ماينجبر قلب على قلب

10-03-2010, 05:16 AM

""""الجـــزء الثالث""""

وين هاذيك السوالف روّحت من وقت سالف يوم كان الحب يسمو بالمحبه الاوليه..يا حبيب الروح انا مانساك طول العمر حالف وش حياتي دون حبك مثل مجهول الهويه

عفرا: لطيفه؟؟؟....لطووووف
لطيفه: لبيه امايه
عفرا: لبيتي في منى...انابسير اودي عويش اختج السوق..فديتج سوي حق سعيد
لطيفه و بإنفعال: ليش سعيد شي بلاه؟؟؟
عفرا: لا لا ما بلاه شي...دخل علينا مضيق و من ارمسه عن حمده مررره مادري شوه ايحلبه..فديتج سويله شو فيه وين؟؟ يسمع منج هوه...و ردي عليه بخبر تراني اترياج..لا تقوليله امك اتخبرك عنك..
لطيفه : ان شالله امايه..امايه
عفرا: هاه؟
لطيفه: خطفن على راعي العبايا..و هاتن عباتي و عباة فطيم..و الفاتوره عند عويش
عفرا: ما عليه..سوي حق اخوج و شوفيه وين
لطيفه: ان شالله
سارت لطيفه صوب التيلفون بتسوي حق سعيد..{يسمع منج هوه}..
++ صدقها امايه..سعيد يسمع مني وايد اكثر عن امايه او عويش اختيه..مادري ليش لي تأثير غريب على سعيد اخويه.. فديته و الله ما يهون عليه..حياته ما سارت بزياده..رغم انه عرس و ياب عيال..سعيد عنده ولدين..حمد و خالد...و رغم هاذا كله..الكل يعرف انه العلاقه بين سعيد و حمده متوتره وايد...ما نلوم حمده..لانه بصراحه سعيد غادي صعب امرره ما يتعاشر وبس عليها صراحه متحملتنه من ست سنين..سعيد عمره ما كان جافي و قاسي..بس مادري ويا حمده ينجلب شخص ثاني..بس اتم حمده مالها ذنب...بعد هيه شوه ذنبها باللي استوا حق سعيد؟؟؟ و سعيد بعد ماله ذنب فاللي استواله
رن التيلفون مره و ثنتين و ثلاث بس ما شي فايده...اكيد سعيد يتحراني امايه بسير اييب الموبايل و بسويله اول مايشوف رقميه اكيد بيرد...
سويت حق سعيد و من ثاني رنه رد عليه...فديته و الله لا يحرمني منه..
لطيفه: السلام عليكم ( عاد لطوف يوم ترمس فالتيلفون اتخلي عمرها رقيقه..لازم اتعوض الدفاشه شوي)
سعيد : و عليكم السلام... حي هالصووت
لطيفه: الله يحييك..هب اتقردن تراني صدق بصدق عمريه...وين دارك بو حمد
سعيد: و الله الا هنيه فالقهوه ...علومج
لطيفه: علومي علوم الخير..شحالك بو عسكور
سعيد: شوه حاليه بعد...اتسر العدو
لطيفه: افاااا يا سعيد ليش
سعيد: و الله شوه اقولج..
لطيفه: اسمع حسوس عدالك؟
سعيد: هيه و الله الا الربع
لطيفه: عيل بو عسكور ما بطول عليك...يوم انك عند ربعك..بس الشيشه هب اتحطها في ثمك بعدني ما وايهتك
سعيد: هههههههه...عيل مره لا بخلي معسل ولا مدوااااخ.
لطيفه: ههههههههههه...المهم لا تبطي شوه تبا عالعشا؟؟؟ بخلي عباس ايسويلك مشاكيك
سعيد: زين ....اللي يسمع حرمتيه مب اختيه
لطيفه: برايك ...ما تبا مب لازم ...امبونك الا بتجابل ديايت عباااسوه المشوايه
سعيد: لا لا لا دخليج كله ولا هاذيج الديايه ...خليه ايسوي اللي تبينه
لطيفه: ههههه..خلاص عيل ما بطول عليك..هب تبطي
سعيد: لا حوووول ياهل انا...ولا هاي توصيات امايه ..ادريبج انتي ما بتسويلي الا منيه والدرب
لطيفه: افاااااا يا سعيد يوم هاي علومك....امررره عيل انا زعلانه...عنبوه متولهين عليك و جيه اتقول
سعيد: لطوووف زعلتي....
لطيفه:.....
سعيد: لطفين بس عاد عن البزا ...بس عاد فضحتيني جدام الرياييل يالس ازاقرج ردي يالله
لطيفه: شوه تبا بعد على العشا؟؟؟
سعيد: هههه ما شي سلامتج
لطيفه: يالله عيل فداعت الله
سعيد : الله يحفظج
++ سكرت السماعه...فديته و الله انه غالي عندي..و حاله مررره مب عايبنيه..الله يهديه ..بسير اشووف الحليان شوة سوا ادريبه عباااسوه وده انه يجتله اليوم قبل باجر...ياخوفي من اسير العمره يعفد عليه و ايسويه صالونه..ظهرت لطيفه الحوش برا..تتمشا دام محد فالبيت بعد شوه اسوي يالسه اروووحي..اتحجبت و طلعت مريت على الستور اشل شوي حب شعير حق الحليان و عياله..بسير اشوفه من يومين عدي به...
لطيفه: عبااااااس.....عباااس
لطيفه: عباااااسوه و يهدددد...
عباس: شوووه فيه شوه فيه
لطيفه: ليش ما نظفت القفص ككم مرره انا يقول حق انته..وشوه هاذا ماي كلش وصخ
عباااس: اوووهووو...شو يريد انتي هاذا
لطيفه: و انته شوه يخصك..و الله انك متعبل...يالله روح هات برووش و ماي نظيف ..يعلني بلا هالسوده..تحرطم عباس الطباخ و سار اييب اللي امرته عليه لطيفه
لطيفه مندمجه و هيه اتنظف القفص...سمعت صوت سياره بس عبالها حد خاطف فالشارع أو انه حد من العمال اللي يصلحون المكيفات...حست انه حد يمشي صوبها...ما حست بأنه حد يالس يراقبها من ورا..اول ما انتبهت لظل..
لطيفه: عباس ...يبت الماي ولا لا ؟؟؟
ما في حد رد...
لطيفه: عبااااااس...روح شوف كشميرا خلها اتيي قولها ماماه لطيفه يريد يالله بسرعه ( عايشه الدور يون ماماه^_^)
++ ما في حد رد...عيل منوه اللي واقف مسطن وراااايه من الصبح..هاذا عبااااسوه ادريبه حركاته...عباس طباخنا عندنا من اربع و عشرين سنه...من يوم ايطيح خليفه اخويه..ما شالله مستوي واحد من الاهل و ما يداني حد يأمر عليه...
----: السلام عليكم
++ لطيفه ...اتيبست...هاذا صوت ريال...انزين حتا عباس ريال...لا لا صوت مووواطن...خيبه خيبه..منوه....اتغشيت بسرعه و نشيت من على الارض..شوه هالوقاحه لاحقني ألين الحوش عند القفص؟؟!!!!..اول ما التفتت لطيفه ...منووووه....انته؟؟؟؟ ما غيرك؟؟؟؟ الديج؟!!!!!
لطيفه: و عليكم السلام و الرحمه..
+++أحمد.. و الله و كبرتي يا لطيفه..عنبوه خمس اسنين اتكبر جيه؟؟ و متغشيه بعد شوه يمكن ما عرفتني..
أحمد: لطيفه ولا عايشه؟
لطيفه: لا لطيفه...شحالك احمد؟
+++أحمد.. لا و الله طلعت لطيفه..انزين دام قالت شحالك احمد معناها اكيد عرفتني..عيل ليش متغشيه؟؟؟..انزين انته شوه يخصك برايها تتغشا..لا و الله ما اتغشت من الهندي و انا ولد عمتها تتغشا عني..هاي شوه سالفتها على فكره انا من خمس سنين ما شفت ويهها...و كل ما تشوفني تشرد..شوه يونها تستحي..مستحيل العالم كلها بتستحي الا لطوف ما عرفها انا..خبز ايديه
احمد: بخير و نعمه..و من صوبج
لطيفه: بخير الحمدلله

+++أحمد.. مرت لحظة صمت، شوه يالس تسوي مجابلنها انته..ولا اول مره تتعرفون على بعض؟..بصراحه هيه ..لانه لطيفه اللي جدامي غير تماما عن لطيفه اللي احيدها..هاي اطول و اضخم و اهدى، مستحيل لطوف الخريش تكبر بهالطريقه، على الاقل لطيفه اللي اعرفها كانت عنيفه و دفشه..يعني لول اول ما تشوفني عطول تنغز بالكلام اما اللي جدامي بصراحه شي ثاني...مب يمكن ما تبا اتشوفني اصلا..و ليش ان اشالله انا شوه سويت بها يعني؟؟ بشوف شوه ردت فعلها اذا تقربت منها..لازم اعرف شوه السر اللي يخليها تختفي كل ما تشوفني..شوه السر اللي خلاها تختفي من حياتي خمس سنوات..اعرفها لطوف ما تستحي مني ..عيل شوه السالفه؟؟..بالفعل اتجدمت عدالها و ما خليت مسافه بينا..بتستحي يعني؟؟ خلها ..وقفت جدام القفص تماما..

