ديوان الامير الشاعر (محمد الاحمد السديري" رحمه الله)

قصيدة ان كان بي عذروب - محمد احمد السديري


ان كان بي عذروب حبي لاهل نجد
احبها واحب شمة هواها

احبها يوم انها ديرة المجد
دار تمكن بالضماير غلاها

دار غلاها باجد مهجتي بجد
دار لنا دار ظلالي سماها

ان غبت عنها الحقت وجد على وجد
متذكر عقب البطا يرد ماها

يا ما غدا فيها مهار لهن رجد
من فوقها صيد تروي قناها

اللي نوده يا علي ما وجد
الله يلحق كل نفس هواها

قصيدة قالو علامك - محمد احمد السديري


قالوا علامك
قالوا علامك باكي قلت مطعون
شوفو نزيف الدم مني تتالا
قالوا من اللي صوبك قالت عافون
قالوعدوك قالت ياناس لالا
هذا الحبيب الي له القلب مرهون
هذا حيات لبروح بدر الكمالا
يا عاذلين القلب لالاتعذلون
وحيات رب فوق عرشه تعالا
اني فلا انسى واحد فيه مفتون
بيني وبينه نازح البعد حالا
فتان صاب الفاب كون بثر كون
مملوح اخذ كل البها والجمالا
كنه الى حرك قوامه على الهون
غصن الى هب الهوا فيه مالا
قلبي لقلبه لو تنحيت مرهون
غيره حرام ونور عيني حلالا

قصيدة قال السديري عقب ماخاطره ضاق - محمد السديري


دام الكلام اليوم ماعاد ينطاق
.........................بين الولايف نبرة الشوق غرقا



قال السديري عقب ماخاطره ضاق
.........................بيتن يخلي ضامي القلب يشقا



ياليت ربي ماخلق حب وفراق
.........................والا خلق حب(ن) على غير فرقا


واليوم ضاعت بالمواجيب الاخلاق
.........................صار الغزل بين المواليف يرقا


دارت دواليب الزمن بين الاشواق
.........................يالصاحب اللي من سبايبك نشقا


عنيت لك في عالي الرجم مشتاق
.........................وغنيت لك مع تالي العصر طرقا


عن شوف غيرك شح شوفي ولالاق
.........................وسرقت ماتحت المحاديب سرقا


واليوم طعت اللي بالاشوار بواق
.........................واللي بقى لك بالمحاجير يبقا


من عانقوا دربك قليلين الاوفاق
.........................حالك تغير والبلا وين نلقا


محدن يعالجني سوى شوف براق
.........................واقول مابين الغنادير فرقا


ياهيه يالمشتاق لاعاد تشتاق
.........................ويامعدي المرقاب لاعاد ترقى


اخر نصيحه واحفظه وسط الاعماق
.........................خل الرجم وانزل على راس برقا

قصيدة عود لبان - محمد السديري


ليت عود لبان من يمي يميل
واتفيا في ذرا غصنه ظلال

يا حبيبي ما بقلبي لك عديل
جل من سواك يا بدر الكمال

ضمني بحماك يالظل الظليل
وانعش المفتون يا زين الخيال

هام قلبي في غرامك له دليل
عارفن سيد الملاحه والجمال

دوك جسمي يا بعد روحي نحيل
شف نزيف العين من فرقاك سال

اسمع الونات من قلب عليل
من نوازع عبرته رفرف وجال

والله انه ما خلق جنسه مثيل
بالجنوب والغرب والشرق وشمال

يا حبيبي لا تخليني قتيل
من رحيق شفاك جرعني زلال

مساجلة بين محمد احمد السديري و الشاعر زبن بن عمير العتيبي


مساجله بينه وبين صديقه الخاص الشاعر زبن بن عمير العتيبي - رحمهما الله - اذ قال شاعرنا محمد السديري


يازبن ودعناك في يوم الاثنين
لعلها لك ياخو صنعا مسافير
بجيرة الله ياعشير الغلامين
يامقفي عنا ذكرناك بالخير
نغليك يوم إنك بعيد عن الشين
وريف لضيفك في ليال المعاسير
يوم تغيبه عندنا قدر عامين
ويوم نشوفك فيه عز وتباشير
هذا الفراق اللي نظرناه بالعين
وعز الله انك ناوي بالمحادير
يازبن يالبراق بالله الى وين
واسلم ورد العلم يازبن العمير


