ديوان الشاعر ( سعد علوش )

قصيدة اجر الجماعة - سعد علوش


مالي الا أقولك يغلا البشر سمعن وطاعه


أنت سافر وأطلق الاحلام .. وأتركني مكاني


مالك الا واحدن لارحت ..؟ وقف ربع ساعه


ولقا وجهه للجنوب .. وهل دمعه في ثواني


تستحق البكي .. يافرد الخطا .. وأجر الجماعه


وأستحق أنك تذكرني وتسترسل حناني


فلا طرالك صوتي المجروح يارب أستماعه


شوف نفسك فالقزاز .. وحبلي ذيك الاذاني


جعلني ماعدم ذكرك فالوصال وفالقطاعه


والله أن كني فبعدك فاقدن أغلا خواني


ممرض صدري من أنواع التجفف والمجاعه


يا هلالي الاحمر . اللي ما اعرفه قاصي وداني


عوذ بلله ..... يمكن أن صدري لو أعمله أشاعه


شفتك أتحسب خطا رجليك من بين المحاني


جل من سواك ياخلط القساوه بالمياعه


أشهد أنك مختلف .. وأنشهد أني عنفواني


خذتها من سرب جولن ضاع في سكة ضياعه


وكنها أتقول... الله الله در من بيده خذاني


لاتحاتي . والله أنها بين ضلعيني وداعه


الوصاه اللي تقول .. العز .. لطوال اليماني


كل قمه .. فالشعر .. او .. فالكرم . او .. فالشجاعه


أعرف أن فيها ذكر ياهاجري.... والا أقحطاني


هو كذا التاريخ . من قبل التصور والطباعه


ولا عليهم زود .. ذربين المبادي والمعاني


القنوع...؟ أيحاسبه ربي على حسب القناعه


ويرحم الله المحب .. ويلعن الله الاناني


بس حبيتك تطمن يارضا القلب ومتاعه


يالوحيد اللي على العار ماعوضك بثاني


رح فمان الله وأتركني وأنا.....؟ عندي مناعه


من كلامن مايجملني .. وولا يراق لكياني


ماني اقوله ....؟ علاشان أتناقله الاذاعه

قصيدة في انتظارك - سعد علوش


كل حاجه يانبيله في انتظارك ..
الوطن .. والناس .. وانا في انتظارك ..

والطريق العام .. والباب الرئيسي .. والممر .. وقبضة السلم ودارك

كل ابونا يانبيله بانتظارك ..

\

لو تشوفيني شلون امشي ويديني في جيبي .. انا و أحزاني وطيبي
كان ماخذتي قرارك ..
كان مارحتي وقلتي ترى .. مانت بحبيبي

\

ياخساره قلبي المظلوم والا يا انتصارك ..
رحتي واخذتي معاك ابسط تفاصيل الحياة

يامزعلة البنات .. سحقا لكل البنات ..
انا ميت فيك .. ايش ميت فيك .. !! انتي فيك حتى الموت مات

\
ياجنونك .. يانتشارك ..
مري بشارعك الاول ي الغلا الاول .. وطوفي بس / شوفي
من وقف على عيونه في انتظارك

من بعد ماخنتي وخانوا كثير احباب يوفي
هم هم رابطه جمهورك المتعصب لطله نهارك

انا .. وطيور القفص .. والباب واشجارك .. وجارك

انتي ام الحسن ..وام العاطفه ..وحنا صغارك
فلا تلومينا اليامنا وقفنا بانتظارك ..

\

اطغي .. اطغي .. خلي الغابات تتسلف خضارك ..
بس تترك اصفرارك ل ابتسامات المجامل ولوقارك
واتركي لعشاقك الموتى حمارك .. او بالاحرى احمرارك

\

لاتلومينا مجانينك .. نحبك

لا طغيتي .. لازعلتي .. لاحكيتي .. لامشيتي

انتي مسكينه ومظلومه .. ومعذوره ..لامنك نسيتي
لانك انتي اللي فقط ماشفتي نفسك لاحكيتي
لانك انتي اللي فقط ماشفتي نفسك ليا مشيتي

\

يادمارك
ياوقوف العالم الثالث على شرفة زرارك
مادريتي ؟ !!
طيب ادري يانبيله كانك اليا الحين فعلا مادريتي

انتي اكبر مشكله تواجه الشعب الكويتي
انتي مثل ايران واسرائيل بس انتي لئيمه
هم طبيعتهم عدائيين بس انتي رحيمه
مابدر منك جريمة ..
انتي بالفطرة بدون سلاح ومقاتل جريمة

وانا بالفطره .. احبك ياعظيمه

بذبولك .. وانصهارك .. وازدهارك .

