ديوان ريم شمر ... ( غروب )

08-03-2020, 01:07 PM

..
هيضني الهاجس وانا شبه زهقان

أزريـت اصـدد بالقـوافـي عـناده

نقيت بالابيــات حطيـت ما زان
الفهم لاهل الفهـم سهل الأجـاده

لوكانت الدنيا على كيف الانسان
ماكل حييّ عاش فيها بـ قــراده

يمكن صواديف القدر بعض الاحيان
تمحي لنا حلم العمر بالسعاده

هذا مريــض طــول الايام وجعان
يشكي من الاوجاع دور ضماده

يشري علاجه دايم الدوم تعبان
يقضي حياته عايش في سهاده

وهذاك مــر العمر فقري وطفـران
يلهث على المقسوم زاد أجتهاده

كثــرة همومه ميزته بس شقيان
يركض ورى الدينار يعلن حداده

وهذي حرمها الله تولد بورعان
تبكي بقلبه نار يصْعب أخماده

وهذيك كثلى ظامها فعل بزران
تقول ضاع العمر وهذا حصاده

والشايب المرمي على دار شيبان
شي قديم وانحكم بالاباده

تمضي بنا الايام والكل حيران
نجر بالونّات حظ النكااده

ياكثر شرهتنا غدا الكل زعلان
هذي مقادير الزمن يا سياده

يا صاحبي الله رحيم ورحمان
ارحم بعبده بس صبر وجلاده

أطلبك يا معبود في كل الازمان
تغفر ذنوب لعبد يرجي ارشاده

الموت حق وان جاك قرقع البيبان
أسجد لربك والتزم بالعباده

\\ اسند على الشاعر أبو حرف رنان ...والعذر كان القاف ما به اشاده ..!

حصرياً لمنتدى همسات الغلا
السبت \2019\3\23
غروب

08-03-2020, 01:10 PM

**
الهاجس اللي لفى أطناب غالين
حيّ الهجوس وحيّ منهو قرابه

غالي وترخص له بلاد وعنوانين
ينزل بروض(ن)زي برق وسحابه

يفرح له الخافق وتطرب به العين
تنبت بساتين الفـرح في ركابــه

الله خلقنا بأختلاف المــوازين
أصابعك بالكف صعب اتشابه

ناس بفعل الطيب تاخذ براهين
وناس على الزلات مفتوح بابه

وانا عشيري خوته ما بها شين
سمـح المـحيا يتسـم بالذرابـه

اذا حكي ضاعت علوم المعادين
اقول يا لبييييييه ملـح ومهابــه

الشوق متعبنا سكن بين ضلعين
الشوق يفضح صاحبه لا سطابه

ان غاب روحي كنها بين نارين
حبه محاصرني سوات الذيابه

صافي ويــرقى بسلوم المحبين
بالعهــد وافي ما يميـل ركابـه

باله مقفي عن جميع المزايين
يقـول ريم العمر مرتع شبابه

تفداه روح يسكنـه والشرايين
يكفيه بين الناس فعلٍ مشى به

يا الله عسى دربه ورود ورياحين
ويالله برزق(ن) ياصله عند بابه

يأهل الوفاء جبت انا العيد عيدين
عـذري عشيري يستحق الكتابه

وختامها صلوا على ناشر الدين
نبينا المختار وأهــل الصحابه

\\ بأمر الرجال اللي على الطيب رابين .. نرجع نردد بالقوافي لبابه ..!

حصرياً لمنتدى همسات الغلا
الخميس \2019\3\28

08-03-2020, 01:15 PM

..

..
عمت تباشير الفرح كل الوجـود
تغنوا الاعضاء باللحن الجميل
..
جابــوا تعابير السعاده بالــردود
في عيد همسات الغلا وابن الاصيل
..
يمكن نبرهن عن غلاها بالعهـود
هي بيتنا الثاني وهي لمة شليل
..
نويت أشارك لو غدى وقتي جحود
في عيدها التاسع انا قافي جزيل
..
أسرج من الابيات والقاف معقود
قـلبي من عروشه تغنى بالجليل
..
شي يجمَّل موقفي بين الوفـــــود
الكل شارك فرحها وزاد الحصيل
..
يامنتدى الهمسات ياروض الورود
على خطى الغاليــن ثبتنا الدلــيل
..
الشمري عــرق يفيض به الصمـود
النــازف كحيلان شيال الثقيل
..
وبنت الاصايل ذكرها ممتلي جود
سنعــه ومنعــه ترتهش مابهـا ميــل
..
والنادر الطيــب ابو كف مــدود
سلطان ساس الطيب من دون تظليل
..
شفت الوفاء في روضها يشتعل زود
الكل يــزرع في بساتين النخيل
..
وان كان خنت القاف واظهرت السدود
في غيمة الهمسات مكفول الدخيــل
..

