تكمله قصه وش الدنيا بعد فرقاه

#1 16-02-2010, 08:53 PM

بنزل جزءين وأبي ردودكم: مستعدين تفضلوا::wink_smile:
الجزء الخامس

صارت الساعه 2 الفجر , ولا جاها نوم وفوق هذا ذبحها الجووع ,, بدلت بجامتها الضيقه والبست دراعة قطنيه بيتوتيه لونها ابيض وفيها دببه ملونين , قررت انها تنزل للمطبخ وتسوي لها ساندويتش مرتديلا خذت طبعا معاه شال حق شعرها لان يمكن تلقىبالمايونيز وتشرب معاه كوب شاي اخضر احد قاعد .

انزلت تحت وكانت الاناره طافيه , بس انارة المطبخ شابه , يعني اكيد فيه احد بالمطبخ , البست الشال فوق شعرها ومشت بهدوء صوب الباب وافتحته , لقت نواف يتعبث بالثلاجة ويغني بصوت خافت اغنيته المفضله بين ايديا , ابتسمت لولوة لان كانت تحب هالاغنيه بس صوته كان يخرع ههههه .

راحت تبي تطلع ولا شافها نواف : لولوة ,, وين رايحه .

التفتت لولوه حقه : لا بس كنت ابي اسوي لي اكله خفيفه , بس اخذ راحتك . راح ارجع بعدين .
نواف واهو يبتسم : لاتروحين خلج اذا مضايقج وجودي اطلع عادي .

لولوه : لا عادي بالعكس بس اخاف انت متضايق من وجودي .

نواف واهو يرفع حاجبه الايمن : شدعوا وليش اتضايق بالعكس , انا نازل المطبخ عشان بعد جوعان ولا اكلت من البوفيه , بس تصدقين ماعرف اطبخ .

لولوة ترد عليه من ورى طاولة الطعام : اممممم انا بسوي لي ساندويتشات خفيفه حاب اسويلك معاي ؟

نواف وبأبتسامه قاتله : يااااليت .

كان نواف واقف عند الثلاجة وكان لابس بنطلون بيج قطني وتي شيرت بيج مع ازرق فاتح وفوقه جاكيت قصير لونه بني وشعره مبهذل بس ياي يجنن ويخبل , وخلا مجال حق لولوة انها تروح صوب الثلاجه واهو قعد عند طاولة الطعام , يراقب تصرفات لولوه وتحركاتها , وحس انها مرتبكه من نظراته .

لولوة بارتباك : حاب احطلك خس ولا بدون خس .

نواف بابتسامه : كيفج ,, كل شي من ايدج اكيد طعمه حلو .

اهني لولوه صاروا خدودها طماطه , انتبه لها نواف ونزل راسه وهو يبتسم . حاب يكسر التوتر بينهم : لولوة انتي ناويه تفتحين مكتب محاماة خاص لج ؟لولوة واهي شدها السؤال : لا انا ناويه بأذن الله اصير محامية دولة في مجلس الوزراء بس انشالله يقبلوني .

نواف وبأعجاب : ماشالله عليج طموحج قوي وانشالله يتحقق لج .

لولوة بأبتسامه ذوبت قلب نواف : ياربي احقق حلمي وحلم امي , وافرحها انشالله.

نواف واهو يطالع لولوه : امج انسانه عظيمه لانها وصلتج لهالمواصيل هذي واكيد بتفتخر فيج لانج رفعتي راسها فوق . الله يخليها لج ويطول بعمرها انشالله .

لولوة بنظرة حنان : تسلم ومشكور على الكلام الطيب , وانت ماعليك قاصر امك اكيد بتفخر فيك ويكفي رفعت راسها .

نواف نزل راسه وحس بدمعته تبي تطلع اول ماتذكر امه ,, لولوة لامت نفسها صج اني خبله وين ذكرته بأمه المرحومه , اكيد تضايق والسبه انا صج اني غبيه , وقالت له : نواف اسفه والله ماكان قصدي .

نواف رفع راسه على طول : بالعكس يالولوة انتي ماقلتي شي يزعل , بس تذكرت امي وتمنيتها انها تكون موجوده وتشاركني فرحتي ,, والله يالولوه احس ان فرحتي ناقصه بدونها .

قربت لولوه من طاولة الاكل وبيدها صحن فيها ساندويتشتين وايدها الثانيه فيها كوب شاي اخضر وحطتهم على الطاوله واهمست له بس بصوت مسموع وواضح : امك يانواف موجوده معاك تدري وين .. اهنيه ( واشرت على قلبه ) ماراح تخليك ,, دامك تتذكرها و تتذكر ايامك معاها راح تكون قريبه عندك , الحين لازم علينا اننا نترحم لها وندعي لها ولاننساها من الدعاء ,, عدل يادكتور نواف ؟

نواف بهاللحظه هذي تمنى انه يضم لولوه ولا يخليها , يتم يضمها ليما يغفى وينام , يحس براحه مو طبيعيه لما يسمع كلامها ولما يشوفها ,, اكتفى في انه يبتسم في وجه لولوه وقال لها بهمس : توني احس بطعم الراحه يا استاذه لولوه

لولوة نزلت راسها : دوم انشالله مرتاح يا دكتور نواف ............... على فكرة انا سويت لك شاي اخضر اوكي.

نواف واهو يطالع الصحن : وااااو والله حركات , شكله لذيذ ,, يعطيج العافيه .

لولوه واهي تغسل ايدها : عوافي انشالله .

راحت تبي تطلع من الباب ولا نواف يطالعها : وين ....... وين .......!

لولوة واهي تطالعه : ليش بغيت اسوي لك شي ثاني قبل لا اطع .؟

نواف واهو شكله بيزعل : ماراح تسولفين معاي ... تبين تطلعين .؟

لولوه توهقت ياربي شكو اقعد معاه مايجوز اصلا ,, لولوه واهي متوهقه : الوقت تأخر حيل ومو حلوه احد ينزل ويشوفني قاعده اسولف معاك .؟؟

نواف وهو معصب : اللي يتكلم اقص لسانه , نسيتي انا ولد عمج وشرفي هو شرفج ..

لولوه واهي تطالعه : بس مايجوز اقعد مع زوج اختي منى المستقبلي .

نواف هد اللي بأيده وهو استغرب : زوج منو ؟؟؟؟؟؟؟؟؟؟ منى ؟..؟؟ ومنو قالج هالكلام او من وين سمعتيه ؟

لولوة واهي متعجبه : ليش يعني انت ماتدري ؟؟؟؟؟

نواف واهو معصب : اكيد ما ادري ,, على كيفهم يزوجوني ويخطبون لي ,, اصلا منى بعيييييييييده حيل عن تفكيري ,, ولا عمري فكرت فيها انها تكون زوجه لي , اعتبرها مثل مريم اختي لا اكثر ولا اقل .
لولوة ارتاحت نسبيا وحست بنشوة الانتصار لانها تأكدت ان نواف مايفكر في منى .
كمل نواف كلامه : اسمعي لولوة ,, الكلام اللي راح تسمعينه واجد ,, وخصوصا من خالتي ام احمد او يمكن من منى , لان ادري ان امنيتها اني اتزوج منى , بس صدقيني يالولوه مافكرت فيها .

لولوه : انا مالي شغل فيهم , ولا لي شغل في اختيارك .

نواف واهو يطالع لولوه : لا راح يكون لج شغل باختياري ....... صدقيني .

لولوه استغربت : انا شكو فيك ؟؟؟؟؟؟

نواف ابتسم ورد لاكله : على فكره جهازج ipod موجود  غريبه حتى اهتماماتج مثلي عندي ,, طلعتي تحبين ماجد المهندس نفسي

لولوة واهي مستانسه : صج عاد نيتي اليوم ادور الجهاز بالاسطبل بس اشوا انك لقيته ... وماجد يعجبني احساسه لما يغني بصوته الرومانسي .

