 الإهداءات | |
| |||||||
 |
10-03-2010, 05:43 AM
| #43 |
  |  الجزء الحادي عشر لطيفه: انسير انشوف شوه فيها.. فاطمه: لطيفه يمكن عايشه تعبانه خليها ترتاح و عقب صلاه العشا بنسير انشوف شوه فيها.. لطيفه: لا لا انا متأكده انها وراها مصيبه...قلبي ناغزني من زمان..عويش مب هيه الاوليه فاطمه: شوه بيستوي الله يهديج..يمكن زفتت فالامتحان ولا حد قالها شي لطيفه: بس انا قلبي مب مرتاح...فاطمه البنت اتغيرت استوت دووم اتصيح و دوم ساكته ما ترمس حد خلينا انسير شوه فيها.. فاطمه: يعني عويش من عرفناها عنطووزه و فيها ريحه خقه...و دوم عازله عمرها عن العرب..عنبوه اختج هاي مفروض تعرفينها اكثر عني....بس امري لله انسير انشوفها.. سارن لطيفه و فاطمه فوق عند عايشه، دقن الباب مره و مرتين وثلاث بس ما شي رد!! الباب كان مسكر بس مب مقفول زين..فجنه شوي شوي و دخلن داخل.. لطيفه: عايشه شي يعورج؟؟ ما شي رد...اتقربن منها، عايشه كانت راقده على الشبريه و متلحفه و....تصيح!!!! لطيفه: عويش.....عويش شوووه فيج؟؟؟؟ ما شي رد..عايشه كانت اتصيح صياح غريب...صياح ايقطع القلب..صياح ما فيه شك انه اللي استوا شي مب هين..شي جايد... لطيفه: عويش فديتج رووحج ترمسين؟؟؟ قوليلي شوه فيج؟؟؟شي ايعورج؟؟شي مستوي؟؟؟ زادت شهقات عايشه و الدموع اتغطي ويهها المحمر..دموع حاره..دموع حسره و قهر و ألم.. فاطمه: عووويش...حبوبه قوليلنا شوه فيج؟؟ عايشه و هي اتصيح: مم....م..ماااات....ماااات و خلاني بروّحي في هالدنيا...ليش ليش ايموت..لطوووف فد..فديتج قوليله ايرد والله و الله ما زعله..بس قوليله ايرد و الله و الله.... لطيفه: منوووه اللي ماااات؟؟؟ يالله يهالمصايب من وين ولا من وين تطلعلنا؟؟؟ عويش شووه مستوي منوه اللي ماااات...ارمسي حرام عليج قلبي وقف.. عايشه: الله يي...يسا...يسامحه...حرام عليه و الله حر..حرام لطيفه: لاحووووووول..و بعدين يعني عويش ارمسي دخليج ترمسين... فاطمه: لطووف شوي شوي على البنت..قومي قومي خليني اشوف شوه فيها..( قامت فاطمه و قعدت عدال عايشه على الشبريه) فاطمه و هيه تمسح على راس عايشه و تمسح لها دموعها: عايشه قومي وشربي شوية ماي،قومي و قوليلنا شوه مستوي..بس ما شي اي ردت فعل من عايشه بالعكس انهارت اكثر و زادت دموعها و شهقاتها اللي تقطع الفواد..انتبهت فاطمه انه عايشه ماسكه بين ايديها جريده و لاويه عليها بقو و اتصيح..شلت فاطمه الجريده و جلبتها... فاطمه: غريبه هاي جريده اليوم...شوه تباها؟؟؟ ليش جيه لاويه عليها؟؟!! لطيفه: هاتي اشوووف لمحت تعازي فالصفحه الاخيره هاتي اشوووف ... و كانت المفاجأه : " بقلوب مؤمنه بقضاء الله و قدره تنعى عائله السيد محمد بن...ال....، ابنها المأسووف على شبابه غانم محمد ال... الذي وافته المنيه مساء امس في حادث اليم و تقبل التعازي في منزل والده الكائن بمدينه أبوظبي منطقه... انا لله و انا اليه راجعون" فاطمه: عويش...كنتي اتعرفينه اللي مات؟؟؟ هزت عايشه راسها بالايجاب..و بدت شهقاتها اتخف شوي شوي... لطيفه: شوووووو...شوه يعني اتعرفينه؟؟ عويش الله يخليج لا يكون اللي في بالي..مب ناقصين مصايب نحن فاطمه: لطووف اذا بتمين جيه طلعي برا الغرفه احسن... لطيفه: شوه يعني تبين اشوووفها مسوده ويهها و اسكت...ياربي من وين ولا من وين حطت فاطمه راس عايشه على ريولها و قعدت تمسح على شعر عايشه الين ما هدت شوي و شهقاتها بدت تخف.. فاطمه و بتردد: عايشه...كنتي اتعرفينه...كنتي اتحبينه؟؟ هزت راسها عايشه بالايجاب مره ثانيه و دموعها غاسله ويهها..دموع حسره و غصه و بخص لطيفه: شفتي شفتي....قلتلج مسوده ويهها... فاطمه: لطيفه و بعدين يعني؟؟؟ عايشه و هيه اتغطي عيونها بإيدها: برايها خليها اتقول اللي اتقوله...و الله اني استاهل...ليش يا ربي ليش...خذته عني؟؟ اللي احبه ماات تعرفين شوه يعني مااات...ما بشوووفه مره ثاااانيه...ولا بسمع صووته فهالدنيا ابد...مااات و دكوووه تحت الترااااب...ياووويلي يا ويع في قلبي..كيف برقد اليوووم على الشبريه و تغفي عيني و غانم اهناك اروووحه تحت التراااب...ياويلي ياويلي من هم ضواني...آآآآآآه يا قلبي ..بمووت يا لطيفه بمووت ... فاطمه: عويش حبيبتي لا تقولين جيه...قولي قدر الله و ما شاء فعل..هاي الدنيا..هدي اعصابج و شربي شويه ماي.... شربت عايشه شويه ماي..و هدت ....بس دمووعها ما وقفت ثانيه..و شهقاتها مثل السيوف اللي تطعن القلب فاطمه: هاي الدنيا حد ساير و حد ياي...عويش ارمسي و قوليلنا ربج ايخف شي عليج..و اذا ما تبين ترمسين براحتج..هاذا شي يخصج.. عايشه: آآآآآآآه يا فاطمه....شوه تبيني اقولج...حبيته و الله عاقبني على هالشي و شله عني في غمضت عين..راح يا فطيم...ناظر عيوني فارق الدنيا..خلاص لا له حس ولا نصخ في هالدنيا..لا يسمعني ولا اسمعه..سار و خلاني بروحي..ليته حي ليته يمشي على هالارض ولا يكون تحتها و هو في شبابه..آآآه الله ياخذها من حياة عقبك يا غا...غانم..و ردت عايشه اتصيح بكل الالم اللي في قلبها و روحها فاطمه: فديتج يا عويش لا تقولين جيه...قولي الله يغفرله..لا تقطعين قلوبنا... لطيفه: بس عويش بس الله يخليج...انتي شقايل عرفتيه؟؟ مرت نص ساعه قبل لا تهدا عايشه و توقف دموعها..عايشه: كن..كنا..مره متأخرين فالكليه انا و عليا و عبير اللبنانيه عش..عشان بروجيكت..رحنا انا و عبير نييب كووفي و يوم ردينا..لقينا عليا داشه الجات و محتشره.. (( عبير: ولِهِ عليا يالله خلينا انشوووف البروجيكت عليا: اوكي اوكي صبري دقيقه خليني اشووف شغلي فيهم هاذيلا اللي ما يستحون ولا يخيلون..عنلاتهم من دشيت و هم مستلميني عبير: لا يكون هم اللي امبارح عمالين يسبوا فينا |
