تصيح بخوف اكبر هالمره ..

أنبه ضميره .. وقلبه قام يدق بقوه .. لو هو اقوى مخلوقات الارض .. بيضعف لادنى درجه قدام منظرها اللي فعلا ماقدر يتحمله ..

..... : خلاص .. انا بطلع الحين ..

....... : ......

اخذ جواله ومسك باب الجناح : شوفيني .. بطلع خلاص لاتخافين ..

ماردت عليه .. بس بعدت يديها شوي وكنها تتأكد هو صادق ولا لا ..

بس فعلا .. شافت الباب ينفتح وهو يطلع منه .. واخيرا يتسكر الباب ..

رفعت راسها ولقطت انفاسها , ورجعت تجلس على الكنبة مفتشله منه .. وتدخل في نوبة صياح اهدى شي

وهو ظل برا يدور .. على الاقل يبعد عنها شوي لين تهدا ويمكن احسن لو تنام ..

وشفيها ؟ لايكون ضايعه مره مثل ريماس ؟

لا لا .. ماتوقع ..!

الإهداءات

عـشــانـكـ بـس ..!!

(همســــات قصص وروايات)