نواف مد ايده بجيبه وطلع منه الجهاز وقدمه حق لولوه ,, لولوه اشكرته وابتسمت له واطلعت فوق لغرفتها ....

نواف تم مكانه قاعد على طاولة الطعام ماكان يتمنى ان لولوة تروح . كان يبيها تقعد معاه وتسولف معاه ,, حس بأحساس غريب اتجاهها , حب لولوة .. يحس براحه لها ,, يتمناها تكون طول العمر قربه ,, يتمنى يمسك ايدها ,, يلمس وجهها ,, يضمها حيل لصدرة ,, كل هذا يدل على شي واحد انه مايقدر يعيش بدونها ولازم يتقدم لها ويتزوجها ,, بس شلون ,, يمكن اهي ماتفكر فيه ؟ ,, ومنى وامها اكيد ماراح يخلون هالشي يتم اذا دروا ان نواف بدا يميل حق لولوة,, قرر انه ينتظر ويشوف وش اخرتها .

***

في الجامعه ,, نورة اخت ضحى تأقلمت مع وضع الجامعه والدراسه وحبت جو الجامعه لانه جو جديد وحلو عليها ,, حبت المحاضرات وايام ,, كانت توها خالصه منالانتخابات الجامعية ,, طبعا كانت تصوت لقائمة الائتلافيه المحاضره ورايحه تشوف بدور وين ,, ولا دق تلفونها واهي تمشي وطلعته من الجنطه وكان المتصل صديقتها شهد ,, واهي تمشي ومنزله راسها تبي ترد على الاتصال ولا اصدمت بشي لدرجة انه كتبها واوراقها طاحوا على الارض ......., جاها صوت رجولي : اسف ,, فيج شي اختي ؟؟

ولا نورة عدلت وقفتها واهي ترفع راسها وتقول بعصبية : ماتشوف انت ,, عما انشالله يعميك .؟

زياد واهو يبتسم على عصبيتها : خلاص اختي قلت لج اسف ....... مع ان انتي العميه ماتشوفين في احد يمشي ومايشوف دربه .

نورة واهي تلم كتبها واوراقها : خلاص بس فارقني .

نزل زياد لمستواها عشان يلم معاها الكتب والاوراق : اوكي على الاقل خل اساعدج

نورة واهي تكمل وتلم اوراقها اللي طاروا : مابيك تساعدني ,, فارقني بس وخلاص .
زياد وهو يحط كتبه على جنب : بدال ماتقولين لي شكرا وجزاك الله خير وماقصرت تقولين هالكلام , هذا وانا هاد محاضرتي ومتأخر علشانج وتقولين هالكلام .

نورة واهي مشتطه وصاروا خدودها حمر من التعصيب : ياخي مابي منك شي , طلبت تساعدني وقلت لك ساعدني , ياخي روح خلاص فكني .

زياد واهو ياخذ كتبه : خلاص خلاص لاتعصبين شوي وتطقيني .. و شوفي عدل مره ثانيه ياالعميه ,

راح زياد وقعد يضحك ,, لان كلامه يغيضها واهي عصبت حييييييييييل منه , ودقت على رفيجتها شهد : الو شهد وينج

شهد واهي مخترعه : هلا نوره اشفيج معصبه ,,.

نوره واهي تمشي : انا اقول لج اذا شفتج ,, وينج بسرعه .

شهد : موجودين ننطرج انا وبدور بالمكتبه .

نوره : يلا كاني جايتكم .
دشت نورة للمكتبة وشافت بدور وشهد قاعدين يكتبون بحثهم , جتهم نورة واهي معصبه واقعدت قبالهم .

انتبهوا لها وسألوها : اشفييييييييج.

نورة واهي تهمس لان ممنوع الكلام بالمكتبه : صار لي موقف خايس قبل شوي .

شهد وهي تهمس لنوره : شصار لج شنو الموقف ؟

نورة وهي منفعله : دعمت واحد وتنثرت اوراقي ,, وتخيلي يقول لي انتي عميه ماتشوفين

طبعا شهد وبدور ماتوا من الضحك .. نوره واهي مشتطه : بس هذا اللي فالحين فيه ضحك ومصخره وبس صج مالت عليكم مافيكم خير .

بدور واهي تعطيها ماي : شربي الماي وهدي اعصابج وخلاص انسي .

نوره واهي تشرب الماي : بدور والله لو تشوفينه يبط الجبد ,, مسوي نفسه يساعد المغرور هذا صج حقير اكرهه اكرهه .

شهد واهي تضحك : شدعوا عاد اهو يحبج هههههههههه .

بدور واهي تهديهم : خلاص عاد خل نكمل البحث لازم نسلمه باجر .

تموا ثلاثتهم يكتبون البحث ولا شافوا نوره تشهق وتقول : هذا هو المغرور الحقير.

شهد وبدور يتلفتون : وين وين وين !!!!!

نوره واهي تأشر شوي شوي : كاهو هذا اللي لابس بنطلون جينز وبلوزة لونها ابيض ومسوي شعره فوق .

شهد واهي تطالعه : يازينه والله انه مملوح ويهبل ياحظج هذا اللي صدمج ,, اخيه لو صادمني .

نوره بنظرة غضب : وجع انشالله من زينه المغرور .. مادري على شنو مغرور .

شهد : ياختي من حقه يصير مغرور ماتشوفين شحلاته , ياي شوفي جسمه معضل وحده رياضي .

بدور : شهد خلاص عاد فكينا من هالسوالف عيب يلا .

شهد واهي تحط ايدها على خصرها : يسلام وانا شقلت ماقلت الا الصج مزيون وشكله ولد عااااااااااايله هاي هاي . (( هاي هاي تعبير عندنا بالكويت عن الناس اللي عايلاتهم ثرية ويهتمون بالمظاهر ))

نورة واهي ترجع لبحثها : والطقاق شنو يعني "هاي هاي" , اهم شي الصحه والعافيه والستر والاخلاق .
شهد واهي تتحلطم : أي مو احنا عيال فقارى مساكين مالنا الا هالكلام .

نورة طالعت شهد بنظرة يعني انطمي : شهد تبينه روحي له مو تقعدين تقرقين فوق روسنا خلينا نكمل البحث .

شهد واهي تتأفف : اووف خلاص عاد شقلت يعني ,, قاعده اضحك معاكم .

( نورة ملامحها حلوه ,, بيضه , وجهها دائري ,, شفايفها صغار ,, عيونها ذبلانه ,, خشمها حلو ,, مو طويله حيل ,, وجسمها شوي متروس بس كان مقسم وحلو ,, نوره هادية بطبعها بعكس اختها ضحى اللي تحب تضحك واختها نوف وتحب دراستها وتحاول انها تجيب معدل يرفع راس اهلها ,, ماكانتاللي بس تحب تهاوش تهتم بسوالف المكياج والكشخه وسوالف الشباب ,, لدرجة ماكانت تعرف تحط مكياج الا مسكره وغلوس ملمع فقط ,, لبسها بسيط وكاجوال ولا تهتم بالمظاهر )

( زياد كان محط انظار البنات ,, كل البنات متحطمات فيه , طويل .. ضعيف بحيث عضلات جسمة بارزة من ممارسة الرياضه ,, شعره كستنائي ناعم خفيف وعنده شوارب كلاسيك وعيونه فيهم حدة تذوب لما يطالع احد ,, واحلا ما فيه كانت ابتسامته العذبه ,, كان ولد عائلة بارزة في المجتمع الكويتي وغنية جدااا ,, على شان جذي البنات دايما يحاولون يلفتون انظاره عشان يقع في الحب ,, بس اهو ما يهتم ,, كان يبي يحب وحده هو اللي يتعب على شانها مو اهي تجي وتعرض نفسها لان يحتقر هالفئة هذي اللي تقط نفسها على الشباب )

كان زياد يدور له كتاب يساعده على عمل التقرير,, من ورى رفوف الكتب لمح نورة , كانت قاعده وحاطه ايدها على خدها وايدها الثانيه ماسكه القلم وتكتب بالبحث وكان شكلها مندمج للآخر ,, ابتسم زياد لا شعوريا لما طالعها ونزل راسة وكمل البحث عن الكتاب ..

