ماينجبر قلب على قلب

10-03-2010, 05:27 AM

احمد و بكل هدوء: انتي اهنيه و انا جالب الدنيا ادورج
++ احلا مثل في حياتي سمعته " طنش تعش"
احمد و بعد فترة صمت: الورديه احلا
++ لطيفه..اوب اوب اوب..شكله راق و هدا...و يعطي رايه بعد..سبحان مغير الاحوال حاسبت و نشيت..مشينا صوب اسواق بن داوود بس هالمره....مع بعض يعني عداله مب وراه ....انقرص شكله...خخخخ
دشينا و تمينا نشتري..ما فارقني ثانيه..حتا و انا اشتري الشامبو واقف عدالي..بس ما نطق ولا بكلمه..تحركت بس ما تحرك..كان ماسك شامبو..و يالس يقرا شوه مكتوب عليه..استنيت واستنيت..بس شكله مندمج..اول ما التفت احمد
احمد: اقولج لطفين شوه احسن الاخضر ولا الازرق؟؟
++ لا تعليق..
لطيفه: انته شوه نوع شعرك؟
احمد و هو ايحرك ايده في شعره من ورا..بصراحه خبلتبي هالحركه..و ذكرتني بوايد اشياء: جاف اظني
لطيفه: خلاص خذ الازرق للشعر الجاف..و الاخضر للشعر الدهني
احمد: يالله خلصتي؟؟
لطيفه: لا بس باقي الخبز
احمد: يالله انزين..انسير عند الخبز..ولا اقولج سبقيني انتي وانا بسير اشتري جرايد..بس مب اتغيبين و تخليني ادورج بلا حاسيه شرات مساعه؟
++ لطيفه..ادورج بلا حاسيه؟؟ سمعتو اللي سمعته..اعتقد انه يمزح..سار احمد..و انا سرت وقفت عدال الخبز..بس اللي لاحظته انه في واحد ما طاع ايفارج..اممم يمكن يشتري بعد هالريال..ياويلي من احمدوووه..رحت للجانب الثاني من الرف..لحقني...ياخراب بيتي..شوه اسوي الحين؟؟ رحت حطيت الخبز بسرعه بس هوه اتقرب مني..يااااوووووووووويلي...شكلي بنفد اليوم..وقف عدالي و حط ورقه صغير على الرف اللي جدامي و اصطفل.. ما مسكتها لانه احمد شاف كل شي..مسك احمد الورقه و قطعها..فيها رقم .. ما قال ولا كلمه..بس عيونه قالت كلام وايد..كلام قاسي..رحنا للكاشير انحاسب..طلعت الفلوس..و طلع احمد فلوس في نفس الوقت بس هو شكله ما صرف و انا عندي فلوس سعوديه قلت خلاص انا اللي بدفع
العامل: ما في فلوس سعودي؟
احمد: لا
جدمت انا ايدي بالفلوس..طالعني احمد بنفس نظره الاحتقار
احمد: شوه ما تشوووفني ريال جدامج

يا اعز و اغلا ما خلق ربي انسان..لو غض جفني خافقي بك واعي..لجلك ذراعي صارعت كل ثعبان..و اقطع عصبها لو تقصر ذراعي

++ انطميت و بلعت لساني..ليش اروم اقول شي عقب اللي قاله؟؟!!!!شليت الاكياس و طلعنا..حرام عليه ما شل ولا كيس..و بصراحه الاكياس كانت وايد ثقيله..بس انا مستحيل اني اترشا احمد و اطلب منه انه ايشلهن عني..اذا هو من خاطره ما شلهن..اصلا هو معصب..غريبه ما قال ولا كلمه..ما علق..!!طلعنا من السوبرماركت..و سرنا صوب الفندق..عاد هو خفيف و خطوته عن عشر خطوات..و انا متغشيه و شاله الاكياس في ايدي الثنتين..بس الحمدلله وصلنا..الله رحمني..ركبنا السلم اللي جدام باب الفندق..هانت يالله هانت..بس فجأه..
دست على طرف العباه...و طرباااااااااااااااااااخ..على ويهي..الله لا يرويكم طحت طيحه على ركبيه..حسيت انهن خلاص انسحقن..طاحت الاكياس بس الحمدلله كل شي موجود داخلهن ما ظهر شي منهن..مادري اول مارفعت راسي..ما حسيت بالدنيا..الم الم الم..و طنين في اذني..بس بعد شوي عقب ما رفعت راسي زين و بديت استوعب..اكتشفت انه العالم كلها اتشووووفني بما فيهم احمدووووه..و بصراحه النظره اللي كانت في عيونه نستني كل آلامي..فديته خاف عليه!!!!
أحمد و هو موخي عليه: لطووووووف...ايه لطووووف..شي عورج؟؟
لطيفه: لا الحمدلله سليمه...بس الفشلللللله حارقه ويهي
نش احمد و نقققققققققققققققققققققققققققققققققققققع من الضحك و ألتقت الصووووب الثاني مب قادر يمسك عمره..اتشوووووفوون..يوم اقولكم اكرهه محد صدقني..ياربي اشوف فيك يوم يالديج..طالعو اول مره اشووفه يضحك جيه..اوكي اوكي اتغشيت طبعا عشان الناس ما اتم اتبحلق فيني و نظره الشفقه في عيوونهم..دشيت الفندق بسرعه ..و الله حتا العامل في الريسبشن الخام كان يضحك..الله يغربل الريااييل كلهم من طينه وحده!! التفتت صوب العامل وانا ادق اللفت.
لطيفه: و انته شووه ايضحك بعد؟؟ ضحكت بلا ضروس قول امين
دشيت اللفت و خليت احمدوووه اييب الاكياس كلهن..امحق اتيكيت احيد الريال ايسوي حق الحرمه كل شي..بس الديج كل شي عنده بالعكس!! لحق علي احمد و هو مخلي واحد من عمال الفندق ايشل الاكياس..بعد ما يحق ايشل..طول الوقت ما حد نطق فاللفت..وصلنا الشقه..حسيت انه احمد يبا ايقولي شي..بس ما عطيته فرصه دشينا على طول..الباب كان مفتوح و الكل كان واعي..و يالس فالصاله..يالله الحين اكيد بيقولهم و بيفشلني كالمعتاد..ما عطيته فرصه على طول دشيت و حاطه في بالي اني بسير الغرفه..اصلا احس انه ريولي تنزف..
لطيفه + احمد : السلااااام عليكم
اليده: مرحبا مرحبا..يالله يعلني اشوووفكم معاريس
++ ما قدرت اخلي هالموقف ايعدي على خير خاصه انه احمد ما علق..
لطيفه: يدتيه...لا إن شاء الله لا تدعين بهالدعوه..اخاف على خطفت ملك و الله يستجيب
++ دشيت على طول الغرفه .. بصراحه الدمعه كانت على طرف عيني..بس انا حالفه انه عيني ما تدمع بسبب احمد..
فاطمه: بسم الله شوه سويتبها انته
عفرا:شوه بيسويبها يعني؟؟امبونها لطيفه ما تنرام،و لا في حد يرمس برمستها اسميها الا ضيعت المذهب هالبنت
حمد: لا اله الا الله..شوه بلاكم عالبنت
احمد: ما بلاها شي..بس جنها امدووخه من الحر..مشينا وايد تحت الشمس..فطيم؟
فاطمه: هلا
احمد: تعالي شوي
سار احمد صوب المطبخ و مسك فاطمه من جتفها
احمد: اقولج..تراه لطيفه طاحت على الدري و اخاف شي عورها..
قاطعته فاطمه: شووووه؟؟؟
احمد: عنبوه انزين خليني اخلص رمستيه.. اقولج انا لاحظت انها تعري..فديتج سيري طالعيها..و ان عورها شي و تبا دوا خبريني انا بييبلها من الصيدليه
فاطمه: لا و الله من متا لطفين اتهمك
احمد: و الله انه فوادي عندها
فاطمه: لا و الله من متا ؟ فديتك احمد خبرني انا أختك و بسعالك بالخير
احمد: جب انتي..شوه ايخصج سوي اللي قلتلج اياه و بس
فاطمه: ان شالله