عن سوالفك و كلامك ما تعوضني السوالف لك تشد القلب همسات و مشاعر داخليه روحك وروحي يجمعهن على اللقيا تآلف كل ما شفتك تجدد دافع الاشواق فيه

احمد: شوه هاذا؟؟
++ لطيفه...خيبه وين يبا هاذا معفد جيه...يالله ..هاي اول مره اشوف احمد فيها بهالقرب من خمس سنين..
لطيفه: شوه اتشوف انته؟؟ بقره
+++احمد..ايوا هاي لطيفه اللي اعرفها ...ظهر اللسان الطويل..اوكي الهجوم خير وسيله للدفاع
احمد: اكيد بقررره..لانج شراتها
++لطيفه..لا و الله في بيتنا و يعايب بعد...شوه يتحرا عمره هاذا...بس احسلي ما ارد عليه..
احمد: يعني اللي انا اعرفه انه البنات ايربن قطاو ..عصافير...اذا بالغن جلاب...بس فيران شي غريب و الله
لطيفه و هيه اتشل صحن الاكل: طبعا لاني غير عن البنات....و بعدين هاذا هامستر مب فار!!
+++احمد و عشان يكسر الصمت اللي بينهم...بصراحه لطيفه ما دري كيف صايره..ما عرفتلها يبتها بالسياسه قلت خلاص البنت الحينه حرمه ولازم يعني شوي نحترمها..مافاد...عاملتها بالدفاشه مثل ما كنت اعاملها طول حياتي ما فاد شوه بلاها؟؟؟
احمد: لا و الله ...ليش ان شالله..فيج ايد ولا لسان زياده عنهن
لطيفه: ولاشي ....بس انا غير انا همباة ( مانجا) باكستان...
++ بس يا احمد شوه لزوم اتقلب المواجع..خلاص انته نفسك امررره ما تغيرت..نفس الطبع ..نفس الاسلوب..نفس الازدراء..اذا انته مثل ما انته يا احمد..فانا خلاص انسان ثاني..انسان ثاني غير عن هاذاك الكائن الغبي اللي كان يركض وراك بلا احساس..غير عن هاذاك الانسان اللي كان سفيه و هو يعبر بحبه لك بكل براءه..انسان جرحك له خلاه ما يطيق حتا يسمع طاريك..ظاهريا احمد مثل ما هوه ما غيرته السنين..بإستثاء انه لحيته استوت اغلظ..اما ملامح الويه نفس ما هيه..و يمكن فتح لون بشرته شوي..اكيد على هاذيج الايام ما كان ييلس فالبيت بالمره..اما ملامح ويهه هيه هيه نفسها ما تغيرت..نفس الملامح اللي مرسومه في قلبي!! نفس العيون الخبيثه..عيونه نفس عيون فطوم اخته بالظبط..وطواطيات..اتزيد من شره..نفس الخشم نفس الضحكه..و نفس الحواجب..اللي كان مميز احمد عن خوانه هوه حواجبه..حياته مقارين..اه من هالحيات كم و كم ذوبني..و الاهم
نفس الضربه...في حاجبه الايسر.. اللي تقسم حاجبه نصين..الشاهد الوحيد على حبي الغبي لأحمد!!!!

و الله اني من غيابك يا اعز الناس ذالف ما تعرف انه ابتعادك يالغلا يأثر عليه لان قلبي يا وليفي عند غيرك ما يوالف اشعر براحه اذا شفتك و احس بجاذبيه

و سارت لطيفه عن احمد مخليتنه في ذهوول كامل..شِوه بلاها هالبنت!!! دشت لطيفه البيت..و سارت صوب المطبخ تغسل ايديها..
++همبات باكستان...بهالاسم كان يزقرني احمد يوم كنت ابات عندهم..ادري اسم غريب..بس شوه معناه؟؟؟ مادري ...كنت احب هالاسم وايد ..اكيد لانه احمد الغالي كان يزقرني به..كنت اتخيل انه يدلعني ..فالوقت اللي كان هوه يستخدم هالاسم عشان يتطنز عليه
+++ ..دش احمد البيت ..عنلاتها خلتني وسارت عني..اصلا انا مب ياي عشانها..بسير اشوف منوه فالبيت عشان اشل الجوازات عنه!!! دشيت البيت هودت...بس ماحد ايرد...اصلا انا يوم دشيت ما شفت الاسيارة سلطان الاكس فايف..اما سيارة البيت و سيارة سعيد مش موجودات..بس اكيد سلطان فالبيت..دشيت ماحد فالبيت فااضي..ما عليه بيلس شوي فالصاله اكيد هالخبله بترد مره ثانيه...وين سارت البقره ما تشوفني ياي البيت ؟؟ شوه ياي اسوي انا يعني اتمنظر فيها!!! سرت و يلست على واحد من كراسي الصاله..بيت خالي حمد يمتاز بالفخامه زياده عن اللزوم..و هالشي يحسسني بالضيق في كل مره ادشه...اما بيتنا نحن غير..كل شي بسيط بس انيق و مرتب..يلست على الكرسي..بسوي حق سلطان بشوفه وين...اسويله بس ما يرد و ين سار هاذا بعد؟؟!!! بشوف وين سارت هالهبله؟؟
احمد: لطيفه ....لطيفه

