ديوان الشاعر ( ياسر التويجري)

ديوان الشاعر ( ياسر التويجري)

ديوان الشاعرياسر التويجري قصيدة يابليس انا وياك ربع ورفاقه - ياسر التويجري يابليس انا وياك ربع ورفاقه ومن بينا ميثاق وعهود وصكوك انت توردني دروب الحماقة وأنا لاضيعت قمت العن أبوك ياذا العور وان كان مافيك طاقة مالك عذر وانت على المتن معكوك عندي على درب المهالك لياقة على النقا والكسب يابليس مشروك ولك الفخر يابو البلا والشقاقة اني انا شاعر ملك كان مادروك شاعر أبو متعب صليف الطراقه على الزعيم من ورا الناس محروك يابليس تدري وش حلات الصداقه اني ليا ضيعتها جيت للبوك وغديت بين المحفظة والبطاقة وتشكلت فرتك ميات وشيوك ولغيت عندي ماتسمى العلاقة ماتنبنى طبعا على عطني ودوك كثرت هروج مدورين الخناقة يبون فتحة باب ماهو بمصكوك واللي قهرني صدق ان اللواقه مهوي وفارغ وفاشل وصعلوك اسمع هدير وكل ماشفت ناقة ومتن الجرب مبعد ومهمل ومتروك والله مالد الا على اربع عماقه ونا وريث ملوك واخاطب ملوك عبدالله وسلطان واكبر شقاقه نايف وزير الداخلية وانا اخوك والرابع محمد وسيعن نطاقه ولي عهد الدار مبرك ومبروك ماهو بغصب إلا بطيب ولباقه والظن فيني وثق ماهو بمشكوك شاعر طغى ماني بشاعر أناقة والشعر اعلكه شبك ماعلكه علوك أكثر ماحبه في الحياة الطفاقة واكره ماشوف الحر لا صار مملوك ياللي تعكز بي بعد جتك إعاقة سلام وانت تدري بقافية أوك يعني أبرفعها واعرفك طباقه ماتدري ان البيت واضح ومحبوك أقدر أوطيها عليك بسياقه لكني اكبر منك مير انت غروك المير خذلك وردتن وسط باقة ودوج بسوق الفيصلية وهردوك وخلك قريب من صالون الحلاقة وليا شربت الببس لاتلحقه كوك حنا هل الوجهة وقوم الرواقه هل الدلال اللي بها الهيل مدكوك ويلان من ويلان ساقه بساقه في نجد وليا اشملت عرعر وتبوك ومافيه حدن حد وايل وعاقه روسن مع العربان ماحنا بوروك الورع منا لالعب بالتفاقه يرمي لحم مايرمي عصي وجيوك خبل عنزة ما اقفى العدو في نياقه افتكها ولا انت خبلن و مفكوك إلياكلنا مانحب الذواقه نشبع ولا نترك للا نذال متروك وسيوفن ارهى من سلاحك بطاقة واشبار اطول من خطاويك ببلوك ماحقتها ولاحب الحواقه ربعك لهم في المجد دربن ومحيوك سلطانهم لاحل ذر الرواقه شالوا ثقيل الحمل مير انت خلوك الشعر حنا حاسبين احتراقه عندك يوم اللي بجمبك تحدوك الشعر انا ماجيت احسب أوراقه جاني على لوكي وجيته على لوك أكبر فخر للشعر اني نطاقه وأكبر فشل للشعر من يوم رزوك

