ديوان الشاعر ( سعد علوش )

قصيدة لاترتجي - سعد علوش


لا ترتجي من هالبشر تغليك
وعن الشعور الصادق لا تسال

اللي يحبك حب شي له فيك
يعني انت لا تفرح ولا تزعل

والناس للايجار والتمليك
وشوف انت وش تملك وش تعمل

في عصر زيت الغاز والتفكيك
الناقصين التافهين اكمل

المبدعين الحالمين الشيك
ورودهم بحباطهم تذبل

لا ترتجي حقك ولا يرجيك
الصعب لا من مت صار اسهل

يا سيد الاحباط والتشكيك
موت انت بس وشوف وش يحصل

كل اللي سبك قبل يمدح فيك
ويقول كان المبدع الافضل

قصيدة الأسف - سعد علوش


قصيدة الأسف - سعد علوش



الأسف من بعد جرحك جرح ثاني
وانا ش اكفيك انت والا اكفي جروحك ؟!


ما اعرف شاللي على دربك رماني

بس اعرف اني اعاني من جموحك


انا مشكلتي احبك وب تفاني

وانت مشكلتك تردد في طموحك


كل يوم تسوق قلبي للمواني

ولا بديت ارحل تقول ارحل بروحك


عمري اكبر من رجاك ومن حناني

صعبه اعيش افرز غموضك عن وضوحك


لاتزين وانت من داخل اناني

داخلك لو تستره وجهك يبوحك


تبي وجهك مشرق أحلام واماني

قبل وجهك فكر بتنظيف .. روحك

قصيدة شعور الكابة - سعد علوش


ما ناوي احط عطر لعام قدام
تضامنا مع شعوري بالكابة

الله خلق للبشر واقع واحلام
وخلق لنا يا اهل الشعر الغرابة

احرقتني يالشعر والباقي حطام
انا ضحية قصاصات وكتابة

يا ليت ما فيه فكر وحس والهام
يا ليتها لا مبالاه ورتابه

لو كنت موسيقي او لو كنت رسام
ما كان شيب شعوري في شبابه

يغفر لي الرب الباقي من ايام
عساه ما بين دعوه واستجابه

قصيدة اكتب لك - سعد علوش


ما ادري وش اكتب لك علشان تقرأ
ما دامني ما عدت قادر أكلمك

أهم شيء ان انت بشعوري أدرى
سواء اعلمك و الا ما اعلمك

ما دامك الجلاد و افراحي اسرى
ما فيه داعي اشتكي و اتظلمك

الجرح دامه منك جعله ما يبرى
يشفيني الله و انت ربي يسلمك

قصيدة الاخرين - سعد علوش


دايم نحط اللوم على الاخرين
وننسى اننا ..للاخرين ؟ الاخرين
الانسان دايم يرمي أخطاءه لغير
والغير يرمي الغير الين الين الين
الباحثين عن الحقيقه يتلقون
فيهم ... وهم عن الحقيقه باحثين
الدائرة من أنشط انظمة الحياه
الحين مدري ليه يطلع بعد حين
عندي يقين ان كل حس وله رديف
حتى بديت اشك ..ان عندي يقين
لا شفت لي بسمه اقول فخاطري
هذي قبل انين او بعد انين
ما فيه شي الا بشي يقابله
ولو كان مابه غيب مابه مؤمنين
احيان احس انه محد يشبه احد
واحيان احس انا لنا مكررين
حنا الغريبين ف دواخلنا وانا
مستغرب ان حنا محن مستغربين
ما نلتقي فينا سوى في ضعفنا
لحظة مرض او خوف او لوعة ضنين
نستحقر اللحظات واحنا نعيشها
احياء لو نفهم شعور الميتين
اليوم دايم ننتظر بكره عليه
واليوم .. كان ال بكره المملي حنين
مجهول بكره اجمل من المعرفه
السحر دايم من ورى متى ووين
وكل شي في بكره يجوز اصدقه
في يوم من الايام كنت انا جنين
وال كنت رابط قبلها مع بعدها
ال كنت احيانا تسوي شي زين
انا القديم وانا الجديد ف معركه
وانا اللي من بين الثنين ..الله يعين
تعبت حيل اشوف نفسي من خلال
نفسي ونفسي مالها في نفسي عين
المؤمن مراية اخيه وناصحه
وانا م بين العالم المتأرجحين
ان افرحو خذوا الحياه بعرضها
وان امرضو صارو تقاه ودينيين
الفاشلين اليا تحدوا بينهم
اولهم اول بس بين الفاشلين
تطفو على سطح الحياه عقولهم
العمق فارغ من عقول الفارغين
يارب انا متعب ومتعبني انا