 |
|
10-03-2010, 05:43 AM
| #44 |
| | عليا: الا هم المقاليع...عبيرووه دشي دشي الله يخليج. عبير: خليني اشوووف اليوم شوه بدهم يئولو...و الله لا اشرشحهوون..ولِهِ عواشي دشي شوي آزرينا عايشه: اتخسن ....انا انزل مستوايه و ادش جات!!!! عبير: تعي تعي عواشي تعي شوفي هايدا الزير عم بيسبني فالعام و عم بيغازل فالرسائل الخاصه!!! شوه عجيب هالزلمه!! عايشه: اشوف اشوف..ههههههههههه عبير: شوه عم بيئول ما عم بفهم...هيك عم بيئول شي محلي..تعي عواشي اوليلي شوه عم بيئول عايشه:هههههههههه... يالس ايقوولج شعر بالبدوي...قوليله قوليله: احبك زود عما الناس حبت و حبي لك يا غناتي عباده.. احبك عدد ما الحجاج لبت.. و احبك عدد الرمل و زياده عبير: بليز عواشي دشي...شوفي شغلك فيهن..و الله عم بيئهروني... عايشه: مستحيل عبير: طب ليش..دشي و راح نعمل شلّه...بليزاول و اخر مره..و ما في حد راح يعرف مين انتي عايشه: ما فيني عليا: بليز عواشي انتي تعرفيلهم دشي شوي بس شوي....انتي ما تنغلبين في المصطلحات البدويه..دشي عايشه: ما عليه...انتن شوه نكاتكن؟ عليا: انا " ملكه جمال الخسفات" عبير: و انا " احلا عبده" و انتي شوه بدك تختاري؟؟ عايشه:غربلات عدوج يا عبيروه مسميه عمرج هالاسم و انتي غاديه غندووره والله لو يشووفوونج انج ما تتفججين منهم.... يالله انا " جب ماحد له خص فيني " عليا: يالله تراهم هاذيلا هم الشله الفاسده :الزير و الغاوي و راعي العزبه و قانص الغيد و المياس..عندج اياهم)) عايشه: دشيت...ما كنت حاطه شي في بالي..ولا لي نيه خبيثه..قلت بدش عشان خاطر عليا و عبير..و منيه بنخطف الوقت الين ما تيي السياره..و صدق كانت اول و اخر مره ادش فيها الجات فاطمه: و....و منوه منهم اللي اللي توفا؟؟ عايشه و دمعه تنزل من عينها: غانم كان اسمه قانص الغيد... فاطمه: كيف عرفتيه؟ عايشه: ما شي اول ما دشيت كان السب عالاخير..بس من دشيت انا..مادري عرفت اسكتهم و اوقفهم عند حدهم رغم اني ما سبيت ولا شي..اول ما دشيت غا..غانم كان ايسب بس من بديت ارمس صخ و انا مادري انه يلس ايراقبني شوه اقول...عقب دش على الرسائل الخاصه (( قانص الغيد: اقوووول جب...شوه هالنك...حتا ما اعرف كيف ازقرج....ممكن؟؟ جب ماحد له خص فيني: لا الخاص اللذي طلبته مغلق او خارج نطاق الخدمه..بليز اجلب ويهك قانص الغيد: هههههههههه...انزين دقيقه بس...دقيقه اوكي..لا تعصبين...انا...اباج جب ماحد له خص فيني: شوووه..عنلاتك قانص الغيد: هههههههه...قصدي اباج في كلمة راس جب ماحد له خص فيني: شوه تبا يالله قول و خلصني قانص الغيد: شوفي يا بنت الناس...انا من الصبح اراقبج..و ايبين عليج انج بنت عرب و قبايل من رمستج..احسلج اظهري من الجات دامنها هاي اول مره لج.. جب ماحد له خص فيني: جب انته ما لك خص فيني قانص الغيد:ما عليه...بنعديها..اهم شي يالله الحينه ظهري من الجات بسرعه... جب ماحد له خص فيني: لا و الله الجات جات ابوك؟؟ قانص الغيد: لا حووووول...شوفي لا يغرج انه ربعي الحين محترمين حالهم عقب شوي بيجلبون و بيسبون فاظهري احسن عن لا تشوفين الي ما يسرج...و بعدين ماباهم ايرقموونج جب ماحد له خص فيني: فارج فارج.. قانص الغيد: ما عليه بفارج بس انتي قبلي يالله بسرعه...ما بيلس اترياج وايد )) عايشه: و بالفعل ظهرت سيده...مادري مب خوف...بس مادري يمكن شعور بالفرح لانه ما بغا حد يرقمني!! فاطمه: و بعدين كيف حصلج؟؟ عايشه: ما شي مره كنت داشه الماسنجر ولقيته ضايفني بس انا ما انتبهت و سويتله ادد لطيفه: سبحان الله !!!! عايشه: و الله و ربي في سماه..انتن اتعرفن انه الام اس ان مالي فيه اكثر عن خمسين بنت كيف بميز يعني اذا كان بنت ولا ولد...ضفته من دون لا اشوفه فاطمه: و بعدين عطول كلمج؟؟ عايشه:لا...تصدقين من ضفته كملنا شهر انا اشوفه اون و هو ايشوفني اون بس ما انتبهت ولا كلمته..الين ذاك اليوم...يوم دش و انتبهت ان الايميل غريب (( روّح وراحت روحي( غانم) :و عليكم السلام.. احيد السلام ببلاش مب بفلوس... روحي تحبك(عايشه): ما ظني سلمت....بعدين منوه معايه روّح وراحت روحي: جب انتي مالج خص فيني روحي تحبك: شوف جدامك ثلاث ثواني يا اتقول منوه انته يا بلوك و دليت روّح وراحت روحي: انزين عادي بيلس اضيفج الين ما تلوع جبدج...ولا بهكر على جهازج)) عايشه: ماشي طلعت من الماسنجر و سكرت في ويهه..و ما دشيت تقريبا اسبوعين... فاطمه: و هو شوه سوا؟؟ عايشه و بإبتسامة حزن: طرشلي ايميل" السلام عليكم...دشي الام اسن بسرعه..حسبي الله عليج لج وحشه" فاطمه: دشيتي؟؟ عايشه: لا ...بس هو تم كل يوم ايطرشلي اغاني و شلات...عقبها طرشلته ايميل لاني ما تحملت الوضع" سلام...يا تقول منوه انته يا بخبر عليك اخويه اللي يشتغل في جهاز الامن...باي" فاطمه: و الله؟؟!!! و هو شوه سوا؟؟؟ عايشه: ولا شي بس رد عليه بايميل" سلام...يون بخبر جهاز الامن..ماماتي اليهال ما يهددون..انا جهاز الامن بكبره عندي...لا تنسين المرضعه قبل لا ترقدين..باي"..يوم قال جذي تحاشيت الماسنجر بكبره..و في مره من المرات دشيت الساعه ثنتين فليل بغيت افضي الايميل من ايميلات ربيعاتي عن لا يهكر عليهن بعد..سبحان الله جنه متيّم اول ما دشيت دش...و هالمره كان حاط نفس النك اللي فالجات فعرفته (( قانص الغيد: اليهال شوه ايسون واعين الين الحين؟؟ روحي تحبك: انته؟؟ قانص الغيد: هيه انا...بسم الله لا يكون شايفه يني روحي تحبك: بعدك حي؟؟ قانص الغيد: اهبي حد يتفاول على روحه بالموت؟ روحي تحبك: شووووه..روحه؟؟!!!! قانص الغيد: هيه روحج ولا عندج شك..وينج انتي يالسباله امرره مالج شوف؟ عايشه مب عايشه مستانسه ولا لا ؟؟؟)) عايشه: هنيه انا خفت..تحريته عرف اسمي...بس عقب اكتشفت انه كان يسأل عن حالي..فحبيت اغير الموضوع ((روحي تحبك: الحمدلله..بخير و سهاله...الا في واحد دمه ثقيل مأذني ( فيس يغمز) قاص الغيد: عنلاته السبال...و شوه يبا منج؟؟ وحي تحبك: و انا شدراني...ما عرفت شوه اسويبه...من زمان اقوله فارج بس مب فايد فيه قانص الغيد: اهااااا...انزين حليله يمكن يحبج..محد يدري يمكن منيه مناك دوري في قليبه انتي ( فيس شيطان) روحي تحبك: ههههههههه..حشا يهالحب جاااهز عندهم الشباب في مخابيهم...اصلا الشباب كلهم جذابين ما شفت واحد في حياتي ايحب من خاطره ( فيس معصب) |