بدور كانت لاهيه ومنشغله بالبحث وفجأة جاها مسج من حبيب القلب خالد :

هو فيه غيرك بالغلا شخص يسواك && يخسى بزمانه ما يـجي بيوم يمك
الله وهبك من الغلا والله اعـطااااك && عشق يبي يسري مع عروقي دمك
عهد علي لأعيش لك طـول دنياك && على الوفا والطيب و بالقلب اضمك

ابتسمت بدور ابتسامه عشق ووله ,, انتبهوا لها نورة وشهد ,, شهد بلقافتها المعهوده : اييييييه ناس نايمه بالعسل وناس منغثه بهالتقارير عسالله يرزقنا يارب ؟

بدور واهي تطق شهد وخدودها حمر من الاحراج : وجع زين , صج انج ملقوفه انتي شكو.

نورة كانت تدري ان خالد يحب بدور وبدور تحب خالد بس ماكانت تبي تحرجها وقالت : بدور ماعليج منها ,,واهي تغمز لبدور بأبتسامه .

بهاللحظة كان زياد يتابع حركاتها وشاف ابتسامتها لاول مره , زادت جمال وعذوبه وبراءة , حس انها طيبة و على نياتها , قعد زياد بالطاولة اللي قبال نورة .

استأذنوا بدور وشهد على شان محاضرتهم بدت وتمت نورة قاعده بالمكتبه وتكتب بحثها اللي تعب ايدينها الصغيره من الكتابه ,, رفعت راسها فوق وطالعت جدام ولقت زياد مرتز وقاعد يطالعها ومندمج .. طالعته ورفعت حاجبها بطريقة استفزازيه ,, وهو بادلها بابتسامه عذبه خلت قلب نورة يرتجف وردت على طول تسوي نفسها تكتب عشان مايبين التوتر اللي فيها .

فجأة جت بنت وكانت لابسه ضيق وشكلها كان ملفت من المكياج اللي حاطته والتسريحه اللي مسويتها لشعرها ,, كانت البنت جميله وحلوه بس شكلها حييييييييل اوفر ,, شافت زياد وحاولت تتحرش فيه عن طريق الابتسامات وهالسوالف هذي ,, طالعها زياد بنظرة استحقار ,, الموقف هذا كله صار قدام نورة اللي كانت تراقب بهدوء ,, قربت منه البنت وطلبت بكل حقارة رقم زياد ,, نوره بققت عيونها وتمت تراقب ,, زياد اكتفى في ان يقول لها كلمه وحده : احترمني نفسج وانا ماتشرف اعطي رقمي لانسانه نفسج . طبعا ا ستحت البنت وقلب وجهها الوان وطلعت على طول . زياد كان مبين عليه انه متضايق حيل من تصرفات البنات معاه . رفع راسه فوق وطالع نوره اللي كانت تطالعه وعيونهم تلاقت مع بعض لثواني ,, رجعت نورة بسرعه ونزلت راسها وبدت تلم كتبها عشان تبي تطلع .. وتلحق على محاضرتها .*** كان من المقرر ان أحمد يرجع للمزرعه اليوم ويلتقي في عايلته ....... لكن استدعى الى العمل لان عنده بلاغ عن حريقة كبيرة في بيت عائلة مكون من ستة افراد من ضمنهم ثلاثة اطفال مع الام والاب والخادمة .. اتجه الضابط احمد الى البيت المحترق ,, تفاجأ لما شاف النار شلون تلتهم البيت واهل البيت قاعدين يستنجدون ويصيحوووون والمطافي للحين ماوصلت ....... أحمد مع اصدقاءه الضباط يحاولون يساعدون قد مايقدرون والجيران بعد مو مقصرين بس للأسف النار محاطة بكل الزوايا ومافي مجال انهم يدخلون ,, احمد راح صوب الحديقة وشاف ولد صغير عند الباب الخلفي للبيت وقاعد يصيح ويبجي ,, سمعوا صوت المطافي وتحركوا رجال المطافي بسرعه ,, لكن احمد قرر انه ينقذ هالولد هذا ,, حاول يبطل باب السور ,, ومشى صوب البيت ,, ماكان ماخذ معاه أي درع حمايه من النيران ,, كان متكل على الله ,, تقدم خطوه خطوه ,, كل مايتقدم خطوه يحس بنسبة الاكسجين تقل عنده ,, حس بحرارة النيراة ,, رفس الباب برجله ,, وقدر بقوته يكسر الباب ,, لقى الولد الصغير مسكيين متكور على نفسه وقاعد يبجي كان منظره حيل يعور القلب ,, احمد واهو قاعد يصيح بصوت عالي : حبيبي لاتخاف انا راح اطلعك بس انت لاتتحرك خلك مكانك انزين .

طالعه الولد الصغير وهو يحرك راسه طاعة لكلام أحمد . الضابط وليد قعد يلتفت ويدور على أحمد بس مو لاقيه بأي مكان ,, نادى على الشرطي سعد بصوت عالي : ما شفت الضابط احمد ؟
الشرطي : لا سيدي ما شفته .

استغرب وليد وقعد يسأل نفسه وين راح وين ذلف حده مو وقته , وخاف انه سوى شي متهور لان احمد كان يحب المغامرة بصورة جنونية ,, فجأة سمع الجيران ملتفين ورى البيت عند الحديقة وقاعدين يصارخون , جمع الضابط وليد فرقته وراح صوب التجمع , ودخل وشاف احمد يحاول انه يدخل بين النيران لكن ماقدر . وليد نادى على احمد : احمد وخر لاتتهور المطافي قايمين بالواجب .

لكن احمد لاحياة لمن تنادي , معطيه طاف , راح احمد ونزع قميصه وربطه على خشمة وقط نفسه بين الممر اللي كانت النيران تحاصره ,, شاف الولد الصغير وحضن احمد وقاله احمد : لاتخاف احنا راح نطلع بس ابي منك طلب .

الولد الصغير واهو يبجي : شنو

احمد واهو ماسك الولد : ابيك تكون بطل وتتمسك فيني حيل وتنزل راسك وتحطه بين صدري عشان النار ما تحرقك .

الولد الصغير سمع الكلام وسوى نفس ماقال عنه احمد .... وراح احمد واهو يركض والنيران تلسعه وتحرقه قدر بفضل الله انه يطلع الولد وينقذه ويوصله لبر الامان ,, ركض له الضابط وليد وفرقته وخذوا الولد واحمد طاح مغشي عليه متأثر من نقص الاكسجييييين وانصدم الضابط وليد لما شاف نص رقبة احمد محترقه وصدرة متأثر بالجروح مع ظهره ,, على طول وصلوا الاسعاف واسعفوا احمد ,, وتمت العمليه بنجاح وانقذوا الاسرى المنكوبه والكل كان يشهد على موقف احمد البطولي واللي ضحى بحياته عشان هالولد .

وصلت الاسعاف للمستشفى على طول دخلوا احمد للعناية المركزه اللي كان متأثر بالجروح وكان فاقد الوعي نتيجة نقص الاكسجين .

