ديوان الشاعر الامير ( خالد الفيصل)

قصيدة بنت فكري - خالد الفيصل


إلعبي يا بنت فكري العبي ..
غردي بالحرف مني واطربي

واسدلي على شعرك دلال ..
واسقي عروقي غرام واشربي

وانشري الفرحه على الدنيا معي ..
وازرعي البسمه على وجه الصبي

قلبي الطفل الذي عيا يشيب ..
كل ما قلت اكتفى صوت أبي

ما شبع من حسن ظلام الهوى ..
كل ما جارت طلبها عذبي

انت أعلى ما أشوفه في سماي ..
وانت أبعد ماسعى له مطلبي

وانت احلام اشكلها وجود ..
وانت ديوان الهوى في مكتبي

يا حكاياتي إذا باح الزمان ..
يا وميض الفكر في الوقت الغبي

وددي صوت الهوى صح ومسا ..
واعزفي باوتار قلبي والعبي

قصيدة وقف ترى لي مع شفايفك ميعاد - خالد الفيصل


وقف ترى لي مع شفايفك ميعاد
بيني وبين الموت معسول ماها

طق اللثام ولا تبين لحساد
لا لا تخلي كل عين تراها

في شفتك جمر حمر فيه وقاد
أغليت أنا لون الجمر من غلاها

أخاف من واهج شفاياك يزداد
يحرق ورود الخد واهج سناها

ورد على غصن من البان مياد
ورد نما في ظل رمش كساها

رمش على جال النواعيس صياد
ذبح القلوب اللي تعرض حماها

عقلي وقلبي منك في حرب وجهاد
واشوف دق القلب ميل خطاها

قصيدة أبي منه الخبر - خالد الفيصل


أبي منه الخبر ويقول للا
لفا المرسول وماعين محله

وقلبي تايه من عام الاول
ألا يالله يسر من يدله

خذاه اللي على خده علامه
سوادة غيم في شمس مطله

سرقني مادريت إنه سرقني
سلبني و أحسب إني فاطن له

أنا يوم أرسل عيونه لقلبي
عطيته مهجتي والمعطي الله

نصف زين الخلايق في عيونه
وباقي الزين في باقيه كله

قصيدة ياقديم الغوص - خالد الفيصل


يا قديم الغوص في بحر الهوى
وش لقيت بغبة البحر الغزير

علم الي جس شطه وارتوى
ما بعد جرب طويله والقصير

قالوا انه من جميع امر حوى
فيه سر وفيه شر وفيه خير

واسمع انه من ركب موجه دوى
من فعل موجه غريقه يستجير

واسمع انه من لمس شطه غوى
ما يفرق بين بحره والغدير

واسمع انه من على تركه نوى
يجذبه سحره ويرجع له كسير

لو تجرح فيه قلبه واكتوى
ما يتوب ولا يريح ويستخير

وش جمع حلوه على مره سوا
هي حلاة الحب في الكأس المرير

رغبوني لين قلبي له هوى
وانذروني لين صدقت النذير

خوفوني منه والقلب التوى
راغب ومعيف والخايف يجير


هو صحيح ان الهوى ماله دوا
خبر الي جاك عاني يستشير

قصيدة معك التحيه يانسيم الجنوب - خالد الفيصل


معك التحية يا نسيم الجنوب
ضم بحناني لين العود ثلاب

بالهون ضمه يا لطيف الهبوب
لا تزعج عيون شكت طول الأهداب

تلقاه واقف بين هاك الدروب
في هضبة يا ما تناجى بها أحباب

تراه من بد العذارى لعوب
يضحك ومع ضحكه سروق للألباب

في ضحكته لحن الغرام الطروب
في مسمعي لحنه على البعد ما غاب

يشهد على ما اقول قلب تعوب
قلب غدا به سيد أهل نجد نهاب القلوب

قصيدة يا مسافر للجفا - خالد الفيصل


(( يا مسافر للجفا ))


يا مسافر للجفا و الوصل يبكي عليك
وين عهدك بالوفا للخفوق اللي يبيك
لي جناح ولك جناح ولانطير إلا سوى
اسقني عذب القراح من ينابيع الهوى
ليت لي قلب خلي ماعرف فرقا الوليف
لا عليه ولا علي لا ربيع ولا خريف
الهوى أمره عجيب مره يسابق حلاه
إن صفا ود الحبيب الزمان ابعد مداه
ويل قلبي يالغرام كل يومن لي قصيد
اشتكى مني الكلام اجرح حروفه و أعيد

قصيدة الشعر قطره وشوقي بحرها- خالد الفيصل



الشعر قطره وشوقي بحرها

فز الخفوق وقلت يالله عسى خير

أثر الليالي عاد غايب قمرها

مع شوفته نشوه و فزه و تخدير

و عيون خلان(ن) تعانق نظرها

يفز له قلبي كما فزة الطير

و الرجل كن اللي تحتها غدرها

يا صبح عمري يا صباح التباشير

نوره ملا قلبي و روحي غمرها

عقب الفراق اللي تعدى المحاذير

يبس غصون القلب جافي دهرها

ربع بروحي عقب ماهي معاسير

سحابة(ن) هلت بقلبي مطرها

و اسقى بها زرعة هوانا بتقدير

غرسة غرام(ن) بالمحبه بذرها

يا عاذلين العين والله مخاسير

و اللي درى عن حال عيني عذرها

تشوم عيني عن جميع الغنادير

و إن ناظرت عيني فوادي نهرها

يا ناس احبه و المحبه مقادير

هذا هوى نفسي و هذا قدرها

و الحب ماله يا اهل الحب تفسير

قلبين و الله بالمحبه امرها

لا جيت اصور حالة الحب تصوير

و أرد عن حالي لخلي خبرها

لقيت وجدي فوق كل التعابير

كل الشعر قطره و شوقي بحرها