10-03-2010, 05:16 AM

+++بس مافي حد يرد..شفت جريدة الاتحاد.. شليتها...يالله فرصه ما قريت الملحق الرياضي اليوم..في هاللحظه دشت عليه لطيفه و هيه اتمش ايديها بالكلينكس..و اول ما شافتني اتفاجئت...حاولت تتغشا....عنلاتها شوه شايفه جدامها يني ولا ياثووم..
احمد: لطيفه وين خاليه؟
لطيفه: و الله مب هنيه في بوظبي..
++ هذا بعده ماسار شوه يالس ايسوي؟؟نشيت و صبيت كوب جاهي بالحليب حق احمد..بعد مهما كان ايتم ضيف..و بعدين اعرفه انا احمد ما يداني القهوه...يالله الحينه كيف بعطيه الكوب...اولا انا متغشيه..ثانيا الكوب حار..و اخاف احطه جدامه اجبه؟؟!!! مشيت شوي شوي ..و احمد يالس ايجلب الجريده..حطيته على طرف الطاوله..لاحظ احمد الصعوبه اللي كنت امشي بها..
احمد و بنبرت استهزاء: و انتي شعنه متغشيه؟؟؟!!!!
لطيفه: كيفي
احمد: كيفج كيفج...بس لا تخافين ما بخطبج انا ..ويهج و اعرفه اللي يسمع ملكت جمال الكون
++يالله منه هاذا متا بيكبر على هالطبع..طول حياته طبعه ناري..الا يتطنز و يتمصخر...اووف منه
لطيفه: لا و الله ...صدقك يا بوشهاب ما شي رياييل فالدنيا غيرك..امرره انقرضوا
احمد:عيل فجيها الغشوه و خلي عنج المستحا ..يوني ما عرفج من متا انتي تستحين؟؟؟
لطيفه: انا استحي منك ؟؟؟ اللي يسمع هزاااع بن زااايد يالس جدامي و انا مادري
++بصراحه احرجني...و هوه شوه يخصه..استاهل انا اللي حطيت نفسي في هالموقف..يعني معروف اننا متربين مع بعض ..و خواتي ما يتغشن جدام اي واحد من عيال عمتيه..و العكس صحيح..حتا خليفه خوويه اللي هوه مب وايد فالبلاد و ما يخالط وايد..بنات عمتيه ما يتغشن منه..حبكت علي انا؟؟؟ انزين انتي اللي مسببه لعمرج كل هالبلا..و الله انا ما باه ايشوف ويهي..ما ريده ما ريده..مب كفايه طنازته عليه يوم انا كنت صغيره..كل ما يشوفني يونه تلوع جبده من ويهي..بصراحه يوم كنت صغيره كان ويهي ناقع حب شباب بصووووره فظيعه..و شكله بصراحه ايخرع..بس ولو هاذا ما يعطيه الحق انه ييلس يستهزء بي!!! بس ما عليه خليه ايشوف ويهي الحينه و ايشووف انه الطب ايسوي المعجزات..بشرتيه الحينه اصفا من بشرت الياهل!!!!!
احمد: ما تنرامين امرررره..وين سعيد اخوج ولا سلطان
لطيفه و هيه تعق الغشوه...بس التفتت الصوب الثاني: محد كلهم ظاهرين السوق..سعيد فالقهوه و سلطان فالصناعيه
احمد: انزين ما طلبت تقرير منج انا...ابا الجوازات من عندهم..ما تعرفين متا بيردون؟
لطيفه: مادري...لحظه بسوي حق سلطان اخويه بشوفه
سارت لطيفه و دقت حق سلطان...
لطيفه: الوه ...السلام عليكم
سلطان: و عليكم السلام ..هلا لطوف شوه بلاج
لطيفه: اقولك احمد ولد عمتيه اهنيه و يبا الجوازات
سلطان: خيبه..نسيت اوديهن
لطيفه: انزين الجوازات وين انا بعطيه اياهن
سلطان: لا لا الجوازات في سدة الاكس فايف و انا قافلنها و المفتاح عندي
لطيفه: خلاص انزين
سلطان: اقولج لطيفن
لطيفه: هلا الغالي
سلطان: قوليله لا يروح خلاص انا مخلص..
لطيفه : ان شالله ..يالله مع السلامه
سلطان: باي
ردت لطيفه عند احمد الصاله...
لطيفه و هيه تلعب بصبوعها: ايقولك سلطان الجوازات عنده..بس الحينه هوه ياي فالدرب
+++اول ما رفع عينه احمد..منوه هاي اللي جدامي؟؟؟..الصوت صوتها الصدعه منوه غيرها..بس الشكل مستحيل..مستحيل هاي لطوف اللي احيدها..شت كيف اتغيرت ..180 درجه..بصراحه صخت بي الدنيا من شفتها..معقوله هاي لطوف لطوف ما غيرها..يخرب بيتها كيف اتغيرت..و الله و حلويتي يا لطوف..بصراحه ما حلوت بس الا غدت ظبي...غربلاتها أحس بقلبي يرقص رقيص.. ما روم اشل عيني عنها!!!!! الحينه هاي شوه بتقول من الصبح ايبحلق فيني..اغير السالفه احسن..
احمد: اوكي...هاذا الحليب منوه مسونه
لطيفه: كشميرا
احمد: شوه هاي كشميرا بعد؟؟؟ البشكاره؟
لطيفه: هيه عيل منوه ...الثلاجه
احمد: سيري سويلي غيره..تعرفينيه اني ما شرب جاهي البشكارات
++لطيفه...لا و الله شوه فاكر نفسه هاذا...خقاق و متعنطز عليه..يبا جاهي ايروح بيتهم يتشرط..و الله بيتنا مب مطعم...اففف منه..ما بسويله ..و يروح يصطفل مب مشكلتيه..فهاللحظه رن موبايل احمد...انا ما تحركت..شفت احمد شاف الرقم بس طنش..امممم ..منوه اللي داقله..اذا الشيخ يتحرا نفسه بخليه عشان ايرد على التيلفون على راحته ذا بعده..يالله بشوف رد جان فيك خير..اكيد و حده من هالخايسات اللي يرمسهن و مستحي على ويه ايرد عليها جدامي!!!!! عيل و الله و الله ما تحرك...احمدوه احسلك رد..ولا ترا و الله برد و بسبها الخامه!!!! صك التيلفون ..بس رد ايرن مره ثانيه...
+++أحمد و هو ايقول في خاطره..ادريبها الحينه هيه و اقفه حارستني..هههههه...عيل الا ارفعلها الضغط...انا اصلا من شفت رقم البيت قلت مابرد هاي اكيد وحده من البنات ..ما فيني على حشرتهن..بس دام لطوف جدامي و شكلها اتفوووور..عيل انا بلعب نفس اللعبه..خيبه كيف ويهها احمر....و الدخان يضهر من خشمها..هههههههه
احمد: الوو
فاطمه: مرحبا
احمد: مرحبتين الساااااع..هلا و الله بالغلا كله
فاطمه: هههههه...ثرني غاليه عندك و انا مادري
احمد: اذا تدرين بكيفج ..و اذا ما تدرين تراه ....حبكم وسط الحشا سادي
فاطمه: ههههههه...شوه ما شالله اليوم المووود رايق...ما شالله جني ارمس الشاعر الجمري
احمد: و الله الجمري ما يوصف اللي في قلبي من صوبج
فاطمه: حوووه احمدووه شياك...
احمد و هوه يرفع عيونه صوب لطيفه: و الله ما شي...بس من اسمع صوتج مادري جيه احس بنفضه في قلبي
فاطمه: الله يهديك..بتخبرك انته وين...في بيت عموه ولا سرت
احمد: لا بعدني هنيه..شوه تآمرين
فاطمه: انا امر...لا و الله يا خويه انك مب طبيعي..المهم اتقولك امايه يوم تخلص خطف على راعي التيلفونات و خذلها تيلفون يديد..ولا صلح مالها الجديم
احمد: خلاااص ما عليه باخذلج اللي تبينه !!!! كم قلب نحن عندنا
++ عنلااااته الخاااام ..الديج ..بو البنيات يغازلهااا جدامي...الود ودي ازغده من حلجه..و الله و الله لو مب الحشمه جان راويته زين هالخام..يون كم قلب نحن عندناااا...فقدتك و فقدتها فوووقك قول امين...تيس ...خام ..اكرههه!!
لطيفه: كشميراااا.....كشميرااا
فاطمه: احمد...اسمع صوت لطووف عندك
احمد: هيه هاذيه تنعش جدامي بلا مدخن
فاطمه: هههههههه...فديتها عطني اياها
احمد: لا و الله..يالله يالله فارجي ...
فاطمه: احمدوووه...فديتك..شوي شوي بس ابا ابشرها
احمد: فطيم ...فكيني من الصدعه سويلها على تيلفون البيت
فاطمه: شوي عاااد..و رفجت بوخليفه
احمد: لا حووووووول....لطيفه
++التفتت لطيفه صوبه بس ما ردت عليه,,,,,يعني ألحين هوه من الصبح يرمس فطيم...اوكي اوكي يتحراني اغار عليه...مالت على هالشيفه
احمد: دوووج فطيم تباج؟؟
لطيفه: منوه انا؟؟
احمد: لا الياااعده اللي عدالج..انتي بعد منوه غيرج
++لطيفه..مستحيل اني اشل الموبايل من ايده...سابع المستحيلات..لا و ارمس في تيلفونه بعد..ايخسي..ايخسي ولا انتي اصلا ما ترومين تتقربين منه!!! و الله مب مهم المهم اني مابرمسها من تيلفونه و احط السماعه في اذني عقب ما كانت في ذنه..لا لا
لطيفه: برايها برمسها من تيلفون البيت
احمد: اتقولج سكري و بتسويلج من تلفون البيت
فاطمه: لا لا لا ..دخيلك شوي بس شوي
احمد: اوهووووو..و الله انكن ما تنعطن ويه...بس سكري يالله سكري
فاطمه: احمد ..حرام عليك تراني ارفقت ببو خليفه
احمد: انزين اندووووج...و مد احمد ايده بالتيلفون,,,,بس انا نحسه مستحيل اشله ...طنشته و صديت الصوب الثاني...حط احمد على السبيكر...و رفع التيلفون على فوق شوي...خلني افتك من حشرتهن
احمد: دووج هاذي سبيجه رمسيها
الغبيه فاطمه رمست على طول ما تدري انه الشيخ حاطنه على الميكرفون
فاطمه: لطفييييييييييييين...الخامه....احمدووه عندكم فالبيت و ظاهرتله...و شمعنا بيتنا ما طيحينه؟؟ ما عليج دواج عندي يالخامه...و الله مشتائين يا ألبي للحب الاديم...عندج اه...ما عليه ما عليه...اقولج نتايج الفكر الاسلامي طلعت..عنبوج ياللوتيه يايبه b و انا c+ و يمنوووه d
++الله ياخذ بليسج يا فاااطمه...خلاص دوروني ..خلاص شكلي بختفي عن الكون كله من القفففطه...طول حياتها هالبنت هاديه بس من تكلمني ما دري شوه اييها تخترش..صدق ان الدفاشه عدوى..خيبه قفططططططططططططططت...انحرق ويهي الا تبخر...و هاذا الخام يضحك بعد
+++ضحك احمد بصوت خفيف...و نزل راسه و خلى عمره ما سمع شي يونه يالس يقرا الجريده..لان بصراحه حالت لطوف ما تسر العدو....خيبه يا فاطمه الحب الاديم مررره وحده..!!!!
نشت لطووف و شلت الموبايل من ايد احمد بسرعه..قبل لا تقول هالبدله شي ثاني ....خلاص خلاص مالي ويه اصلا..ياناااااس اريد انتحر....الحقووووووني
لطيفه: هلا هلا بفاطمه بنت سيف شحالج؟؟
فاطمه: تمام و الله...مبروك على النجاح
لطيفه: الله يبارك فيج....خلاص لطيفه تذوب تذوب ببطء من الفشله
لطيفه: اقول فاطمه سلطان اخويه يزقرني باي....و رقعت التيلفون في ويه فاطمه...تستاهل الخامه
بالفعل انه سلطان توه ايوقف سيارته النيسان برا...نشيت و حطيت الموبايل جدام احمد..وعع يا طعم الفشله..ابا ازووع ياناااااس و احس بدواااااخ...يا لوعت الجبد
سلطان: السلام عليكم...
احمد: هلااااا بو مييد و عليكم السلام و الرحمه...و توايهو الشباب
سلطان: و شحااااالك..ربك بخير
احمد: بخيرو نعمه و من صوبك
سلطان: و الله ما نشكي باس...اقول لطوف هاتي ماي
احمد: عنبوه شوه اتسوي فالصناعيه؟؟
سلطان: و الله ما شي ازود المكينه مالت النيسان تعرف تل مرعب بيــــــبدا جريب
احمد: النيسان قصدك ولا المدررررعه....ههههههه
و تموا احمد و سلطان ايرمسون بعض..سرت عنهم المطبخ بأييب حق سلطان ماي..و اتذكرت انه احمد ما شرب الحليب ماله..و الله هالانسان غريب...ما يطيع يشرب من ايد البشكاره ابد..لازم حد من خواته ايسويله..المهم دامني فالمطبخ بسويله...بسير اشرب ماي احس بحلجي امرره يابس عقب القفطه..الله يغربل بليسج يا فطووووم..يالله يالله ما اقدر اتذكرالموقف..شكلي ما ببات اليوم من الفشله..و الله عادي عادي؟؟؟ شوه يعني هوه ما يعرف..يدري اني كنت احبه مثل ما يدري اني اكره كره الحينه!!! و الله مب عادي عن الجذب ..عادي و انتي ترتجفين جنج ورقه في مهب الريح...عادي و انتي غاديه طماطه..عادي و قلبج بيظهر من حلجج!!!! ما اعتقد انه احمد بكبره عادي...احمد طول حياته ما كان شخص عادي!! خلصت الحليب و حطيت كوب ماي عداله و طلعت بوديه عند الشباب...انه ماحد فالصاله..وين سارو..لحظه اسمع حسوس فالحوش اكيد هم...طلعت الحوش و حطيت الصينيه عدالي انه احمد يالس في سيارته و فاتح الباب و توه ايشغلها و سلطان واقف على الباب و يعطي احمد الجوازات....وين بيسير و انا مسويتله الحليب...
لطيفه: احمد,.....احممممممممد