***

كان ابو احمد ونواف وابوه والعايله كلها مجتمعين كلهم في المزرعه ,, سوالف وضحك ,, لولوة كانت فوق مانزلت ,, نواف كان بنظرات عيونه يدور على لولوة وحس بضيقه لما درى ان لولوة مو موجوده معاهم .
دق موبايل ابو احمد والكل سكت عشان يرد على الموبايل .
(( ألو , نعم ))
(( أي نعم معاك ابو احمد ))
(( شنو ,, أي مستشفى ,, ها الحين جاي مع السلامه ))

الكل التفت على ابو احمد اللي كان منصدم ,, ابو نواف ونواف قاموا معاه والكل : خير شفيك شصاير .

ابو احمد واهو متوتر ويطالع ام احمد : أحمد ولدي بالمستشفى .

ام احمد قعدت تصيح وجدته والكل انهار , ابو نواف ونواف راحو على طول مع ابو احمد , لولوة اسمعت الصراخ ونزلت على طول واهي تسأل عمتها شالموضوع وقالت لها على السالفة

منى واهي تطالع اختها بنظرة حقد : يعني يهمج احمد ,, شدعوا دريتي عنه ..

لولوة واهي بموقف دفاع : عمر الظفر مايطلع من اللحم يامنى . راحت لها ام احمد واهي تمسك يدها بقوه : كل المصايب والبلاوي منج يام النحس , من جيتينا واحنا محتاسين.

لولوة وعيونها تدمع : انا ماسويت شي ,, شسويت لكم عشان تعاملوني بالطريقه هذي .

عمتها فاطمه راحت لام احمد ووخرت ايدها وقالت لها : عيب عليج يا ام احمد ماله داعي هالكلام هذا , لولوه بنتنا واحمد اخوها . , وام احمد تصارخ على لولوة : اطلعي من حياتنا عوع مانبيج يا ام البلاوي .

على طول لولوة ركضت و اصعدت ولمت اغراضها واهي تبجي ودقت على خالها ابو خالد وطلبت انه يجيها الحين لان خلاص تحملت المذله والمهانه عشان خاطر ابوها .

صعدت لها عمتها وشافتها لامه اغراضها وتبي تروح : خلاص يالولوة لاتسوين جذي بنفسج

لولوة واهي تشهق : بس ياعمه خلاص تحملت عشانج انتي وابوي بس مالي قعده اهني خلاص بروح لامي .

فاطمه واهي تشوف جنطتها : شنو تروحين الحين الساعه 10 بالليل ماكو روحه يالله .

لولوة واهي تمسح دموعها : اصلا اتصلت على خالي وكاهو جاي بالطريق , ماعليه عمه سلمي على ابوي وكان ودي اشوف احمد واقعد معاه بس مالله لي هالشي والله يشفيه انشالله وبليز عمه طمنيني عليه .

وصل خالها بعد ساعه ودق عليها تلفون , وامرت الخدم انهم يشيلون اغراضها سلمت على عمتها وجدتها وراحت .......

خالها : عسا ماشر شصار .

لولوة بنظرة حزن : ماصار شي ياخالي , اتمنى انك ماقلت لامي.

ابو خالد : لا يالولوة مستحيل ماراح اقولها ,, بس شصاير !

طبعا لولوة قالت له كل شي واكتفى في ان يقول : حسبي الله ونعم الوكيل .

***

في المستشفى قسم الحروق وبالتحديد قسم العناية المركزية ,, توجه ابو احمد واخوه ابو نواف ونواف معاهم لغرفة أحمد ,, شافوا احمد محاط بالاجهزه ونص وجهه وصدرة كله لافينه بالشاش الابيض .. دمعت عين ابو احمد لما شاف ولده بهالمنظر هذا وعلى طول راح نواف لدكتور أحمد وبدا يستفسر عن حالته المرضية والدكتور فهمه ان حالة احمد مستقره بس للأسف ان آثار الحروق راح تبقى فيه .

توجة نواف لابو احمد : ياعمي الحمدلله على كل شي واذكر الله , وقدر الله وماشاء فعله .

ابو احمد : الحمدلله على كل شي ,, ياولدي شقالك الدكتور ؟

نواف واهو يحك راسه : والله ياعمي قال ان حالته مستقره ومعطينه منوم بس اثار الحروق راح تبقى معاه .

ابو احمد وهو متكدر : اللهم لك الحمد والشكر ,, ياولدي روح انت وابوك وارجع المزرعه وانا بتم شويه عند احمد وبرجع .

نواف : بس ياعمي ماني مخليك بروحك , انت روح ارتاح وانا اتم عند احمد .

ابو احمد وهو مصر : لا روح الحين مع ابوك , المزرعه مافيها الا محارمنا وروح خلك عندهم.
توجه نواف هو وابوه للمزرعه وكان الكل ينتظرهم عشان يتطمنون , دخلوا من البوابة الرئيسية واتجهوا لصالة الاستقبال ولقوا الكل قاعد ينطر .. ابو نواف بدا يقول لهم عن حالة أحمد ,, والكل تضايق وتأسف عليه لكن ملامح منى كانت عادية بالنسبه للموقف وكانت عيونها على نواف ,, ونواف كان بعيونه ونظراته يدور على لولوه بس ماشافها ,, كان وده يشوفها الحين وبهاللحظة هذي حس انه مشتاق لها بس للأسف مالقاها ,, شاف منى تطالعه وتخزه استغرب من نظراتها وقال لها : خير فيه شي يابنت العم .

منى طاح وجهها وقالت بصوت شبه مسموع : سلامتك ياولد عمي .

ابتسم نواف بسخريه واستهزاء وقال لها : ما اشوفج متأثره من سالفة احمد ..

منى واهي تلقط وجهها : ها .. اممم.. أي صح اكيد اخاف على اخوي .

نواف طالعها فوق تحت : خير انشالله .

وطلع على طول راح للمجلس بس نادته عمته فاطمه : نواف بالذمه شلون احمد الحين ؟ لاتحاول تجذب علي .

نواف واهو منزل راسه : والله ياعمتي احمد حالته مستقره ولله الحمد بس للأسف آثار الحروق راح تتم فيه .

فاطمه واهي تدمع عيونها : ياحسرتي عليك يا احمد , والله انك ماتستاهل ياولد اخوي .

نواف واهو يحضن عمته : اذكري الله والحمدلله الحرووق مو بوجهه , بصراحه ياعمتي ماتوقعتج جذي ,يلا عاد لاتضيقين خلق خالتي ام احمد .

فاطمه واهي تمسح دموعها : شدعوا عاد تهتم بولدها احمد , لا هي ولا خواته ماقول الا حسبي الله على الظالم .

نواف واهو متعجب من اللي سمعه : معقوله ام ماتهتم لولدها ؟!!!

فاطمه : اصلا يانواف احمد دايم يعاني من طريقة تعامل امه والكل معاه , يحسسونه كأنه منبوذ ولاذاق طعم الحنان منها , احمد غير عن اهله وطيب ولايستاهل .

نواف انجرح لما سمع هالكلام , ولو كان يدري كان واسه ولد عمه احمد ... طرا على باله لولوه وحاب يسأل عمته عنها : اقول عمه ,, لولوه شلون علاقتها مع احمد .

فاطمه : لولوه المسكينه ماقصرت , كان ودها تشوف احمد وتقعد معاه لكن مالله كتب , حتى نسيت اطمنها عن احمد خل اتصل فيها .

نواف : تتصلين فيها ليش اهي وينها الحين ؟

فاطمه واهي تقعد على الكنبه : ايييي انت ماتدري شصار يوم رحتوا للمستشفى ؟
نواف بأهتمام كبير : شصاير قولي لي بالتفصيل .؟

طبعا شرحت له فاطمه عن كل شي وطلبت انه مايقول لبو احمد .. نواف عصب وحس بضيقه وقال بعصبيه : ليش جذي يعاملونها واهي شذنبها , هذا شي بأمر الله .؟

فاطمه واهي تقوم : هذا وهم خواتها من لحم ودم لعوزها وبهذلوها ماقول الا حسبي الله عليهم.

