الله يسامح ضحكتي في غيابك

من حقي أزعل ، لا ابتديت بعتابك
.............. و من حقك ارضى لا اعترفت بخطاويك

كلش يهون ، و لكن أبغى : جوابك
.............. قلّي حبيبي ، كيف أسامح تناسيك ؟

كم غبت عنّي ، لكن الشوق جابك ؟
.............. و كم جيتني و أنا ابتسم لك و أداريك ؟

حاولت ، لكن ، هالعناد : انتهى بك
.............. لا حدّ عندي ، يا حسااافة تغلّيك !

ما كنْ تدري عن خفوق اشتكى بك
.............. كانك تحمّل .. دمعتك ما تواليك !

تضحك ، و لكن ، شي ٍ آخر بدا بك
.............. هذي دموعك ، يا حليلك ، تواسيك

و إن كان تجهل كيف أعيش اغترابك
.............. لا غبت عنّي و احتوى الدرب رجليك

باوصفه في بيت ٍ .. بهالصدر شابك
.............. لولا المعزة ، قدْ محيته ، و لا اشكيك

الله يسامح ضحكتي ، في غيابك
............. و الله يسامحني ، على قلّ ما ابكيك

دامك بعيد ، و بآخر الوقت بابك
............. وشلون ما افتح للدموع ، الشبابيك ؟

مسموح ، ياللي ما تتوب لحبابك
.............. عن جرح ٍ أقسى من عنادٍ يماريك

ليت الخطايا .. تنكتب في كتابك
.............. و تشوفه أسود من عيون ٍ تحاكيك

لكن قلبي ، غلطته : ارتضى بك
.............. مهما يصير ، تسامحه نظرته فيك

تبقى حبيبه ، و غايته : اقترابك
.............. معذور لا من شفته بيوم .. يفديك

أدري بتزعل .. لا انتهيت بعتابك
.............. لكنْ و ربي ( قدْ ) سمحت لخطاويك