يانبيله ..
انا حاليا ترى ماني [سعيد] غايب وروحي /جوارك

ماعرف للعيد يوم ... وماعرف لليوم عيد
انقذيني .. كل ماوزني نقص حبك يزيد
انقذيني .. صرت اكلم نفسي ونفسي تعيد

\

كنا اول في انتظارك
انا وطيور القفص والباب واشجارك وجارك
كلهم راحوا وملوا ..
كلهم راحووا وخلوني لحالي .. في انتظارك

انا حاليا وحيد .. انا حاليا معيد .. لامزيد ولاجديد

الا اني اسولف مع الاخ انتظارك
عند دارك

على كرسي انتظارك اجلس انا وانتظارك في انتظارك

قصيدة كل عام وأنت بخير- سعد علوش


جمرني ابدفى من التجمير
وبفرح ولو النفس نقاده

يا شهر تسعة جعل ما بك ضير
بك يوم ميعادي بميعاده

جبه وجبني صب ذايب مير
معاه خاتم شوق وقلاده

ووجه رسايل دعوة وتحذير
لأشياءنا إلي غير معتاده

لأحلامنا الواجد عن التحرير
وقصة سجين يحب جلاده

ووسائل التشويق والتحذير
والشعر بوصوله وبأبعاده

والغيم وزخات المطر والطير
وبخار فم البردة وقناده

وسيد جنيد وسيده كارتير
وبكلات ليل يشقر اسواده

والقبعة والمعطف الحرير
والنادلة والقهوة الساده

والمرحباه اللي لها تخدير
وقلم ودفتر سلك ووساده

والنمل والنسناس والنوير
وأبو علي واجداد اجداده

وابو عمر والسايس الفقير
وجنايني الشتلات ابو غاده

والصبر والفراش والتقدير
وبنات كل الحي وأولاده

في شارعه يتجمعون عصير
للتهنئة في عيد ميلاده

ولا خلص التصفيق والتصفير
من كل مجموعة طلع قاده

وقالوا رجاءا مانبي تأخير
رددوا ورانا بذوق وإجاده

مع بعض كل عام وانت بخير
يا أغلا البشر يا سيد الساده

هذا وسامحنا على التقصير
والله يزود في عمرك أعياده

وانا اللي أحبك محبة غير
من قلبي ومن فوده أفواده

كل عام وانت بخير وانا بخير
كل عام وانا أحبك زياده

وكل عام وانا كافح التفكير
واحبك بإصرار واراده

وكل عام وأنا أقاوم التغيير
وكل عام ولا انت على العاده

وكل عام ودموعي عليك تحير
وهذي السنة بالذات هداده

وكل عام تكبر به ترد صغير
كأنك تسوي لوجهك إعاده

يا كبدي إلي معك كبد بعير
مرددن غاربه لشداده

ويا حب قلبي لقلبك الشرير
الأبيض اللي عناده عناده

سياسة التوطين والتهجير
ما خلت الفقير في بلاده

والله وكبرنا والأماني بير
مصداره يشابه لميراده

سبعة وعشرينك عساها تصير
ميه على عز وعلى عباده

يا حبي الأول ويا الأخير
اللي قديمه ورث أجداده

كل عام وأنت بخير وأنا بخير
واشيب وانا أحبك زياده

قصيدة واقاتلي - سعد علوش


واقاتلي ما درى عني ولا ويني
يا قاتلي ليت صبري ربع من صبرك

على كثر منت جافيني وناسيني
على كثر ما اشوفك غير واعتبرك

ولا تغيرت وسنيني هي سنيني
شاعرك.. عاشقك .. مجنونك على خبرك

ما اعرف شسمي ولا ادري عن عناويني
باخع من الحزن خفاقي على اثرك

ما فيه درب يودي ما يوديني
مدامك الارض قلي ليه ابختصرك

احبك بكل ما املك من شراييني
ليتك محطه يعبر العمر واعبرك

انت اشتركت بتفاصيلي وتكويني
كني انا انت من صغرك الا كبرك

تغيب واصير صب ويعترك فيني
اشباح نسيانك وملايكة ذكرك

وتطيح من عيني الدنيا على ايديني
واقول اخسر الجميع وانت ما خسرك

حذني على قد حبي لك وتخميني
ولا تعذر لاني دايم اعذرك

وتعال شف وجهي المنهك وشف عيني