طلعت الموبايل وبدت تتصل على لولوة وكان نواف قاعد عندها ماتحرك , وبدت تكلم لولوه وتطمنها على اخوها احمد وسألت عنه وين أي جناح راقد وقالت لها فاطمه انها ماتعرف مما نادت نواف وخلته يكلمها .

نواف : ألو ,, هلا لولوه شخبارج ؟

لولوة بنعومه : ياهلا نواف بخير الله يسلمك انت شلونك ؟

نواف : بخير الحمدلله,, ليش يالولوه تروحين واحمد بحاجه لج .(( نواف كان يقط نغزة لها بس اهي مافهمته ))

لولوة بضيقه : ادري طريقتي ماكانت حلوه اني اطلع جذي بس لاتلومني يانواف اللي صار مو شويه لي واحمد انشالله انا ماراح اقطع فيه مهما كان اخوي وانا باجر الصبح بزوره .

نواف : خلاص باجر الصبح تعالي وانا راح انطرج عند باب المستشفى واوصلج لاحمد بس لاتطلعين بروحج اخذي معاج احد .

لولوه منحرجه : مشكور يانواف ماقصرت معاي ادري تعبتك

نواف بأبتسامه : ولو انتي بنت عمي ومابينا شكر .

واستأذنت منه وسكرت الموبايل . وكان يتمنى انها ماتسكر ويظل يسمع صوتها وهمساتها ,
وسألته عمته فاطمه : نواف بتروح باجر مع لولوه لاحمد ؟ واذا رحتوا متى بتروحون ..؟

نواف : أي نعم , وانشالله الصبح , بتروحين معاي ؟

فاطمه بتردد : ما اعتقد اقدر الصبح , بس شلون تعرف انها وصلت ؟؟؟ وانت تدري المستشفى مليان شباب .

نواف : والله مادري ياعمه نسيت اسألها متى تكون موجوده .

فاطمه واهي تقوم : شوف خذ رقمها ودق عليها وشوف بنت عمك انزين .
استانس نواف : انشالله عمتي . استأذن من عمته فاطمه وراح لغرفته يرتاح فيها .

أشرقت شمس الصباح , ونواف طالع ساعته بعيون نعسانه لقاها الساعه 7 الصبح , قعد من النوم وراح اخذ له شاور عشان ينتعش , نشف شعره حيل واحتار شنو يبي يلبس فقرر انه يلبس كاجوال بنطلون جينز وبلوزة قطنيه لونها بني مع كاب بالخلف كان شكله بسيط وحلو وشكله ملفت للنظر نظرا لوسامة نواف , لبس نظارته الطبية ونزل للمطبخ وطلب من الخدامه تسوي له عصير برتقال طبيعي فرش , وتوجه الى المجلس وقعد يفكر في لولوه وابتسم بينه وبين نفسه , دخلت منى وكانت لابسه تنورة لونها زيتي وبلوزة اصفر بزيتي مع شيله لونها اسود وكانت حاطه مكياج خفيف , رفع راسه يبي يشوف منو اللي دخل عليه لقى منى مبتسمه ومتوجهه له : صباح الخير نواف .
نواف من غير نفس : صباح النور . منى واهي تقعد قباله : ها ياولد عمي تريقت , تبي اسوي لك ريوق .

نواف واهو يطالع التلفزيون : لا مشكوره لاتعبين نفسج , ماحب اتريق الصبح .

منى بدلع : نواف ماقلت لي شرايك بترتيبات العشا والمجلس ترا انا اللي اشرفت عليهم .

نواف طالع منى بنظره خلت وجهها يطلع الوان : اعتقد الحين مو فاضين حق هالسوالف هذي , اخوج احمد بالعنايه المركزة ولا سألتي عنه جايه تسأليني عن الخرابيط .

منى وانقص وجهها : لا انا اصلا كنت ابي اسألك عنه واليوم بنروح له كلنا بنزورة .

نواف لاعت جبده وقف وقام بيطلع : انا استأذن تامرين بشي .

منى قامت معاه : وين ياولد عمي , خلك شوي قاعد .

نواف بدون مايلف عليها : يالله مع السلامه .
الجزء السادس

طلع نواف من الفيلا وركب سيارته الرنج روفر متوجه الى المستشفى وشغل طبعا أغنيتة المفضله بين ايديا وعلاّ عليها , وابتسامته تشق وجهه ,, اخيرا بيشوف لولوه , اشتاق لها , ويحس براحة كبيرة لما تطري في باله .

وقف سيارته بالباركينق , ونزل منها , ودخل المستشفى ومر على ولد عمه أحمد مالقاه بالعناية المركزه خاف واختبص قلبه وراح على طول لدكتوره وقاله ان حالته أحسن من اول وانقلوه للجناح وهو الحين نايم تحت تأثير المخدر , ارتاح لكلام الدكتور وابتسم وتوجه للجناح وشافه نايم وحمد ربه انه بخير , ونزل تحت للكافيه مال المستشفى وبدا يشرب كوفي لاتيه مع كرواسون بالجبن , مر الوقت بطيء على نواف ومل انتظار لولوة طالع ساعته وشافها الساعه 9 , طلع موبايله واتصل على لولوه ورن موبايلها .

بهالحزه كانت لولوه تتجهز وألبست لها عبايه راقيه وحلوه وفيها على اطرافه نقش ناعم وشيلتها نفس الشي , حطت لها مسكره وغلوس خفيف وكانت في منتهى النعومه والذرابه , اسمعت تلفونها يرن ويرن وشافت المتصل ولقته رقم غريب فقررت انها ترد عشان تشوف منو : ألوووووو نعم .

نواف : صباح الخير لولوه شخبارج .

لولوه واهي رافعه حاجبها : نعم منو انت اخوي ؟

نواف واهو يبتسم : ماعرفتيني يابنت العم , انا ولد عمج نواف .

لولوه ارتاحت : هلا نواف , صباح النور , اسفه ماعرفت الرقم .

نواف : توقعت هالشي , على العموم انا بأنتظارج بالمستشفى من الصبح .

لولوه واهي تبتسم : يلا كاني بس مسافة الدرب .

نواف واهو يمسح على شعره : خلاص اذا وصلتي تلقيني بالكافيه اللي بالمستشفى .

لولوه : انشالله على خير يلا مع السلامه .

صكرت لولوة التلفون ونزلت تحت وشافت امها وصبحت عليها بالخير وباست راسها وقالت لها : يمه انا قلت لج اني بروح لاخوي احمد بالمستشفى .

ام لولوه واهي تشرب شاي : مايخالف يابنتي روحي هذا اخوج , بس لاتصيفين اهناك .

لولوه واهي تلتفت : وين ضحى ابيها تروح معاي , قلت لها من امس .

ام لولوه واهي تبتسم : وييييييييي ضحى تلقينها طاقتها نوم .

لولوه واهي معصبه : تسويها هالخايسه , بس ماعليه انا اوريها , خل اروح لاني تأخرت حدي .
اطلعت لولوه من البيت , ووصلت المستشفى ووقفت سيارتها بالباركينق , وتوجهت إلى المستشفى والتفت يمين يسار وشافت نواف قاعد بالكافيه , لمحها من بعيد وابتسمت له وراحت صوبه : هلا نواف لايكون طولت عليك ؟

نواف واهو يوقف قبالها : لا عادي بالعكس , تفضلي اطلب لج قهوه .؟

لولوه واهي تطالع ساعتها : لالا مابي اتأخر .

نواف بأبتسامه : ماراح تتأخرين , يلا انا اصلا ناوي اعزمج على قهوه ؟

لولوه بأنصياع : خلاص انا ابي هوت جوكلت .