| |
|
10-03-2010, 05:44 AM
| #45 |
| | قانص الغيد: لا و الله عيل من وين يحبون الشباب من ريولهم يعني؟؟؟ روحي تحبك: انزين بسم الله شوي شوي على عمرك لا تعصب قانص الغيد: هههههههههههه......احلا شي في الدنيا انك تلقى ناس تستهم عليك يوم اتعصب( فيس يغمز) روحي تحبك: شوووف اخويه....انته من وين يبته ايميلي الله يخليك قولي..فديت رووحك اتقولي..و بعدين انته شوه تبا مني يعني..الله يخليك فكني و خلني في حالي..بليز احذفني و انا بحذفك قانص الغيد: آآآآآآآآآه....يا بلا بوووك يا عقاب روحي تحبك: شوه بلاك قانص الغيد: عيديها ...دخيلج اتعيدينها روحي تحبك: شوه هيه؟؟؟ قلتلك احذفني قانص الغيد: لا لا اللي قبلها...حسبي الله عليج تلعبيبي لعبه روحي تحبك:اووووه غلطه مطبعيه.. المهم اخويه خلني في حالي و الله انا ورايه رياييل لو يدرون اني ارمس ريال بيقطعوني تقطيع)) عايشه: و الله و الله اني من كثر ما اندمجت زلت مني هالكلمه..مادري هل كانت زله لسان ولا زلة ايدي باللي في قلبي لطيفه: ما قالج من وين ياب الايميل؟؟ عايشه: قالي انه ضغط علي عبير و هددها الين ما عطته ايميلي لطيفه: عنلاتها ما فيها امان هاي.. عايشه: لا لا لا ...غير انه هددها..قص عليها و قالها اني انا عطيته الايميل بس هو نساه..و هي صدقت فاطمه: و بعدين شوه استوا؟؟ عايشه: من عقب كلامي ما دش الام اس ان ابد...بس كان كل يوم ايطرشلي رساله ولا اغنيه..مادري كنت كل يوم اتريا رسالته بفارغ الصبر..تعلقت به و انا مادري..حسيت اني اذا ما شفت رسالته في يوم بمووت..مادريت اني بديت احبه ولو بكم كلمه اللي ايقولي اياها كل يوم.. فاطمه: و بعدين؟؟؟ ما صار شي؟؟ عايشه: لا...اختفى شهرين تقريبا..من دون لا يقول اي شي..اختفى ولا دريتبه حي ولا ميت..صاحي ولا مريض..حسيت بعمري بيـــّن بتخبل..منيه قلت احسن هاذا الشي لمصلحتيه..و منيه الشوق ماكللي فوادي و الخوف عليه خلاني ما حس بعمري..عشت شرات الهايمه علا هالارض جسد بلا روح فاطمه: لهدرجه؟؟؟ انزين هو وين كان... عايشه: و اكثر بعد...مره كنت فالكلاس و دش (( روّح وراحت روحي: صباح الخيرات...ِ شوه عاملين اليوم؟؟ بوظبي تسأل عن اطيافك: بسم الله انته من وين طلعتليه؟؟؟ بعدين انا فالكلاس الحين لاتأذيني روّح وراحت روحي: عيل و الله ياظهرلج قروون في راسج)) عايشه و بابتسامه حزن و قهر: و تم كل شوي ايوقف الجهاز عليه..الين مامر السير عدالي وشافني على الماسنجر و طردني من الكلاس...طلعت و دشيت من كلاس ثاني (( روّح وراحت روحي: جيه الناس تطلع من دون لا تستأذن بوظبي تسأل عن اطيافك : كله من بصايرك الشيخ..طردني السير من الكلاس...استانست عااااد روّح وراحت روحي سمايلي فيس) اتصدقين على الاخير...لاني اباج اتجابليني انا ارووووحي..ولا تقولين شيخ ماحد شيخ غير بوخليفه روّح وراحت روحي: ليش سكتي؟؟؟ تبيني اطلع؟؟ بعدين شوه هالنك هاذا؟؟ بوظبي تسأل عن اطيافك: شوه فيه...اصلا هاي اغنيه راشد الماجد؟؟ روّح وراحت روحي: لمنوه حاطتنه ان اشالله ؟؟؟!!!! يالله قولي بوظبي تسأل عن اطيافك: حق ناس غالين على قلبي.. روّح وراحت روحي: لا و الله.....وايد عايشه الدور انتي...يالله يالله غيريه...و بعدين ايكون في علمج محد غالي في قلبج غيري انا...يالله بسرعه اشوووفج غيريه.. روحي تحبك: اشوفك وايد متعنطز..شوي شوي على عمرك من الخقه...و بعدين انته ما يخصك باللي احطه..)) عايشه: عصب يوم قلتله جذيه..و طلع و سكر الام اس ان من دون لا يقول حتى باي...هاذيج الساعه حسيت انه قلبي وقف...ما صدقت على الله انه ايدش و اشوفه مره ثانيه..قمت و خربت كل شي..لعنت عمري الف مره هاذيج الساعه..و انا متأكده الف مره انه كلامه صح لانه ما كان حد غالي في قلبي غيره..اول من دش قلبي..و اول من قاله قلبي احبك.. فاطمه: ما رجع مره ثانيه؟؟ عايشه: رد...في نفس اليوم عقب ربع ساعه..بس هالمره كان مغير النك (( بوظبي تسأل عن اطيافك: وين سرت انته؟؟ الروّح دايم الى المحبوب مشتاقه: و انتي شوه ايخصج؟؟ بوظبي تسأل عن اطيافك: اهااااا...اوكي انزين..يالله فداعت الله الروّح دايم الى المحبوب مشتاقه: وين وين ...ايه صبري شوي..مب اتقولين السير طردج من الكلاس بوظبي تسأل عن اطيافك: هيه الروّح دايم الى المحبوب مشتاقه: عيل يلسي شوي...رديت عشانج بوظبي تسأل عن اطيافك: اقول الروّح دايم الى المحبوب مشتاقه: اتخبري... بوظبي تسأل عن اطيافك: وين اختفيت انته.. الروّح دايم الى المحبوب مشتاقه: متا الشهرين اللي خطفن؟؟ بوظبي تسأل عن اطيافك: يب الروّح دايم الى المحبوب مشتاقه: سافرنا ميونخ انا و الربع...يالله من حلات الجو ما بغينا انرد بوظبي تسأل عن اطيافك: انزين الناس يوم اتسافر ايقولون ايوادعون مب مررره اتسير جيه الروّح دايم الى المحبوب مشتاقه: ليش استهميتي عليه؟؟؟ بوظبي تسأل عن اطيافك: ايقولون..اقولك..