ديوان شاعرة الحلم مها الرياض

لو تشوف شلون اشرح لك غلاك
والله ان تشفق علي من الجنون
اعتدل في جلستي كني معاك
وتنطق شفاهي هلا بك ياحنون
واقعد اسولف واجيبك من هناك
واللي حولي يهمسون ويضحكون
مدري حشمه او غلا او ذا وذاك
الوكاد انك تحرك ... بي شجون
من ورا الشاشة ويجيني ارتباك
قلبي يرجف وبعد يديني يرجفون
والكلام اللي جمعته بقوله في لقاك
والقصيد اللي على عذب اللحون
كل هذا يضيع مع بسمة شفاك
ولالمحتك ضاع حتى الحاضرون
واعتقد ياروحي ماتجهل غلاك
لو حذفت الحرف بين في العيون
ياحبيبي قلبي مايعشق سواك
وانت وحدك مالكه واللي تمون
وعاد ماوصيك دام القلب جاك
كان ماتبغيه رده لي تكفى بهون
وانتبه ان شفت في حرفي اشتباك
وحست ام اللهجة اللي تنطقون
اعرف انك قلت لي يسعد مساك
اجل لو قلت احبك ..... وش يكون
كلمات شاعرة الحلم مها الرياض

طير السعد معجب بهذا

امي
في انخفاضي على تقبيل يدك
يرتفع راسي الى حد السحاب
تشبهين البحر في طول مدك
اما جزرك فسيل يغطي الهضاب
في عطائك مافي هالكون قدك
والوفاء يالوافيه بلغ النصاب
جاك طيبك من ابوك وجد جدك
وغير هذا فزتي يمه بلين الجناب
شلتي ايتامٍ ولا بيحتي... سدك
وضيقتك ماشافها من هم اقراب
تطلبين الله من فضله.. يمدك
واحمد الله دوم يسعدك الجواب
اتفائل لاسمعت قراية وردك
ولا طلبتي ربي يجنبنا الصعاب
قل ذات اليد مافي يوم ردك
عن عطايا اعجزت بعض الشباب
افتخر يابنت جدي بك واعدك
اطهر واطيب من مشت فوق التراب
ماهو قصور بالنساء بس ماهن بندك
من قديم الين ساعة .... هالخطاب
ايه احبك وايه اعزك وايه اودك
ولو طلبتي نور عيني ماافاصل فالحساب
الله يقدرني على برك وودك
ويحفظك ربي من انواع العذاب
شاعرة الحلم
مها الرياض

من خيالاتي

بنبرة حب يسالني
يقول لي يالمها وش صار
وش اللي مشغل بالك
مشغولة ليه باستمرار
وقلت ما شئ... يالغالي
ولكن قلبي ... يمك طار
واخذت عقلي بعد مني
وبقيت انت محور الافكار
وملكت احساسي وشعوري
وصاروا لك من الانصار
وتفز لشوفتك عيني
وقلبي يدق مثل الطار
وانسى كل من حولي
وتجيني حالة استنفار
تقول كن صابني جني
او بسم الله فيني زار
وارحب بك واهلي بك
واقولك اعذب الاشعار
واعشق كل حروف اسمك
نقشتها بسوارتي تذكار
واذا شفتك سعيد اسعد
وزعلك يالطيييييف ..اعصار
طلبتك ياحبيب الروح
ترفق باللي جوك زوار
عيوني وقلبي وروحي
في وداعتك من الاخطار
ومثلك يكرم ضيوفه
كما غيث له مدرار
ومااوصيك في قلبي
تراه يعشق الابهار
ابيك تصبحه بوردة
وتمسيه باجمل الازهار
وقول له كل كلام الحب
تراه يستاهل الاكبار
تراه في صدري معزز
كما طير بيد صقار
فديتك دلعه بالحيل
ولاتزعله ترا ينهار
وابيه بقلبك مكرم
وابيك تخفيه عن الانظار
مابي من هب يحكي به
ومن دب يلمزه باستحقار
وابيك تحبه وتغليه
مثل ماهو عليك يغار
ولكن كان ماتبغيه
فصد وكثر الاعذار
سالتني يابعد عيني
وهذا اللي ياحبيبي صار

