ديوان الشاعر ( الامير نواف بن فيصل)

قصيدة يالجماهير هلي ورحبي بالبطل - نواف بن فيصل


يالجماهير هلي ورحبي بالبطل
علي الصوت علي قولي الأخضر وصل
جانا مرفوع الجبين ياهلا أسد العرين
فايزين فايزين موفقين
من خليج العرب للبحر الأحمر
كل كل الشعب يهتف يالأخضر
ما عرفت المستحيل والوصول اكبر دليل
فايزين فايزين موفقين
من سعى للمعالي ما يبالي
غالي الفوز وراعي الفوز غالي
الفوارس بالطريق أشعلوا الساحة حريق
فايزين فايزين موفقين
أول الغيث قطره واخره سيل
يكمل الفوز بكره والمقابيل
السعودي فوق فوق والوطن نبض العروق
فايزين فايزين موفقين

نواف بن فيصل

قصيدة ولا تزعل - نواف بن فيصل


ولا تزعل ولا تتعب شعورك
ولا تاخذ على خاطرك مني

أبتأسف إلين أرضي غرورك
وأقول إني مقصر غصب عني

أنا معذور لو غبت بحضورك
وحسن الحسن عن حسنك شغلني

لأنك بالحلى لوشفت نورك
بعيني ساعة القرب تعذرني

وش أحلى من العدالة غير جورك
تجنن عاشق منك التجني

لو إن الشور في كل شي شورك
طلبتك بس في ذا الشي طعني

قصيدة منت رايق - نواف بن فيصل


منت رايق فيك شي ومتضايق
مانت في طبعك ولا هذا مزاجك

التفت لي شوي محتاج لدقايق
انا ماصدقت اشوفك وانتواجه

ودي اطفي بشوفتك نار الحرايق
ودي انسابك ردى الحظ وعجاجه

عش معي في فرحتي وانسى الخلايق
واسمع لرعشة خفوقي واحتجاجه

علم مابينك وبين الما عوايد
من رحيق ازهار روضي وابتهاجه

ليه تخفي يابعد روحي الحقايق
يسألك قلبي دخيلك بس ناجه

وين عني شارد عنظره توايق
مانت في حالة ظلام ولا سراجه

اه ياحلوك عليك الحزن لايق
ياجعل ربي يعجل في انفراجه

جت تسائلني علامك منت رايق
قلت رايق بس ابكتب فيك حاجه

قصيدة نجد ياشمس العرب والجزيرة - نواف بن فيصل


نجد ياشمس العرب والجزيرة
نحمد اللي على حبك فطرنا

ياوطنا كلنا لك ذخيرة
لا نوى الباغي بك الشر ثرنا

من ورى شيخ يقود المسيرة
وتحت راياته مشينا وسرنا

المليك اللي الملا تستشيرة
أبو فيصل عزنا مع فخرنا

زادنا دستورنا والبصيرة
والشريعه نورنا لا سبرنا

من زبنا في حمانا نجيرة
ومن ظما يبشر بوابل مطرنا

كلنا في الحرب نار سعيرة
لا تجمرنا حرقنا ودمرنا

وكلنا في السلم خير وخيرة
ونشكر الباري إذا أحد شكرنا

سيفنا للحق دايم نعيرة
والخطر يجفل إذا أقبل خطرنا

نفتخر بأمجادنا بكل سيرة
في مضارب بدونا وفي حضرنا

قصيدة الهميني يالمشاعر - نواف بن فيصل


الهميني



الهميني يالمشاعر بالشعر معنى جميل
علميني كيف أكون وكيف اصير وابتدى

كيف اسافر في عيونك في الزمان المستحيل
كيف تضوين الطريق لناظري وكيف اهتدي

اسمحيلي يالغرام العف يالطيف البخيل
لو تركت القلب ينبض في يدينك في يدي

كيف الاقي في محيط الظهر لي ظل ظليل
كيف احبك أكثر أكثر واتقي طعن المدي

انزفيني كل لحظة همس اكثر من قليل
وصدري في روض روحي يالغرام وردي

اشتياقي لو عرفني يافرح فجري ثقيل
وردي في فياض شوقي مثل وردة وردي

صرت اسير الشوق غصب خافقي شد الرحيل
رحت لبحور بعيدة رحت ادور عن غدي

مبسمك لا من لمحته كنه لبارق يخيل
ولو وصفت وماوصفت احس انى ببتدي

قصيدة اسمحيلي يالغرام - نواف بن فيصل


اسمحي لي يالغرام العذب يالوجه السموح
ان لزمت الصمت أو حتى لبست الاقنعه


اعترف لك ما بقى من عالي الهمه سفوح
انحدر كلي مثل طفل تحدر مدمعه


من يبي بالله يفتح لي غلق صدره و ابوح
ضاقت الدنيا بشاعر طيب قلبه ضيعه


ما قبلنا الحظ قولي وين ابارحل وين اروح
الصبر ياهو يعذب و الاماني موجعه


اه يا جود الحزن وياي و الفرحه شحوح
ضايع بهمومي الغبرا بوسط المعمعه


اشتكي لوسادتي دنياي واسمعها تنوح
كنها بعضي وبعضي وين هو من هو معه


ايه انا و العالم المغرور و الياس اللحوح
خايض حرب الرياح اللي تسوق الاشرعه

مختلط في عبرتي حبر الشقى ودم الجروح
ومستوي في نظرتي غرب الوجود و مطلعه

عودي المبري بقى به من عطايا الوقت روح
وفصل خامس حاير بين الفصول الاربعه

وراس مالي ذكريات حلم وأمال و طموح
لا صديق ولا رفيق ولا طريق واتبعه

نوب اسافر في سديد الراي ونب في جنوح
مختفي صوت الحقيقه كيف ويش لون اسمعه

سامحيني دام هجري واضح كل الوضوح
واسمحي لي بالرحيل بلا تذاكر وامتعه

قصيدة مهما يقولون - نواف بن فيصل


مهما يقولون مهما صار مهما تم
أنت البدايات وأخر ساحل ومينا


في هرجة الناس بالعذال لاتهتم
لو هم يحسون فينا ماحكوا فينا


ماعقب شرب الصبر والمر والعلقم
شي على طاري الفرقا يودينا


حنا اجتمعنا وشمل العاشقين التم
خضنا حروب الهوى فزنا وردينا


اهواك ماهي مواويل بها اترنم
ترى المواويل هي اللي تغنينا


منا الوفا ياوفي الروح يتعلم
وكل التعابير تبحر من شواطينا


حبيب عمري حياة القلب خل الهم
تقسي الليالى ولكن ماتقسينا


وان كان جدت جدايد حبنا اقدم
ولاعاش راس على الدنيا يبكينا