اخوض بحر يرسل للموج طوفان لجلك تزايد في المحيط اندفاعي..ولا زبنت بلجة البحر شطآن يعجبني اوفي في مسارك صراعي

10-03-2010, 05:28 AM

""""الجـــزء الثــــــامن""""

عليك اغار من لمس الهبايب.و جلاسك و اهلك و القرايب..عليك اغار من عمري عليكم..و اغار بسبة وبلا سبايب

مرت الايام بسرعه و نحن فالعمره..ايام حلوه..كنا نقضيها بين الحرم و الفندق و السوالف اللي ما تخلص..قدرت اتجنب احمد طول الاسبوع و الاربعت الايام اللي فاتن..انا اتجنبته؟؟ ولا هوه اللي ما بغا ايشوفني؟؟ اعتقد انه كل واحد منا مب طايق الثاني..يالله ما بقا الا باجر و بنرد البلاد..
بخيته: ضبابه....ضبااااااااااااااااااابه
ضبابه: هاه امايه؟؟ شوه تبين؟
بخيته: بنتيه سويتي الجاهي حق احمد؟
ضبابه: هيه بس اترياه ايفور و بصبه فالدله
بخيته: انزين بنتيه ... ايقولكن طرشن عدساته بعد
ضبابه: شوه عدسات عيووونه؟؟؟ هاذيلا عند فطيم تخبريها انتي
بخيته: انزين سيري هاتيهن انتي امررره ما ترومين اتسوين شي ؟
ضبابه: الله يسامحج يا امايه....مب كفايه اني مسويتلكم الريوق اليوم؟؟ و بعدين انا ما عرف ارقام عدسات احمد اخاف اشل عدسات فطيم بالغلط...
بخيته: ياربي عيالي كلهم مررره ما يشوووفوون..سيري خلي فطيم اتظهرهن هو ايقول انه عطاهن فطيم عشان تحفظهن مع عدساتها..و قوليلها اليوم الغدا عليها هيه و لطوف
ضبابه: ما عليه
سارت ضبابه عندهن و دقت الباب
ضبابه: ليش قافلات الباب بعد؟؟؟ فجن بسرعه
فاطمه: خير خير...قافلات نبا نرتاح شوي
ضبابه: ترتاحن ولا ترقدن...اقولج ايقولج احمد طلعي عدساته و تقولج امايه ودي دلة الجاهي حقه بعد..
فاطمه: لا و الله الريوق عليج انتي، يعني انتي سيري
ضبابه: سوري..انا بسير اتسبح باي
فاطمه: ذبابه بتردين ولا لا .؟؟
ضبابه: هيه صح اتذكرت السلطات العليا اتقولكن انتي و سبيجه انه الغدا عليكن انتن..يالله تشاو
لطيفه: شعندها اختج هاي..دووم رابطه راسها بلا ويع
فاطمه: نشي امهاتنا ايقولن الغدا علينا انا و انتي..يالله هبابنا ندش المطبخ الساعه 11 الحين
انجلبت لطيفه الطرف الثاني و حطت المخده على راسها
فاطمه: يالله عاااااد لطوووف نشي...هاذا كله من السهر البارحه و الكابتشينو اللوعه اللي شربناه..يالله انا بسير اودي عدسات احمد و برد بلقاج امودنه الدياي انزين
لطيفه و هيه تتلحف و اتأشر حق فطيم انها تطلع: سيري يالله سيري
طلعت فاطمه عدسات احمد..و شلت دلة الجاهي..اتحجبت بشيلة صلاتها و طلعت
فاطمه: امايه كم رقم شقتهم؟؟
بخيته: خيبه و الله مادري احيدهم فالدور السابع..بس الشقه مادري..صبري بسوي حق احمد
فاطمه: هاه شوه ما يرد عليج؟
بخيته: لا ...سيري انتي يمكن انها 702 مادري سمعت ضبابه اتقول رقم ما تذكره
فاطمه: ما عليه..ما يبون ريوق
بخيته: لا احمد ما يبا...و سلطان ما ينش الين صلاة الظهر..يالله انقفضي من الصبح حاشر الدنيا
فاطمه: ما عليه ما عليه...ما فينا على احمدووه و زنفخته
نزلت فاطمه اللفت الدور السابع..اول ما طلعت شافت كل الحجر يتشابهن الحين اي غرفه هم؟؟ بسير على الرقم اللي قالته امايه...يالله فرصه لانه باب هالغرفه مش مقفول..اكيد هم..منوه غيرنا ايخلي بيبان الغرف مشرعه..فجيت الباب شوي شوي..يحليلهم شقتهم صغيره..يالله الثياب معقوقه في كل مكان..و صينية العشا من البارحه ما ظهروها...و الشراشف في كل مكان..صدق انه غرف العزابيه زباله!! الله يعين الهاوس كيبنج يبالها شهر عقبهم عشان اتنظفها و اتطهرها ..الليتات مسكره..التفتت صوب غرفه النوم بشوف احمد..محد..و سلطان راقد و متلحف..خلاص انا بحط الدله فالصاله و العدسات عدالهن اسمع صوت فالحمام اكيد انه احمد يتسبح..دشيت صالتهم..حطيت الدله..بس