المصدر: منتدى همسات الغلا

---

]d,hk hgahuv ( dhsv hgj,d[vd) hgahuv dhsv

قصيدة بريدة - ياسر التويجري


*
*

مدلهمه والهموم وحنيني
والوجد الاشهب والضلوع الهميده
كل المناظر لا طريتي تجيني
يادار عزي ياضواحي بريده
والحاقدين الحسد والعاذليني
وديار نقصى والرجال البليده
كل عجز يحتال بينك وبيني
عتقتي الحيلات وانتي جديده
طرت عليه في ديار الخميني
والنفس شفقى والمساري بعيده
ضاقت علي وهلت الدمع عيني
وعرفت وش معنى الضروف العنيده
تسبل دموعي وابيح كنيني
كني وحيد فاقد له وحيده
حنا ورى كاشان نفرق يميني
وانتي بنجد ودون حايل وضيده
نفحت هواك اللي تمر البطيني
هبت وتلت من خفوقي وريده
يا دار اللي كل ما قلت ويني
جتني مثل ام تباكت وليده
فيك الرجال اللي تبرك سميني
اهل الفعول اللي خطاهم سديده
يوم انها مبطي وهي بالثنيني
بالسيف والعقل الحكيم ورصيده
وهم رجالك كل حزه وحيني
فوق الأصايل والبكار الفريده
الله يرحم ماضيات السنيني
من قبل لا تنشف موارد زبيده
وانتي رجالك بالمواقف تبيني
مع الأمام يثبتون العقيده
أنا بقول الحق والله يعيني
وليا احتمت ناري بدق الحديده
إليا سجدت وحب رملك جبيني
ذكرت قول اللي اسمى حفيده
يومه يقول اسمع وانا ابوك زيني
وعينه شرار ويمسك الرمل بيده
يقول لا تغفل جزاء الوالديني
وربك خلقك وصر من احسن عبيده
وأن خيروك تعيش بس سنتيني
عش بالقصيم ولا تعدى بريده
كله طرالي وقت ذاك الحنيني
ويليتها رحلت عديم وسنيده
أن كان انا ما جيت عند اللعيني
راع البقاله واشتريت الجريده
وقعدت ادور صورت معزبيني
فيصل ولد بندر وصورت عضيده
وازريت ادور صورت الياسميني
اللي تفرعن في شعيب السويده
واثري بعيد ووين انا عنك ويني
والنودلي ما يصلون لبريده
وكل الجرايد والصور للخميني
ولخامنيه اللي يلقب طريده
وضاقت على ديار فارس بحيني
وسبوق طيري كنهن بوريده
ولديت في ربعي وهم مستحيني
وحاولت اجمع بس جمله مفيده
قلت انتم اصلا ما عرفتو حنيني
ويحول ياللي ما سكن في بريده

تناديك .. ياسر التويجري ..،


تناديك رغبات المقابيل من الأرض وانتي بالمجرة
تهادي على غصن من الليل وتمادي على القلب ومقره
ترى كل هالدنيا تساهيل مادام اننا بنعيش مرة
تلدين وتزين التعاليل، تصدين وتصد المسره
وأناديك ودموعي هماليل وفي الصدر تنهيده و حره
أحبك وما للحب تأويل ولا شفت منك إلا المضرة
وتموني يا ريم المكاحيل على القلب في خيره وشره
اذا جيتي استاهلك بالحيل، واذا كان ما تبغين حره
فديت الوسيعات المظاليل، رماح الهلاك المستشره
وخطواتك اللي بالخلاخيل، لها في الصدر والقلب جره
وسواليفك بكل التفاصيل، وصوتك بها لله دره
ابي منك ما ينهد لي حيل، على شي ما يسوى المبره
وابي صادقات التهاليل، اذا جيت ابشكي واتشره
من الحظ واشباه الرجاجيل وعثرات وقتي المستمره
وطموحاتي الغر المحاجيل وخذلانها مع كل كره
اعدل المساوي يطيح قنديل، وأهز الجفن وتطيح قره

