ديوان الشاعر ( مساعد الرشيدي)

قصيدة سيف العشق - مساعد الرشيدي


كيف أطفي الريح بثيابك وكيف اشعلك
كيف اتنثر على جمرك وكيف احتويك

نقضت لليل الحرير وجيت ما انت لهلك
سميت باللي فتني بك وقلت ابتديك

هذا اول الدرب اوهذا الطريق اولك
جيت اتوقا عذابات المدى واهتديك

شوقي مسافة وهمساتك مدار وفلك
ان ما ضميتك غلا ياعلني ما ارتويك

اية اعرفك واعرف اني من غلاك اجهلك
مرات اضمك واخاف اني مشبة عليك

مرات اشوفك بنفس الوقت واتخيلك
وانشد كفوفي عن اخر سالفة من ايديك

اعن لك لو تصب الموت واتهيلك
واجوع لك واتمنى خنجرك واشتهيك

ماقلت لك عمر سيف العشق مايقتلك
ماتشوفني حي قدامك وانا اموت فيك

اشتق لك قبل اجيك وجيت واشتقت لك
لبارحة طول ليلي بين هاذي وذيك

مليت جمر انتظارك واستحيت اسالك
واحسبني ما بعد جيت وفكرت اجيك

اثرك بقلبي من البارح وانا استعجلك
واثري نسيتك من الفرحة وقمت احتريك

قصيدة حب جديد وقصيدة عشق مجنونه - مساعد الرشيدي


حب جديد وقصيدة عشق مجنونه
الله يحييك ياحب لفى توه

حب لكله وحب بس لعيونه
حبين باقصي خفوقي بس له هوه

ايه انصتي ياشجون الروح ممنونه
جاني رقيق المشاعر ناوي الخوه

جاني حبيبي وعمري فرحة غصونه
ربيعها يوم سال السيل من توه

يوم انهمر لي حنانه باعذب لحونه
قلت الله الله صفا جوي على جوه

والله لاحبه ولو حظي وقف دونه
مافيه قوه تصد الحب بالقوه

بس انتظر يازمن لين اعلن المونه
ومن بعدها اللي تسوي يازمن سوه

قصيدة رماد الشوق - مساعد الرشيدي


ولع رماد الشوق يامعذبي نار ------- من كان يحلم بشتعال الرمادي

ماكنت احسب انة يكون القاء حار------- لين أجتمعنا واشتبكنا الايادي

وقامت لنا الذكرى تغني على الطار------- تنساب بسماعي نغم حب هادي

حسيت شي لفني مثل الاعصار------- واستيقضت نشوة غلاك بفوادي

أخذت لي سجة وانا شبة منهار------- بين الخيال وبين علما وكادي

وفزيت يوم اني تنبهت وش صار ------- مثل الي توة صحى من رقادي

تغير الموقف بلا سابق أنذار------- وغير المشاعر جت مشاعر اجدادي

رديت لك عقب التجافي ولانكار -------- وطويت صفحات الزعل والعنادي

وتبدا ذيك المبادي والافكار -------- اية جنون افكار واية مبادي

ترى انا مليتها لعبت النار------- محد لعبها قبلنا واستفادي

من رد للجنة عقب صالي النار ------- حتى السموم يصير عندة برادي

قصيدة كبوة حصان - مساعد الرشيدي


لا عاد تنشد ما بقى عندي علوم
كل العلوم المبطيات تخبرها


ما جيتك اشكي ميلة الوقت مزحوم
نفسي ليا ضاق المدى ما اخسرها


يا صاحبي كنت امس كنت امس محشوم
و اليوم هج بجيتك و اختصرها


خلك بعيد ابعد من العام لليوم
و ادنى من احلام النجوم و قمرها


بعض الكلام اللي تحليه مسموم
و ما كل كف صافحتك تغدرها


كم طيب ساقته الاقدر لرخوم
و يا كثر ناس تنخدع في صورها


و الحر ما يشره على خنعة البوم
الله رفع شانه و وطا قدرها


لو جيتني كنك على الوجه ملطوم
بعض الخطايا عذرها ما غفرها


عندي تساوت هرجة العذر و اللوم
هذيك ما ابغاها و ذيك احتقرها


زله و عدت ما حدتني عن النوم
مرت سلام و بعد الله كدرها


انا اعتبرها كبوة حصان و يقوم
و انت اعتبرها زي ما تعتبرها

قصيدة عبسية عيت على قلب عبسي - مساعد الرشيدي


قالت ضمينا شعر وأمهلت هجسي
ماللقصيد اليا ضميتي معاذير

حطت نوارس عطرها فوق طرسي
شوي وارياف الحنايا نواوير

عبسية عيت على قلب عبسي
عيت على قلبه وقلبه كما الطير

طير على غصن المواعيد منسي
ودلال شوقه للهبايب مباهير

أمارة بمهيل الشعر نفسي
رويانة عشق وسلام وعياطير

اليا اصطفق موج الطواريق يرسي
يخت الزعيم ويفرقون الشواعير

هاتو لها في فية القلب كرسي
من طلة النجمة اليا رعشة عصير

هاتوا لها لاخالط الشوق همسي
هي غير عن كل البنات الذي غير

وقولوا لها لاهبت الريح عكسي
وقامت تصافقني هبوب المشاوير

تلمني بأهداب نجل وخرسي
وتمطر على عمري وتصبح على خير

تصبح على قلبي وتصحى وتمسي
وريانة القامة عنود الغنادير

وقولوا لها لاغيب الغيم شمسي
هذي سواته لاأفختن المعاذير