10-03-2010, 05:17 AM

++رفع احمد عيونه و هو لابس النظاره الشمسيه...بس ما ظهر راسه من السياره..الله يغربل عدوه محلاته..اففف منه...دقات قلبي اتخف شوي شوي ..ياويلي ...بس بس يا لطيفه هاذا الا الديج شوه اول مره اتشوفينه...رفعت كوب الحليب فوق عشان ايشوفه و كأني اقوله...شوه ما تبا حليب؟؟؟ طلع احمد راسه من السياره
احمد: شربيه ارررررروحج...ولا اقول اعطيه فيرانج يشربنه
اففففففف....افين ....و الف...هالريال بييبلي الخبال...اوكي اوكي...شلت لطيفه الكوب و رفعته فوق بطول ايدها و جبته على الزراعه اللي عدالها.....طالعها احمد و هو رافع حواجبه..و سلطان عادي عنده..متعودين على لطوف و قواتها...

بعد هاذا اليوم ما نبغي صدود ولا تخالف خلنا نهنى سنين الحب يا حلو السجيه يا حبيبي ما يكلفنا على البعاد كالف والدورب اللي سلكناها انا و انته سويه

10-03-2010, 05:18 AM

ا"""لجـــزء الرابــــــــــع""""
+++ما توقع احمد انه لطيفه بتشغل باله هالكثر..منوه يعني لطيفه؟؟؟ لطوووف الهمباه ما غيرها...بصراحه اتغيرت وايد وايد..بالنسبه له كانت مجرد مخلوق صغير يركض وراه وين ما يروح..اما الحينه فلطيفه شخصيه ثانيه..مادري..مادري يوم اتدور على بالي جيه احس بقلبي يفز..خل عنك مالقيت الا لطوف؟؟؟ بصراحه شفت اللي احلا عنها..و رمست اللي ارقى عنها...بس هيه غير؟؟؟ شوه غير انته بعد..صح انها حلوت و تغيرت بس شخصيتها الا هيه..قويه قويه قويه..و هاذا الشي اللي يقهرني فيها..ماداني البنت القويه..الوحيده اللي اتروم اتقولي لا !!!! الحق...لطيفه جميله...و كل ما تدور على بالي احس برجفه..الله يغربلها ما لقيت الا لطووف!!
~~~~~
++باجر السفر...أو بكره السفر على قولت علي عبدالكريم...مادري حاسه بضيجه ماريد اسافر..اول مره ما كون متحمسه للسيره لهدرجه..رتبنا الاغراض كلها ..و جهزنا الشنط كلها..عدا شنطتيه طبعا...و شنطة عايشه اختيه..انا متعوده اني ارتب شنطتيه ليلت السفر لاني انسا اشياء وايد..اما عويش اختيه لانها ما تعرف اترتب شنط اصلا...دايما انا اللي ارتبلها الشنطه!!! ادري شي غريب بس على الرغم من ان عايشه اكبر مني بس هيه تعتمد عليه بأشياء وايد!!! اصلا البيت كله معتمد عليه..مب خقه او كبر..بس هاي الحقيقه ..اهتمامي بالبيت اعتبره شي مهم في حياتي لانه ينسيني همومي..همومي اللي ما قدر اشاركبهن اي حد..بسير اشوف عايشه و برتبلها الشنطه يا خوفي لا تكون رقدت لانه الساعه الحينه 11 و نص فليل و السفر باجر الساعه 12 الظهر مطار دبي...
فجيت الباب بلا احم ولا دستور..يعني اختيه شوه فيها اذا دشيت عليها من دون لا ادق الباب!!! بس عايشه اضايجت وايد من هالحركه و حسيتبها مرتبكه و متنرفزه...
عايشه و هيه يالسه من ورا اللابتوب: ما تعرفين ادقين الباب قبل لا ادشين؟؟؟؟
لطيفه: و ليش ادق الباب؟؟؟ تراني يايه ارتب الشنطه ولا ما تبين؟؟؟
عايشه: لا لا خلاص الشنطه ورا الباب و الثياب في غرفة الملابس..روحي رتبيها
لطيفه: متأكده من انه كل شي موجود ما برد ثاني مره تراني
عايشه: لطوف ما تفهمين الكلام انتي...قلتلج كل شي في غرفت الملابس زولي من جدامي عاد
حسيت انه عويش مرتبكه..و صوتها مخنوق...مادري جنها كانت اتصيح!!! المهم انا ما يخصنيه...عويش شعارها فالحياه " انا مالي خص في حد و محد له خص فيه" و الله لو هاذا شعاري...بنتحر احسلي ليش عايشه فالدينا ؟؟؟
رحت غرفة الملابس..مشكلة عايشه فالترتيب انه لو رتبت شنطتها بتحتاج عشر شنط عشان ثيابها..يلست ارتب الاغراض...سمعت عايشه اتشغل اغنية عيضه " بي ضيجه ودعت انا اليوم غالي" سكت ما قلت شي، عايشه انسانه غاامضه وايد..ما نعرف بشوه اتحس..شوه مشاكلها؟؟..مادري احسبها وايد بعيده عنا..المهم اخلص شغلتيه احسلي و ازول قبل لا تحتشر عليه ...خلصت سكرت الشنطه بس خلتيها فالحجره سبحان الله تتذكر شي و ترد اتحطه فيها..فجيت باب غرفة الملابس ..لقيت ليت الغرفه مسكر و الاباجوره بس اللي تشتغل و عايشه راقده..طلعت شوي شوي..بس سمعت شهقه!!!! و انا شوه لي خص افارج احسلي..بس و الله ما هانت عليه عايشه ...يمكن شي يعورها..و انا شوه لي خص؟؟!!! حرام حرام .اتجدمت منها شوي..وخيت عليها..
لطيفه: عويش عويش
عايشه: شوووو
لطيفه: شي يعورج؟؟
عايشه: لا لا ما فيني شي ...اذا خلصتي طلعي و صكي الباب وراج
لطيفه: اللي يريحج..انا ما ببند تيلفونيه اذا عورج شي سويلي..
++طلعت سكرت الباب ورايه...مابيدي حيله...بس انه عويش اتصيح!!!! بصراحه شي غريب..اللي اعرفه انه عويش قاسيه و بارده ...الله يعينها بصراحه الظاهر انه الشي جايد؟؟؟ بس هيه كانت على اللابتوب يعني منوه زعلها؟؟
سرت الحجره...اول ما دشيت مالقيت وضووووح...وين سارت هاي بعد انصاص الليالي؟؟؟ طلعت بسرعه ادورها..وضحه شمعة البيت و اي شي يستويلها بيجتلني...وين سارت؟؟؟طلعت اركض احيدها متسبحه ولابسه بجامتها و بترقد!!! رحت الصاله اللي عدال غرفنا ماحد؟؟؟ رحت المطبخ التحضيري اللي فوق بعد محد؟؟نزلت تحت..اخاف اقول حق امايه اخوفها اكثر!!! نزلت الصاله اللي تحت..المطبخ..الميالس..محد...ياررررربي..بسير اشوف كشميرا...اول ما فجيت الباب على كشميرا لقيت وضحه عندها...و يالسه اتغشل الفيديو و ماسكه افلام عندها
لطيفه: وضحووووووووووه
وضحه: ها شوه
لطيفه: و ضرررررررررريس...وين انتي
وضحه: انا هنيه بعد وين..
لطيفه: و شوه محولنج اهنيه....و شوه اتسوين تبيني اجتلج ؟؟
وضحه: بس اراوي كشميرا كيف اتسجل
لطيفه: اتسجل شوه؟؟؟ افلام شوه هاذيلا....قولي يالله و لا و الله تراني بخبر سلطان عليج
وضحه: و الله و الله ما فيهن شي فاضيات طرشت عباس ايبلي اياهن من الدكان
لطيفه: حق شوووه ان شالله ...ماحيد ايبيعون افلام ديزني فالدكان؟؟
وضحه: ابا اعلمها كيف اتسجلي البرايم؟
لطيفه: اي برايم
وضحه: مال ستار اكاديمي...شوه نحن بنسير مكه اكيد ما شي هناك القناة مالتهم وانا ابا اشوووفهم
لطيفه:لااااااااااو الللله؟؟؟؟ عنلااااااتج...انتي اللي بعدج ما ظهرتي من البيضه هاي سواياج..تدرين لو يعرف سعيد انج اتشوفين هاذيلا المفاصيخ شوه بيسويبج؟؟
وضحه: برايه سيري سيري قوليله انا ما خاف( طبعا سعيد ما تخاف منه مدلعنها..اوكي اوكي انتي ما اييبج الا سلطان)
لطيفه: اوكي بقول حق سلطان وضووح اتشوف هاذيلا اللي البنات و الاولاد في بيت واحد و انتي تفاهمي معاه..ولا انتي الياهل شوه فهمج بسوالف التسجيل و الفيديو..شوه بيستوي عليج لو ما شفتيهم اسبوعين؟
وضحه: حرام عليج لطووووف...اخاف بهاء تطلع وانا احبها
لطيفه: حبج بوبريص قولي امين...يالله فوق جدامي يالله..
وضحه: خلاص كشميرا...معلوم انتي كيف سجل..شوفي كل يوم ساعه تسعه روحي هاذا قناه اسم مالها ازرق..بعدين دقي هاذا فص..بعدين كل يوم جمعه روحي سيم سيم قناه ساعه عشر و نص بعد سجل خلاص