ليش كل نكاتك فيهن كلمه روح؟؟.. الروّح دايم الى المحبوب مشتاقه: مادري بس جيه...يمكن لاني احس انه روحي ما بتطول وايد بوظبي تسأل عن اطيافك:لا تقول جيه مره ثانيه...دخيلك)) لطيفه: مستحيل انه ما قال انه يبا ايرمسج فالموبايل.. عايشه: مب الموبايل بس...الا بغى ايشوفني..بس انا ما طعت.. لطيفه: و عادي عنده؟؟ عايشه: اكيد لا ..كل الشباب من يتمجنون فالماسنجر ايزنون على الموبايل...بس انا رفضت و اتزاعلنا وايد بسبت هالشي...قطعنا بعض ثلاث شهور..عدن عليه بصعوبه...عشتهن جني عايشه في جهنم الحمرا..عرفت اني اللي امر فيه من عذاب يزاتي لاني خنت ثقت اهليه فيني..و اللي ياني هين بالنسبه للي يستوي للبنات..بس و الله اني حبيته و الله يشهد لا حبيته حب زيف و خداع حبيته من خاطر صدوق فاطمه: و بعدين...كيف قدرتي تتحملين لو انا ما اقدر اتحمل وبرد عايشه: انزين ردينا لبعض بالصدفه..و اتفقنا انه مايرد ايرمسني في هالموضوع مره ثانيه...عدت الايام الين مره حسيت انه خلاص ناوي على الفراق و عزت نفسي منعتني من اني اترجاه انه ما يخليني رغم انه قلبي كان يتقطع قطعه قطعه |
| |
|
10-03-2010, 05:45 AM
| #46 |
| | ((روحي تحبك: غانم بتسير بوظبي اليوم.. روّح وراحت روحي : لا هالويكند ما بسير يوم السبت عندي ميد تيرم بيلس اهنيه عند يدتيه فالعين عن لا اسير بوظبي عند الاهل و التهي عن الدراسه و ارسب.. روحي تحبك: كم باقلك انته؟ روّح وراحت روحي: الكورس الياي و بفتك ان شالله .. روحي تحبك: شوه اتخصصت انته؟ روّح وراحت روحي: علوم سياسيه روحي تحبك: زين و الله..اقول غانم ..شي في خاطرك بظهر انا روّح وراحت روحي: وين وين..ما كملتي ربع ساعه من دشيتي روحي تحبك: بسير اشتري حق العيد اغراض ناقصتني.. روّح وراحت روحي: وين بتسيرين بالضبط روحي تحبك: بسير العين مول بسرعه و برد...ساعه بالكثير وبرد لا تطلع روّح وراحت روحي: العين مول و الخميس فليل؟؟ ما شي سيره... روحي تحبك: غانم بسير اشتري نعول حق العيد روّح وراحت روحي : قلتلج لا يعني لا...شوه المول متروس شباب و ما با حد يتعرضلج روحي تحبك: بسير اشتري نعلان و برد روّح وراحت روحي: مب لازم روحي تحبك: شوه تباني اعيد بزنوووبه؟؟!!!!! روّح وراحت روحي: روحي... قلتلج لا يعني لا ... روحي تحبك: خلاص انزين بخلي اختيه تيبلي روّح وراحت روحي: ايكون احسن ..انزين روحي انا بظهر الحين..بسير الحلاق و بسير اييب ثيابي من الخياط..اقول انا في ايام العيد ما بدش الماسنجر فلا تستهمين عليه..لاني بكون مشغول ولا بلقى فرصه ايلس على الكمبيوتر..لا تحاتين متا ما لقيت فرصه بطرشلج ايميل.. روحي تحبك: انزين العيد بعده اسبوع من الحين بتقطعني؟؟ الروّح دايم الي المحبوب مشتاقه: هالايام مشغول انا شوي...سمحيلي روحي تحبك:برايك الله يحفظك الروّح دايم الي المحبوب مشتاقه: شوه زعلتي؟؟؟ روحي تحبك: و ليش ازعل لي ما يبانا ما نباه الروّح دايم الي المحبوب مشتاقه: لا حوووووول....اقولج انا الحين مستعيل ما ريد اسير و انتي زعلانه روحي تحبك: ليش ايهمك زعليه؟؟؟ الروّح دايم الي المحبوب مشتاقه: ااااااه....ما تتخيلين لاي درجه...المهم يالله شي في خاطرج؟ روحي تحبك: لاسلامتك)) فاطمه: و بعدين عايشه: ولا شي قبل العيد بيومين لقيت ايميل من عنده" سلام.. روحي شحالج؟ اقول سيري محل جناين حفيت اللي فالمويجعي..و خذي الاغراض اللي باسم غانم ال....، اذا ما خذتيهن تراني لا اعرفج ولا تعرفيني..و مبارك من عيدج مقدما..باي" عايشه: عرفت انه يبا ينهي كل شي ويبا يعودني على الفراق..احترمت قراره وا بتعدت بكل هدوء..لانه من عقبها لا طرش ايميل ولا شي فاطمه: وشوه الاغراض اللي مطرشنهن عايشه: بوكس من بلو مارين فيه نعلان و قمصان و اغراض ثانيه ..البوكس مثل ما هو فالكبت مااستخدمت اي شي.. فاطمه: انزين و انتي شوه سويتي عايشه: تلومت منه..حبيت ارد له الهديه..ادري انها غلطه...بس مب ندمانه عليها..كانت ليلة العيد..ما عرفت شوه اخذله فيها خاصه انه الريال اتكون اغراضه محدوده..طرشت عبير تاخذله من باشوتي لبستين..اتخيلي ما عرف قياسه سرت و خذت قياس نعال سعيد اخويه و قلتلها تاخذله نفس الشي..و طرشتها تاخذله عطورات من باريس قاليري...و حطيناله اياهن في نفس المحل..و طرشتله ايميل" سلام..غانم لك اغراض في نفس المحل بسمك...و رفجه انك تاخذهن لا تردلي اخر طلب لي عندك..فداعت الله" فاطمه: و عقب؟؟ عايشه: ولا شي..انفصالنا كان شكلي..يعني كنا انتواصل بالايميلات بس..حتا كلامنا فالايميل كان رسمي وايد فاطمه: و انتهى الوضع جيه؟؟؟ بس حسيت انه يحبج.. معقوله ما سوا شي!!!.... ما تصرف؟؟؟ عايشه: ردينا لبعض بالتدريج بالماسنجر..ألين ما سرنا العمره..احتشر..يون لازم ارمسج فالموبايل..قلتله و فهمته...بس يون ما بيرمسني الا فالعمره..و من ارد بنرد للماسنجر..لانه اسبوعين وايد انه ما يشوفني فيهن..حاولت وياه منيه مناك بس ما شي فايده...غانم كان عنيد وايد...و اللي يحطه في باله ايسويه.. لطيفه: و كيف انتهى الوضع؟؟ عايشه: ولا شي..اصر اني ارمسه و انا قلتله صوتي ما بتسمعه..كفايه اني اشوفك فالماسنجر..قالي يا اني ارمسه فالتيلفون ولا اني مابشوووفه مره ثانيه ولا احلم اني ارمسه مره غير.... فاطمه: و رمستيه؟؟؟!!!!! عايشه: لا....اذا انا غلطت غلطه فما في داعي اتبعها بغلطه اكبر... فاطمه: اي حب هاذا اللي بيعيش بين فراق و لمه فراق و لمه؟؟!!!! عايشه: انا حطيت في بالي انه كل شي انتها..بس بعد ما رديت من العمره لقيت غانم مره ثانيه و كلمني عادي فالام اس ان...اتخيلت انه بيقطعني ولا خلاص انه كل شي انتها..بس كل شي رد مثل ما كان..بس اسلوبه كان جاف شوي..