ديوان الشاعره ( عبير بنت احمد)

قصيدة دبلة الماس - عبير بنت احمد


من قلت أحبك..ضاع الاحساس كله
ومن شفتك أصلا..ضعت انا قبل الاحساس !!

غلاك في قلبي كذا .... جا من الله
سبحان من خص الغلا ناس عن ناس !!

أول هوانا .......... ما نوينا انتوله
والحين ما به للوله حد ينقاس

نشفت ريقي وانت ناوي تبله؟!
أشربك .. واظمى.. واسكبك وأكسر الكاس

وإذا جنوني عاجبك ؟؟ .... لا تذله
كافي على عقلي – من اذكرك - ينداس

مايكفي انك كل شي مستحله
تجي تقول : أما أنا ...... وإلا .. الأنفاس!!

لولا وجودك .. كان هالقلب من له؟
ولولا وجودي .. من بها ترفع الراس ؟

واللي لحقه الشك فالحب قل له :
تبطي ولانتب جايب للردى ساس

ومسكين منهو ما يسميك خله
من وين له يربح وهو شاري إفلاس؟

إن كان فيني من ورى الحب عله
حبك طهور ..... ولا على العاشقة باس !

وإذا بغيت تزود الطين بله ؟؟
غافل يدي .. وازرع بها .. دبلة ألماس

قصيدة لهفة عاشقة - عبير بنت أحمد


للوطن أرسل من الخافق سلام
فيه لهفة عاشقة عيت تتوب

للسعودية مدار الإهتمام
شمسنا اللي ما لها يوم غروب

قلت احبك قبل ما اعرف الكلام
ومع حليب امي لك الود امحسوب

ومن حوالي أربع وعشرين عام
كانت أول خطوة ف أرضك تجوب

يكفي انك موطن البيت الحرام
كم يحسدونا على هذي شعوب

وفيك مسجد للنبي سيد الأنام
إنخلق معصوم من كل الذنوب

وما ملك مستعمر لأمرك زمام
يومك انتي مالكة كل القلوب

ومهما قالوا فيك عذالك ملام
لا حشا ما اشوف في داري عيوب

من يلوم اللي زرعتي به هيام
شعبك اللي هام في حبك يذوب

إنتسابه لك على صدره وسام
يفتديك ان كان في سلم أو حروب

الغلا للشرق وللغرب إحترام
من شمالك نعشقك لين الجنوب

الله يديمك لنا عز و سلام
والله ينور لنا فيك الدروب

وبصلاة الله على أحمد ختام
عد ماهبت على الصحرا هبوب

قصيدة زمان الكبرياء - عبير بنت أحمد


من قصائد الفراق ...

~ زمان الكبرياء ~




يا رفيق الجرح الأول .. جرحك التالي بيا
مدمي باقي عروق باديات الإحتضار

ما ذبحنا غير قولة : ( كبريانا ) .. كبريا
من عرفنا كبريانا كل شي فانحدار

لا تحسب الشمع نوره يكفي العالم ضيا
كل ليل بالخطايا تكشفه شمس النهار

الحقيقة في وضوحي ... لا غرور و لا ريا
البلا إن الخطا شيد على عينك جدار

كان صغر السن ظنك في عذاريبي حيا
كيف ظنيتك تخلي للعقل أدنى اعتبار

يا بدايات الهموم و يا بداياتي و يا...
.. اخر أحزاني ويا أكبر أحاسيسي الصغار

يا جميع الجرح الأول .... يا زمان الكبريا
يا وداع الحب كله .. يا وفاتي باختصار

قصيدة حطني تلقاني - عبير بنت أحمد


النوم له كم من شهر ما جاني
والهم من كثر العنا.. هميته

بأسباب من عقب اللقا .. خلاني
مالي حد غير الفراق ا لقيته

الفكر يمه .. جابني ووداني
ما عنه يتخلى و لو خليته

من دونه.. احيا .. والبشر تنعاني
وكل من ضحك لي ؟.. في انا عزيته

قبل اعرفه .. كم كان ليلي هاني
ان كان جاني نوم والا جيته ..
.
.
ذي دعوتي: " يارب لا تبلاني !...
... بالحب ".. مير ان البلا حبيته

كان ا يتشكى عيشته وحداني
وانا .. على نياتي وحييته !

شفته حزين .. وكان يترجاني
ياليتني من يومها رديته

لا جا يسولف لي .. يضيع لساني !
وانسى كلامي وين انا حطيته

حتى سكوته يستفز ألحاني
على مقامات الغلا غنيته

يضحك ؟.. ولا اذكر عقبها عنواني !
يرفع حجاجه ؟.. وانشده عن بيته

به طيبة تشبه بياض ألواني
وله هيبة ما تشبه الا صيته

واموووت به لاقام يتحداني !
ويموت بي لا قمت وتحديته

يدري بحالي.. " حطني .. تلقاني !! "
وش كان ماكان الطلب لبيته

وبين الرجاجيل ان طرى لي ثاني ؟
ما اعده الا ( بنت ) .. لو عديته !

ولا قد ملى عينه سوى قيفاني
رغم انني بالشعر ما وفيته

من بن سبيل / لينما / الجزلاني
محد وصف حس معه حسيته !

