@ ~ ( عـذب الخيال ) ~ @

الشوق في صدري يلجلج هديره
وده يبوح وحارس القلب يكماه
لاجا يسولف بالغلا يستشيره
عن طيش من لا يعرف الحب ينهاه
لان الغرام لقلب عاشق سفيره
يحمل مراسيل المحبة بيمناه
اما عطا المكتوب للحب سيره
والا قصر عن سيرة الحب بخطاه

عذب

ارسلت لك خمسين ستين سبعين
لا والله اكثر لوتضاعف عددها
كل الرسايل قالت لقلبك اهلين
يامرحبا مليون وادبل دبلها
لكن خسارة ماوصل رد يازين
طال انتظار العاطفة ماوصلها
ترا الصبر لاطالت السالفة شين
عجل ترا نفسي بداها مللها

عذب

تنام اصواتهم لاجا الظلام وهاجسي صاحي
على حروة سنا نجم يسلي خاطري نوره
ابحكي له عن الي في خفوقي يقتل افراحي
مع غدر الزمان الي طعنها من قوي جوره
ولكنه سناها نجمتي ذا الليل مالاحي
غفت فوق السحاب وكنها للغيم مأسوره
وكنه هالمسا يبغى اعيش بزحمة جراحي
انا والجرح والذكرى وضيق القلب وكسوره

عذب

اتخيل والخيال اوسع مدى
بس اصورحاجتي لك بالخيال
كل ماطيفك على البال اعتدى
ارفع الراية لجيش الأحتلال
واتحرى منك ياقطر الندى
تسقي الخفاق من نبع الوصال
حلم والأحلام مافيها جدى
لوتصيراحلامنا كبر الجبال
كم ندهته حلم ويرد الصدى
وادري انه حلمنا يابن الحلال
وان لقيته حلم ضاع ومااهتدى
فاعرف انه حلم تحقيقه محال




عذب

سويت لك من كثرالأعذار دفتر
وحطيت له عنوان اعذار خلي
يمكن تجي الفين لا والله اكثر
في كل ساعة اطلبك تعتذرلي
تصدق ان مافيه عذر تكرر
كله جديد ومنك صنعه محلي
حتى معه البوم كله مصور
ومن الغلا حطيت قسم التغلي
والخاتمه منها العلاقات تفتر
الين صدرالي قرا به يملي

عذب

على جو السهر نادت عيوني والهموم ضيوف
تزاحم في وسط صدر فتح لكبارها بابه
تلافت حزة المغرب على باب الكريم صفوف
وضيق الخاطر الي مع غثاها نوخ ركابه
ونجمات السما عنده تعلل والسما مكشوف
مع كثار الظنون الي غدت له حسبة احبابه
يقهويها من دلال الهجوس الي تبوح حروف
وهي تسمع لقصاص الحزن يقرا من كتابه
عذب