" النفـ. الضائعه .ـس " الكاتب . سعود العنزي

مساء الاحساس

●●●●

قصة حب جميله

تتكون عن طريق السيطره وحب التملك

بين ( انثى و ذكر )


لاحد يفكر ان حب التملك فقط يكون على اجهزه

فون ولا سياره ولا ادوات يحتاجها

في ناس تحب السيطره على ناس معينه

لا تنصدم يحبون السيطره

( اخوانهم وصديقه و حبيبه سوا منو ما كان )


●●●●




حب الولد يكلمها :: يتصل عليها ::




طبعاً هذي البنت






الشاب : الوو نايمه حبيبتي ؟

البنت : اي تعبانه حبيبي وعندي متحان باجر

الشاب : قومي صحصحي شوي وغسلي وجهج

البنت : ساعه 11 بالليل الحين ولازم اقعد 5 الصبح عشان اراجع

الشاب : قومي اقول لا ازعل وعصب عليج عاد مشتاقلج يلا

البنت : طيب طيب بقوم اغسل الحين

الشاب : يلا انتظرك لا طولين




البنت : ها حبيبي طولت عليك

الشاب : لا حبيبتي عشر دقايق راحت شتقتلك فيها

البنت : خجلانه

الشاب : اي اقول بشوفك تقدرين تصوريلي نفسج الحين

البنت : لا ما اتوقع اختي نايمه عندي الحين

الشاب : ها طار النوم منك ؟

البنت : اي حبيبي فديت الي طير النومه مني مع ان عندي متحان باجر ههه

الشاب : اممم يعني مافي مجال اشوفج الحين لو صوره

البنت : لا ما اقدر اعذرني حبيبي باجر ان شاء الله

الشاب : باجر اكيد مو تقولين لا

البنت : اوكي ان شاء الله

الشاب : اوكي وانا الحين بقوم انام تبين شي

البنت : ....

الشاب : الوو قلبي وينج

البنت : معاك معاك بتنام ليش ؟

الشاب : تعبان بعد مرهق حدي

البنت : طيب نوم العوافي

الشاب : بايوو بيبي

البنت : امممم باي



●●●●


تستاهلين يا خبله سحب عليج

قعدج من النومه وراح ينام عشان ماكو صوره

كفو يا صخله وان شاء الله امتحانج صعب بعد هههههه

لا وإذا جيت تبي تنصحه تقولك ( احبه احبه ما اقدر اتركه )


اوكي لا تتركينه شفتي صورتج الي حطيتها فوق المزيونه يوم اقول هذي البنت


ابشرج راح تكونين نفس هذي بضبط ولا ( ابشع بعد )



راح تتعبين صدقيني بشكل مو طبيعي

بتتغير ملامحج من جمال لـ قباحه وبشاعه

بتظهر عليج تغيرات بالنفسيه بين اهلج وناسج بسبته

بعرف : انفاسج : بيده لو حبيتي تعدلين حياتج

بياخذ انفاسج ( بتموتين من بعده ) لا تقصين على عمرج



:: الحب عمره ما صار من هالنوع ::

الحب ( سسسما عالم كبير )

الحب ( احساس ومشاعر قبل لا ينطق بكلامه )

الحب ( عمره ما كان قفص ويحبسج داخله )

الحب ( حرية النفسس )

فا فكري بحياتج وبـ مستقبلج فكري بالانسان

الي يبيع راحته عشانج مو عشان الي يسرق راحه منج

فكري بالانسان الي يدور مصلحتج ويشجعج على الاختبار

مو الي يخليج تفكرين بالاختبار بـ افعاله وترسبين بسبته

فكري بـ الانسان الي حاب يحتفظ بقلبج مو الي يبي صورج ولا خرابيطه



●●●●



ولا الي يحاول يفرض وجوده بين اهله

بـ صراخ و طق و سب و عدم الاحترام

بس عشان يقول ( انا رجال بالبيت )

بس عشان يخلي ( اخته تمشي ع كلامه )

اصلن في ( بنات عقولهم بالحياة يوازنون بلد )

وانت جاي تقولي بعلمها الحياة الصح

( في بنت عقلها يوازن مليون شنب )