كشميرا : اجييييييييه فهم انا فهم يالله روح يريد نوم انا
يالله من هالبنت سوينا المستحيل عشان نمنعها من انها اتشوف هالبرنامج ما شي فايده..قفلت القناه في حجرتنا ( انا ووضوح في نفس الحجره) قامت تنزل الصاله و تشوفهم..هزبتها و قالتلي مابتشوووفهم بس كله خريط اتقولي كشميرا انها من ترد من المدرسه سيده عليهم..حتا ثيابها ما تبدلهن...الحين هاي ام 11 سنه و هاي سواياها و مب قادرين انسيطر عليها...استوا كل شي عادي عندها ..ربايعها اللي فالمدرسه ايسجلن لها البرايم و يعطنها اياه و اتشوفه يوم نحن فالجامعه!!! و الله بنات اخر زمن...لا و اتصوت من تيلفون امايه و توصل الفاتوره اخر الشهر بهاذاك المبلغ..بس ماحد ايقولها شي..اخر العنقود
المهم رديت الحجره و يلست ارتب اغراضي..الين ما وصلت الساعه وحده و نص فليل...سمعت تيلفوني ايدق..ركضت بسرعه بشووف منوه اللي مسوي يا خوفي عايشه استوا عليها شي...طلعت فاطمه
فاطمه: الووووو
لطيفه: النمره غلطت

فاطمه: ههههههههه..شوه بعدج ما رقدتي؟
لطيفه: شوه رايج منوه عيل يالس ايرمسج الحينه؟
فاطمه: شوه اتسوين؟
لطيفه: فطيم تراج فاااايجه...جان ما عندج سالفه بصك
فاطمه: لطفين شوه بلاج؟؟؟
لطيفه: لا سلامتج بنت سيف ما سويتي شي حاشاج...الرقاد ما طاع اييني من الفشله؟؟
فاطمه: اي فشله
لطيفه: اتعرفين انج البارحه يوم كنتي ترمسيني من تيلفون اخووج انه الديج كان حاطنه على السبيكر؟؟؟
فاطمه: شووووووووووه؟؟؟؟ حلفي حلفي
لطيفه: شوه يونج ما تدرين يعني؟؟
فاطمه: و راس السيافي اني مادري بشي..يااااربي شووه سويت
لطيفه: لا الغاليه ما سويتي شي بس فشلتيني جدام اخوج..و حرقتي ويهي...و قفطيني..و خليتيه يتحراني احبه الين يومج هاذا..بس ما شي
فاطمه: بس عاد لطوف لا تلومينيه اكثر عن جيه..شدراني انا من ارمسج اخترش ما دري شوه ايني...و الله اني متلومه فيج...و بتخبرج هوه شوه سوا يوم سمعني اقول جيه؟؟
لطيفه: طااااعو الخامه...و تتخبر بعد..ما بقولج
فاطمه: فديتج يا تقولين
لطيفه: ماشي يلس يضحك
فاطمه: و الله
لطيفه: لا عيل نش يزغرط...اقول متا بتظهرون باجر من البيت؟
فاطمه: نحن بنظهر جيه على تسع و نص
لطيفه: خيبه شوه عايلنكم؟؟؟
فاطمه: الله يسلمج بنسير انا و احمد سويحان و بنشل يدتيه..اما امايه و ضبوب و عمران بييبهم عمير
لطيفه: اها...نحن بنظهر جيه علىعشر و نص
فاطمه: يااااحظج بترقدين شوي..
لطيفه: الله يخليج اي رقاد انا يوم يكون باجر شي سفر مارقد
فاطمه: خيبه عيل بتواصلين
لطيفه: شوه اسوي تعالي سهري عندي
فاطمه: لا والله انصاص الليالي ...خليني يا بوي بسير ارقد..يالله شي في خاطرج
لطيفه: لا تصبحين على خير
فاطمه: هيه صح لطووف اتذكرت..اليوم سمعت احمد اخويه ايرمس شمسوه اختج و يقوولها...انج...
لطيفه: شوووو
فاطمه: مادري نسيت
لطيفه: طمااااطوووه بترمسين ولا لا ؟؟
فاطمه: ما برمس شوه بتسوين يعني؟؟....
لطيفه: فطيم و يههههههد...قولي
فاطمه: ياختيه ما سمعج فيني رقاد شوه اتقولين...احمد..احبك...شوه؟؟!!!
لطيفه: اوكي اوكي فطيم مب منج من اللي..
فاطمه: يونج ما تحبينه بعد؟؟؟؟ على منوه تقصين...يوم انج ما تحبينه ليش متحرقصه تبين تعرفين شوه قالج عنج
لطيفه: حبتج القراده انتي و خوج فوووووقج...و علومج خليهن حقج
فاطمه: ايقول انج اتغيرتي وايد و انه ما عرفج فالبدايه...
لطيفه: كيف تغيرت يعني؟
فاطمه: شدراني انا... باجر بتشوفينه و سأليه
لطيفه: اقولج اتشوفين الكوميدينو اللي عدالج
فاطمه: هيه شوه بلاه
لطيفه: دقي راسج فيه و انطبي باي
فاطمه: هههههههه..بايات ولا تنسين احلام سعيده مع

10-03-2010, 05:19 AM

++ما خليتها اتكمل صكيت في ويهها..ادريبها بتقول الحب الاديم...كيف بسير باجر؟؟ ما بقدر اتحمل احمد طول السيرة..اف منها حالة..لطيفه لازم تتعودين على وجوده..شوه بيستوي عليج يعني؟؟..وليش اتعود على وجوده إن شاء الله!!! خلاص احمد انا شليته من بالي..و ماله في قلبي اي محل..دشيت اتسبح..و لبست بجامه و يلست اتابع فلم اجنبي الين صلاة الصبح صليت ووطيت راسي..ما واحت امايه ساعه و انها داقه عليه...
عفرا: لطوووووف...لطوووووووف نشي نشي الصلاه
نقزززززت لاني اعرف اذا ما فجيت الباب عادي امايه تكسر الباب
لطيفه: هاه امايه...صليت خليني ارقد شوي
عفرا: شوه رقااااده الضحى هاذا
لطيفه: الله يهديج يا امايه شوه الضحى توها ست الفير
عفرا:منوه يقول..ثمان الحينه.. نشي نشي يالله سلطان اخوج ايقولكن يالله حولن الشنط...و ابوج متفيزر تحت ما طاع يتريق الين ماتحوليله انتي
لطيفه: إن شاء الله ماعليه ببدل و بنزل
عفرا: هب تردين ترقدين...و وضحه وعيها خليها اتنش هالبزيا ارووحها يبالها ساعه الين ماتلبس
لطيفه: ان شالله
++نشيت ...اتغسلت غيرت ثيابي و لبست جلابيه الاحرام ...خيبه اذا الطايره 12 و الين ما نوصل جده يبالنا ساعتين يعني بنوصل هناك الظهر و مشوار مكه بعد ساعه و نص يعني بنوصل يا القايله يا العصر كيف بنطوف في هالحر؟؟؟؟؟ اسميهم سلطان و احمد من تعبلوا بهالسيره خربووها..لول سعيد اخويه يحجزلنا العصر و نوصل هناك فليل لا حر ولا شياته...لفيت شعريه على السريع ذيل حصان اصلا من طوله هو؟؟ من يوم انا صغيره ماداني الشعر الطويل..عكس بنات عمتيه...ضبابه و فاطمه شعورهن وايد طويله ما شالله..اما انا دووم اقصه كاريه يوم انا صغيره بس من دشيت الثانويه بديت اطوله الين تحت جتوفي شوي و دوم اقصه مدرج احلا عليه خاصه انه شعريه وايد غليظ...يالله المهم بنزل
نزلت تحت لقيت سلطان اخويه متسبح و شعره رطب و يالس يشرب جاهي و عداله بويه حاط على التلفزيون مسلسل جواهر.. و يتابع...صبحت عليهم و وايهته
حمد: هلا هلا بالشيووخ...ماشالله ماشالله على الخضر اسميج ما خربتي بنت حمد..شصبحتي امايه
لطيفه: بخير الحمدلله..شوه بويه ما تريقت؟
سلطان: لا يترياج الاميره تحولين ما يروم يتريق بدووونج
لطيفه: فديته انا...لازم ما يصبر عني جانه مصبح على شيفتك اكيد انه لاعت جبده...ما تقول الا عادل محمود( المغني البحريني)
سلطان: لا و الله جب جب اصلا انا شيخ المزايين ...مب انتي ما تقول الا سوريه بتخبرج متأكده انج مب من البوسنه؟؟ ( عاد سلطان يعرف انه جميل و دوووم يتخقق)
لطيفه و هيه اتصب فنيان قهوه حق ابوها : قالولي بوسنيه و محصلينا انا و انته عدال الزباله
حمد: بس بس من هالرمسه اللي مالها معنا....لطيفه حطيليه شويه خبز و لبن وشويت دهينه
عفرا و هيه توها تيلس: لا لا هب اتصيبله دهن...عنبوه التكسرول مرتفع عندك
سلطان: اوب اوب اوب البوس هنيه...بعدين اميه شوه اسمه ؟
عفرا: شوه هوه
سلطان: هاذا اللي في ابويه؟
عفرا: التكسرول...عيل شوه