قصيدة الحواجز - ياسر التويجري


رحمتك يالله ترحم ضعفنا
يوم غم الجو واخفيت الجدي


يوم همي فوق متني متنا
والسلام عصوف ريح ترعدي


والضروف أكبر من اللي ودنا
والفراق الحل والحل الردي


لاحياة ولاممات ولاهنا
في حنايا الضيم ألقى مقعدي


إن سهرت الليل مس ومسكنا
وإن غفيت افلام رعب تحشدي


صاير مابين مظلوم وأنا
أختلفت وودي أعرف مولدي؟


والكرم لليأس كأس مدنا
نشربه لوهو علينا يجهدي


وش نسوي دام هذا حظنا
والحواجز ماتعدى بالعدي


مير صبرك يالحبيبه بالعنا
أصبري ياروح روحي وبعدي


لايهمك دن دنات ودندنا
وبلبة حساد وأغضي وأرقدي


دام أنا وأنتي تلاقى جدنا
نلتقي لوهب ريح جلمدي

قصيدة ارض الحصار - ياسر التويجري


على غرار الحصار أعلنت فرض الحصار
على أشتراكية الأعداء والحاقدين


مدام في كفي اليمنى سلاح الدمار
الله يلعن أبو البرت قبل أستلين


لو كنت ابحسب حساب للعيال الصغار
ماكان ذكري من أم رجوم لأم القوين


حتى لو أني لدى القله من أهل اليسار
أنا على قائمة فرسان أهل اليمين


ولي علاقة قوية مع رجال القرار
ماكدرت صفوها عجاجة المغرضين


حتى اني لو كنت اخر شخص فوق المسار
لأتين باللي عجز سطى الأولين


أكره هولاكو وأحب أفكار بعض التتار
وماحب رجعية الشيعة واحب الحسين


مع تقلب طقوس الوقت ليل ونهار
وتوسع الكونقرس والضغط بالمسلمين


إيقنت إن الجهاد إن كان بالأنتحار
يثر علينا قبل يثر على المشركين


الله يذكرك بالخيرات ياقندهار
وياحليل حقدك على الأسلام يامدلين


أحيان أحس إني أتعدى حدود الإطار
واحيان أحس إني أرقى وافقد الأكسجين


ياللي لكل أسمين تقليدي معا مستعار
لاتدحم الناس في جنبك لو إنه متين


والله لو إنا نبي حلقك يابو مستشار
أقربلك إيديننا من قرب حبل الوتين


ماتدري إننا مقابيس الوغى والشرار
نهار يفرق ضنين عن مضنة ضنين


على ضهور الصفر ولا ضهور البكار
نارد حياض المنايا ماندور عوين


من دم وايل توزعنا على كل دار
شيوخ في نجد وشيوخ على الرافدين


قوم نحب الفخر والعز والأنتصار
ياناخذ الطايله ولا نموت أجمعين

قصيدة العشق الموهق - ياسر التويجري


ياللي عرضتي عنوة بدروبي
العيب عيبك والذنوب ذنوبي


اما تبلين الخفوق الممحل
والا عن العشق الموهق توبي


ياللي جمعتي فيك مالا يجمع
لاتشحبين بوجهي المشحوبي


تشتتي مثل شتات امتنا
عقب صلاح وعمه الأيوبي


وتجمعي مثل تجمع ربعي
على الشرف والرفد والماجوبي


خلي ........ يصير طولي وانتي
اليا ..... لوسمحتي ...........ي


ذوبي مثل أحساسك التلقائي
لاقمت اغازل مسمعك باسلوبي


تنخبوي مثل قصايد غازي
وتشعبي مثل خليل النوبي


ياليت في جوفي قلوب واجد
عشان احبك في جميع قلوبي


نعم احبك حب ماهو عاد
يحب من اقصى خافقي مجذوبي


حب كثر ماذقت واتحملته
من سرمد في ليلي الأثيوبي


وكثر ماحنا فالعرب أملنا
ولا استفدنا غير بار ولوبي


واكثر من اعداء النجاح الفردي
اللي على صدور الصحف قالوبي


ارجوك ياعين العديم الصافي
لدي اليا مني دعيتك صوبي


لاجيت ابنسى مامضى واطنش
تطري علي ذكراك يامحبوبي


نظارتك واشياءك المركونه
واسوارتك والماسك المكذوبي


وكتابك اللي فهرسته عروقي
وعروقك اللي فهرست مكتوبي


الصدر بيتك والضلوع ضلوعك
نامي على جنب السعه بجنوبي


وان ايقضك قلبي وحن وصوت
مغلوب وهذي حيلة المغلوبي

قصيدة ميسون بنت بحدل - ياسر التويجري


يضيق الصدر واخلي منيفي
واعديها على الرجم المنيفي

اصيح من الزمن واقول مادري
وانا ادري والزمن ماهو بكيفي

تركت من الحياة اطهر مساحة
ذبحت حصاني وكسرت سيفي

فلا حزن يرد اللي تركته
من الماضي ولا الدمع الذريفي

خلقنا الله بكفوف وعزايم
وعمرنا الارض ونمنا على الرصيفي

توزعنا طبقات وطوائف
هذا شيعي وذا سني حنيفي

فلا هذا قدر يعسف حصانه
ولا هذا قدر يركب عسيفي

خلقنا الله مما قد خلقنا
ولا اضعف من ضعافتنا ضعيفي

تعلقنا باباطيل وخرافة
وصرنا نشبه الفصل الخريفي

تساقطنا فالارض ولا مشينا
فهل يمشي الكفيف مع الكفيفي

تذكرت النساء بكل عصر
فلم اظفر بهن ولا بنيفي

تقزمنا الشوامخ في عيوني
ذوات الاصل والعرق الشريفي

خلقهن ربهن من ضلع اعوج
سوا ميسون من ضلع مريفي

سقا الله ذكرها مع كل هبه
لاساق الهوا وسم وصيفي