يارب ليتك خالق مني ثنين
واحد يجازي السيئين بسوءهم
والثاني يعفو عن مساو السيئين
لله حكمه والردى يوم انخلق
يمكن عشان انعرف قدر الطيبين
مظاهر الاشياء مثل بطونها
ويا كم صرخه في شفاه الساكتين
عين الطموح تشوف فالعثره فرص
وعين اليؤوس تشوف فالفرصه كمين
احلم واعزي نفسي اليا من ذكرت
ان اغلب اللي فالسجون الحالمين
وانا مع اللي يختزلني ذكرها
افرد يديني بس ما عندي يدين
لها فصدري من مكان ومن زمان
ما يغرق المحجر وما يندي الجبين
احبها ينقذني الله منها
اخاف اموت وعادني فيها مدين
مدري الزعل مدري الاهل مدري الظروف
مدري ..ولكن ادري ان وضعي مشين
لانيب ناسيها ولا واصل لها
وانا اللي متعلق فكل الحالتين
من كثر ما هي ذروة الموت الاخير
انا معى كل شي بي.. متنافسين
احلامي خلتني وغدت تحلم بها
شف حتى احلامي معاها خاينين
الياسمين الياسمين الياسمين
الياسمين الياسمين الياسمين
ترديد اسم الورد حولكم الى
مستنشقين وانتو اصلا سامعين
وشلون انا اللي كل وقت اردده
انا اعيش ف حقل من نور وحنين
وكن تساميها على اطباع البنات
تسامي النخبه على المستشعرين
يا كيف يسلى من وجه حبيبته
كنه صباح العيد عند المسلمين
من ينحرم منه حرم عيديته
ومن شافه من العايدين الفايزين
مافيه شمس الا وتسألها الفجر ..
انا اليوم اشرق او انتي تشرقين؟
احبها وحبي من النوع القديم
اللي يبين ونصف عمره مايبين
ياكم وياكم من شفوف ومن حقوق
عاشت وماتت في صدور المستحين
وياكم وياكم من كروب ومن دروب
تذوب ل اقدام الرجال الشاسعين
اعلم اللي يحسب انها بالعمر
ماكبرت بعض الرياجيل السنين
رباه والدنيا صحيح مربيه
لكنها ماهيب مثل الوالدين
كان العطا هديك والاخذ بملتك
عسانا معطين وعسانا ماخذين
وعسانا لامن كلحت واستمحلت
على افواه اجياعها متوزعين
وعسانا لامن ايئسو سمارها
انا بما تقسم لنا متفائلين
وما الحياه الا علامات وحدود
ماتعب التالين عقب الاولين
مهما وصلت من الشعور ابقى بها
وش فايدة حريتي وانا سجين
اللي ابيه اكبر من انه ينشعر
ما اعرفه لكني ادري انه ثمين
فلا يعتتب مثلي ليامنه حزن
الحزن من انعام ربي العالمين
الحزن انسانيه ف عصر الجمود
لذا انا سعيد لاني حزين

قصيدة الأتعس البسيط - سعد علوش



هناك أناس يفكرون كثيرا بلا طائل وأنا منهم
وهناك أناس يعانون مشاكل وأنا منهم ..
وهناك حلول
وهناك مشاكل
الأتعس البسيط
أنه يوجد نوع من المشاكل ليس لها حلول نهائيا
لأن علاجها واضح لكن المعنيين لا يريدون
هنا يأتي الزمن .. الكفيل بها
يحلها وإن لم يحلها يغير ظروف ابطالها
فتصغر . لذلك لا تجاهد كثيرا
لحل هذا النوع من المشاكل ولا تحزن لعدم القدرة على حلها
اصبر .. تغافل .. تعايش .

قصيدة حاولت - سعد علوش


حاولت اعيش مع الاماني في سلام
لقيتني اضيق والا هي تضيق !

انا الغريق اللي يدور عن الوئام
مع البحر حتى و لو انه غريق

ياصبر انا المأموم والا انا الأمام؟
انا الغريق انا الطريد انا العشيق

انا ابتسام الرد على الابتسام
ودمع الشقيق ليا انحدر على شقيق

هذا الكمال اللي تشوفه من حطام
هذا القسى اللي تشوفه من رقيق

الشمس ترسل نورها على الانام
وهي من الداخل متاهات وحريق

على ابواب الملك .. ألد الخصام
باقي شوي ويسقط الملك العريق

اجارتك يارب من صغر المقام
في ساعة يدور بها الحلق ريق

مانيب خايف من ضياع ومن ظلام
اخاف اوقف وانا في نصف الطريق