أبغى المقانيص يوم القنص لي عــــاده معنا اشقرٍ ضربته للخرب تمــزيري

#1 07-12-2015, 07:18 AM

أبغى المقانيص يوم القنص لي عــــاده معنا اشقرٍ ضربته للخرب تمــزيري

يقول الشاعر:
يا موتري لا تضايق من مشــــاويري
يوم أ جا المغباش له عــــاده
مااظن يصلح يسوقك واحدٍ غيــــري
أصايدك من الحصا وأرفق بك زيــاده
جيب بدفعٍ رباعـــي نقلــــة القيـــري
ما ودك أنه يشوفه بعض حســـــــــاده
كم مرة في السهل نمشي مـــــداويري
وكم مرة قد مسكت طويق وشــــــداده
أحيان نسري وحينٍ نمشي اعصيري
واحيان قبل الفجر والناس هجّــــــــاده
يوم ان بعض العرب يهوى المصافيري
يجيه وقت الضحى والظهر في رقـاده
أهوى المغابيش قبل ايصوُت الطيري
يوم ان بعض الشباب يكبّر وســـــــاده
العين عافت لذيذ النـــــــــوم يا طيري
أبغى المقانيص يوم القنص لي عــــاده
معنا اشقرٍ ضربته للخرب تمــزيري
أفدغ وحرشٍ اكفوفه ويل من صــاده
مع هدّة الطير يذهب كل تفكيـــــــري
أنسى مماتي وكِنّ العمر بزيـــــــــــاده
يا زِين شوف الحباري بالمناظيــري
في خايعٍ مابعـــــــــــــد زاروه رُوّاده
ويازِين شوف العشاير و المظاهيري
لا روّحت مع رقاق الحزم منقــــــاده
يا ماحــــــــلا شرْبك لـــدرّ المباكيري
أخير من نيدوٍ به سكر زيـــــــــــــــاده
وماكول قرص الجمر مع تمرٍ وضيري
أحسن من البيتزا والشورمـــا زاده
وجذبك بدلوٍ به الماء من جبا البيري
أخير من ماي صحه وســـــــط برّاده
البر يســـــــوى مسلسل سالم الزيري
وأحلا من مشاهد الكوره مع استــــاده
شوف البراري ولا شوف المقاصيري
أو شوف نخلٍ ظمايا واجد عيـــــــاده
في روضةٍ غاديٍ للعشب تنــــــويري
يازِين شوف الخضار وزِين مقعـاده
معك نشاما مخاوينك منــــــــاعيري
رجّالهم منوة للقلب واسْعـــــــــــــــاده
حولك ادلالٍ بها البُنّ المباهيـــــــري
بهارها الهيل والمسمار هو اقنـــــــاده
أحسن ولا رفقة اربوع ٍ معاثيــــري
هرج القفا عندهم هو ثالث اعْيـــــــاده
أحباب وأصحاب بقلوب المثابيري
تمتعوا بالصور