استوا ما يسولف ولا شي..يدوب ايدش ايسلم و يسألني عن احوالي و يطلع..عرفت انه حاط في خاطره بس كنت متأكده انه قراري هو اللي كان صح... لطيفه و هي اتجلب الجريده و بشهقه قويه: عووووووويش....هالاسم مألووووف...محمد بن...ال....، مب هاذا اللي ماسك منصب كبير فالشرطه؟؟؟ هزت راسها عايشه بالايجاب لطيفه و هي تهز راسها بعجب و صدمه: مب.....مب هم نفسهم اللي ...اللي خطبوا عندنا؟؟؟!!!! اللي بغوج لكن سعيد ما وافق عايشه و دموع حاااااره تغسل ويهها: هيه هم..... فاطمه: يالله يعني يا و خطبج؟؟!!!!! كيف عرف منوه انتي و بنت بمنوه اكيد انتي ما قلتيله..!!!!!! عايشه: لا ما قلتله بس الشباب ما يغلبهم شي..غانم شاطر فالكمبيوتر و هكر..ما بيغلبه انه يسأل عن تحويله النت بأسم منوه .!!!! ولا حتا بيوصي حد ايبله الرقم مال الخط من اتصالات فاطمه:انزين كيف خطب اهنيه !!!!!....شوه هو ما لمحلج... عايشه: لمح بس انا ما فهمتها ((الروّح دايم الي المحبوب مشتاقه: اقول روحي؟؟ روحي تحبك: هلا الروّح دايم الي المحبوب مشتاقه: انتي مب مخطوووبه؟؟ روحي تحبك: رسمي لا... الروّح دايم الي المحبوب مشتاقه: شوه يعني رسمي...ما رسمي.. انخطبتي ولا لا روحي تحبك: قبل كنت محيره حق ولد عمي بس ما ستوا نصيب الروّح دايم الي المحبوب مشتاقه: ليش؟؟ |
| |
|
10-03-2010, 05:45 AM
| #47 |
| | روحي تحبك: ما شي اخويه كان يبا بنت عمي اخت اللي محيرني بس استوت ظروف و انفصلت العايلتين عن بعض..و دام اخويه ما خذ بنت عمي.... ولد عمي اكيد ما بياخذني الروّح دايم الي المحبوب مشتاقه: هيه بس الحين انتي مب مخطوبه روحي تحبك: قلتلك رسمي لا...لانه واحد من ربع اخويه اللي يشتغل وياه فبوظبي رامس عليه انه يباني الروّح دايم الي المحبوب مشتاقه: منوه هاذا بعد؟؟؟ روحي تحبك: واحد محيربي من هل بوظبي الروّح دايم الي المحبوب مشتاقه: بس ما خطبج؟؟ روحي تحبك: علّيه حِـــيَرَ...بس خطوبه لا الروّح دايم الي المحبوب مشتاقه: احسن يالله يعلج ما تعرسين قبلي...يالعيوووز.... روحي تحبك: بسم الله فال الله ولا فالك.. الروّح دايم الي المحبوب مشتاقه: بسم الله يالبنات من حد ايبلهن طاري العرس تواكلن...خلاص خلاص انزين انا بتعطف عليج و بخطبج..يالله الخميس الياي عشانا عندكم روحي تحبك: امررره فالك طيب...بنعقر الجعدان...بس عليها كشميروووه يوم بتضويك.. الروّح دايم الي المحبوب مشتاقه: وايه فقدتج ...منوه كشميروه هاي بعد روحي تحبك: بشكارتنا... الروّح دايم الي المحبوب مشتاقه: اتخسين..ما عليه ما عليه..اما يوزتج عبدالرحمن دريولنا بلوووشي كبر الدرام بيعفصج عفاص...امبوونه من زمان مشترط يبا وحده عانس روحي تحبك: عانس في عينك..انا توني الا 22 سنه..و قلتلك مخطووبه..ما بترياك انته الين ما تتمنن عليه بدريولكم الروح دايم الى المحبوب مشتاقه: اوكي يوم هاي رمستج...يالله ..انا بطلع باي)) فاطمه: و طبعا اخطبوا عندكم بس لقوج محيره حق فري المحيربي..شوه سوا غانم بعدها؟؟ عايشه: ما شي كان انفصال نهائي بينا..ما شفته عقبها ابد..ولا سمعت عنه اي شي..لا خبر لا ايميل ولا اي شي...عدن خمس شهور من بعدها...ألين ما كان البارحه...( و تغمض عايشه عيونها بقو...و تصيح صياح كله الم و لوعه...صياح المتعذب...صياح لا شك فيه انه الحب اللي في خاطرها حب صافي و حقيقي) فاطمه و هيه خانقتنها العبره: يعني ما شفتيه قبل لا يتوفا...ما رمستيه؟؟؟ هزت عايشه راسها و هيه تمسح دموعها: الب...الباا...البااااارحه شفته على الم اس ان..كلمته و ليتني ما كلمته...اااااه يا فاطمه ما نسااااها كلماته...ولا بنسا صوووته...ياووويلي بمووت دخليكم ابا انساه...شلووه من قلبي ....فديت روووحه (( روّح و راحت روحي: غريبه على النت اليوم؟؟؟ شحالج رووحي؟؟ روحي تحبك: بخير و من صوبك؟ روّح و راحت روحي: ايسرج الحال...شحال الاهل .. روحي تحبك: بخير ايسرك حالهم عقب فتره صمت روّح و راحت روحي: اتصدقين عاد؟؟ روحي تحبك: هلا روّح و راحت روحي: كنت داش احذف ايميلج....ابا احذفج من حياتي كلها روحي تحبك: اها...شو تتريا الين الحين ما حذفتني...ولا اقولك عطني الباسورد و انا بحذف نفسي بنفسي روّح و راحت روحي: ماله داااعي هالكلام...و انتي تعرفين غلاج في قلبي روحي تحبك: غانم الغالي ما في داعي له هالكلام...اعتقد انه علاقتنا خلاص انتهت روّح و راحت روحي: وشوه تبيني اسوي اكثر عن اللي سويته..هلج و ردونا...ما يسدج اني بغيتج من خاطريه روحي تحبك: لا تزيد المواجع.. روّح و راحت روحي: ااااااه...خلي كل شي على الله...اتصدقين اول مره اتقوليلي الغالي... روحي تحبك:غانم شوه بلاك اليوم انته مررره مب طبيعي...شي يعورك ؟؟ شي مضايقنك؟؟ روّح و راحت روحي: مادري حااس بضيقه في صدري...و متملل مادري شوه يايني روحي تحبك: صليت العصر؟؟ روّح و راحت روحي: الا صليت و قريت قران بس مادري شوه اللي حالبي من اصبحت اليوم روحي تحبك: بسم الله عليك... روّح و راحت روحي: بس...هاذا اللي قدرتي عليه...قولي على الاقل حبيبي ...روحي اي شي.. روحي تحبك: و شوه بيفيد هاذا كله...الا بيعذبني و بيعذبك روّح و راحت روحي: هيه و الله..بس خاطريه اتقولينها....يوم انا وصلنا اخر الدرب.. قوليها و انا متأكد انها من خاطرج..قوليها و ريحيني من هم فيني معذبني...الحين من متا نحن انعرف بعض؟ روحي تحبك:من سنه و اربعة شهور... روّح و راحت روحي: اسميني ما بنساهن هالشهور...بغيت انساج بس ما رمت..حشا بتخبرج شوه فيج زود عن البنات؟؟!! روحي تحبك: اللي في قلبي من صوبك..ما ظني يعرفه قلب بنت غيري ... روّح و راحت روحي: اقووول روحي....عندج مايك؟ روحي تحبك: هيه ليش؟؟ روّح و راحت روحي: اقولج ركبيه.. روحي تحبك: شوووووه....غانم الله يخليك خله هاليوم يعدي على خير ما فينا نتزاعل و انته ارووحك متضايق روّح و راحت روحي: انزين اوكي ركبيه انا بتكلم وانتي لا تتكلمين...يالله بسرعه عشان الحق ارد العين اليوم... روحي تحبك: بتداوم باجر؟؟ روّح و راحت روحي: هيه باجر عندنا اخر امتحان فاينل... روحي تحبك: اها... روّح و راحت روحي: يالله بسرعه لا تغيرين الموضوع ...ركبي المايك....قلنالج ما نباج ترمسين بس شغليه ابا ارمسج روحي تحبك: اوكي...دقيقه بس روّح و راحت روحي: ما عليه بطرشلج هالفايل شوفيه الين ما تركبين المايك...اسميه طماشه( كان فايل فيديو ايضحك) روّح و احت روحي( غانم بالمايك): احم احم....غانم بن محمد ال....، اربع و عشرين سنه..جامعه الامارات..علوم سياسيه... ممكن نتعرف.. روحي تحبك( عايشه تطبع بالمسانجر): بسم الله بسم الله من صووتك..حشا ما توقعته جيه.. روّح و راحت روحي: بسم الله ردي الشهاده لا تنضليني...عيل شوه تبيني شرات هاذيلا الطفوس اللي يتليغنون.. روحي تحبك: اقولج سمعي صوتي و قوليلي رايج...كح كح: روّح و راحت روحي تتبع موطاه ثراه..تسأل عنه و تنوحي ما حد ياب اخباره روحي تحبك:صوتك حليو...بس بليز لا تنزل شريط اخاف عيال اخويه يسمعوونك ما يباتون الليل ( فيس يغمز) روّح وراحت روحي: فديت صوووت الصبيعات اللي يطبعن روحي تحبك: ههههههههه...بس الغزل ممنوع روّح و راحت روحي: يالله عاد ارمسي شوي شوه بيستوي عليج...اهون عليج من الصبح ارمس عمريه..انزين قولي شحالك بس روحي تحبك: No Way روّح و راحت روحي: خلاااص انزين ذليتينا....اقووول شغلي الفايل....( و كان الفايل صدق ايفطس من الضحك) روحي تحبك: حشا شوه ايسووون هاذيلا ... روّح و راحت روحي: شوفي المفلع انتي الله ياخذ الخبال..ههههههه..شوفي شوفي كيف بيطيح على ربيعه....ههههههههه روحي تحبك: ههههههههههههههههههههههه روّح و راحت روحي:هههههههههههه..الله الله ياخذهم..ههههههههههه...ههههههههههههههه( اول شي غانم كان يضحك ضحك عادي بس بعدين ضحك هستيري فيه لوعه و قهر و الم) روحي تحبك:ههههههههه( عايشه و بالغلط ضحكت و طلع صوتها فالمايك....صخ غانم): اووووووبس روّح و راحت روحي: يالله فديت هالحس...عديها دخيلج اتعيدينها روحي تحبك ( طباعه): تحلم انا اصلا خلاص مكعت(طفيت) المايك... احسن ونس عمرك بروووحك روّح و راحت روحي: اهون عليج؟؟ روحي تحبك: خافي الوجدان يخفق باسم خلي..و روحي الولهى من فراقه حزينه..حب صادق حب قلبي مب تسلي..ضامي لحبك و يرويني حنينه روّح و راحت روحي:ودي بكلمه يا حبيبي..قلها و قلبي لك يجيبي.. يا جارح قلبي بحبك.. ليتك في هالدينا نصيبي روحي تحبك:اربع حروف و ايزيد حبي.. اربع حروف و ايفز قلبي..انته الغلا ميزك ربي..قلبي انا منك صويبي روّح و راحت روحي: يالله الغاليه...ورايه خط العين..اقول يوم بوصل يمكن ادش ..جيه على 11 فليل اترياج؟ روحي تحبك: ما عليه اذا قدرت بدش.. روّح و راحت روحي: تمام..يالله عيل اشوفج على 11 شي في خاطرج روحي تحبك: ما شي غير سلامتك ... و شوي شوي عن السرعه روّح و راحت روحي: ما عليه يالله فداعت الله روحي تحبك: الله يحفظك روّح و راحت روحي: اقول اقووووول.... روحي تحبك: لبيه روّح و راحت روحي: عايشه.... أ ح ب ج )) عايشه: و مادش....طلع من حياتي..طلع من هالكون كله....طلع و خلاني...مب حرام عليه...مب حرام عليه ايسير عن هالدنيا و ايخليني بحب ثجيل ما يروم قلبي على حمله...آآآآآآآه ياويلي شوه بسووووي...قوووللي و ارحمني...قوللي شوه اللي بيطلعه من قلبي و من عيني و من فكري...آآآه يا فاااطمه...أحبه و الله اني احبه...قوولوووله اني احبه...دخيل والدينكم قولوه و خلوه ايرد...ياربي ارحمني برحمتك.. و غاصت عايشه في بحر اسود لا له ساحل ولا مينا...بحر هم و قهر و الم....غرقت بدموعها على حسره تعتصر قلبها.. فاطمه و هيه خانقتنها العبره..و الدموع اتسيل من عيونها: بس يا عايشه بس الله يخليج..لا تقطعيلنا قلووبنا ركضت لطيفه صوب عايشه و لوت عليها..و مسحت لها دمووعها...و دموع لطيفه ما وقفت: فديت روووحج لا تقولين جذيه..خذه الله منج و من اهله و ناسه..الله يعلم بحال امه..صبري عمرج ودعيله و ادعي لامه بالصبر...انا لله و انا اليه راجعون عايشه+ فاطمه: و نعم بالله |
| |
|
10-03-2010, 05:46 AM
| #48 |
| | عدن أسبوعين من سالفه عايشه اختيه...كنت خلالهن ما قدر ارقد الليل..كنت احس بعذابها..على الاقل اللي حبته لو فارق الدنيا سمعت منه اغلى كلمه..سمعتها منه و لو كانت اخر كلمه..اما انا؟؟؟ فانا تايهه لا اعلم شوه مستقبليه و شوه اللي بيستوي لي..الايام اللي فاتن كنت ارقد عند عويش فالحجره..مش عشان اخفف عليها!!!! ولكن عشان اخفف على عمريه...ألم تسرب لي و أنا اعيش وياها لحظات الحب الاخيره..تحاول عايشه تنسا حب وافي انتزعته الاقدار منها..وانا احاول اتناسا حب غادر اطلب من الاقدار انها تنسيني اياه!! لطيفه: السلاااااام عليكم...مرحبا مرحبا الساااااع بهالشوووف...في ذمتيه انه شوفتج اتخوز الضيقه من البال اليده ضبابه: امرررررحب لاهاااان....وايهت لطيفه يدتها و حبتها على راسها لطيفه:يعلني هب بلاج.... شحالج يدتيه؟؟؟ ضبابه: بخير و سهاله....أمّين يايه؟؟ لطيفه: منها هاي اللي تسحت البنات...من الجامعه يدتيه... ضبابه: يالله عساكن بلاها...شوه تبنها انتن؟؟؟ أمرره تربعن للشقا بريولكن.... لطيفه: ههههههه يدتيه يوم نحن لا ولد ولا تلد شوه تبينا انسوي اهنيه؟؟ ....مبرووك الرحمه ضبابه: الحمدلله يا بنتيه هاي رحمه من الله...