ألتفت نواف للجرسون وطلب منه هوت جوكلت , ومن ثم التفت على لولوه وشافها متوتره : عسا ماشر لولوه شفيج ؟

لولوه بأرتباك : مافيني شي نواف بس مو متعوده على جذي , وانا جايه بس ابي اشوف اخوي احمد واتطمن عليه .

نواف واهو مانزل عيونه منها : اذا يحرجج هالشي مو مشكله نمشي ونروح , بس انا قلت انج تشربين شي على الاقل افضل وبعدين نشوف احمد . لولوه واهي تتعبث بنظارتها : على رايك .

نواف يبي يكسر الحاجز اللي بينهم : انا مو قلت لج لاتجين الا معاج احد ؟

لولوه طالعت عيونه : ماحصلت احد يروح معاي , واكيد قلت لامي وامي اسمحت لي بس قالت لي لاتتأخرين , حتى توصل لك سلام وتبارك لك لو انها متأخره .

نواف بأبتسامه : الله يبارك فيها , ماقصرت خالتي فيها الخير والبركه ,الله يطول لج بعمرها.

لولوه ابتسمت وطلعوا غمازاتها : الله يسلمك ويخليك .

وصل طلب لولوه واشربت بتروي وكل هذا ونواف ماشال عيونه منها , شاف ملامحها عن قرب , حلوه لا مو حلوه اكثر من الحلا نفسه , اسحرته بنت عمه بجمالها وهدوئها ولباقتها , انتبهت لنظرات نواف مما زاد ارتباكها قالت بصوت متوتر : يلا مشينا .

على طول وقفت ومسكت جنطتها وهو وقف ودفع الحساب ومشى قدامها , كانت تمشي وايدينها على قلبها , خايفه من ردة فعل اخوها .. هل يتقبلها؟ او لا .؟

وصلت للجناح واوقفت عند باب غرفته ونواف دخل لاحظ انها للحين واقفه توجه نحوها وقال لها بصوت كله حنيه ورومانسيه : لولوه يلا تعالي لاتخافين انا معاج .

لولوه ارتاحت من كلام نواف ودخلت الغرفه , وشافت اخوها احمد نص جسمه لافينه واجهزة التنفس موصوله فيه , قربت منه وبدون شعور دموعها بدت تنهمر على حال اخوها ولا على لحظة لقاها حق اخوها , حست انه بحاجه لها , حست بأحتياج الاخوه مع بعض , حست بمشاعر متضاربه , بكت بهدوء واهي ماسكه ايد اخوها , شافها نواف,, شاف دموعها , حس كأن انطعن لما شاف هالدموع هذي على وجه الملاك , قرب منها نواف وقال لها بهدوء : انا ابيج تكونين اقوى يالولوه احمد الحمدلله مافيه شي واحسن من اول .

لولوه وصوتها مبحوح من البكي : كان ودي اشوفه غير هالمكان , مو قادره اشوفه بهالوضع يانواف , يصعب علي شوفته جذي .

نواف بأبتسامه تدوخ : لو يدري انج موجوده وانج عنده وبقربه جان يشكر ربه لانج اخته , يابخته والله , والحين امسحي دموعج مابي اشوفهم مره ثانيه فاهمه .

ابتسمت لولوه وامسحت دموعها وقربت من اخوها وباست جبينه واقعدت بقربه واهي تقرا عليه آيات قرآنيه , هالموقف هذا هز كيان نواف , ياربي وشكثر يحبها .

أحمد كان يحس ان فيه احد حوله , فتح عيونه بتكاسل , شاف نواف ومعاه وحده , ابتسم نواف لما شاف ولد عمه : ها ابو شهاب شخبارك الحين .؟؟؟

لولوه بسرعه ألتفتت وشافت وجه اخوها وابتسمت : الحمدلله على سلامتك ياخوي خطاك السوء .

أحمد بصوت تعبان : منو أنتي .؟

نواف على طول رد : هذي أختك يا أحمد , اختك لولوه .؟

أحمد واهو يطالع لولوه اللي دموعها بدت تنهمر من جديد ": أختي لولوه .

لولوه واهي تمسح دموعها وتمسك ايد اخوها : أي يا أحمد انا اختك لولوه , شخبارك ياخوي والله كان ودي اشوفك من زمان .

أحمد بأبتسامه والهالات السوداء محيطه بعيونه : وانا كان ودي اشوفج من زمان .

لولوه واهي تبوس راسه : الله لايحرمني منك ياخوي .

أحمد يبي يمازحها : تو ادري ان عندي اخت حلوه .
ضحك الكل ولولوه انحرجت طبعا بس ضحكت على اخوها , واحمدت ربها ان اخوها تقبلها عكس العقارب خواتها , دخل عليهم ابوها وسلمت عليه لولوه .

أبو احمد : واخيرا يا احمد شفت اختك لولوه .

أحمد : الحمدلله يايبه اني شفتها وعرفتها .

لولوه منحرجه : خلاص عاد بسكم ترا ماستحمل .

ضحك ابوها واحمد ونواف , انتبهت للساعه شافتها الساعه 11 تأخرت حيل , أستأذنت من ابوها واخوها عشان تروح .

أحمد : تو الناس لولوه قعدي معاي شوي .

لولوه : انشالله راح ازورك باجر الصبح وراح اتغدى بس الحين لازم اروح تأخرت على أمي وهي موصيتني ارد مبجر .معاك بعد

أبو احمد : خلها يابوك , البنت تأخرت وباجر انشالله تجيك , قومي يابنتي وسوقي شوي شوي بالسياره وانا ابوج . نواف وانا عمك رح وصل بنت عمك للسياره ؟

لولوه وهي تسلم على ابوها : انشالله يا يبه ولا يهمك .

وتوجهت لأحمد وقالت له : دير بالك على نفسك ترا انت غالي وباجر ترا غداي عندك انت فاهم . واضحكت وطلعت وطلع معاها نواف .

مشى نواف بجنبها والتفت لها وشافها منزله راسها : ها لولوه تطمنتي على احمد .؟

لولوه واهي منزله راسها : أي الحمدلله , ماتوقعته يتقبلني .؟

نواف باستغراب : ليش مايتقبلج يالولوه انتي اخته ولاتخلين هالكلام براسج .

لولوه واهي تبتسم وتطالع نواف بنظرة كلها حنان : توي الحين عرفت شلون احساس الأخوه , فعلا احساس حلو .

وصلوا لسيارة لولوه , واركبت السياره ونزلت الجامه : نواف مشكور على كل شي سويته , وشكرا على القهوه .

نواف نزل لمستواها وطالعها بعيونه الحاجه : العفو ,, وانتبهي على نفسج يالولوه , بس ممكن طلب ؟
لولوه بأبتسامه : تفضل امرني .

نواف واهو مركز عيونه على عيونها : ابيج تطمنيني لما توصلين البيت , على الاقل دزي لي مسج .

لولوه وخدودها حمر : انشالله .

ياترى هل هذي بداية لمشوار طويل بين نواف ولولوه . !!!!!!!!!!!!!!!