ماكنت بروحي فالصاله..ياربي ياربي..شوه بسوي الحين..اتغشا..ولا اشرد..ولا شوه اسوي دخليكم قولولي..اول شي انا بقولكم شوه شفت او منوه شفت؟؟؟ علي ما غيره..يالله صدق اني بقره كيف ما تذكرت انهم في نفس الشقه!!! علي كان لابس كندوره و يرمس فالموبايل و شكله مندمج وايد و ايناقش..و كل شوي ايدخل صبوعه في شعره..مادري شو سالفته..بس هوه انتبه اني موجوده..ألتفت صوبي..رفع عيونه ...و اتخيلو شوه سوا؟؟؟؟ ابتسم و رفع ايده يونه ايسلم عليه..لا لا اكيد اني اتوهم..رافع الكلفه ما شالله عليه..غربلات بليسي الحينه لو يظهر احمد و ايشوفني يالسه اتنمظر فالريال من دون لا استحي عادي اودع الدنيا الي عالم المجهول..و الله اني صدق ما استحي تغشيت بسرعه..سكر علي التيلفون..
على : السلام عليكم اختيه؟؟ تبين احمد ؟؟
لا جواب...الله يغربل بليسه يون اختيه..وانا من اسبوع متخيلتنه فارس احلامي
علي و هو ايأشر صوب الحمام: أحمد يتسبح
فاطمه: هاذيلا العددد...العدسات حق احمد..باي
++يون باي..مالت عليه و على اسلوبي البايخ..مفروض اقول فداعت الله ولا اي شي..و طلعت ارررررررررررركض اتقولون وحش يركض ورايه..و قلبي ايدق..و ما سمع غير كلام علي يتردد في بالي..استاهل و الله اني استاهل اللي بييني من احمد..اعترف اني خديه..و اعترف اني ما ستحي.بس و الله و الله انه هالحاله ما تيني الا اذا شفت هالريال..و بعدين يعني...لي متا هالحاله..شوه النهايه؟؟!!
بخيته: هاه فطيم وديتيهن العدسات؟
فاطمه: هيه..وين بتسيرن انتن؟
عفرا: بناتيه نحن بنسير السوق..و الغدا تراه اليوم عليكن انتي و لطيفه بنيته
فاطمه: ان شالله
فاطمه: لطوووووووووووووووووووووووووف
لطيفه: شووو
فاطمه: وين انتي
لطيفه: انا اهنيه ..في مملكة المرأه على قولتهم أمحق مملكه زهورها البصل و عبيرها الزفر..تعالي انا فالمطبخ
فاطمه: لطوووف حبيبتي ...نور عيوني..
لطيفه: هلا يا بعد جبد لطووف..هلا يا ريول لطوف..هلا يا قرون لطوف
فاطمه: هههههه...مالت عليج و على قروونج..
لطيفه: خير انسه طماطه اشووف الابتسامه شااااقه الحلج..حتا نغاغتج اشوفها اتوايج
فاطمه: خلي عنج عاد...من كبر ثميه
لطيفه: لا تغيرين الموضووووع...بسرعه قولي ورانا طباخ
فاطمه: شوه بنسوي
لطيفه: مجبوس دياي...اقولج يالله انا طبخت الدياي و قطعت البصل و بعدين شوه اسوي
فاطمه: يالله سلمت يداك يا مولينكس...الباجي عليه..لطفين
لطيفه: يالله ....قررتي تعترفين؟
فاطمه: نزلت تحت شقة احمد..و شفت علي
لطيفه: في ذمتج؟
فاطمه: عنبوج زاد..مجذبتني يعني..و الله اني شفته تحت
لطيفه: علاووووووووي...علاووووي دخيلك خلاص تعال خطبها لا تسويلي شاروخ خان و تتعنتر على فطومه خان
فاطمه: هههههههه..ايه جب..خالي راقد داخل
لطيفه و بهمس: فطووم و بعدين يعني؟؟ شوه النهايه
فاطمه و ويها محمر: و انا شدراني
لطيفه و هي تتطنزو شاله الملاس بين ايدينها يونها عروس: تن تن تناااااا تن تن تنااااا ...
فاطمه: ههههههههه..لطوف امممم بقولج سر
لطيفه: سرج في طوي
فاطمه: احبه..احبه..احبه
لطيفه: هاذا مب سر..يارب البيت و الحرم انك اول ما نرد البلاد نسمع انه ريحانة فواد فطوم ( و هي تهمس) علي ....بتخبرج شوه اسم ابوه
فاطمه: حارب
لطيفه: علي بن حارب ايخطب فطامي و افتك منها و من حشرتها
فاطمه: هههههههههههه