ولا إذا جاء يكلم اخته ماكو اسلوب مقنع



تابعو الواقع بين ( بعض ) العائلات


سامي : اسمعي كلام بقوله وما اعيده فاهمه

مشاعل : خير وش في

سامي : جامعه ومن هالخرابيط ماكو سامعه

مشاعل : وطيب وتعبي بالدراسه وين اوديه

سامي : ما يهمني تعبتي ولا ما تعبتي قلت انا ماكو

مشاعل : طيب وش فيها الجامعه مابي اكمل مستقبلي فيها

سامي : انتي تفهمين ولا تبين طراق اعدل ملامح وجهك ؟

مشاعل : طيب شنو تبيني اسوي اجلس بالبيت عقب السنين هذي كلها

سامي : امسكي ارضج بالبيت حالج حال البنات الي ساترين نفسهم بالبيت

مشاعل : يعني لو كنت بالجامعه بجيب الفضايح انا

سامي : اي الجامعه كلها فضايح واقص ارقبتج قبل لا تفكرين فيها

مشاعل : حسبي الله ونعم الوكيل بتضيع حياتي

سامي : طسي يلا سمعتي كلامي وروحي سوي شاي لي

مشاعل : طيب


●●●●


يعني شوفو بالله عليكم عطوني سبب مقنع قاله ؟

ماكو المشكله تدرون شنو ؟

انه يشوف بنات او يسمع عن بنات للاسف غير محتشمات

يفكر ( ان اخته نفسهم لو راحت ) و يا حيف بس على هالتفكير

وتدرون وين المشكله الي تقهر بعد

انه لو جلس مع صديق له والصديق هو الي فر راسه وعقله

يقوله لا الجامعه فيها وفيها وفيها لا تخلي خواتك يدخلونها نصيحه من اخوك

بعد شهور وايام وحركات بين دوران الارض

يجي صديقه ويقوله

اقول سسسسسسامي قولي مبروك

سامي : مبرررروك عسى خير

الصديق : اختي تخرجت من الجامعه وعطتني 3000 ريال

سامي : مششاء الله الف الف مبروك تستاهل والله

الصديق : اي راح تكون ابله ان شاء الله

سامي : اي ياخوك حلو التغيرات وان الواحد يعتمد ع نفسه



●●●●



ايا ( منافق ) ضيعت سنين اختك وحياتها

عشان بس تثبت رجولتك .. ؟

ياخي الاخت تفهم وتقدر وجود الاخ بالبيت

وتعرف شكثر يخاف عليها ويبي مصلحتها

بس بنفس الوقت هي تعرف مصلحتها اكثر منك

( طبعاً بعض البنات مو الكل الي تعرف مصلحتها )

عشان جذي لازم الواحد يراعي السنين الي بذلتها بتعبها

حطمت امالها وطموحاتها عشان سمعت ولا شفت

وخليت ( اختك ) نفسهم براسك ياخي وين الثقه بين الاخوان

تدمرت الثقه بين الاخوان

ليش حب التملك ان لازم تخليها تمشي ع كلامك

لازم يتفاخر بين الشباب ويقعد يقول

انا ( والله منعت اختي من الجامعه وهي جالسه بالبيت الحين )

ولا يصفقوله الشباب كفووو شنب شنب والله

ياليت الرجاجيل نفسك اي خلها تسمع كلامك كفو عليك



كل الي اقوله الله يعين كل اخت عندها هالنوع هذا



●●●●




ولا الي اخوه يقوله قم جيبلي ( قلاص ماي )

والاخو ثاني يقول اوووف ماني ( خدام عندك اخر مره )

ويوم يطلع من الشباب يصير ( خدامه اثـيوبيه مره وحده لهم )