وخذني ب ياديك من سحرك الى نحرك

من كثر ما قلت بتجيني ولا تجيني
وانا معك .. نصف معك .. ونصف ينتظرك

علمتني ما اضيع شي ف يديني
انا فدا امك وابوك وعفوك وشكرك

العمر ماهو ب سنينك وبسنيني
لحظاتك اللي فيها تحب هي عمرك

قصيدة اخليك - سعد علوش



ارجوك ساعدني علشان أخليك // ،،
انا تعبت اسهر و افكر و أحاتي

اعتقني الله يعتق ايدي من إيديك ..
ب اروح ادور في حياتي حياتي

عمري ماهو بايجار ولا تمليك
انا احبك لكن احب ذاتي

ماعاد باقي شي أعطيه و أعطيك
ماعاد باقي مني الا سكاتي

حاولت أكون اكبر من الحق و أرضيك
لكن رضاك أصعب من محاولاتي

كنت أتمنى اعيش لك منك وفيك ..
وصرت أتمنى ماتصير أمنياتي ،،

حبي أحد غيري عسى الله يهنيك
حبه ولكن لاتسوي سواتي ،،

ماعاد يمديني ولا عاد يمديك
تعلم من اخطائي وصفاتي

اما انا اعرف ماني بناسيك
انا رجل مصنوع من ذكرياتي

لاعاد ترجيني ولا عاد ارجيك
هذي حياتك // وانا هذي حياتي ..

قصيدة أفضل طرق - سعد علوش


أفضل طرق عيش الحياه بسعاده
هو أنك تعيش الحياه بسعاده

أنت أنعكاس لفكرتك يعني
أن كنت حزين؟صارالحزن والهم عاده

وأن كنت دايم مبتسم و متفائل
كسبتها مع السعاده عباده

ماطول العمر القصير التوتر
يطول العمر القصير الاراده

تفكيرك ف بكره مظره ليومك
وبكره بتفكيرك ف بعده نكاده

عش في حدود اليوم وأفرح له اليوم
واختار طلعاته و لبسه وزاده

قصيدة الجرح - سعد علوش


الجرح ماهو خاطر شوي ويروق
الجرح حتى لو تشافى يعللك

واذاك متحمس متاهات وطروق
انا تعبت اشد حيلي واحاولك

سماي ما شي شمس ورعود وبروق
والريح ماهبت ولايجري الفلك

والقلب ناشف بحر وشقوقه شقوق
وشلون بيكون سحاب ويبللك

يا ضامي انا الضما ومتشبع حروق
واذاك ضامي للمواصل انا هلك

هلك وقف في وجهي الاصل والذوق
والمجتمع والعرف والفقر واهلك

متعومس وحزن النبلاء مرموق
يعني لو احتاج الك ماجيتك اسألك

اللي علي اشكي واعاتبك برفوق
واقولك ودي ماعاد اتأملك

من دورة الايام ياخوك مخنوق
الوقت مشاني من السلك للسلك

ازل خطوه بس ما ازل منطوق
ولو صارت ابحب خشمك واجاملك

يبقى البني ادم مجرد ومخلوق
ملك ولكن في الحقيقه بلا ملك

كذاب قايل كل مطرود ملحوق
سنيييين وانا اطردك وازريت لا اوصلك

كنك تطيش وكني ادور في طوق
كل ما وصلت اخرك يطلعلي اولك

ليت مافي خاطري شوق وحروق
ماكان حسيت ان انا بس من كلك

الشوق ماهو رعشه وقبضة عروق
وماهو اللي من شينك فعينك يجملك

وماهو شعور ياخالق الروح برفوق
وماهو سحر ولا ادري والله شقول الك

انا سحابة حلم وتطير بك فوق
وتطير ولا ودك انها تنزلك

الشوق هذا والا انا شوقي البوق
ماقد حصل في شوق هذي ولا تلك

تدري وش اسوي ليا اضناني الشوق
اسوي بعيوني كذا واتخيلك

واقربك واتوق واتوق واتوق
واكثرك واحلف ماعاد اقللك

واصورك في الموق وتكبر على الموق
وتطيح مع دمعي على ايدي واقبلك

هذا غلاي اللي مع الدم مدقوق
ولا عاد تسأل عن شعوري وازعلك

محبة ماهيب من طارف السوق
لو انك توكل كان والله لاكلك

جيتك حقوق ورحت ماعندي حقوق
وان قلت ما احبك ابجحد مواصلك

احبك الا يا بري حالي وعوق
من كثر ما احبك اخاف اني اقتلك