(( أنتم مميزون ))

#1 26-02-2010, 08:05 PM

السلام عليكم ورحمة الله وبركاته ..

قبل ما تبدأ الدراسه .. حبيت ابين لكم شغله تفيدني و تفيدكم ..

بتحداكم اليوم اذا أنتم مو مميزين .. !!

كل واحد منا لازم يتميز بشيء .. و فيه ميزه هو ما أكتشفها .. و البعض منا اكتشفها ..

دائما نسمع كلام يحطمنا من أهلنا أو من صديق .. أو من أب أو من أم .. و أغلبه من دون قصد ..

دائما تصير مشاكل بين الأخوان و الاخوات بتطلع كلمه مثل الرصاصه .. مثل ما سمعت من بعض الاخوان

لكن ما عمرنا سمعنا كلمه تشجعنا .. و اذا سمعنا ما نصدق نقووول لا مو صج يجاملونا ..

لكن من يسبونا ولا يعيبون علينا بشغله نقووول أى والله معاهم حق ..

............................

دعوه للجميع .. يتأملون بأجمل شيء فيهم .. هم يحسووون فيه لكن مستحين يقولونه ..

صج فينا عيوووب كثير .. لكن لازم على الأقل ميزه وحده فينا حلوووة ..

ولو نعرف شنو هالميزه و نطورها و نحاول نرفع من مستواها كان كل واحد عرف توجهه بالحياه ..

و عرف طريقه .. و صار كل شيء سهل ..

ولو شخص واحد بس عندنا فى البيت شجعنا على ميزة فينا أو اكتشفها لنا ..

أو بينها .. يمكن يتغير مسار حيتنا .. بمجرد تنبيه ...

من قبل كم شهر بس حاولت أطبق الشغله هذى .. و طبقتها فعلا .. و صرت أقول لكل شخص

عن ميزه فيه .. و يرد يقولى لا مو صج أنت غلطان .. و أنت تجامل .. و انت ترفع من معنويات الواحد ..

و مو مصدق كلامي مع أنى صادق معاه .. ؟؟

و كل يوم يمر أبين له هالميزه و أنها حرام تضيع .. و تصدقون مع الوقت طور منها و فعلا صار شخص ثاني .

طيب سؤال : ليه ما طورها من زمان .. ؟؟

ليه كان متجاهلها .. ؟؟؟ يمكن لأنه ما يدري انه مبدع فيها .. ؟؟

أو أنه ما درى عن تواجدها فيه ..

لازم نجتهد عشان نعرف بشنو حنا بارعين .. او بشنو حنا متفوووقين ..

لازم نعرف قدرتنا عشان نوجها ..

منا شخص المفرووض يكون كاتب .. و منا شخص المفروض رسام مبدع ..

و منا شخص المفروض مخترع .. و منا المفروض طبيب .. و منا من يقدر يحل المشاكل ..

و منا التربوي و المعماري .. و الملتزم .. و المكتشف .. و من يهوى التراث ..

و من عنده اسلوووب لجذب الناس يكون داعيه عشان يجذبهم للأسلام ..

و تختلف مميزاتنا .. و مستحيل واحد منا ما عنده لو ميزه وحده يفتخر فيها ..

يالله تفااااااااعل يا اخوااااان هالمره لازم اشوووف ردودكم .. ما أبي شخص واحد يدش و ما يرد ..

أبيه يكتب عن ميزه هو يملكها .. و نبي ناس يعلقون على الميزة الي يحبونها ..

و شنو أهم شيء يتوفر فيها .. و لازم نسووويه عشان نحصل عليها ..

لا أشوووف الموضوع فاضى من الردود .. أبيها ردود كثيرة بشرط توفر الفايده مو بس رد عادى ..

موضوعي هالمره عفوي و كلامه مثل جلسه فى مجلس ..

يعني مثل ربع و أخوان .. حياكم القهوه ..