ديوان الشاعر ثامر شبيب

قصيدة الرساله

ياللي حرمت القلب مبطي من الصوت
لاتحرمه هالحين رد الرساله

ايام عمري معك لحظات وتفوت
وش تنتظر لاضاع عمري بداله ؟

يعني عشان اسمك على القلب منحوت
ماعاد تسئل ليه وش هالنذاله ؟

ان كان قصدك شوفتي وسط تابوت
خلنا على ماقيل كلن بفاله !!!

اليا طرى طاريك حسيت بالموت
اليا متى هالحال ماهي بحاله .؟؟؟

من غبت وصارت غيبتك شي مثبوت
الناس تنشد ليه ثامر لحاله .؟

زعلان حدي منك ضايق ومغموت
وكل من سئلني عنك ضقت بسؤاله

عز الله اني معك ماني بمبخوت
امشي يمين الدرب تمشي شماله

عزاآه يالدنيا عقب بحت الصوت
صار الرجى منك ترد الرساله !!!!

قصيدة الشهره

الشهره اللي وراها الناس منجرفه
ماهوب اكبر طموحي مصافح ايديها

مانيب جاهل بها انكانها حرفه
اعرف مداخيلهاواعرف خوافيها

اعرفك يادربها واقول ماعرفه
وان مر طاري لها صديت طاريها

الشعر لولا عيون الجادل الترفه
والله لانسى القصايد مع قوافيها

ضيقات صدري كثيره مالها صرفه
من كثرها ماعرفت شلون ابحكيها

اشياء منها تبات النفس منقرفه
ياكثر ماحطمت نفسي وامانيها

القدس راحت إناظرها من الشرفه
وابن اليهودي يدوج في ضواحيها

وحنا العرب ساكتين اسكات معترفه
نشوف بالعين ارض القدس وش فيها

والدمعه اللي من المسكين منذرفه
ماحركت شي بالظالم معانيها

الجوع .. والبرد .. ومسكن يشبه الغرفه
تقتل احلام الفقاره .. قبل تحييها

والناس صارت بجرح الناس محترفه
يارب سترك من الدنيا وبلاويها

والحب تطعن بصدقه .. بنت منحرفه
من كثر ماكذبت .. تنسى اساميها

وبعض السوالف تغثك مابها طرفه
تدبل كبود تدور من يسليها

مثل البشر بعضهم ماودك تعرفه
زود على ضيقتك وجهه يطريها