ورغم انني " رمز الوفا الإنساني"
خليت لجله كل من أغليته !!!

وانا اشهد انه من نوى يهواني
يتعب .. م غيره: متعبي .. سميته

متمكن مني و من وجداني
ليته درى عن حالتي يا ليته

صحيح بإنه عمري و خلاني
مير ان طرت له " ثانية " .. وريته !

وان فكر ف غيبته يتناساني ؟؟
ما ينفعه لا جا .. وانا ناسيته

قصيدة عسى ما تكلفت - عبير بنت أحمد


~ عسى ما تكلفت ~



عقب الثمان دهور مريتني اليوم
جايب تحياتك .. عسى ما تكلفت !!

ما كنك اللي قلت (انا فيك مصدوم)
عيني بعينك .. تنكر انك تحسفت ؟!

لو تمهلك دنياك ما تمهلك دوم
هذا.. لو انك للغلا قد تعرفت

أجل أنا يا صاحبي ما علي لوم
لو عن رجاي وحسن ظني توقفت

وكانك تعاف امن الوله لذة النوم؟؟
أنا لهالدنيا بلذاتها عفت

ياما سهرت وصحبتي ليل ونجوم
وياما على روح المجرات سولفت

وياما رحم حالي يتيم ومظلوم
والجن احس اني معاهم توالفت

لين الشقى خلى من عزومي..عزوم
وعن ركب تباع الهزايم تخلفت

ما شفت قبلك داخله ( أمة ) رخوم
ومثلك(قبيلة) في الردى..مابعد شفت

القلب لولا نبضته ؟؟ ماله لزوم
والدم لولا حرمته ؟؟ ما تكتفت

محروم عشت .. وخلك تموت محروم
يكفيك بإنك في صدودي تشرفت

ولا تحسب اني ارتجف خوف وهموم
لولا الحساب وشدته.. ما تراجفت

ولا يقبل الله لي صلاة ولا صوم
إن كانني من غير رب الملا خفت

لو بس تفهم ليه انا أستر علوم
ما كان عني هالحكايات ألفت

خطاك سهم صايب الروح مسموم
ماعاد يشفع لك أسف لو تأسفت

وبهالبساطة جيتني شاري اليوم
وتبيعني بكره ؟؟ عسى ما تكلفت

قصيدة خمسين غيمة - عبير بنت أحمد


قالت الشاعره القصيده
في ذكرى زواج والدايها الخمسيني عام 1432ه أمد الله في أعمارهما
على طاعته ومتعهما بالصحة والعافية
~~~~~~~~~~~~~
خمسين غيمة هالسنة جت تعايد
رسيلها ديم الفؤاد ووتينه

وثامر شجرنا بالأمل له عوايد
والبدر خالد في سما هالمدينه

واذا ذكرنا كم لنا من ولايد
لمى وأسامة ملحهم خابرينه

وعبدالله يقري عمر فالجرايد
وعزيز يعطي عبدالرحمن زينه

ومحمد اللي صار له حب زايد
سمي خالي بالوفا ذاكرينه

واحمد على أحمد مزيل الشدايد
أبوي يا شيخ العقول الرزينه

اذا ابتسم يزهل معه كل كايد
والشمس تبدا يومها من جبينه

واعمارنا لوتنهدى كالقصايد
كل قسمها بين أمي وبينه

ونوره على نوره بها الطيب سايد
من طيبها طيب البشر ماخذينه

في حضنها يغفى المسا والوسايد
ومن لينها غطت على الياسمينه

وفعشقها مابه خفوق محايد
تطغي سماحتها على من تدينه

خمسين شمعة في هواهم وقايد
وعسى الرخا وقاد باقي سنينه

ذكرى زواج النجمتين الفرايد
نشرب بها طعم الفرح من يدينه

لكم نرابي حبكم بالفوايد
يا راسمال الكون واول حنينه

كل عام وانتم للرقاب القلايد
كل عام وانتم للبحار السفينة

كل عام واحنا في غلاكم نزايد
وكل عام واحنا في رغد عايشينه

قصيدة لا تحداني - عبير بنت أحمد


الشرهه اللي تعاندني واعاندها
من وين ماروح عنها غصب تلقاني

على حبيب نوى روحي وواعدها
وخلوني بدون روح ودون خلاني

ما شفت فيه المزايا .. شفت سيدها
وما ينقصه شي .. دامي نصفه الثاني

أعذره لا غاب عني.. مير زودها؟!
ولا جيت ب اشره / لقيت العذر ف لساني

يقول للناس : ( أنا موتي على يدها )
واقول : يستاهل أكثر .. ليه يهواني ؟!

العشق عشقي .. حبيبي لا تعقدها
لا تضيع أحلى سنيني .. والعمر فاني

ما اقصر ليال الجفا .. لولاي اعددها
وما اطول ثوان اللقا .. لولاك تجفاني !

سيد الدواهي .. تراني أسيد وأدهى
إثبت لي انك إلى هالحين تقواني

غيبتك ..

لو كنت أهمك ؟؟

لا تعودها

والا تراني بغيب .. ولا تحداني !!

والشرهه اللي تعاندني .. بعاندها
واصير من وين ما رحت انت .. تلقاني .