***
في غرفة بدور ,, كانت قاعده تختار لها بدله عشان تلبسها لان بيت خالها بيجون يباركون حق هدى وبعد عشان احتمال تشوف حبيب القلب خالد , واهي قاعده تشوف لها بدله دق موبايلها على النغمة المخصصه لخالد وهي ( نغمة نانسي اللي كان ) ابتسمت وتوجهت للسرير وردت بصوت هادي : ألوو
خالد : هلا بأحلى الوو والله , شخبارج حبيبتي
بدور حمرت : بخير حبيبي وانت شلونك ؟
خالد : بخير دامني سمعت هالصوت والله .
بدور : بس عاد خالد استحي ترا .
خالد : أخخخ بس متى اتخرج واتوظف واجيج طيراااااااان واخطفج .
بدور : وي بسم الله علي شنو انخطف ؟
خالد واهو يبي يحرها : ماتبيني اخطفج , خلاص اخطف غيرج .
بدور واهي مسويه نفسها زعلانه : لااا تخطف غيري مو مشكله روح اخطف غيري بس هذا وجهي ان كلمتك اليوم كله .
خالد واهو يضحك : شدعوا حبيبتي ليش زعلانه
بدور وبدون ما تعطيه جواب على طول سكرته بوجهه وقالت واهي واقفه هين اوريه الخايس .
واختارت لها تنورة جينز قصيره طولها للركبه وبدي بيج مع ذهبي وسيحت شعرها وانزلت تحت عند امها .

بدور واهي تبوس امها : يمه شحلاتج تهبليييين يا ام بدر .
ام بدر : حلاي ماخذته من بنتي الاموره الحلوه .
بدور واهي تبتسم : وين العروسه ما تنشاف صايره .
أم بدر : رايحه مع لولوه تجهز للعرس .
بدور واهي مبرطمه : ليش ماقلتي لي عشان اروح معاهم .
أم بدر : وتخليني بروحي ويهون عليج تخلين امج بروحها وبيت خالج بيزورنا .
بدور واهي تحظن امها : اموت ولا اخلييييييج يا احلا ام بالدنيا .
أم بدر واهي تلم بنتها : انشالله اشوفج عروسه وافرح فيج نفس اختج .
بدور انحرجت ونزلت راسها واستأذنت من امها عشان تجهز الحلا والقهوه .

***

الساعه 1 الظهر , نورة خلصت آخر محاضراتها وتذكرت البروجكت اللي قدمته حق دكتورها المتعجرف ولازم تروح لمكتب الدكتور عشان تعرف جم عطاها على البروجكت , بس مالها خلق حق تعجرف دكتورها ونفسيته الخايسه بس مضطره تروح عشان تعرف نتيجتها , مشت ومشت ووصلت لقسم الادب الانكليزي ووقفت عند الباب متردده تدخل ولا ماتدخل , ورفعت راسها واهي تقول : ياربي ياربي سهل لي ولاتخليه يعصب علي ولا يزفني . خذت نفس قوي وطقت الباب بهدوء والدكتور من ورى الباب وبصوت عالي : تفضل .
سمت بالرحمن ودشت : السلام عليكم دكتور .
الدكتور وهوا يقرا بالاوراق بدون مايرفع راسه : وعليكم السلام , نعم .
نورة واهي تقول بنفسها (اوف بدايتها نفسيه الله يستر) : عفوا دكتور بغيت اعرف درجتي بالبروجكت جم ؟
الدكتور واهو يطالعها بنظاراته الكبيره : اسمج ؟
نوره عطته اسمها الكامل , و قال الدكتور : درجتج 19 من 30
نورة بققت عيونها وشوي تدمع : ليش دكتور والله تعبت عليه وكان الافضل بالكلاس .
الدكتور بعصبيه : شنو تعلميني انتي شلون اعطي الدرجات , البروجكت ماكان قوي يعني مكرر .
نورة واهي تدري ان مافي فايده من المجاراة : بس دكتور اعتقد انه كان حلو وقوي والكل يمدح فيه .
الدكتور واهو يطالعها بنظرة شريه : أعتقد انا اتكلم عربي , ولوسمحتي عندي شغل وطلعي وصكي الباب وراج . ورد يطالع بأوراقه واهي مغتاظه منه , راحت اطلعت على طول من المكتب وصكرت الباب بقوه من الحره اللي فيها وانزلت دموعها غصب عنها , والله ظلم حرام عليه يعطيني درجة جذي ومعدلها راح ينزل والسبه هالدكتور الظالم , تعبت وانا اسوي البروجكت , واقعدت على الكرسي اللي عند القسم , واحمدت ربها ان مافي احد نظرا لان الظهر والطلاب اغلبيتهم بالكافتيريا اما الاقسام كانت فاضيه ونزلت راسها على كتبها واهي تحاول تخفف من دموعها , رن موبايلها وشافت المتصل بدور , اتصلت بالوقت المناسب , ردت بصوت مبحوح : ألو , هلا بدور
بدور : اشفيج نوره , انتي قاعده تبجين .
نوره وقد اطلقت العنان لدموعها : شفتي يابدور البروجكت اللي تعبت عليه عطاني عليه درجة تفشل , معدلي بينزل والسبه هالظالم .
بدور واهي خايفه على بنت خالها : خلاص نوروه حبيبتي ماعليه لاتضايقين نفسج وانشالله تعوضين باللي جاي , انتي وينج الحين .
نوره : انا بقسم الادب الانجليزي قاعده ,, تعالي لي بدور
بدور : نوره انا مارحت اليوم الجامعه عندي اوف , يلا تعالي ردي البيت عشان تجينا مع الاهل بالمغرب .
نوره واهي تمسح عيونها : خلاص انا انطر خالد يجيني او ضحى وهم بيتصلون علي , يلا سلام .
بهاللحظة كان زياد مار على القسم ولمح نورة قاعده وعيونها حمر وماشاف احد عندها واستغرب ان القسم فاضي وهدوء , قرب منها وصار قبالها : عسا ماشر اختي اقدر اساعدج ؟
نوره بدون ماترفع راسها : لا مشكور اخوي مابي شي .
زياد أصر على ان يعرف شنو فيها لان قلبه يعوره واهو يشوفها منكسره : بس حالتج ماتطمن , اذا عندج مشكله مع دكتور ولا شي , يمكن اقدر اساعدج او افيدج على الاقل .
رفعت راسها وشافته : انـ .. انت انت
زياد واهو يبتسم : أي انا انا
نوره واهي تلم كتبها : قلتلك اخوي مابي شي شكرا .
زياد : نوره ( وكان اول مره تسمع اسمها منه ) ليش تعامليني جذي كأني مرض تبتعدين عنه .
نوره واهي تطالعه : اشلون عرفت اسمي , ومن سمح لك تقول اسمي بلسانك .

زياد بلباقة : احنا داخل صرح جامعي والكل يعرف اسماء الطلاب والطالبات ولاتنسين انج معاي بمحاضرة اساسيات اللغة الانجليزيه وانتي ماتدرين اني موجود معاج واشوفج واراقب حركاتج . نوره وهي مواجهته وبنبرة حاده : مالك أي حق انك تشوفني وتراقب حركاتي واعتقد ماله داعي , اذا تبي تتحرش في بنت , هذيلا شكثرهم الوان واشكال ولبس وخرابيط شوف لك وحده منهم اما انا لاتعتقد بمجرد الاعتقاد اني راح اميل لك او تمشي علي فلمك .

زياد وهو ناوي ينهي ويهد الجبل اللي بينهم : انتي ليش ماخذه موقف مني , ليش تقولين لي هالكلام , ليش ماخذه فكرة عني غلط اني راعي بنات وخرابيط , غيري فكرتج عني لو سمحتي .
نوره بنظرة احتقار : يبا انت كلك على بعضك ماهميتني , وقامت تبي تمشي , وزياد وقف بطريقها وقال بنبرة حادة وعصبيه : شوفي يابنت الناس . رايج فيني ما احطه بالاعتبار ولا همني بس انا كنت ابي اساعدج لوجة الله وبس لكن انتي ماتستاهلين أي مساعده من احد , يامعقدة .
وطلع بسرعه بدون مايلتفت لها . اما اهي انصدمت وقفت مكانها مذهوله ,شلون يتجرأ ويقول لها هالكلام , بس لامت نفسها شلون عاملته جذي واهو نيته طيبه , سكتت واتصلت عليها ضحى عشان تطلع لها بسرعه ويردون البيت .