سلطان و لطيفه: هههههههههههههههههههههههههه
لطيفه: الكولستروووووووول
سلطان: و الله يا اميه انج عجيبه...انزين شوه اسمها سيارتيه؟
عفرا: الخنفسانه؟
سلطان: لا لا الثاني
عفرا: اخس فايو
سلطان+حمد+لطيفه: ههههههههههههههههههه..و الله انج طماشه
عفرا: يالله بالستر جانكم تضحكوون عليه...ثرنيه شوه قلت انا
حمد: عنبوه يا عفرا مخليه العيال يلعبون عليج
عفرا: وايه يعلني ما خلا من بوومييد و من سويلفاته ..ابويه سر شوف جان عباس حمل الشنط...و انتي لطوف نشي طاعي عويش جانها نشت ادق عليها و ماترد
حمد: وين الوضيحي عيل...سيرو وعوووها
و انه وضحه توها داشه عليهم..و الحبيبه لابسه بنطلون جينز وبدي
حمد: مرحبا مرحبا الساع بالوضيحي..تعالي بنتي هنيه مره عدال ابووج..
سلطان: وضحووه شوه هاللبس..نشي بدليه بسرعه ما فينا انترياج
وضحه: شوه بلاه
حمد: بنتيه وين احرامج ... ما يوز اتسيرين العمره جيه
وضحه: باباتي ما با مابا البس كندوووره
سلطان: شوووووه...نشي يالله متزرزره بهاللبس اتقولين رقااااصه نشي..
تمت وضحه اتصيح
حمد: لا اله الا الله ...ِشياك عالبنت دووم اتخشعها
سلطان: ما تشوووفها شوه لابسه...عنبوه حرمه هاي شراتها لابسه شيله و عباه
لطيفه: عندك اياها مره ما تنرام ...يعريه و بعدها ببناطلينها...بتشوفج هناك هيئه الامر بالمعروف و بتزخج
وضحه: تسمعهم ابويه شوه يقولون؟؟
حمد: ياعيال الحلال خلو البنت...حتا العيشه ما حطتها في ثمها...سيري بنتيه و بدلي ثيابج ما بتسافرين لندل(لندن بس بالبدوي) انتي.. العمره بتسيرين لازم الحريم يلبسن احرامات
نشت وضحه و لحقتها انا بسير اشوف عايشه شوه فيها...رحت الحجره لقيت وضحا اتبدل ثيابها..طلعت العباه بعطيها كشميرا اتكويها و بسير اشوف عايشه مره وحده...دقيت دقيت بس ما حد يرد..ياربي لا يكون شي عورها البارحه...فجيت الباب شوي شوي...ماحد فالغرفه؟؟ لقيت اللابتوب يشتغل..و النت بعد!!! شوه هاذا تتريق على النت الله يهديها...دشت عليه عايشه في هاذيج اللحظه..مستحيل انه هاي عايشه اختيه اللي اعرفها..عيونها متنفخات..ويهها احمر..و مبهدله...عايشه اختيه مستحيل تهمل عمرها...حتى اذا بترقد تتكشخ اتقول سايره عرس...
لطيفه: صباح الخير عويش
عايشه: مرحبا...شوه متا بنسير؟
لطيفه: يالله الحينه يايه اقولج تزهبي جيه عقب ساعه بنسير...عويش
عايشه رفعت عيونها صوبي..و كأنها تترجاني اني ما اسألها شوه فيها..بس ما قدرت اقاوم هاذي اختيه!!!
لطيفه: امممم..عايشه شي يعورج
عايشه: لا ... اذا ما شي في خاطرج طلعي ببدل ملابسيه
لطيفه: اللي يريحج..
طلعت...بالاحرى انسحبت..غرفه عايشه كانت مثل ساحت الحرب..فيها ناس تتعذب..ناس تقاتل..ناس اتمووت..عمري ما تمنيت اني اكون قريبه من عايشه اختيه كثر اللحظه اللي خطفت!! عمري ما حسيت انها اختيه مثل اللحظه اللي فاتت..حسيتها محتاجتني...بس عزة نفسها...اخ من عزة نفسها و عنطزتها..دايمن مسويه حاجز بيني و بينها!!!!
تلبسنا و اتزهبنا و اتأكدنا من الغرف انها مسكره و بأمان..
سلطان: اماااااااايه...يالله عاااد بتسيرن عرس انتن يالله انقفضن
حمد: من جيه مادانيها سيرة الحرمات اممرررره انحوشهن تحويش
يالله منهم...سلطان محتشر...و ابويه من معاليه..شوه عندهم انزين توها عشر و الطياره 12..عايشه اختيه ووضحا ركبن السياره..الا انا و امايه ..امايه يالسه اتجيك و تاخذ نظره اخيره على البيت
عفرا: شوفي كشميرا...ما في يفتح باب حق ناس انتي ما فيه معلوم..و شوفي ارباب سعيد يوم يجي خلي عباس ايسويله عشا تمام...
لطيفه: و هاذا مفتاح مال حجره سوي نظيف تمام بعدين قفليها..
سلطان وهو يطلع راسه من السياره: اوووووهوووو...بتركبن ولا انسير عنكن
عفرا: وااااابويه يا سلطان عين من الله خير..خلنا انشووف اشغالنا و حلالنا..امرره ما يخلون فيك ذهن
يوم توها امايه بتركب...
عفرا: يابتها كشميرا دلة القهوه؟؟
وضحه: لا ماماتي
عفرا: اوهووووو من هالبشكاره السنيانه...و طلعت تبا اتسير اتييب الدله
سلطان: اميه و الله مادبرين ...شوه تبونها القهوه..الحنيه تراكم متقهوييين اركبي يالله خلونا نظهر
عفرا: لطيفه سيري هاتيها بسرعه
سلطان: اووهوووو
حمد: ياهاذي ما سنت
و الله اني رديت اركض اركض..شوه هاذا الله يهديهم سيرتهم امرره سيرة خبال..المهم يبت دلة القهوه و ركبنا..عاد ابويه و سلطان مزنفخين...مرت نص ساعه ما حد رام يفج حلجه بكلمه.. سلطان الدخان يظهر من خشمه..و حاطه ريله على الباب ..ايعرف انه هالحركه تقهر امايه..نش و شغل الشريط..( خالد عبدالرحمن)
عفرا و بصوت هادي: سلطان ابويه
سلطان: شووووووو
عفرا: ابويه عين من الله خير ...حاطلنا هاذا يطرب و نحن بإحراماتنا..
سلطان: تبن اسمعن ما تبن سدن ذ***ن
عفرا: انزين بويه برايك حط اللي تباه...بس ريلك الغالي نزلها
سلطان: لا حوووووول..
عفرا: فديتك الغالي شقايل اتسووق جيه و انته راكز ريلك لو تظهرلك الحينه شاحنه
استحى سلطان من امايه ..خاصه انه من الصبح و هوه رافع صوته عليها...و سلطان بالذات ايعز امايه وايد
حمد: سلطان بويه ...غير عنه هاذا من الصبح يطنطن...حطلنا بروووغه جان عندك
وضحه: شوه هاذا باباتي شوه بررووغه ما احبه انا
حمد: فديتج بنتيه عيل شوه تبين؟
سلطان و هو يحط شريط اللي يباه ابوه: جب ما عندنا بنات يتشرطن...
حمد: سلطان.. الوضيحي لحد يقولها شي..عنبوه ثرني لو بموت بتولاهن انته...

بعد فتره
حمد: ما عندك هاذيج الغنيه اللي يقول فيها احوري كالبدر لونه؟؟
سلطان: لطوف
لطيفه: لبيه
سلطان: فجي السدة و بتلقين شريط اخضر ظهريه
نشيت و طلعت الشريط و عطيته سلطان..وضحه يالسه عند ابويه جدام وانا يالسه فالنص بين امايه و عويش..اللي ما نطقت بكلمه من ظهرنا..!! و اخيرا وصلنا المطار على الساعه 11 وربع..طبعا سلطان مطيرنها السياره و الشواب مب حاسين المهم اننا وصلنا بخير و سهاله ^_^..حول سلطان وبويه
سلطان: امايه لا تحولن بنسير انا و بويه و بندخل الشنط..انتن يلسن اهنيه اترين قوم عمتيه الحنيه سويت حق عمير و يقولي اهنيه دون دوار بوكدره...لا حد يحول تسمعن بنات و لا لا ؟؟؟
عقب عشر دقايق...انه عمير و عمتيه و ضبابه وشمسه و عمران واصلين..حولو وسلمو علينا فاضطرينا انا انحول و انسلم عليهم ..ماشالله علينا جنه المطار مطارنا...خليناه ميلس...بغينا اندش داخل .. بس قلنا بنتريا يدتيه بنسلم عليها و بندش مره وحده...
خطفت ربع ساعه و انه احمد واصل
ضبابه: هاذوه وصل احمد
لطيفه: وينهم ما شوفهم؟
ضبابه: هاذيه البي ام السودا

10-03-2010, 05:20 AM

لطيفه: حلفي
ضبابه: و الله ليش
لطيفه: خيبه و انا من الصبح ما شليت عيني عن هاذا راعي الاستيشن الذهبيه عبالي هوه
ضبابه: غربلات بليسج اشوفه الريال من الصبح مصوب علينا...و لو كان احمد انتي شوه تبين اطالعينه؟؟