10-03-2010, 05:28 AM

و اندمجن البنات فالطبخ..لطوف واقفه على الجدر و اتضيف المقادير اللي اتقولها فاطمه..و كل شوي ترفع الملاس صوب فطوم عشان اتذووق الطعم..و فاطمه يالسه على الكاونتر فوق..و مر الوقت بسرعه...لطوف يالسه اتغني..اغنيه خالد عبدالرحمن ( ودعت جرحك للابد)
فاطمه و بهمس: لطيفه
بس لطيفه مندمجه ما سمعت..
فاطمه: لطووووف
رفعت لطوووف عيووووووونها..و هيه شاله السجين و اتأشر بها صوب فاطمه: لطيفه:أدري...أحــــــــــــــــــــبه..أحبه..أحبه. ..بس تراني مليت من هالموال..خلاص حفظته
احمرررت فطوم....و نظراتها صوب الباب مب صوب لطيفه...اضطرت لطوف اتشوف اللي اتشووووفه فاطمه..كان احمد واقف على الباب!!!!!!!!!!!!!!!!!!!!!!!!!!!!!!!!!!..
++ هاذا من متا وااااقف اهنيه؟؟ وشوه سمع من الكلام اللي قلته؟؟!!! انا كنت اقلد فطوم..ليكون سمع اللي قلته اخر شي؟؟!! لا لا لا لا يا ربي..ألحينه هاذا شوه بيقول؟؟ بشوه بيفكر فيني.؟؟ لا يالله ما لقا الا هاللحظه عشان ايدش؟؟!!
~~~~~~~~~~~~~~~~~~~~~~
+++ احمد...و دوامه اتدور في راسه..احبه؟؟ لطوف اتحب؟؟؟ اتحب منوه؟؟ منوه هاذا اللي خذ قلب لطوف و خلاها اتهاذي به؟؟ اخ..مادري احس بطعنه في قلبي..بنت خالي لطوف..ما غيرها..اتحب؟؟ منوه؟؟ اموووت و اعرف منوه اللي اتحبه لطوف؟؟ بذبحها اتعرفون شوه يعني اذبحها..مادري حسيت انه الدم ايفور و مخي بينفجر..شوي و كنت بمسكها من حلجها..لازم اعرف من تحب مسودة الويه..بجتلها و الله ثم و الله برتكب فيها جريمه وبشرب من دمها بعد..بس مسكت ايديني و طلعت قبل لا اسوي شي اندم عليه..سمعت الاذان ايأذن..تعوذت من بليس و قلت احسلي اروح الحرم مباشره!!
لطيفه: ياوووووووووووووووويلي يا فاطمه..ياويلي..شوه قلت..شوه سويت..خربت بيتي بإيدي
فاطمه: بس لطيفه..لاتكبرين الموضوع
لطيفه و هيه يالسه على الشبريه و حاطه راسها بين ايديها: كيف ما اكبر الموضوع؟؟ تدرين انه احمد سمع اللي قلته؟؟؟
فاطمه: انزين عادي بيتحرانا نمزح
لطيفه: فطيم ادريبج انتي تحاولين تهديني..بس انتي شفتي نظرت اعيونه و انتي تعرفين اخوج اكثر عني صح و لا انا غلطانه؟؟
هزت فاطمه راسها...لانها اتعرف انه كل اللي تقولها لطيفه صح..و اتعرف اخوها زين و اتعرف انه خذ فكره غلط عن الموضوع كله؟؟!! و من كثر ما اتأثرت لطيفه ما طاعت تنزل الحرم للصلاه..
غرفن البنات الغدا..و اتجمعو الكل فالصاله..الجو كاان ربشه..خاصه انه اليوم 6-8 يعني عيد جلوس الشيخ زايد..و كانو حاطين على قناة دبي وكله اغاني وطنيه..و الشباب شالين الدنيا باليواله..بس لطيفه حابسه عمرها فالحجره ما طاعت تظهر..
فاطمه: لطووف عاد بس ...اطلعي الصاله تعالي شووفيهم ربشه و صدعه و انتي حابسه عمرج اهنيه؟
لطيفه: راسي ايعورني..فديتج طلعي و سكري الباب
فاطمه: شوه هاذا ما طعتي تتغدين؟؟ و ما تبين تطلعين خلاص لطوف ما صار شي..اطلعي من هالغرفه
لطيفه:-----
فاطمه: و الله و الله يا لطيفه انه احمد فالصاله و عادي كأنه شي لم يكن..بالعكس ايسولفون هو و خالي و سلطان ايول..و امهاتنا يسولفن حرام لا تفوتينها القعده
لطيفه: فاطمه...ماروم فهميني ما روم احط عيني في عينه
فاطمه: يدتيه ما طاعت تاخذ دوا السكر...تترياج..يالله قومي ولا تحسسينه انج غلطانه جذيه بتزيدين الشكوك في راسه..و بعدين احسن خليه يشك انج تحبين حد...خليه ايحس على دمه شوي و يتلحلح
لطيفه: لا حول ولا قوة الا بالله

ولا ارتاح الا بشوف عينك.متا بتعود يا مجفي و غايب..انا وش حيلتي كيف اسوي.و انا في حبكم مخطي و صايب

طلعن لطيفه و فاطمه الصاله..و الجو كااااااااااااااااان رهيب..ربشه عالاخير..كان بو سعيد و سلطان ايولون..و وضوح ترقص في نصهم..امايه و عمتيه بخيته كانن يالسات على طرف و امايه اتصفق حق سلطان اللي كان كل شوي ييلس عند ريولها و ايبس..اما احمد فكان يالس على طرف و يالس يعلم عمران اليواله..اهم شي انه يدتيه كانت يالسه على طرف بعيد على كرسي منفصل..رحت عدالها و عطيتها الدوا..انتبه احمد اني موجوده بس ما حط عينه في عيني بالعكس اتجاهلني و كأني مش موجوده..يلست على مسند كرسي يدتيه..اوكي انا مب غلطانه..صدقها فاطمه ليش احسسه اني سويت شي غلط؟؟!!
و بعدين حطوا اغنية " الله يا دار زايد" و زادت الربشه، و تم ابويه مصر على احمد انه اينش و ايول وياهم..ما شالله اتحولت الصاله الى صالة احتفالات..ابويه ماسك ايدين وضوح اللي تنعش..سلطان الحبيب ايلف لفات و يوم ايمر جدام ضبابه يبطئ فالمشي..و الله الغزل عيني عينك..و نش احمد..و تم ايول هو و سلطان و ايسووون حركات..و ايتقابضون بالايادي..بصراحه بصراحه قلبي كان ايدق بسرعه و خوف..حسيت جنه الحياه من اول و يديد تبث فيني..الحياه ولا شي ثاني؟؟!! مادري و الله اني مادري..اتجدم احمد جدام يدتيه اللي زقرته..و يلست اتصفقله و هو يالس عند ريولها و ايبس