الا وينها فطيم مالها شوف خطفتيها البيت؟ لطيفه: لا يدتيه فطيم ما دوامت اليوم البارحه جالعه ضرس العقل و تعبانه منه ضبابه: لا اله الا الله جان فطيم و عقلت!!! لطيفه: يدتيه متى يتي من سويحان؟ ضبابه: اليوم الصبح...فزعت للدختور البيطري لطيفه: شعنه؟؟!!! ضبابه: يا بنتيه الهوووش ضاربنه العنقز...ولا ريتله حيله..و اتولهت على عيال سعيد وينهم مالهم شوف؟؟ لطيفه: يالله يعله بلاهن ما لقا الا هوشج..يدتيه حمد و خالد ما ايون الحينه الين الساعه اربع العصر ما يخلصون ضبابه: لا اله الله...شله؟؟ شوه يباهم يفرصهم و هم بعدهم يهال...و في ذمتج دربوح يدوام بعد؟؟؟ لطيفه:ههههه..هيه فديته دربوح ايداوم.. يدتيه شوه نسويبه سعيد ما رمناه الا يبا ايحطهم في مدرسه خااصه.. قلناله يهال هاذيلا ما يابه..اروحج يدتيه انتي اهنيه؟؟؟ ضبابه: امبووونه سعيد من طاح و هو نحس...لا امبونها وضحا اهنيه و امج ..شوفي هالصنع انتي...شوه ايسون.. ضبابه كانت ماسكه مجله ملحق استار اكاديمي...و اتأشر على الصور لطيفه: ههههههههه..منوه عطاج اياها هالمجله انتي؟؟؟ ضبابه: الوضيحي...جان ريتي اتقولي تبا اتسير عندهم و تعيش هياهم.... وين ثرهم هاذيلا؟؟ لطيفه: يدتيه هاذيلا يغنون في لبنان...تسمعينها شوه اتقول؟؟!!!! هاذا كله من بزا بويه خربها خراب ضبابه: مسوده الويه تبا تربع أبنــــــــان هيه؟؟؟ جادنها من الصبح يوم اقولها كلي من الشفايا اللي يايبتنه ماطاعت اتقولي يدتيه هاذيلا ما يطيعون ياخذون المتان !!!!!! لطيفه: هاه يدتيه وين بتسيرين؟؟ ضبابه: بسير اتمسح و اصلي الظهر... ودت لطيفه يدتها داخل عشان اتصلي...و هي طالعه فوق عشان اتبدل..سمعت صرخه!!!!! و انه شوي و وضحا طالعه تركض لطيفه: وضوووووووووح....وضووح شوه بلاج وضحا: الحقي الحقي لطووووف الحقي لطيفه: يعلني بلا ويهج ارمسي.....قوووووولي شوه بلاج؟؟؟ وضحا: الحقي....امايه انزلقت فالحمام و طاحت لطيفه: شوووووووه...وين وين؟؟؟؟ وضحا: تراني قلتلج فالحمام...الحقي لطوووووف ركضت لطووف و وضحا صوب حجرة امهم...دشت لطيفه الحمام و لقت امها ياسله على ارضيه الحمام و قابضه ريلها... لطيفه:أمااااااااااااااااااااااااااااايه...شوه ياج؟؟؟ لا تنشين لا تنشين عفرا: ما بلاااني شي... لطيفه: امايه لا تنشين صبري صبري الين ما شلج وضحا: ماماتي ماماتي لا تقومين انتي ريلج اتعورج...صبري بروح اخبر سلطان عفرا: لا لا تخبرين حد ما فيني شي...الا ضاربتني دوره و بتخوز عني قامت لطيفه و مسكت ايد امها و ساندتها عليها عشان اتشلها و تحطها على الشبريه عفرا: فجيني اقولج فجيني..ما فيني شي... لطيفه: وين ما فيج شي و انتي ما ترومين اتنشين على ريلج.. يمكن انكسرت.. ثرها طيحت الحمام هيّـنـه؟؟!! عفرا: شياكن انتن محتشرات... لطيفه: امايه الله يهديج ما ترومين اتنشين خلينا نزقرلج سعيد ولا سلطان و انشلج المستشفا..هاتي يدج وانا بشلج عفرا و هي اتمط ايدها و بعصبيه: مابااااج انتي..ماابااااج ازقرلي بنتي ...زقرلي عويش اطالعن لطيفه و وضحا بعض دقيقتين باستغراب..و حست لطيفه بالاحراج..نزلت عيونها بسرعه عن نظرات وضحا اللي كلها تساؤلات... لطيفه: وضوووح....سيري بسرعه زقري عويش و هاتي عباة امايه و انا بسير ازقر سلطان وضحا: ما عليه ماماه لا تتحركين طلعت وضحا تركض صوب عايشه...و لطيفه صوب حجرة اخوانها...راحت صوب حجره سلطان بس شكله مايا من الامتحان الين الحين سارت و دقت على سعيد الين ما نش و تلبس و سار صوب حجره امه وشلها وساروا عايشه و امايه و سعيد المستشفا..و يلست لطوف و وضحا فالبيت عند يدتهن... ضبابه: اقووووولج سويلهم تيلفوووون...الحينه تسويلهم... لطيفه: يا يدتيه قلنالج ايصورون ريلها...و سعيد مغلق تيلفونه ضبابه: و شعنه يغلقه؟؟؟ انزين سوي حق عويش تخبريهم شوه سوت لطيفه: يدتيه تراه داخل غرفه الاشعه ما يشغلونهن التيلفونات... وضحا: و عويش نسته تيلفونها ما شلته ضبابه: يعل الله يغربلهن من تيلفونات....و انتن يوم عاطينكن كل وحده تيلفون شله ما تشلنه؟؟!!!! لطيفه و هيه تبا تضرب وضحا على راسها: يدتيه لا تلومينها من العيله ما عرفت كوعها من بوعها... وضحه: ااااااايه.... و عقب نص ساعه انه سياره سعيد واقفه جدام البيت وضحا: هاذووم وصلوووو وصلووووو.... دشت عفرا و سعيد ماسكنها من طرف و عويش من طرف ثاني.. ضبابه: سلااامااات سلااامااات... عفرا: الله يسلمج يا عمتيه ضبابه: عنبوه يا عفرا شقايل انزلقتي ... الحمام هاذا ..جان اتقبضتي زين؟؟ عفرا: شوه اسوي يا عمتيه كله منها البشكاره مسوده الويه غاسلتنه ولا نشفته...و انا بعد ما حيدّتها انها مغسلتنه ..هبطت مستعيله بلحق على الصلاه انزلقت .. ضبابه: رب ما انكسرت ريلج؟؟ سعيد: لا يدتيه الحمدلله...التواء بسيط... ضبابه: انفدعت يعني؟؟ سعيد: لا شوي اقوى بس الحمدلله ما شي كسر...يالله انا بسير فوق لاحد يحطلي غدا مابا..لطيفه؟ لطيفه: لبيه؟؟ سعيد: يوم ايي وقت ظهرة العيال من المدارس وعيني عفرا: شعنه يا بويه ارتاح انته الدريول وبشكارتهم بيبونهم وط راسك دام اليوم اجازه عندك... سعيد: لا ابغي اشووف مدرسينهم و اسال عنهم ..و واعدنهم اوديهم اليوم الفروسيه..لاتنسين لطيفه لطيفه: ان شالله...ما تباني اسير وياك؟ ضبابه: لو انته مخلي امهم عندهم جان الحينه هيه سادتنهم الا انته امرره ما تنرام سعيد و بغياض: هيه نعم ما نرام...و طاري الحرمه ما بغي اسمعه جدامي ضبابه: ييي هاااااا يا ولديه...شوه مسويتبك بنت العرب نافرنها؟؟؟ شوه ناقد عليها انته؟؟؟ سعيد: لازم انقد عليها شي؟؟؟ ماباها عايفنها |
| |
|
10-03-2010, 05:47 AM
| #49 |
