من اجزل قصائد الشعر النبطي

من أجزل قصائد الشعر النبطي .. تستحق القراءة عدة مرات ..

========

معوّض خير ياحيٍ وردت الماء بدون حبـال
يطول بك الوقوف وشربة المـاء ماتحصّلهـا

وقوفك عند راس البير مايسقيك لـو فنجـال
ولاينفعك شوف الجمـه اللـي منـت طايلهـا

ومعوّض خير ياحيٍ خدعك من الرجال أشكـال
تشوف أشكالها وتحطها ارفـع مـن منازلهـا

تعلّم من زمانك لاتصير مـن اجهـل الجهـال
ترى في كل يـوم تجيـك عبـره لاتجاهلهـا

إذا ربي وهب لك عقل تلقى في الرجال رجـال
تعرف اللـي يطلّـع قيمتـك واللـي ينزلهـا

ترى من بعض مايندي الجبين ويحرج الرجال
لياسـاق الميانـه فـي نفـوسٍ ماتقبّلـهـا

ومهما شفت في صاحبك من نخوه وطيبة فال
ترى بعض السجايـا كثـرة الإلحـاح يقتلهـا

معاريف الرجال ديون وديون الرجـال ثقـال
لياصرت متعافي ليش تغـرق فـي جمايلهـا

رصيدك في حياتك سمعتك مع طيبيـن الفـال
رجال الطيب والمعروف بالمعـروف عاملهـا

ولاتبدي بجاهـك فـي مقـامٍ مايسـر الحـال
ولاتشفـع لنـاسٍ ماتنومـسـك بفعايلـهـا

لياجاتك تعذّرهـا مـدام العـذر لـه مدخـال
ووقت الجد قول الهـا الصحيـح ولاتجاملهـا

وخذ منـي نصيحـه لاتصـدق كـل ماينقـال
يجـرك للنميمـه ليـن يطرحـك بحبَـْآِآِآِآيَلـهـا

يجيلك ناقـل النمّـات بهـروجٍ تغـث البـال
سوالف في قفاك وحظك اطيب يـوم تجهلهـا

يبـرر بالحميـه والصداقـه شينـة الأفعـال
يجمّـل صورتـه بعلومـه اللـي ماتجمّلـهـا

ولو كانت حميه فيك رد المخطيه فـي الحـال
ولاكان استمعها فـي قفـاك وجـاك شايلهـا

ترى من جاب لك ودّى وهذي عـادة النقـال
يحاول يقتنص من فمك كلمـه لأجـل ينقلهـا

ومثل ماقال عندك راح عنك وعند غيرك قـال
وزوّد عشر فوق الكلمه اللـي كنـت قايلهـا

تجنّب مجلسه لاتجلس إلا مع كريـم خصـال
تحمّـل ميلتـه وإن ميلـت ميلتـك ينقلها

ولاتصبر على الجار الردي لوهي ثلاث ليـال
تضـرك جيرتـه لوكـان بيبانـك تقفلـهـا

وبيع الدار بأول سومةٍ تعرض علـى الـدلال
ورزقـك عنـد ربٍ كاتـب اللقمـه وكافلهـا

وبنتك لاتزوجها الردي لوهـو كثيـر المـال
تربيهـا علـى الطـالات وتشـوّه سلايلهـا

وكم من لاش يرمي خيبة ابنه فوق راس الخال
لو ان الخال من روس الرجال ومـن دلايلهـا

ليامنك عرفـت تميّـز الطيّـب مـن البطـال
وفادتك التجارب في الحيـاه وفـي مسايلهـا

وكشفت الفرق مابين الصحيح وحيلة المحتـال
وتعلمت الفراسه في الوجيـه اللـي تقابلهـا

بعد هذي ترى مالك غنى عن صحبة العقّـال
يدلونـك بـرايٍ ينقـض الدعـوه ويفتلهـا

يقولون الرجال اللي سوالفهـم حِكـم وأمثـال
ليامن ضاعت الحيلـه يـدل القـوم عاقلهـا

نصيحة واحدٍ جرّب وشاف من الزمان اهـوال
يقدّم لـك خلاصـة هجـرةٍ جـرّب هوايلهـا