***

تزعـل واراضيـك واتلـذذ بتزعيلـك
تبي الصراحه انـا مجنـون زعلاتـك

واحاول ارضيك ومدري منين ابديلـك
واحتار واذكـرك فـي بعـض زلاتـك

واستسمحك واعذرك واسمعك واشكيلك
واتلهـف لبسمتـك ورد ضحكـاتـك

يسرقني الوقت ولا يمدينـي احجيلـك
كـلام اللـي تحفظـتـه لشوفـاتـك

تزعـل واراضيـك واتلـذذ بتزعيلـك
تبي الصراحه انا اعشق كـل حالاتـك
)للشاعر حمد السعيد(

كان هذا مسج من خالد حق بدور , اللي قرته وتبتسم ابتسامة انتصار , ياربي والله تحبه وتموت فيه .

***
في بيت أبو احمد , الكل رد من المزرعه , وكانت منى متضايقه لانها تمنت لو تكمل الاسبوع على الاقل عشان تضبط نواف وتخليه يقع في شباكها , لكن حادثة احمد اجبرت الكل يرد , واهي ترتب اغراضها تكلم نفسها : اوووووووووووف ,, صج مو وقته يا احمد . سمعت ابوها يناديها ويصيح بأسمها , على طول خلت اللي بيدها وانزلت تحت تشوف ابوها شنو يبي .
منى واهي نازله من الدرج : هلا يبه أمرني .؟
ابوها : يلا زهبي نفسج بنروح كلنا لاخوج بالطبيب .
منى وهي مبوزه : يبه مارتبت اغراضي للحين , نروح له العشا احسن .
ابوها وهو معصب عليها : ولا كلمه , الحين روحي زهبي حالج وامشي جدامي , في وحده ماتبي تتطمن على اخوها انتي شنو مافيج احساس .
طالعت امها بنظرات استنجاد , لكن امها هزت اكتافها بقصد ماباليد حيله , اصعدت على طول لغرفتها واهي تصك الباب حيييل وشافت اختها مي تلبس عبايتها وشيلتها واسألتها مي : خير شفيج بعد معصبه .
منى : ابوي لا يطاق صراحه , يعني لاحقين على احمد وين بيروح ياحسره كله بالمستشفى قلت له بنروح له العشا مارضى .
مي واهي تطلع من الباب : يامعوده امشي خل نروح لا يحطون علينا سوالف .

***

في مجمع المارينا مول , كانت لولوه وهدى يتسوقون ويتنقلون من محل لمحل , لولوه واهي تعبانه عالآخر : هدى بس تعبت ارجولي تكسروا حرام عليج .
هدى واهي متشوقه وتشوف محل الاكسسوارات : لولو بس هالمحل خل ندشه وبعدين بعزمج على كافيه يلا حبيبتي .
راحت هدى واسحبت يد لولوه اللي يالله تمشي من التعب , وشرت هدى اكسسوارات عجيبه وحلوه , واخيرا خلصت هدى من التشري , واهي تطالع لولوه وتضحك : خلاص يا انسه لولوه خلصت والحين امشي خل نشرب لنا كافيه وناكل لنا كيك معاه .
لولوه وهي مستانسه : أي ابي اخسرج بالكافيه كل شي بطلبه على حسابج .
هدى واهي تمسك ايد بنت خالها : ولا يهمج , جم لولو عندي .
راحوا اقعدوا على طاوله وطلبوا كابتشينو مع كعك بالجوكلت .
هدى بنظرة تفحص حق الطاوله اللي جنبهم : اتصدقين لولو هذا لاحقنا من اول مادخلنا المجمع ومانزل عينه منج .
لولوه بلا مبالاه : عادي مافي شي جديد كل ماروح مكان تلقين ورااااااي سرب مو اوادم هههههههههه متعوده يا اختي .
هدى واهي تضحك : أكيد ماينلامون , احد يشوف هالقمر ويخليه .
لولوه وحمر وجهها : شدعوا هدى مو لهدرجه هذي عاد
هدى اتطالع الاغراض اللي شرتهم بلهفه وبفرح , انتبهت لها لولوه وقالت واهي تغمز لها: ها اشوفج متشوقه عشان تلبسينهم حق حبيب القلب .
هدى واهي تلكز يد لولوه : جبي يالخايسه لاتقولين جذي ترا استحي .
لولوه تضحك : يختي فديت اللي يستحون .
هدى وبنظرة دافئة تميل للحزن : اتصدقين يا لولو , احس اني خايفه وانا مقبله على حياة ما ادري عنها شي , مرات تجيني افكار اقول يمكن فارس مايبيني يمكن مجبور علي , لان بصراحه لولو ماشوفه متشوق لي .
لولوه واهي تحاول تطمن بنت خالتها هدى : شيلي هالافكار من راسج حبيبتي , أصلا من حسن حظ فارس انه ارتبط فيج لانج انتي نفس الالماسه مو أي احد يمتلكها يا هدى , وبعدين شي طبيعي تفكرين جذي لان هذا من التوتر والقلق , واذا تقصدين الحب صدقيني بيجي بعد الزواج
هدى واهي تطالع بنت خالتها بنظرة تفحص : لولوه ماجربتي الحب .
لولوه واهي تقولها بصوت عالي : اعوذ بالله .
وتموا يضحكون على بعض
هدى واهي تبتسم :تصدقين الحب حلو واحساسه أحلا .. احس اني اموت على فارس مع اني ماعشت وياه بس بمجرد انه زوجي .
لولوه واهي اطق الطاوله : احلا احلااااااااااااااااا يابخت روميو فيج
هدى واهي تمسك ايد لولوه : والله يالغاليه اتمنالج كل خير , واتمنى من اللي يبوق قلبج شخص طيب وحبوب و يستحقج وطبعا طبعا حلو نفسج .
لولوه بأبتسامه ناعمه : تسلمين ياقلبي والله يسمع منج.

ادفعوا البنات وخذوا اغراضهم واطلعوا من المجمع وراحوا للسياره
***
لا تبخلود علي بردودكم تمام:wink_smile:

المصدر: منتدى همسات الغلا

j;lgi rwi ,a hg]kdh fu] tvrhi

16-02-2010, 08:55 PM

يسلموووووووووووووووو

يعطيك العافيه يا الغالي

على الطرح الجميل

17-02-2010, 05:21 PM

الله يعافيج بنت وسامحوني على طول القصه

17-02-2010, 05:26 PM

اية واللة طويلة وتعب بعد ذهذي تصلح مسلسل

20-02-2010, 08:38 PM

ادري بس تحملو القصه حلوه
ويسلمو على المرررررررور

24-02-2010, 08:34 PM

اشكرك على القصه الاكثر من رائعه

يسلموو الايادي خيووووووووووو

25-02-2010, 10:10 PM

يسلمووووووووووووو على المروووووووووور

فديتك كرمال عيونك

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
سجل آحسآسك بكلمه.....؟	رحيل!	( إستراحة الأعضـــــــاء والمقهى الأدبي )	914	12-08-2023 08:03 PM
تكمله للموضوع	فارس الهيلا	( همســـــات الإسلامي )	3	02-04-2010 09:48 PM
حاولت انا اكتم عبرتي يوم فرقاه	الحمادي 511	(همســــات شعر وشعراء) منقول	9	12-03-2010 01:45 PM
قصه وش الدنيا بعد فرقاه	القيصر	(همســــات قصص وروايات)	6	04-03-2010 03:37 AM
تكمله قصه وش الدنيا بعد فرقاه والنهائي	القيصر	(همســــات قصص وروايات)	7	27-02-2010 02:52 AM

الإهداءات

تكمله قصه وش الدنيا بعد فرقاه

(همســــات قصص وروايات)