فأجابه زبن بن عمير على الابيات الماضية قائلا
وانا بعد ودعتك الله بتسعين
وداعة من حفظ والي المقادير
ياباذل الحسنى على المستحقين
ونطاح بالضيقات وجه المناعير
ياللي بدرب الطيب جالك براهين
ولبست بالبيضا ثياب مشاهير
يبون دربك ناس واجد وعجزين
يجي لهم من دون دربك عواثير
ولا يختفي فعل به الناس دارين
لين انها تمحى الجبال المزابير
من يوم عنك اقفيت والقلب والعين
عندك,, وفي جسمي تشب السواعير

قصيدة ان باعوا الشيمة بدينار وريال - محمد احمد السديري


إن صار زود المال بيدين الانذال .. حنا من المعروف تندا يدينا
وان كانهم شرهوا على طيب الافعال .. حنا وردنا جمامها وارتوينا
وان فكروا للجود يمشون رحال .. حنا قبل يمشون يمه خطينا
يا ما لبسنا للشرف كل سربال.. وعلى البسيطة للفضيلة مشينا
في دوحة العربا لنا مجد وظلال .. وحنا على در المكارم غذينا
لو نجمع اللي فات منا من المال .. إن كان شيدنا القصور وبنينا
نعطي ولا نتبع عطانا بالاقوال .. ونبذل ونسكت كننا ما عطينا
وان باعوا الشيمة بدينار وريال .. حنا دخلنا سوقها واشترينا
نطلع لها لو هي على روس الاقذال .. لو هو عسير دربها ما انثنينا
بافعالنا نرسم دروب للاجيال .. إلي نساها غيرنا ما نسينا
أسود سادات تسجل للاشبال .. فضايل شمنا لها واهتدينا
بيض نسجلهن جديدات وسمال .. حفايظ لاحفادنا اللاحقينا
نصبر على الشدات لو شيلنا مال.. لو سال دم دفوفنا ما شكينا
نخاف يلقى سدنا كل ختال .. ويبني هزيلات المعاني علينا
الليل يا خالد على والدك طال .. وهنيت ناس بالكرا نايمينا
يا عز راسي شفت ما خبث البال .. شي يهول شيب الجاهلينا
شي من اسبابه يشيب بالاطفال .. فطر خشوم مهجرعات الحنينا
أدير قالات عريضات وطوال.. قالات خلن المخفى يبينا
منهن رزين العقل بالوقت يهتال .. بوقت عبوس فطن الغافلينا
وقت من اسبابه شكى كل ريبال .. نصبر ونسكت كننا غايبينا
الناس بالأيام راحل ونزال .. وتفجعهم الدنيا وهم دالهينا
وحيات رب نزل ايات الانفال .. عالم خفايا نية الحاقدينا
ما اترك طريق العدل في كل الاحوال .. لو يرحل المريخ للفرقدينا

قصيدة انا من نجد يكفيني هواها - محمد احمد السديري


أنا من نجد يكفيني هواها . . . ويبري لوعتي شربي لماها

وشوفي من نبيه من نوده . . . غزال تابع قلبي هواها

غزال ضيعت عقلي وروحي . . . رمت قلبي وقلبي ما رماها

لها بالروح وفوادي موده . . . ولا شي من احوالي خفاها

تعرف اني لها مملوك طايع . . . ابيع الروح في دورة رضاها

اهيم بحبها واخفي جروحي . . . وقلبي ما عشق زول سواها

توقد حبها باقصى فوادي . . . ونار الحب يحرقني لظاها

ملكني بالهوى عذب السجايا . . . ولا اذكر ساعة قلبي نساها

نحيل الخصر وضاح الثنايا . . . نظيم الدر منظوم بفاها

فجعني بالهوى ورقا حمامه . . . الى غنت يذكرني غناها

يذكرني وليف غاب عني . . . وعيني منه جاها ما كفاها