يكنس ينظف يطبخ يجيب يقهوي يشيل يحط

والشباب حاطين رجل على رجل وهو يلبي طلباتهم

ولو طلب احد فيهم يقولوله .. والله مالنا خلق



●●●●


ليش تحبسون انفسكم بيدينهم

ليش تحبون تصيرون دمى متحركه

لو تقولون عادات وتقاليد ان البنت ما تدخل الجامعه

ليش بالبدايه يقولولها ادرررسي كملي دراستج ويوم تخلص

توجه إلى الخطوه ثانيه لمستقبلها بالجامعه يقولولها

وين وين بابا ماكو جامعه اقعدي بالبيت اطبخي ونظفي خلاص

انتي الحين خلصتي وين خلصت وهي وصلت للجامعه على اشراق مستقبلها

والله اني اعرف اكثر من بنت قالت ما راح ادخل جامعه يا سعود

قلتلها السبب قالت اهلي رفضو وعادات وتقاليد ما تسمح

والله يا حبايبي الحين مشاء الله هي ( ابلة اجتماعيات )

بعد عناء يوم الاهل فكرو بمستقبلها وافقو بالجامعه

والحين مشاء الله يمشي لها راتب ومستقبلها طيب ومشرق



●●●●



ليش الواحد يشوف روحه ضائعه

وعادي وريلاكس عنده ولا يهتم

مو حلوه ان انت او انتي

متجهين على طريق العلم او الطريق الي ينور مستقبلنا

ويجي شخص يحاول يطبق كلامه ويخليك تمشي بطريق هو اختاره لك

انا عارف ان الام او الابو بعضهم ما يقتنع بفكرة الجامعه حق البنت

بس صدقوني المحاولات تجيب نتيجه

لا تحط ايدها البنت على خدها وتنتظر

لازم الواحد يحدث التغيير من داخله ينطق يتكلم


●●●●


قولي او قوليلي شنو مستفيد

ان تشوف ( سنينك قاعده تروح على الفاضي )

لو وصل عمرك او عمرج عسى ربي يطول بعماركم

نقول وصلت اعماركم لـ ( 65 ) سنه

قدمتو شي مستقبلكم شلون راح يصير ؟

( 65 ) سنة حبيتو تقعدونها بالبيت لا شغله ولا مشغله

البنت تقولي , لا راح اتزوج وزوجي يصرف علي

( فيها شي لو كانت زوجته موظفه )

بالعكس تحسن المعيشه لكم بدرجه حلوه وطيبه

راتب زوجك و راتب منج

بس نحتاج تفكير وتحرك ما نقعد بالمطبخ نفكر



●●●●



وانت يا اخ العرب

افرض رجولتك بحكمه وبكل عقلانيه

لا تخلي احد يسيطر عليك ؟

سوا حبيبتك او صديقك او اخوك

بـ عقلانيه وبكامل تفكيرك ان هذا صح او هذا غلط

لا تروح تركض وما تدري الله وين حاذفك

حلو ان الشخص يكون له شخصيه ما يفقدها باي حاله



●●●●


حلو ان الواحد يغير حياته

ما ينتظر احداث من شخص

هو يصنع التميز بداخله

هو الي يحدث ويوازن مستقبله

ما يخلي سكة القطار تفوته وينتهي عمره


ركز و ركزي


( ما نخلي حياتنا بيدين غيرنا ويرسمون طريقنا للضياع )

( ما نخلي حياتنا بيدين غيرنا ويرسمون طريقنا للضياع )

( ما نخلي حياتنا بيدين غيرنا ويرسمون طريقنا للضياع )


:: همسه ::

انا بكتب هالكلام عشان ابين شنو مقصدي بالكلام

في ( بنت ) ضايعه ويجي اخوها

يرشدها لـ طريق الصح = 100 % 100

ما ننكر هالشي

وفي صديق ينصح صديقه بكل ( نيه صافيه له وخير )

ما ننكر هالشي

وفي ام و ابو ينصحون عيالهم على الطريق الصح

وهم ضايعين ويتبعون كلام الام والابو ويتوفقون فعلاً

ما ننكر هالشي



●●●●



وها انا وصلت عند نهاية كلامي

واتمنى لكم تغيرات جميله وممتعه ومشرقه بالمستقبل

واتمنى كل واحد يركز بحياته ويعرف هو وين ماشي

لان ( السنين لو راحت ما ترجع )

ولاحد يضيع سنينه بـ ( نفس ضايعه )


( لا احلل النقل دون ذكر مصدر همسات الغلا )




الكاتب ( سعود العنزي )