كبوة جواد...

#1 02-10-2017, 10:09 PM

كبوة جواد...

صعب لامنك فشلت .. وصعب لامنك لقيت
إن من يكره نجاحك .. يدري إنك مانجحت

أمس ضقت .. ورحت أقلب ذكرياتي .. وأنتهيت
عند صورة طفل صوته مثل صوتي لانجرحت

وش مثل لا والله إلا هذا أنا يوم ابتديت
أنطق حروف تلعثم في لساني لا أنمدحت

هذا انا يوم الحياه فنظرتي عشرين بيت
ومسجدين .. ومدرسه من طين كم فيها اصطبحت

هذا أنا وأصبحت اتمتم : هذا انا حتى بغيت..
.. أختنق .. بس القدر عيا على موتي .. وطحت

وصاح صوت الطفل فيني : أنت من وين ارتميت
قلت أنا المستقبل اللي فيه كم همت وطمحت

أمس كنت أبيك تكبر .. بس والله لو دريت
أني اللي عشت لأجله مت عندك وأسترحت

لو دريت إن الزمان يجر رجلي .. ما عديت
ولو دريت إن البحور بلا مواني .. ماسبحت

كان دربك لي طويل .. وكل ماشفتك هويت
قلت لك : كبوة جواد .. وما كبيت إلا وجمحت

ليه تسمعني وتمشي ؟! اه ليتك ما مشيت
و اه ليتك من كثر عثرات الأيام أنتصحت

ضاعت احلامي .. وظل الحزن فيني .. وأهتديت
للطريق اللي يوديني على دمعي .. ورحت

يالحزن .. ليتك مثل دمعي وتنزل لا رقيت
بس أعرفك .. لو مسحت الدمع تبقى ما انمسحت !

كان حلمي .. في وجود إنسان يبكي لا بكيت
وصار حلمي .. في وجود إنسان يفرح لا فرحت

كنت أشوف الناس مثلي كل ما جعت وضميت
مادريت إن الأوادم ناس فوق .. وناس تحت

اه ياأول ذكرياتي خذني فحضنك نسيت
لأسألك عن وجه ابوي اللي معه ياما سرحت

خذني فحضنك أبغفى .. ياه مبطي ماغفيت
وإن لمحت دموع عيني .. سو نفسك مالمحت

خذني فحضنك .. وبعثر في جروحي وإن قضيت
هز لي كتفي .. وقل لي : عيب تبكي لو سمحت

إضحك .. وعلم زماني من أنا .. ومن وين جيت
طق باب الحزن .. واصرخ في لامني فتحت

و ضمني يمك .. وكمل ضحكتك لامن بكيت
ودي أذكر كيف كانت ضحكتي لامن فرحت

لفهد المساعد

المصدر: منتدى همسات الغلا

;f,m [,h]>>>