اليده: عاش عاااااااش بو شهاب..وايه يعلني ما خلا من هاليوله
سلطان: يدتيه شوه رايج بالكندوره السعوديه عليه اتخبل؟؟
احمد: يالغيريه...لازم اترز بالفيس
سلطان: عيل انته بتستحرز الغلا كله...خلنا نورث شي
اليده و هيه تضرب سلطان على جتوفه: بويه سلطان هب جنها ضويقه الكندوره شوي عند جتووفك..عنبوه شوي و بتنطر
سلطان: ههههههههههههههه...يخرررررررررررررب بيت الشيطان..يدتيه ايدج قب..منوه يقول انه كل هالقوه فيج انتي ..صدق انه الله يحط قوته في اضعف خلقه...بعدين مخصره احلا( و هو ايهز جتوفه جنه يرقص)...شرات ما البنات يلبسن عبايا فرنسيه.الرياييل سولهم بعد كنادير فرنسيه.
اليده: واااابويه انا..نش ارقص شرات المصريات بعد..
بخيته و هيه خانقتنها العبره: يالله يارب اتطول في عمر بوخليفه و اترده سالم للبلاد..يالله يعل خيره دايم و ما ننحرم من هالشوف
الجميع: آآآآمين

10-03-2010, 05:29 AM

عفرا: شوه الحينه عزمتو على طواف الوداع ولا ؟؟
حمد: انشالله ..بس جانكن بتمن اتأخرنا و تبطن ما بنسير انطوف ورانا طياره
اليده: لا لا ما يستوي عمره من دون طواف الوداع
حمد:لا لا اميه ما بتسيرين انتي ما ترومين في هالحر اطوفين برايج انتي و العيال تمو فالفندق الين ما نرد عليكم
اليده: لا انا ما عليه من الحر ...بس ما با سلطان ايطوفبيه شرات هاذيج المره
احمد: شعنه يدتيه؟
اليده: خلوني ميا و العقيلي افهم شي؟؟...امرررره ما خلوني ادعي..ولا خلو فيني ذهن

ضبابه الويه غادي احمر..و سلطان ماسك عمره لا ينقع من الضحك..احمد يائس من الوضع بينهم..عفرا متعوده على ولدها و حركاته الارعا..بخيته اتعرف بنتها زين..خلاص مصيرهم هالاثنينه العرس..ليش ايعورون راسهم؟؟

+++ أحمد..جدامي و مب قادر اسوي شي..الين الحينه احس بدمي ايفوور..و الله لو ابيدي جان ذبحتها..مب قادر اركز..احس بمخي ايدور..و الف شي و شي يخطر على بالي في نفس الوقت..عرفت انها ما نزلت للصلاه..و عرفت انها ما تغدت..و عرفت انها كانت حابسه عمرها فالحجره.كل شوي تقدملي دليل على انها مذنبه..هيه مذنبه..مب عوايلنا اللي اتحب فيها البنت بكل هالجراءه؟؟ ماعرف حاير بين قلبي اللي ايقولي صارحها ووقفها عند حدّها..فهمها انها مب بكيفها اتحب؟؟!! و حاير بين عقلي اللي ايقولي انه ما في داعي اني اكبر هالموضع لهدرجه..لطيفه اولا و اخيرا بشر..ولازم في يوم من الايام بتحب..حتا لو ما كان في قصه حب..بيكون حب من طرف واحد..ادري بس ما باها اتفكر في غيري!! في غيرك؟؟ ليش؟؟ على اي اساس..مادري مادري احس براسي بينفجر من كثر التفكير..طول عمري و انا اشوف لطيفه تتبعني..طول عمري و انا اشوف الحب في عيونها صوبي..حتا لو ما كنت ابادلها نفس الشعور..بس لطيفه كانت شي من ممتلكاتي..لا اريد اي حد ايشوفها ولا اريدها تشوف اي حد!! بس احمد انته اللي فرطتها من ايدك..شوه يالس اخربط انا..اصلا انا عمري ما حبيتها ولا قد فكرت او حسيت بشي صوبها..و عمري ما بندم على اني رفضتها..عيل شوه اللي احسبه ألحين..شوه القهر و الضيق و الهم اللي يقبض قلبي كل من طاحت عيني عليها..ماريد افكر انها في يوم من الايام بتكون لغيري!! هاذا الشي الوحيد اللي متأكد منه الحين..

محبي يالغلا بالله هيد..ترفق و ارحم اللي فيك ذايب..تملكني ودادك دون مادري..تمكن لين صاب القلب صايب

++لطيفه.. مارمت اتحمل الوضع..كل شوي ييلس عدال يدتيه و انا انتفض من فوق الين تحت..شوه هالفوضا العاطفيه اللي انا فيها..لطيفه خلي في بالج فكره وحده..احمد عمره ما حطج في باله..و عمرج ما قد شغلتي افكاره..انسيه ما في داعي اتحاتين بشوه هو ايحس ولا شوه هيه الفكره اللي حطها في باله عنج..ما قدرت اتحمل بروح المطبخ اشرب ماي و اشوف فطيم وين سارت..دشيت المطبخ..عقيت الشيله حاسه بخنقه..وقفت جدام المغسل و غسلت ويهي بالماي البارد الين ما حمّر..فجأه دخل علي أحمد؟؟؟
أحمد: وين الكوبات؟
++ طلعتله كوب من الخزانه و غسلته و طلعت ماي من الثلاجه و صبيتله..مديت ايدي بس ما دري شوه اللي استوا..يمكن لاني كنت ارتجف من شوفته و دخلته علي جيه و انا من الصبح كنت افكر فيه..ما انتبهت و انا امد ايدي ان الكوب ما وصل ايده يوم انا فجيته...طاح الكوب و انكسر..و انجب على كندوره احمد..ياربي شوه اللي سويته!! ناقصه انا.. نزلنا مع بعض تحت انشل الزجاج المكسور..
لطيفه: فدوى عن راسك
طالعني احمد...و بنبرة استهزاء..الاحتقار فيها كان اكثر من الاستهزاء
احمد: خميه قبل لا ايدش حد و ايدوس عليه....
و طلع بكل هدوء..
+++ احمد...ادريبها مرتبكه..وين ابا انا داش المطبخ وراها..احمد خل البنت في حالها..دامك من البدايه ما بغيتها..كمل على القرار اللي انته خذته من سنين..مادري الشي الوحيد اللي كان في بالي اني ألحقها..اشوفها شوه اتسوي؟؟ و اشوف ملامح ويهها..بس هاذا اللي كنت اريده في هاذيج اللحظه..
~~~~~~~

