ديوان الشاعرة شيهانة عتيبه

اعزف أحزاني على أوتار المحبه
واعرف ان الحب كل دربه غبينه

أوله لهفه مع اشواقٍ. تصبّه
وآخره تبكي على الماض وحنينه

ثم تحين الفرقى ويدّق المنبه
وكل حيٍ عاش للآخر رهينه



‏‫العنقاء شيهانه

كفنت حرف الغلاء من بعد ما شفتك

تشفق على حرف غيري وترجي اوصاله

احلف يمين ٍبرب الكون ما بعتك

وانت مدير القلب عالم بأحواله

قدرك كبيرٍ بقلبي ماني مرخصتك

ما كنّه الا قدر شايب مع عياله

وبنيت لك مركز اماره وومرتك

على خفوقي بليا شهود ووكاله

وكنت التمس لك دروب العذر عاذرتك

يالين شفت الوضع في حال يرثا له

بانة وسوم الخيانه بطبعك وعفتك

واعيف حبٍ ربطني معك بحباله

جيتك على صافي النيه ولا خنتك

وقلبك بسود النوايا جيت تشتاله

لا عادها من صدوفٍ يوم صادفتك

ولا عاده العشق ودروبه وممشاله

شيهانه

لأجل الشعر لا تحاول تجيني تحبي

مكشوف وضعك ماهو ابوضعٍ سليم

حسبي على شعرٍ يغير مذهبي

ويميل ابي عن تربية عودٍ عظيم

تنزهي تكفين يا بنت // اضربّي

ارض الخبيث خلي نهاره له بهيم

وتكفين ثم تكفين تكفين //اكربي

كل السبل خليه في خبثه يحيم

خليك في طبعك مثل ذاك الظبي

يجفل من ظلاله ولا يمكن يريم

لأجل الشعر حذراك لا لا تلعبي

يصبح قليبك سبّة //اللعبه حطيم

امشي ملاكٍ حولك الخبل ارهبي

وامشي شموخٍ ما يدنسك اللئيم

منتي على دين المجوس تسبى سبي

انتي على دينٍ يعزك //ما يضيم

الله عطاك العقل // والعقل ذهبي

يصقل ويزيد ابلمعته عقلٍ حكيم

الشعر الك وانتي منه و فيه اكتبي

وبالحياء تمسكي بدربه // ياريم

ثم احفظي دينك على دين النبي

وترفعي عن خبلٍ ابعقله // سقيم

شيهانة عتيبه

علتي فقصا المحاني يا طبيبه

ما تبين فالأشعه وش هي منَه

عاجزٍ جهاز تخطيطك يجيبه

صوت قلبي يوم صاح وجر ونَه

من وليفٍ صدَته عنًي غريبه

اخلف ظنوني وانا ما أخلفت ظنَه

جيت الك وابي لي طبٍ يا الحبيبه

قبل ما كل العذارى يعرفنَه

بختصر موضوعي ان كانك لبيبه

وانتهزها فرَص ابوح الشوق عنَه

لي حبيبٍ عيَت أظروفه تجيبه

واضحٍ في عيني شوقي ما اكنَه

نام ليله وانا أدفع لي ضريبه

اسامر أشواق ٍعلى قلب اخلفنَه

اشهد ان الحبَ في وقتي مصيبه

بين عشاق الهوى لعبه وفنَه

شيهانه

ما لحقني في محبتك الحسوفه

كان يلحق قلبك بحبي حسايف

ماني الي يعتذر كثرة ظروفه

اكسرظروف الزمن لجل الولايف

افرح ان شفت الوفي اطرب لشوفه

واكره اللي رفقته مامن خلايف

مرحبا ثم مرحبا مامن كلوفه

اقولها من خلقتي مامن كلايف

راس مال العبد بأخلاق معروفه

طيّبٍ بأخلأقه اولشر عايف

هذا والله الي بعيوني اشوفه

شامخٍ ما كنّه الا الشم نايف

شيهانه

ما هيّض اشجاني يا كود الي تنوح

من وقت عصريه وهي فوق الغصن

من صوتها تخنقني العبره واروح

عن جملة العالم وهيجن لي لحن

وتثّور ألحان الهجيني بي جروح

وأطلق عنان أدموعي الي عصن

شيهانه

طيفك معي وافي بوقت أشتياقي

أوفى منك في حاجتي لك تكابر

لا زاد شوقي وزاد فيني احتراقي

يجيني طيفك فازع لّي وجابر

يجبر كسر قلبٍ من البعد ضاقي

ولا انت شخصٍ انتهازي وعابر

شيهانه