| | ضبابه: ما عفتها الا منيه و الدرب...الا ماخذلك غيرها و داسنها...هناك في هاذيج الدار امبوونكم من اتسيرون هناك اتدسوونهن عندكم فالشقق سعيد: لا حوووووول ولا قوووووه ....و نش سعيد مضيق عفرا:شياج عليه يا عمتيه.؟؟؟!!!!! ضبابه: وابووويه تبوني اشوفه متلته لا حرمه اتسد عياله ولا تحاضيهم و تبني اسكت..يا بويه جانج انتي وريلج زقوق و راضين بحاله انا امررره ما بسكت.... ولا ايرد حرمته الاوليه ولا يوزته غيرها عفرا: الله يهديج..بسير داخل انا نشت لطيفه و مسكت امها الين ما دخلتها الحجره و حطتها على الشبريه و لحفتها.. لطيفه: شي تبين امايه قبل لا اسير... عفرا: هيه...و اشرت بإيدها على المكان الفاضي من الشبريه..سارت لطيفه و يلست.. عفرا: امايه لطيفه لا تحطين في خاطرج...امبوني يوم اضيق اعقها الرمسه..انتن كلكن بناتي... لطيفه: فديتج امايه..انا الين ما موت مانساه فضلج عليه..عنبوه انتي اميه و مالي غيرج في هالدنيا..و انا ادري انه عويش شوي سبشل عنا ....ههههه عفرا: لا لا ما شي سبشل عندي...بس مادري شوه حلبّيه هاذيج الساعه لطيفه: ما نبغي غير سلامتج و شوفتج انتي وبويه طولي بعماركم...باست لطيفه راس امها و طلعت من الحجره... طلعت لطيفه فوق الحجره..و هي خاطفه شافت حجره عويش مفتوحه و عايشه منسدحه على الشبريه..دشت عليها لطيفه و سكرت الباب وراها... لطيفه: هاه عايشه....شي يعورج؟؟ تصلبت عايشه: لا الحمدلله ما شي باس...شفتي الرحمه؟؟ لطيفه: الحمدلله رب العالمين...من زمان ما نزلت علينا امطار جذيه... عايشه: هيه و الله...آآآآآه ....امايه رقدت؟؟ لطيفه: احيدها فالحجره...عايشه بعدج متضايقه؟؟ اعتبريها صفحه و انتهت من حياتج..خلاص شوفي المستقبل و الماضي طبيه... عايشه: ادري...مادري احس بالمطر جنه غسل همومي و احزاني..ادري يا لطيفه اني غلطت..مانكر هالشي..و لو ماكانت النهايه بهالطريقه يمكن اتكون بطريقه اسوأ... لطيفه: كل شي مكتوب عند رب العالمين..و ما يطيح رمش الا بعلمه عايشه: و نعم بالله...بس يوم افكر بكل شي صار..كيف اتعرفت عليه..بكل الكلام اللي دار امبينا..اقول كيف اتجرأت؟؟!! كيف تناسيت كل ناسي و اهليه و جازفت بسمعت اهليه؟؟!!! الله رحم انه غانم الله يرحمه ولد ناس و عرب و انتهى كل شي بينا دون لا حد يدري... لطيفه: هاذي الانترنت و بلاويها...عايشه السالفه مب سالفة حد درا و لا لا ... ولا سمعت اهل ولا لا ...السالفه انه في شخص ورا هالشاشه مادري هل هو انسان صدوق ولا لا؟؟!!! خايف ربه ولا لا..كم كلمه من الكلام اللي قاله صح؟؟ الثقه معدومه..حب الانترنت يا عايشه عمره قصير..و الصدق فيه اذا ما كان معدوم فهو نادر..اهم شي انه كل شي انتها على خير... عايشه و دمعه تنزل من عينها: ادري..ما تتوقعين منوه شفنا اليوم فالمستشفا؟؟ لطيفه: منوه؟ عايشه: مطر ولد عمي مبارك...مريم فالعمليات لطيفه: شووووووووووه....بعدها؟؟؟ توها فالشهر السادس؟؟ عايشه: تدرين انها حامل؟؟!!!! شدراج؟؟ لطيفه: العلاقه بيني و بين مريم ما انقطعت..ارمسها بين فتره و فتره و احيدها اتقولي حامل.. عايشه: و انتي عادي عندج اترمسينها؟؟!!! لطيفه: عايشه..مريم مالها ذنب فاللي استوا كله..و مريم ضحيه للعادات و التقاليد مثل سعيد..و بعدين هاذا نصيب..المهم شوه سوت رب البيبي بخير؟ عايشه: لا....الياهل مات...و مريووم فالعنايه المركزه.. لطيفه: ليش؟؟!!!!! عويش قوليلي دخيلج شوه اللي استوا؟؟؟ لا يكون الخام سوابها شي؟؟!!! عايشه: ماشي...كنا طالعين و سعيد شاف مطر عند مدخل الطواري...سار و سأله شوه بلاهم..قاله مريم تعبانه و دخلوها العمليات...و الجنين في خطر.. لطيفه: اكيد التيس سوابها شي...دوم تشكيلي منه الخاااااااايس ودي اجتله عايشه: منوه هو؟؟ لطيفه: ريلها الخااام بعد منوه!! عايشه: ليش لطيفه: الله ياخذه ليتني اجتله بس... دوم يضويها سكران و يضربها..الله يلعنه عايشه: شووووو؟؟؟؟ و ليش ما تخبر حد هيه؟؟ ليش ساكته على الوضع!!! لطيفه: ما تباه عايفتنه و عايفه شيفته الكلب...الا قالت بصبر عشان اللي في بطنها... عايشه: اها...عشان جيه يوم سعيد شاف امها تم يلعن و يشعن و ايقول كله منها.. لطيفه: رب ما سوا شي سعيد؟؟!!!! ياربي بالستر عايشه: اسميه شرشح ام مريم تشرشيح...انتي السبب و كله منكن انتن..و هاذا اللي يسمع شويرات الحريم و كلام من جيه... لطيفه: يا فضايحنا فيهم... عايشه: لا تلوومينه سعيد مقهوووور و ما صدق لقا فرصه ايفج غيضه... لطيفه: و الحينه شووووه؟؟ عايشه: احيدها الحاله خطيره...بعدين.. لطيفه: شووووو عايشه: ماشي ماشي...اكيد هيه تعبانه لطيفه: عويش مب عليه انا ....شي ياها مريم؟؟!!! شوووو بلااااهااااا عايشه و هي تهز راسها: ما بتييب عيال امررره...شلو اعضائها لطيفه: شوووووو.....لا اله الله ...لا اله الا الله...حشا شوه سوابها السبال... عايشه: مادري...يايبينها المستشفا متأخر...لانها كانت فاقده الوعي و يوم تمت امها اتسويلها و مالقت حد ايرد سارت لها البيت و لقتها امررره خلاااص بين الحياه و الموووت ...نزيف و كدمات على ويهها... لطيفه: حسبي الله و نعم الوكيل..شوه هالحاله لا سعيد ترقع ولا هيه ترقعت..كله منهن كله منهن..الحريم يوم يدخلن فالسالفه ما تسير في زياده...شوه يبونهم جان خلوهم ياخذون بعض.. عايشه: هاذا اللي الله كاتبنه..و مطر يلعن و يشعن..حالف انه ريلها لا يشووفها ولا يسمع صووتها دامنه حي لطيفه: احسسسسسن....نفاد ينفده...برايج عويش انا بسير ارقد شويه...عيزنا من هالهموووم ~~~~~~~~~~~~~~~~ |
| |
|
 |
| |
| كاتب الموضوع | الماس 1 | مشاركات | 62 | المشاهدات | 4249 | 
|  |  | انشر الموضوع |
| |
 |
العرض العادي