لطيفه: عدال عاد..اللي يسمع....بتخبرج من كم يوم كان عندنا فالبيت و كان عنده استيشن ذهبيه
ضبابه: عنده استيشن و بي ام....الله يطول عمر الديوان مشرغنه..شوفي شوفي فطيم يوم هيه اتنزل يدتيه الله يعينها
نزلت يدتيه ضبابه...عفوا الملكه...هههههههه..حليلها فطيم من الصبح اترشاها تمسك ايدها عشان ما طيح بس ضبووب نحسسسسسه مستحيل اتخلي حد يمسكها يون انا قويه ما با حد يمسكني...اتجمعو الشبيبه على يدتيه..يدتيه محبوبة الجماهير و خاصه الشباب..عمير..سعيد اخويه..ابويه..سلطان..يالله كيف تلوي عليهم...شوه هاذا فلم هندي على الهواء مباشره..ولا داقين وياها سوالف مب جنهم محتشرين علينا يونا متأخرين!!!! المهم سلمنا عليها و سرنا سيده قاعه الانتظار..و خلونا الرياييل سارو ايخلصون الجوازات و الشنط...سلمنا على عمتيه و البنات و اتجمعن عمتيه بخيته و امايه يلسن على طرف و يالسات يتقهوين..اما ضبوب الصغيره و وضحا يالسات عند يدتيه يلبسنها زليغات...عشان ما يتورمن ريولها فالطياره..اما انا فيلست عن توأم روحي فطيم
لطيفه: اتصدقين فطيم مسسسسسسسسسسسسطله عيوني متلاصقات
فاطمه: ههههه ما رمتج يوم قلتلج ارقدي ما طعتي..اقولج شوه بلاها عويش اختج
لطيفه: ما شي بلاها ...بس يمكن حازه في خاطرها انه شمووس ما بتسير ؟
فاطمه: اها...هيه و الله اول سنه انسير بدون شمسه..حليلها ..اتصدقين مارمت اوادعها يلست اصيح
لطيفه: ههههههههههه..فديتهاو فديت السيافي..
شمسه: اقول فطيم؟
فطيم: هلا
شمسه:سيري ودي سيف الحمام ورانا خط و اخافه ايعلوزني فالدرب..
فطيم: ما عليه...يالله لطفين نشي ويايه
لطيفه: لا و الله سيري اروحج اتعرفيني ما داني اليهال و صدعتهم
فطيم: يالله عاد
لطيفه : زوووووولي ...بوطي راسي شوي قبل لا انسير
سارت فاطمه اتودي سيف الحمام...مرت نص ساعه...و سمعنا نداء طيارتنا..و الحبيبه فطيم الين الحينه ما هضلت..
سلطان: يالله حرمات...انسير الطياره
نشن حرماتنا كلهن
شمسه: بتخبرج وين سارت فطيم الين الحينه مايت؟؟
لطيفه: شدرانيه؟؟ حد ايطرش هالسنيوحه؟؟
شمسه: شدراني السيافي متعود عليها..قلتله خل ضبوب اتوديك ما طاع
اتحركو كلهم ما تم حد فالقاعه و الحبيبه بعدها ما يت..
شمسه : بسير اشوفهم
لطيفه : خلاص عيل انا بيلس اترياها اهنيه
شمسه: يالله عيل فداعت الله
لطيفه و هيه خانقتنها العبره: الله يحفظج...حطي بالج على عمرج و البيبي..
شمسه: ان شالله لا تنسينا من دعاؤج
لطيفه: ان شالله...اقول شمسوووه..ما وصيج على الحليان تراه عباسوووه متحلفله
شمسه: هههههه...فالج طيب
سارت شمسه...و فاطمه بعدها ما ظهرت...طلعلي احمد
احمد: هاه فاطمه شوه اتريين يالله انقفضي لا اتطير الطياره عنا
مارمت ارد عليه لاني اعرفه انه مغلط و يتحراني اخته فاطمه..انا و فاطمه نفس الطول و لابسات نفس العبايا و نفس الغشاوي..ما ينلام...هزيت راسي لانه لو درا انه فاطمه مب هنيه بيحشر الدنيا...عاد كيف يوم احمد يعصب..ايشل الدنيا ؟!!! اتجدم احمد صوبي وايد...يالله لا يكون شك فيني؟؟؟ شوه ايسوي هاذا؟؟ مسكني من ايدي ....وااااااااااااااااي..الله يغربل بليسه...عمره ما قد مسك ايد فطوم شمعنا اليوم!!!! حشا لمست ايده حرقتني اتقولون يمره..بغيت امط ايدي لانه بيحس اني ارتجف من فوق الين تحت..بس هو حط في ايدي الجوازات
احمد: دووووج الجوازات و حطيهن في شنطتج...لا تضيعينهن..يوم بنوصل جده باخذهن عنج اوكي
هزيت راسي مرررررره ثانيه...سبقني و اشرلي اني اتبعه...في هاي اللحظه ظهرت الاميره النائمه فاطمه
لطيفه و هيه تهمس:طماااااطووووه ويهد وين كنتي؟؟؟
توها بتتكلم فاطمه حطيت ايدي على ثمها..ما فيني يلتفت احمد و ايشوفها بيقولها وين كنتي؟؟؟ و تحقيق ما تحقيق..سرنا وراه بكل هدووووء...دشينا الخرطوم...و انه يدتيه شاله الدنيا بحسها؟؟؟ الله يهديها ..يدتيه و طياره....اتخيلواا الوضع و كله فووووق راس احمدوووووه..احسن يستاهل..اصلا معروف انه احمد روح يدتيه اتمووت فيه...لازم تراه نسخه من يدي الله يرحمه..
اليده: ما باها هالطياره صغيره...مادانيهن الصغار يختضن و يخضن جبودنا وياهن
سلطان: لا لا يدتيه هاي مب صغيره...هاي الطياره العووده مالت الشحن
اليده : خيـــــــــــــــــــــــــــــــبه لا عيل ردووونيه ماباها هاي مالت القشار بطيحبنا
احمد: لا حووووول ولا قوه الا بالله...يدتيه هاي هيه طيارتنا العاميه..ما تحيدين عام لول يوم انسير
اليده: متى؟؟؟ لا لا ماذكر....ردوني ردوني ماباها هالطياره ادريبكم تبون اتنفدونيه
احمد: عنبوه يا يدتيه جانج بتنفدين ترانا نحن بننفدج وياج؟
اليده : لا لا لا لا تقول جيه...يا بويه وين ولديه حمد زقروووه خلوه يكلم هالشرطي يفتحلنا الباب مال الطياره الثانيه..و جانه ما طاع قولوله هاذا يعرف الشيوخ
احمد حب يدته على راسها: ههههههههه...يدتيه ايقولولج ما شي غير هالطياره اتسير العمره..تبونها حياكم ما تبونها بيردونا البلاد
اليده: انزين روودني خلووو عمير ايشلنيه ...ردووني سويحان
احمد: يدتيه جانج انتي ما سرتي انا ما بسير...و بنكسل كلنا
اليده: يا بوووووويه فكنيه من الصدعه اتوكل انته و هلك و سيرو ...انا برقب عمير هنيه
احمد: ورفجت يديه انج اتردين
اليده: حمااااده ...عنبوك زاد يدك فالقبر شوه تبابه
احمد: ههههههههه....يوم انه فالقبر انسيرعيل عيني خير و اعتمري عنه جاد الاجر يوصله
اليده: هزرك؟؟
احمد: عيل شووووه...من يحطونك فالقبر شوه ينفعك؟؟
اليده: عيل قوم و ازقرلي لطووف خلها تقبضنيه من ايديه
احمد: وشوه انا ماسد
اليده: زقرلي لطووف اقولك ..لا تزقرها فطيم ماباها بارده هاذي...ازقر لطوف حرجه ابا تيلسني فالكرسي اللي اباه ماحد يعرفليه غيرها...
احمد: ان شالله ...لطيفه لطيفه
لطيفه: شوووو
احمد: تعالي العيوز تباج
لطيفه : ما عليه ما عليه
++لطيفه..سرت و اتجدمت و مسكت يدتيه من ايدها و احمد من الطرف الثاني ,,,, اول ما تقربت عيون احمد كانت مصوبه سيده صوبي..مادري حسيت بنبض قلبي بيظهر...شوه يطالع هاذا بعد ...اتقربت من الصوب الثاني..يالله كيف احمد جريب منيه خاصه انه جسم يدتيه ضيئل وايد..حاولت اتحمل بس ما رمت احس بضيجه في نفسيه..اووف يا احمد رووح الله يخليك ...روح و ارحمنيه!!!
~~~~~
+++أحمد..يالله....ماروم اشل عيني عنها و هيه تتقرب مني...يعني لازم لطيفه من بد كل البنات..مادري ..جنها تمشي في فواديه...لفيت ويهي الصوب الثاني..بس من مسكت ايد يدتيه استوا راسها جريب وايد من راسيه..عنلاتها شوه اتسويبيه من تتقرب عداليه..لطوف لطوف ما غيرها اللي طول حياتها جدامي..اليوم تلعب بقلبي لعب..و الله و الله اني آنس طبول تغني في قلبي!!!! و هم يا احمد و هم لا اكثر ولا اقل....