غروب \ شفت الوفاء بربوعها وزرعت شتلات الصمود \
عل وعسى يا عاذلي تسكت ولا نسمع صهيل ..!

حصريا لهمسات الغلا
2019\2\5
ابنة الهمسات
سهر

.

08-03-2020, 07:20 PM

**
ماقد كتبت القصيد الا على حله ... يوم المشاعر تزاحمني وازاحمهااا
**
انثر حروفي واعقد الحبل واحله .... اقوُم الناس في قافي واقعدهااا
**
من قال (ريما) تحوف الشعر ودله ....مهو مضيع دروب اهلي وجاهلهااا
**
العود جدي صروح الشعر تخضع له.... ابوي عقبه تفنن في مطالعهاااا
**
شاعرمحنك يحصد القاف ويدله..يلعب على الطايله متعب معاجمهااااا
**

وهذاعضيدي يخوض الشطر ويفله...يجر من واهج بالنفس مشغلهاااا
**
الليث مبطي طبوعه يارثه شبله ....حكمة قديمة كثير الناس تسمعهاااا
**
وانا على النَّهج اروم الشعر مامله .... أتابع الدرب لين اوصل مواردهااااا
**
من شجرة(ن) كل من دور لها زله .... تبطي سنينه ما يلحق مكارمهااا
**
لا يغرك الروج والمكياج وقذله .... وقت الشدايد فعايلنا نوثقهاااا
**
اجيب معنى الكلام بدقه وجله .... اعيد وزن القصايد ثم أعــدلهاااا
**
الجملة اللي تجي عوجا ومختله .... أقيس ثقل المعاني واسنعهااا
**
قويت نفسي برب البيت والمله .... مع كل نبضه صميم القلب زكاهااا
**
ما همني من يجهر القول ويظله.... كل السوالف عنده الله بنلقاهااا
**
يا الله طلبتك تحصن فعلنا كله .... يوم المواجهه صفايحنا تبيضهاااا
**

غروب\لا ترمي الناس بهرجٍ منت قد له ....الشمريه من ياصل مراقبهااا ؟؟

حصرياً لمنتدى همسات الغلا
الاثنين \2019\3\18
بقلم \\ريم شمر

08-03-2020, 07:25 PM

[AL..IGN=center]

..
ياحرف لا شان الـزمـن ..
من يجاريك ~
غير الخفوق الي ..
ضمى في ...
غرامه .
..
رتب حروفك وانّتـبـه ..
في مساعيك .
لايلحقك من هالقصايد ..
ملامه ~
..
يمكن ليا منك تشكيت ..
مغليك .
يـغوص بـبحور الشعر
باهتمامه ~
..
الصاحب اللي لا تباطاك ..
يبغيك .
تشفى جروح في خفوقه
تسامه ~
..
يرضيك وان زاد الزعل بك ..
يسليك .
لو ضاقت الدنيا وصارت ..
ظلامه ~
..
حلو السوالف كلها يوم ..
الاقيك .
اقول يا زين الحكي ..
وأنسجامه ~
..
يقاوم الترحال والبال ..
ناويك..
لو انه امسى في طريق ..
الحطامه ~
..
رحال بالدنيا وهمه ..
يصافيك .
يواجــه أيام العنا..
بأبتسامه ~
..
كل الوصوف النادره في..
معاليك .
رسمت بأبيات الشعر لك ..
علامه ~
..
صحيح عهد الحب ان رحت ..
وافيك .
وان جيت رحب وانتشى
في مكانه ~
..
هذي مواثيق الهوى لك ..
تباريك .
رفعت في درب المحبين ..
هامه ~
..
ماقول مثل الناس من غاب ..
ناسيك .
اقــــول وقـــت وتنجلي ..
هالغمامه ~
..
أقولها وانت تعـرف قدر ..
مغليك .
سمّاك من بين الخلايق ..
هيامه ~
..
ارخصت كل الناس والقلب ..
شاريك .
مثلك وجوده ما يشابه ..
عدامه ~
..
غروب \ عزي لقلب في ظروفك يخاويك .. وان جار ليلٍ ضايقك ما ينامه .

