واحب الي يا منه علا فى جوه الدخان
يوردها حياض الموت روحه ما يداريها
اليا منه قعد سلطان والا يا منه ركض شيطان
قوي الباس عرب الساس خيله ما يعفيها
واحب الي ستر وجه شواهب غالي الاثمان
اليا من ضيعوا الشيمه بغالي الروح يشريها
واحب الي يخاف الله يجيك من العقل رويان
يشير بخير واهل الخير للديره يدليها
واحب الشهم ممدوح السجايا صافي الوجدان
اليا من جوه ضيفانه على نفسه يبديها
واعز الى يهلي بالضيوف ويشعل النيران
يبي قولة هلا من قلب والاشياء ما يبيها
ابي الدله وابي الفنجان وابي الترحيب بالضيفان
ابي جلسة نشاما راعي المجلس يقهويها
ابي لي سالفه عدله معاها من الشعر قيفان
تشدك حكمة الاجداد يشدك صوت راويها
ابي النخوه وابي الفزعه واحب مجالسة الشجعان
هل العادات والفزعات نعم لاحل طاريها
هل الشيمه هل القيمه هل المعروف والاحسان
هل التقدير والتاثير واللي فى غيابيها
واحب الى ليا جوه النشاما يفتح البيبان
كريم من قديم الوقت لصكت لياليها
احب المرجله واصحابها واقدر الفرسان
بخيص فى معانيا قبل ابحث فى خوافيها
واعرف الى يخوض المعركه لصار بالميدان
يمشيها على رايه وياخذها ويعطيها
واحب الي سوالفهم ذهب موزون بالميزان
ما هو خبل يخم السالفه بعدين يخطيها
واحب الي رفع نفسه يجنب مجلس الحقران
حشيم ما لقى حشمة تركها ما يدانيها
عرف نفسه لزم حده ولا هاين ولا ينهان
اليا من زادت اللجه يجنب عن بلاويها
واحب من الرجال الي يسمى شمعه الديوان
اليا من تحدث كل كلماته ينقيها
ولا احب الليم الي تصيد زلة باللسان
اليا منه سمع زلة رفيقة ما يغطيها
واحب الي ليا سوي غلط قال العفو غلطان
حلاة الرجل لامنه جرح روحا يداويها
ترى الى شق فى رآيه على طول المدى خسران
يضيع ولا يطيع ولبغاها ما يلاقيها
وختامها صلوا على سيد الانام عظيم الشان
محمد خاتم الرسل منقذ البشر من بلاويها
من شعر / طلال السعيد
