ديوان الشاعر ( بندر بن سرور)

قصيدة ياشيخة الخفرات- بندر بن سرور


عز الله أني جزت على كل ما قول
لاشك ردتني على القول ضيحه

لا ياعيون اللي لياصك بالجول
منه أبرق الجنحان عجل مطيحه

ياعود ريحان رفع غصنه الطول
رستم قليبه مايهون ضبيحه

يوم استوى عوده على داير الحول
هجوا به التجار من زين ريحه

ياشيخة الخفرات بالزين ودلول
من مات من سبتك ربه يبيحه

قصيدة اه يافيحان - بندر بن سرور


اه يافيحان من بعد المسافة
بين نجد وبين ريعان الحوية

راكب اللي يعجب اللي يوم حافه
زين صوته بالسيور المعدنية

زين الصناع شغله بالكيافه
ناسج حوضه على ذوق الحنية

يوصل الي بان بالقلب اختلافه
عيت الأيام تسمح لي بمجيه

شبه وضحى قيضت فوق اللصافه
ربعت بطبيق وفياض الثنية

ماتلت راع الغنم مجيف لحافه
ثانية طق العصى بارد حتية

مع بلاوي زينها زود النظافه
ماتمشت بالرفايع ……..

قصيدة فلة خبيان - بندر بن سرور


يابنت ياللي حول فلة خبيان
الله عليك أنتي من أيا عتيبه

لا ياعيون اللي على الطرد ولهان
حر قطامي فعوله عطيبه

والقرن ذيل اللي تشعشع للأكوان
بنت الأصيل اللي طويل سبيبه

والردف يطوي الثوب والعود ريان
والخد بارق مزنة مستجيبه

قصيدة تل الرشا -بندر بن سرور


واقلبى اللي تله الود تلي
تل الرشا من فوق ملحا جلاله

في غربها تسعين فري ومشلي
وتجفل اليا سمعت ضريس المحاله

من واحد طرق عليه يهلي
جدد جروح القلب مع ما جرى له

برمش العيون اللي هدبهن مظلي
ضاف على بيض المحاجر ضلاله

يابنت عيفي واحد ما يصلي
تارك عمود الدين مالك وماله

عيفيه لو يفرش لك البيت زلي
من لا يخاف الله حرام حلاله

خلي ملعن والدينه يولي
تلقين في نجد المسمى بداله

وعليك باللي للجماعه يهلي
اللي كما النبوة منارة دلاله

بالرجل ثنتين حداهن يدلي
من كبهن ماهوب ويا الرجاله

وان كان مابه دين مع زين دلي
جعله من الدنيا تقطع حباله

قصيدة راع الكراج- بندر بن سرور


راكب اللي مخ رجليه جنزير وهوا
اشهب في مقدمه بارقين وعكس تاج

متر في مترين مستبرم كله سوا
حايفه حطاب ما سمكره راعي الكراج

إن نعشته بالثلاثة مع اللفه عوا
عوي ذيب محتدينه مربيت النعاج

ثابت ما يختلف كلما لف إنزوا
وارتفع ثم إرتخى مثل طايرة المراج

كن ضرب المرو في الويل قدام و ورا
ضرب هملول البرد وإن تقفاه العجاج

منوة اللي مشفق لهله ولهم نوا
من بعد طول المسافة يبي فلة حجاج

قصيدة انحاس بالي يامحمد وصديت - بندر سرور


انحاس بالي يامحمد وصديت
من كثر الصدات قلت شطونه

ماني وانا بندر بهيت ولد هيت
هيت يجامل خمة يكرهونه

من كثر ماجربت واقبلت واقفيت
قولة هلا لمن لايودك مهونه

سلط على النصراني اللي لقا الزيت
لعل نبع الزيت يعمي عيونه

لاشك تحتاج المراجل شفاليت
تحتاج شي يقصر النذل دونه

عزم على الفرجه وقطع الخلا الميت
حتى عيال البوم مايقطعونه

ثلاث من كل المعاني تنقيت
واللي بقى كل الملا يقدرونه

مابغى جزاهن غير من خالق البيت
عمالهن للناس ماينفعونه

قصيدة سر يا قلم- بندر بن سرور


سر ياقلم مالي على الصبر طاقه
صبري تعدى الحد ماعاد ينطاق

أكتب لمثلي قصته واشتياقه
في خطك الواضح على بيض الأوراق

قصة حزين صافي الحر ذاقه
انا بذكره ماصله خاطري ضاق

باقو به الأصحاب والوقت باقه
وصار الضحيه بين باير وبواق

يمشي وهو ماحس في كسر ساقه
امسى على ساقين واصبح على ساق

مهذي سواة الوقت شين اصطفاقه
الوقت لو يصفى لك ايام دراق

لاشك يامن معك عقل ولباقه
بنصحك كان انك للأمثال تشتاق

صادق رجال يعرفون الصداقه
يقفون صفك يوم يبسات الأرياق

ومن يرغب فراقك فعجل فراقه
جاز الذي يجزيك أفراق بفراق

يقوله اللي جاير الوقت عاقه
ولازال في غيبوبة الهم مافاق

حظه على اقشر شي للنفس ساقه
بقبور الاحياء ينتظر يوم الأطلاق