حصريا لهمسات الغلا
الجمعه 2019 \2\15
غروب

[/ALIGN]

08-03-2020, 07:30 PM

**

البنت ..
مرحبا ترحيبة سقتها لابن الكــــرام
من هجوسٍ لابغيته يشب شبوبها
**
مرحبا يا نسل عود على العزه سنام
اشهد انه بالصعايب يشيل حمولها
أخوها ..
البقى ياللي حضورك يبدد هـ الظلام
إجمع الابيات وأسنـد على طاروقــها
**
لو يشين الوقت حنا على رؤس الغمام
عزوةٍ عند المصامخ تســـــل سيوفها
البنت ..
الرجل لا شان طبعه فقد كل أحترام
الحـــــرام يحلله والـــردى منطوقها
**

ماكسب في دنيته غير تجميع الحطام
الله انـــك هالخطاوي تسد دروبها
أخوها ..
دام انا يا أخوك عايش وراسي به عرام
محزمك وقت الشدايد وأنا عامودها

**
بس انا بقول كلمه وعندي به مرام
من يسوم النار حالـه حـزن يرثونها
البنت ..
جبتها يا تاج راسي على المغزى تمام
والنفوس الحاقده بيحت مكنونها
**
كل ما زانت علوم(ن) تملكها أنتقام
الحسد طالت ذيوله وزاد غبونها
أخوها ..
بسالك يا نور عيني وش اللي بالمنام
شاف له حيه بجوفه تصب سمومها
**
فتنة يكثر بها الهرج ويفك اللحام
والظروف اللي علينا تشد شجونها
البنت ..
الدَّلائل بينه والحذر مسك الختام
العدو يبطي يخطط يهــدم اركونهـا
أخوها ..
افهمي ياخوك مني عناقيد الكـــلام
كل بنت بالطنايا غصب يخشونها

**
غروب \ ابعد عن اللي خوته كلها غم وملام ..ناس على الزله تفك عيونها

حصريا لهمسات الغلا
الخميس 2019 \1 \3

08-03-2020, 07:33 PM

..

الشعر فن وللطــواريـق كيال
اهوى بحور الشعر لو قاطعتني
..
ابوي قبلي بالشعــر نازع رجـــال
واليـوم يشكي هالقوافي جــفتني
..
من رؤس شمر نايف لربعه اظلال
ليت المقابـــــر قبل يومـــه طوتني
..
جتني همــوم زايدت ضيقة البال
طاحت دمـوع العين يــوم لفتني
..
تاه الشعور وزلزل أقصاي زلزال
كـــل الامـور الماضيه عـاودتني
..
قمِـت أتلفت علّها كذب وأقــوال
ابي أعترف يا أهل الغرام اغبنتني
..
ودي أفضفض واسرد القاف موال
ودي اعبـــــــر والمعــاني عصــتني
..
نخطي ونذنب والقدر جملة اهوال
دنيـــا تقلب فــي خفــوقي بلـــتني
..
جابتني الصدفة على كف رحال
وشلون اوادع عينه اللي بكتني
..
ياصاحبي سقت الغلا ماله امثال
مـن عقبهــا نـار المـحبـه صلتني
..
كوتني الفرقى على كل الاحوال
الجـرح ينزف والهموم اتعبتنـي
..
حب سكني يأخذ الــروح مدهال
مضرب طعونه عانها موجعتني
..
نجم بعيد وتالي الليل يختال
يشــع نــوره والغيـــوم ابلشتني
..
حاجه غريبه غطت الشمس بجلال
ماكــان يمديني بصــدري رمتــني
..
وختامها مسك ورياحين ودلال
أن كان حبه ذنب نفسي غوتني
..
غروب \ الطير يرقص متعبه شيل الاثقال \\ بعض الهقاوي لو تخيب اذبحتني .

بقلم الشمريه

وليدة اللحظة حصريا لهمسات الغلا
الاربعاء
2018\12\19

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
حيوان الضرنبول وتأثير على البيئة	مبارك آل ضرمان	( قسم الحيوانات والنباتات والاسماك )	8	19-03-2020 06:12 PM
تعرف عن أهم مميزات حيوان اللاموس	مبارك آل ضرمان	( قسم الحيوانات والنباتات والاسماك )	12	24-07-2018 09:37 AM
أسباب أنقراض حيوان الكوالا	مبارك آل ضرمان	( قسم الحيوانات والنباتات والاسماك )	7	13-07-2018 07:36 PM
إليكم معلومات عن حيوان الشنشيلا - مشاركتي بتنشيط الأقسام	مبارك آل ضرمان	( قسم الحيوانات والنباتات والاسماك )	6	08-02-2017 03:07 PM
حيوان شينشيلا ) القروب الاحمــــــــــــر	حنين الروح	( قسم الحيوانات والنباتات والاسماك )	22	11-05-2016 07:32 PM

الإهداءات

ديوان ريم شمر ... ( غروب )

ركن الاديبه غروب