الحب السامي

ايه احبك حب سامي
حب واضح في كلامي
حب ارواح ومشاعر
حب تنطقه الحروف
بالدعاء لو ماتشوف
حب سامي
لااتصال ولا وصال
او رسائل بالجوال
حب طاهر
ماهو من اجل المظاهر
حب من روحي لروحك
افرح بحكيك وشوفك
وخوف لا افقد خيالك
ضحكتك....حسك ....وصالك
حب سامي بالمشاعر
واندماج حسي وحسك
صرت احب اللي تحبه
حتى لو ماني احبه
وقمت اردد مفرداتك
لهجتك .. حرفك .. وذاتك
صرت احاسب في كلامي
ولجلك اكثر سلامي
وصرت اشوف الدنيا حلوة
واختفى اللون الرمادي
من عيوني ومن فؤادي
وكل شي اصبح جميل
وفي هواك طاب المقيل
يااااه انا احبك كثير
وان سمعت اسمك اطير
وصرت اردد في الاغاني
واسرح .. واحلم .. واغير
وابتسم مهما يصير
اتفائل لالمحتك
واتنرفز لافقدتك
وشوفك عندي يوم عيد
اعيشك حلم باعماقي
وابوح بكل اشواقي
غلا ..وابيات .. وقصيد
واكرر كلمة احببببببببك
ولا ارضى احد يسبك
وادعي ربي وربك
تكون يالغالي سعيد
لاحظ اني قلت لاحظ
هالغرام وانت بعيد
اقول ياللي تعرفونه
يابختكم يوم تشوفونه
مناية تلمحه عيني
وتشوف عيوني عيونه
ابي اطمني قليبي
لاني فيه مجنونة
انا مااحب بالساهل
واذا حبيت مااتساهل
لان اللي احبه دوم
اكيد انا يستاهل
انا قلبي عليه ضامي
لانه كل احلامي
وهو قلبي وروحي
لانه حبي السامي

مرت سنه وشهور يمكن خمسة
وانا معاكم كل صبحٍ وليلة
عاملتكم بالطيب واحد واحد
وحبيتكم مثل مااحب العيلة
افرح لفرحتكم واطق طبولي
وفي احزانكم مدامعي هميله
وافخر واماري في طيّبكم
من الرجال او لابسات الشيلة
وقصايدي تشهد بقولي هذا
ومن زاد طيبه زدت له في الكيلة
ماني بدور من وراها منصب
ومابي سوا قولة نعم ياجميلة
واللي مكذبني في صدق اقوالي
قدام خلق الله يحضر دليله
انا يااخواني مابي منكم حاجه
الا نعيش بهمساتنا الجميلة
نعيش مثل قولة تعايش سلمي
اسعوا لها تكفون باية وسيلة
فيما مضى جاني حقي كامل
ماانكر من المعروف لو قليلة
وقف معي النازف بكل شهامة
وخواتي تتزعمهن الاصيلة
واللي ساعدني بيض الله وجهه
شكرا ويستاهل بيوتي الجزيلة
حنا تجمعنا من بلاد شتى
والكل منا جاز له مقيله
تعالوا يااخواني نصفي النية
ويابخت من كان ذا حصيلة
وتسامحوا قبل رمضان يشرف
وتساعدوا تكفون عالفضيلة
وانا بحللكم وتكفون حللوني
عسى والديكم في الجنان الضليلة
في ذمتي ماجيت اسوي مشكل
الا اتفادى... نزلة التحويلة
كله احتراما لسيد جمعنا
ووفاء لصرح مانبي بديله
ولا ترا النت بحره واسع
وكل يقول الزين من ياتي له
لكن انا احب همسات بقوة
وبصبر ولو جاني منها ميلة
وماراح اتركها الا بامر النازف
ان قال يامها صرتي دخيلة
في ذمتي مااقعد فيها ساعة
لو كان اول روحتي مستحيلة
لذلك كان وجودي مضايقكم
عطني خبر واغادر الخميلة
وهذا تراحقك ولا بالومك
ولا تحملني سنين طويلة

حبيب القلب باحساسه دعاني
وهو ماقال لي شعر واغاني
يترجم صادق احساسه فعايل
يقدر .. يحترم .. ويخاف اعاني
يطالعني بحب مانطق به
ويغض الطرف الا منه لفاني
اشوف الشوق في عينه لاسلم
واحس بنبض قلبه في المحاني
احبه حب مايخطر في باله
واترجم شوق قلبي بالمعاني
وادري فيه يدري اني احبه
ويدري اني دريت انه بغاني
يفز لشوفتي وافز لاجله
وافرح به ولو ماجاء عشاني
والامنه تضايق ضاق صدري
ولكن مااسأله من ما يعاني
اخاف ان السؤال يزيد ضيقه
او يمكن رايده من شخص ثاني
لذلك بعشقه من دون علمه
وبحبه حتى لو انه نساني
لان القلب حبه دون حاجه
واظنه دون حاجه هو هواني
انا من غير لاادري لقيته
وهو من غير لايدري لقاني
تواصل بالمشاعر لا ارادي
ماندري كيف جاه وكيف جاني
احسه يبتسم لا شاف حرفي
وانا اشوف السعادة كان جاني
وادعي له بظهر الغيب دايم
عسى مايشوف ميلات الزماني
وانا والله احب الكل في الله
واعز الكل معزة اخواني
كلمات شاعرة الحلم مها الرياض