الفرق بين الرجل والمراه بعد الرجوع من حفلة الزواج

الفرق بين الرجل والمرأه بعد الرجوع من العزيمة





أولاً : الاصيله تتحدث مع أختها غنوجه



الاصيله: يوووه فاتك نص عمرك.. توني جايه من العزيمة



غنوجه: وش حطوا؟



الاصيله : يو يو يو ، حطهم يجنن، ما فيه شي ماحطوه ، أول شي الشاهي، فناجيلهم تجنن مزخرفه ومسكاتها ذهبيه ، بعدين القاتوه مدري من فين جايبينها طعمها يجنن وحاطينها في صواني خربزيه وفيها نقط صغيييره لونها أخضر ، والمكسرات تموووووت ، حاطين كل كسرة في كيس! والا العشاء ياربيييييه يهبببببل

(ويستمر وصف الاكل ساعة ونصف)



غنوجه : جت نوف؟



الاصيله : ايوه جت، يالله لبسها يجنن، لابسه فستان وردي مطرز بكرستال بني ، لبسها من جد ياخذ العقل



غنوجه : لايكون نفس اللي لبسته قبل 5 سنوات؟



الاصيله : لا لا هذيك المره لابسه فستان أحمر مو وردي ولا كان فيه كرستالات





غنوجه : أجل شكلها لابسه فستان بنت عمها أريج لاني شايفه اللبس هذا عليها في عرس بنت خالتي

.

الاصيله : ايو والله، يووووه يخزياه، والله انه ماتستحي ؟ لا وأريج تدرين ايش لابسه ؟ اليوم لابسه لبس يقررررف



شكلها اشترته من محل أبو ريالين



غنوجه : وجزمتها؟



الاصيله : ما أدري ماشفتها، تصدقين طول العزيمه وانا احاول اشوف جزمتها لكن ماقدرت، حتى اني يوم طفشت في الاخير رميت شنطتي تحت الكرسي حقها على بالي ما ادري ونزلت راسي اخذ الشنطة عشان اقدر اشوف الجزمة بس ماقدرت، لبسها كان طويل مرة ومغطي رجولها



غنوجه : اكيد جزمتها زي لبسها معفن .. هي دايم كذا ذوقها خايس ...طيب ومكياجها كيف كان؟



الاصيله : وععععع ، مكياجها مخليها اكبر من امها، تخيلي حاطة روج بني، شكله كأنه ديرما مو روج، والله المسكرة بعد يووووووووه مالها داعي، ما ادري مين النذلة اللي حاطه لها االمكياج ، شكلها زوجة ابوها



غنوجه : طيب وتسريحة الشعر



الاصيله :حقت مين؟ نوف والا اريج؟



غنوجه : كلهم

.

الاصيله : تسريحة نوف حلوة، حاطة شباصة فضية وبكلة وردية، ومشابك برونزية والشعر صابغته بلون كحكحي لكنه يهببببل،



غنوجه : كحكحي؟ يعني ايش؟



الاصيله : ماتعرفين الكحكحي يالبدويه؟ هذا لون جديد للصبغات ، اذا شفتيه تجيك الكحه من زينه حتى سألتها وين مصلحه شعرها فيه ورفضت تعلمني النجسة، اما اريج تسريحة شعرها باييييخة، شفتي تسريحة خدامتنا جيناتا وهي تغسل المواعين؟ نفسها بالضبط



غنوجه : على طاري الخدامة؟ خدامة اريج وش لابسه

..

الاصيله : الخدامة لبسها عادي، لكن جزمتها خقااااااااااااق ، تهبل ماكأنها جزمة خدامة، لونها اسود وعليها خيوط فسفورية



غنوجه : صدق والله؟ هذي مو جزمة اريج؟



الاصيله : اي والله؟ وانا اقول وين شفت هذي الجزمة .. هذي جزمتها قبل عشرطعش سنة، اتذكرها شكلها عطتها الخدامة بدل ماتكبها في القمامة.



ويستمر الحش إلى صلاة الفجر



----------------------------------------------------------------------------



ثانياً: الرجل يتحدث مع أخيه



الرجل: السلام عليكم، توني جاي من العزيمة وترا كلهم يسلمون عليك كثيرالسلام



اخوه: الله يسلمك ويسلمهم



انتهت المحادثة

المصدر: منتدى همسات الغلا