10-03-2010, 05:29 AM

++ اعتقد انه الوضع بينا متأزم لدرجه كبيره..اثبتلي احمد انه ظن بي ظن السوء..كيفه..هو حر..بس قلبي يعورني..ماريده ياخذ عني هالفكره..نزلنا صلاة المغرب للحرم و كنا مقررين انا نقعد اهناك الين ما بعد صلاة العشاء..خاصه اننا بنتلاقى اهناك مع فاخره بنت عمتيه بخيته و اهل ريلها اللي هم هييرة- ام علي - و خواته الثنتين على حسب علمي من فاطمه..حسنا و عذيجه....بعد السلامات و التعارف بينا نحن البنات..قعدنا كلنا لمه وحده نتعرف عليهن..بصراحه حسنا كانت خقاقه و الحق كانت اسم على مسما يعني صدق حسنا..ما بلعتها و يلست عند الحرمات الكبار رغم ان سنها من سنا..اما عذيجه بصراحه فهي نكته متحركه..شوه اتضحكنا ضحك خلتنا نتمنا أننا ما ضحكنا في حياتنا
عذيجه: بصراحه اريد اقولكم شي..بس مستحيه
لطيفه: خلاص بعد شوه مستحا رفعنا الكلفه نحن بسوالفنا الماصخه
عذيجه: فديتهن سوالفنا ماصخة بنحطلهن ملح بيعتدلن
الكل: هههههههههههههههههههههههههههههه
عذيجه: بصراحه عمران اخووج ايجنن...بس شوه هالاسم اسم زلماوي..ما لقيتو غير هالاسم؟؟
ضبابه: اسميه ويهج لوووح.
عذيجه: ادري لوح و مدقوق بمسامير بعد..بس بصراحه شوه هالاسم الغريب؟؟!!
ضبابه: الله يسلمج امايه يوم كانت حامل به...حلمت بمريم بن عمران رضي الله عنها..و قالت جان يبت ولد بسميه عمران و جان يبت بنت بسميها مريم
عذيجه: الحمدلله انه ما يا بنت..اسميني اكره البنات
لطيفه: ليش ان شالله و انتي شوه
عذيجه: ياختي شوه اسوي حكمت الله..بس ياويلي على الشباب..لو تشوفيني كل اعراس المرموم عندي..و ابات لج فليل الا ازفن و شوي ايول وشوي اشل شلات
فاطمه: انتي حاله ميؤوس منها
عذيجه: ادري...علي اخويه ايقولي اول واحد بيخطبني بيقربه....خخخخخ شوه اسوي انا بكون ام؟؟!! لا لا
فاطمه: علي اخوج..عقب ولا قبل سهيل ريل فاخره؟؟
عذيجه: لا علي اصغر...وين اصغر اللي ايشووووفه و ايشوف سهيل ايقول انه سهيل اصغر..
فاطمه: ليش
عذيجه: من الشغل..مهلك عمره
فاطمه: ليش هو شوه يشتغل؟
لطيفه و بهمس: بس عاد فضحتي عمرج
فاطمه: جب انتي..خليني اعرف عنه كل شي..قبل لا اخذه..عشان ايكون مثل الخاتم في صبعي
لطيفه: غربلات عدوج البنت بتسمعج
فاطمه: اقول..ما قلتي شوه يشتغل علي اخوج؟
عذيجه: الله يسلمج بو حسن يشتغل في القنصليه..بس مب مستقر يعني كل سنتين في بلد..من سنتين كان في مسقط..و الحينه كمل سنه فالرياض.. و المره اليايه شكله المغرب، باقي سنه له اهنيه..اقوله المره اليايه بيودونك الهند..ههههه..ما يعول العميمي.
فاخره: اهبي هباج الرب يالمطيوعيه...عينج اطيّح الطير من السما..ردي الشهاده على ويهج.
عذيجه: عادي ...عادي..العرس ما رمناه ايعرس بيدق 28 الشهر الياي...و الله اخويه سالم يبا ايعرس قبله..
فاخره: خليه يعرس سويلم و نفتك من حشرته..
عذيجه: حليلها فخوور .... عافته بيتنا..عادي فخور جان بتردين بيت اهلج..
فاخره: شوه ان شالله تبيني ارد مطلقه ولا ارمله؟؟؟
عذيجه: هههههههههههههههههه...خلااااااص انزين خلااااااص يهالسهيل اللي مخبلبج..ما شالله سبع اسنين و جنهم الين الحين في شهر العسل
فاخره: عذوووووج..بتردين الشهاده و لا اخش راسج في خزان ماي زمزم
الكل: هههههههههههههههههه.
ضبابه: فخووور..دخيلج..حشرت عيالج ما تحملها..حشا مب عيال قرود هاذيلا يلسيهم راسي دار
فاخره: عيالي تاج راسج اتعرفين ولا لا ؟؟
ضبابه: ادري تاج راسي...ما شالله عليهم ما خلو حد ايصلي بخشوووع..الا واحد واقف و الثاني يالس..ايه حصوووه يلسي..فخوور قولي حق بنتج؟؟!!
فاخره:هيه عشانهم عيالي اتوذون منهم..لو السيافي ما بتقولن شي..عمرااان حبيبي تعال شل حصووه عندكم عشان تلعب... لطوف وين تيلفونج؟
لطيفه: و الله ما يبته احيده على الجرج
فاخره: شوه هاذا انا تيلفوني و تيلفون فطوم مفضيات..اريد اسوي حق لين بشوف حرووووبي شوه مسوي اخافه ايصيح
ضبابه: حشا ما ادفش التدليع عليكم...حرووووبي.زقريه حربي على الاقل
فاخره: ان شالله عموه ضبابه.
لطيفه: بسير اييبلج تيلفون امايه..
نشت لطيفه..و سارت صوب الحرمات الكبار..يلست عدال امها و شلت التيلفون..من نشت الين يلست و هييره ام علي ما شلت عينها عنها!!
هييره: ما شالله لطيفه كم عمرج...احيدج يوم ايعرس سهيل صغيره
لطيفه: 20 خالوه
هييره: هيه ما شالله سنينت حسنا...ما شالله تدرسين ولا خلصتي
لطيفه: لا خالتيه..ادرس فالجامعه مع فاطمه
هييره: هيه زين بنتيه الله يوفقكن و يرزقكن بعيال الحلال
لطيفه: شي في خطركم بسير عند البنات؟
الحريم: لا سلامتج
عذيجه: لا لا لا لا ...مش طبببببببببببببببببببببعيه امايه..حشا من شافتج شغلت الرادارات...اكيد سين جيم
لطيفه: هههههههههه...عادي كل الامهات جي..
عذيجه:الا امايه مستويه جلب بوليسي من تشوف بنت فصفصتها كله عشان علي، محد غيرها ياب عيال في هالعالم
الكل: ههههههههههههههههههههه

10-03-2010, 05:30 AM

ضبابه و هيه تهمس حق لطيفه: جان ما يخطبووونج حق علي
فاطمه: و انتي شوه ايخصج اتخطبين حق الناس
لطيفه و هي اتطالع فاطمه: و الله ما خذته..بسوي سابع المستحيلات ولا اني اخذه
ضبابه: ليش شوه فيه..ما شالله فالجيش و رتبته عاليه..و يشتغل فالقنصليه..شوه تبين بعد
فاطمه: ذبابه جب ...اكريمنا بسكووتج
فاخره: يالله اشوفهن بيروحن..يالله قومن شلن اغراضكن..اقولكن حد رمس شمسه اليوم؟؟؟
لطيفه: لا بس نحن من الصبح انسويلها ما ترد..يا خوفي شي استوالها
فاخره: لا لا انا رمست عمير ما قالي شي..بس هيه غريبه ما ترد
ضبابه و هي صاده صوب لطيفه و فاطمه: شوفي شوفي حسنوووووه...ما فارقت الحريم دقيقه..حاطه احمد في بالها..بتبطين انتي اتضوين بوشهاب
لطيفه: ليش ان شالله شوه فيها البنت؟
ضبابه: تبين الصدق..حسنا هيه المرشحه الاولي حق احمد..بس ياختي ما بلعها هالبنت..دمها ثجيل
فاطمه: ضبابوووووووه و يهد..ما يخصج في هالسوالف انتي..لطوف النصيب عند الله لا تفكرين وايد
لطيفه: و منو قالج اني افكر؟؟ اصلا انا ما احق اني اكون مرشحه حق احد..انا الناس هم اللي يترشحولي
ضبابه: شوي شوي على عمرج من الخقه
لطيفه: بنت حمد ايحقلي ..اقول عمران و وضحه وينهم؟؟
فاطمه: سارو ايبون النعول؟؟
لطيفه: خلاص سبوقنا و انا بسير اييبهم..
اليوم الخميس..و الحرم كان تقريبا متروس..امة لا اله الا الله ..طلعت و وانا ماسكه بإيدي عمران..و وضحا تمشي عدالي..وصلنا البوابه مالت الحرم..زحمه بدرجه فظيعه..ثواني ثواني بس..و اختفى عمران و وضحا..و الله العظيم في غمضت عين ضاعو..مستحيل انهم ايضيعون..ادري انهم مندسين عني يبون يخوفوني..التفت يمين ..يسار..ما في حد..و الزحمه ما تساعدني اني القاهم..مادري شوه اسوي؟؟ كيف اتصرف؟؟ مستحيل ايكونون ابتعدوا..اكيد انهم في مكان..عيوني اتدور و اتدور..و مخي احسبه بينفجر..ما حس بقلبي..معقوله ضاعو!! مستحيل..يالله شوه سويت انا؟؟ كيف ضيعتهم و هم امانه عندي؟؟ لا و المشكله انهم كانو اليوم عمران و وضحا بيقعدون فالفندق مع يدتيه و عايشه و ما بينزلون بس انا اللي زنيت انهم ينزلون ويانا...شوه سويت نفدت العيال من بين ايديني..لطوف عدي الين العشره و اكيد بتلقينهم..اصلا ما خطف وقت طويل عشان يبتعدون..اتجدمت من البوابه و طلعت..وين بلقاهم الحين؟..سألت الحارس..ما عطاني جواب..رجعت للمكان اللي كنا فيه..ما في حد..رحت عند خزانات الماي..ما في حد..رجعت و سألت الحارس مره ثانيه..ما يعرف شي..منوه يعرف يعني..وين بحصلهم الحينه..على الله ايكون عمران مع وضحا..لانه اكيد وضوح بتتصرف..يالله يالله..وينج يا وضوح..كله مني انا ..كله مني..ما حسيت الا النقاب خايس من الدموع..يا ناس احس اني ادور في حلقه مفرغه..شوه اسوي دخيلكم؟؟ بــــــــيــّــن..خلاص..كيف بعيش من دون وضحه..كيف برقد في هاذيج الحجره بدونها..كيف بعيش من دون ضحكتها..كيف بصحا من النوم مره ثانيه من دون لا اشوف ويهها راقد عدالي!! و لا عمران..عمراني الصغير..يسوا نظر امه..يالله يالله ارحمني..لطيفه..بس شوه هالتفكير الاسود..الدار امان..و ان اشالله بتلقينهم لو ايبلغون الشرطه..بيطلعونهم من تحت الارض..طلعت برجع للفندق يلستيه اهنيه ما فيها فايده لازم اخبر حد او اتصل في عموه او اي شي..اول ما طلعت شفت ضبابه..
لطيفه: ضبابه....ضبابه...حد شاف وضوح و عمران؟
ضبابه: كانو معاج؟؟
لطيفه: ادري بس ضاعو
ضبابه: شوووو..كيف ضاعو
لطيفه: امايه و عموه وين؟
ضبابه: امايه و خالوه عفرا و فطيم سارو عند فخور بيتعشون عندهم
لطيفه: حلفي؟؟
ضبابه: و الله و انا يلست اترياج انتي و عمران و ضوح عشان انرد مع بعض
لطيفه: يالله يالله شوه سويت انا؟؟؟ ضيعتهم ضبابه شوه اسوي..و الله انهم كانو عندي ما دري كيف اختفوا؟؟
ضبابه: بس لطوووف لا تصيحين..جذيه ما بنحصلهم..سألتي البواب اذا شافهم؟
لطيفه: هيه بس ايقول ما شاف حد وين بيشوف في كل هالزحمه
ضبابه: المشكله ما عندنا موبايل اندق حق اي حد و نسأله او نخبره..شوفي لطوف انا بسير الحرم داخل و بدورهم في نفس المكان..انتي هدي اعصابج ولا تصيحين..سيري الفندق و يلسي فاللوبي او اقولج و قفي جدام الباب احسن سبحان الله ايكون حد شافهم او شي و يابهم..انا اذا ما لقيتهم برد
لطيفه: لا لا ما روم اسير ما روم بموووت يا ضبابه شوه سويت كله مني انا
ضبابه: لطوف لا تكبرين المشكله سوي اللي قلتلج اياه وسيري خبري سلطان هو بيعرف يتصرف
لطيفه: ما عليه ما عليه
++ رجعت الفندق..و الله ما عرف كنت امشي ولا اركض ولا شوه..حصلت نفسي جدام الفندق..لطوف هدي اعصابج ما بيصير الا الخير..لازم اخبر سلطان قبل لا ايمر وقت طويل..الصياح الحين ما بيردهم لازم اعرف اتصرف مثل ما قالت ضبابه..ما لقيت عمري الا جدام شقتهم...دقيت الجرس بس ما حد ايرد..مره مرتين ثلاث..و في كل مره اتخنقني العبره اكثر..والله ماروم اتحمل ياخوفي سلطان بعده مارد..شوه اسوي شووو..دقيت الباب بإيدي خلاص اليأس دمرني..انفتح الباب..
احمد: منوه انتي...
فجيت النقاب ماشي وقت الحين للمغايض: انا لطيفه احمد
احمد: انزين ادري انج لطيفه من عيونج اللي ما تقول الا عيون قطوه... شوه بلاج شوه تبين؟؟
شكله توه طالع من الحمام...لانه مب لابس الا وزار و فانيله..و حاط الفوطه على جتوفه...
لطيفه: اسمحلي يايتنك الحين
احمد: ما عليه توني ظاهر متسبح..ما سمعت الجرس الين ما ظهرت من الحمام
و في لحظه...انفجرت بالصياح..
احمد: لطوووف..شوه مستوي..حد استوا عليه شي؟..يدتيه شي بلاها؟
++ ما رمت انطق بكلمه..
احمد: لطوووووف...بترمسين ولا لا ؟؟؟؟ لطووووف ارمسي
++ انهرت..خلاااااص..غلطتيه..الحين كيف بقوله..ما حسيت بعمري الا انا يالسه على الارض و حطيت ايديني على ويهي و يلست اصيح...
نزل احمد على الارض...مسك ايديني الثنتين...و سحبهن عن ويهي..حط عيونه في عيوني..و صرخ
احمد: لطيفه

10-03-2010, 05:31 AM

من شدة الصوت...خفت اكثر..ووقفت صياح..بس ما رمت اوقف شهقاتي..كنت خايفه من اللي بيصير..و خايفه من احمد اكثر..حطيت عيني في عينه
احمد و بهدوء: لطوف ارمسي...خليتيني بلا عقل..شوه اللي استوا؟؟؟!!!!!!
لطيفه: كن..كنا..كنا فالحرم و عقب اصص اصص الصلاه طلعنا..كان عندي وضحا و عمران
++ ما رمت اكمل رديت اصيح..بس تذكرت احمد..و اني كل ماتأخرت ازيد الطين بله
لطيفه: يوم طلعنا من الحرم ضاعو..دورتهم ما لقيتهم..و الله اني ما خليت مكان
احمد: منوه عندهم ؟
لطيفه: ماحد..كانو عندي انا بس
احمد: و باقي الحرمات وين؟
لطيفه: يدتيه ما نزلت..و الباقيات سارن عند فاخره اختك بيتعشن اهناك
احمد: وين بالضبط ضاعو؟
لطيفه: عند باب اجياد
نش احمد و لبس كندورته.. شل موبايله و حط السفره على جتفه..
احمد: لطيفه سيري فوق..ولا تصيحين تسمعيني ولا ولا؟؟ بعدين لا تخبرين يدتيه..انا بسير ادورهم اكيد بنلقاهم..لا تصيحين فاهمه؟؟!!!
هزت لطيفه راسها
احمد و هو يعلي صوته مره ثانيه: انزين ولا لا ؟؟
لطيفه: انزين
++ نفذت اللي قاله احمد..دشيت الشقه يدتيه راقده..الحمدلله..طحت على الاريكه اللي فالصاله و يلست اصيح...الين ما هديت..اكيد احمد بيلقاهم...عقب ربع ساعه..ما حسيت الا احمد داش و ماسك في ايده وضحه و ضبابه وراه..ركضت صوب وضحه و انا اصيح لويت عليها و يلست ابوسها..مادري حسيت انه الروح ردت فيني
احمد: بس عاد بتزيغين البنت..سيري وضحا داخل
دش احمد و يلس على الكرسي و سارت ضبابه داخل مع وضحا..
لطيفه: وين لقيتها ....و بعدين وين عمران.؟
احمد: اذا تميتي اتصيحين ما برمس...
لطيفه: خلاص و الله ما صيح..بس وين عمران؟
احمد: عمران عند اميه و فاطمه..يوم ضاع ظهر من البوابه و شافته فطيم و شلته معاها
لطيفه: و ليش ما خبرني خلني اتخبل؟؟
احمد: فاطمه اتقول انه موبايلج مب عندج..و قالن اكيد انج بتعرفين انه عمران معاهن و يونها عشان ما تخوفج طرشتلج مسج عالموبايل..شكلج ما شفتي التيلفون من دخلتي الشقه؟
لطيفه: لا...و وضحا...كيف ليقيتوها؟؟
احمد: وضحا عوده و فاهمه..سألت ناس من الامارات شافتهم...و يابوها الين عند الباب شفناها انا و ضبابه و يبناها...خلاص ارتحتي؟؟
لطيفه: مادري
احمد: اندووج..هاذا عصير بارد يايبنه حقج..بس من الصياح..خلاص خبلتيبنا..شربيه و سيري ارتاحي و ما في داعي الحرمات يدرن عن شي... انا بنزل ان بغيتن شي سون تيلفون
لطيفه: ان شالله....
و طلع احمد...بصراحه..عمري ما حبيت احمد كثر هاللحظه..ريح قلبي الله يريحه..

ولا غيرك فهالدنيا فتني..و حملي ثقيلات النوايب..انا يا شوق حبك ذابحني..فدتك الروح دامنا حبايب

الإهداءات

ماينجبر قلب على قلب

(همســــات قصص وروايات)