10-03-2010, 05:20 AM

"""الجـــزء الخامـــــــــــــــس""""

المهم تمت الرحله على خير و دشينا الطياره...تـأخرت الطياره ألين الساعه 1 بسبب اعطال ...و احتشرن الحرمات ...يالله يالله سكتناهن..يونهن يبن ايردن ولا يبدلولهن الطياره..شوه هو سوبرماركت!!! وصلنا جده على ثلاث الظهر نزلنا ....زربونا مره ثانيه في وحده من القاعات و قالولنا كل وحده تمسك جوازها و اتسير التفتيش النسائي...ألين ما يخلصون الرياييل الشنط..دخلنا نحن البنات و الحرمات كلنا غرفت التفتيش..فجينا الغشاوي و وقفنا بالدور..
فاطمه: خيبه بتخبرج شوه هاذا؟؟
لطيفه: هاذا الله يسلمج جهاز بيخطفونه على جسمج كامل ...بيطالعون جان حاطه سلاح ولا شي
فاطمه: اتخسي اتحطه على جسميه...شوه ارهابيه انا
لطيفه: اص لا تبين طاري الارهاب لا ايشلووونج بوزعبل ولا نشووف زولج مره ثانيه
فاطمه: هههههههه...ياختي ماروم استحي شوه هاذا؟؟
لطيفه: ضبابه يالله الدور دورج
ضبابه: انزين مب عميا...
لطيفه: حشا يهالعايله كلكم حرايق...بتخبرج شوه بلاها
فاطمه: هههههههه..معصبه على سلطان
لطيفه: ياويل سلطان...شوه سوا بعد حليله؟
فاطمه: ما شفتيهم هو و احمد ما طاعت المضيفه تفارجهم من ركبنا ألين ما حولنا
لطيفه: انزين و سلطان شوه يخصه
فاطمه: شوه شوه يخصه!!! هم غلامين يلسوا يناغونها...وهيه ما صدقت
لطيفه: ما تنلام شافتهم مزايين
فاطمه: عاد تعرفين انتي ضبوب ما تبا البقره اتشوف سلطان وين عيل هالشقرا
لطيفه: عنلاتها الغبرا .....شوه تباهم ..الله يغربلها يعلها الماحي
فاطمه: هاه هاه شعندج انتي بعد
لطيفه: يا سلام اشوفها تراوش اخويه وانا بسكتلها
فاطمه: بصراحه ما تنلامين تراوش شوقك و اخوج
لطيفه: فطيم....لمي ثمج
فاطمه: سمعا و طاعة مولاتي
اليده: طاااعووو ضبوب انتو تتضحك ...ايه شيضحكج؟؟
ضبابه الصغيره: الله يغربلها يدتيه ...هاي المكينه تقرقطني
اليده: امممممممف...شوه هالطفاسه هاي بعد؟؟؟ ايه انتي مسودت الويه شوه تبينهن بناتنا تتهيسينهن
بخيته: امايه لازم ايفتشوون
اليده: اتهبي ... عيل تيلس تتلمس بناتكن وانتن اتشوووفنها اسميكن ما تفهمن ألحقن على بنيّكن بتنفدهن
بخيته: يا أمايه...شوه اتنفدهن..حتا انتي بحطونها عليج
اليده: اتهبي الخامه...سرنا الحي و العمره قبل ما سوا هالخريط كله..عطنيه جوازيه بظهر
عفرا: يا عمتيه عيني خير...
حليلها ضابطت التفتيش ظحكت و هزت راسها...جنها اتقول برايها العيوز
بخيته: اسميحلنا اختيه..عاد هاي عيوز و عوده فالسن هب تحطين في خاطرج عليها
اليده: عاز حيلج...امف عليكن زقرلي احمد ولا سلطان ايوديني السياره...
فاطمه: خلاص انسير نحن خلصنا يالله يدتيه
اليده: فاطمه؟
فاطمه: لبيه يدتيه؟
اليده: سيري هاتيلي مويهه...امررره ريجي يابس
فاطمه: ما عليه...بس يدتيه هب تسيرين مكان انزين؟
اليده: وين بسير....ماروم اشل ريولي انا

حطت فاطمه يدتها على واحد من كراسي الانتظار و سارت صوب ثلاجه الماي، شافت سلطان واقف عدال الهندي اللي يحمل الشنط و أحمد واقف عدال المكان اللي يطلعون منه الشنط ، و هيه راده شافت كشك ايبيع مجلات...سارت صوبه فاطمه تبا تشتري مجله فواصل..
فاطمه: السلام عليكم
العامل: و عليكم السلام...
الله يسلمكم العامل اندونيسي بس رخو و ماصخ، مادري كيف يعني مايع يرمس من طرف ثمه
فاطمه: لو سمحت ابا مجله فواصل اذا عندك العدد الاخير؟
فاطمه ما انتبهت انه في ريال غيرها واقف عند الكشك
قام العامل و عطاها مجله ثانيه
فاطمه: شوه هاذا انا ما قلتلك المختلف...قلتلك فواصل
العامل: ما في
فاطمه: لا و الله عيل شوه هاذيج اللي معلقه اهناك
العامل: ما يبغا بيع انا
فاطمه: لا و الله ...عيل ليش عارضنها؟
العامل: مدام انتي شو في...
فاطمه: شو شوه في ..الله يسقمك يالرخو...خلاص خلاص هات المختلف
مد العامل المجله حق فاطمه
فاطمه: اقولك انا عندي فلوس امارات بس... ما في مشكله؟
العامل حب انه يطول السالفه و يتميصخ على فاطمه,,,,خاصه انه اسلوب فاطمه فيه نعومه و دلع طبيعي
العامل: نو نو مدام ما يقدر انا...اذا ما فيه فلوس سعودي رجع مجله؟
فاطمه: ليش فلوس مال امارات سيم سيم مال سعوديه؟؟ يالله هات
قام العامل و مط المجله من ايد فاطمه بعد ما حاول انه يمسك ايدها....عصبت و طلعت
العامل: مداااام مدام خلاص خلاص ارجع...شيل اي مجله انتي يبغا بلاش
فاطمه: خلها حقك...لف بها سندويجات براتا و بيض
سمعت فاطمه ضحكه...من وين ؟؟ من الطرف الثاني من الكشك..استغربت منوه اللي كان يسمع باللي صار بينها و بين العامل و قعد يضحك؟؟؟ ..اكيد هاذا واحد من عمال المطار...لا لا هاذا واحد مواطن و طاوي السفره!!! من الفشله ردت فاطمه صوب المجله ....بس سبقها الريال و خذ مجله فواصل و فرّ الفلوووس على العامل
-----: خل الباجي حقك؟؟؟ و ثاني مرره لا تسوي قرقر زياده ولا لسانك بينقص..عنبو ذا الشيفه...دواك حد يشتكي عليك
العامل: سير سير ...ما في يشتكي انا ما سوي غلط
-----: الا الغلط راكبنك من ساسك الين راسك يالخديه
العامل: سير سوووري سير ما في يشتكي
لف الريال صوب فاطمه اللي كانت شاهد ما فهمش حاجه..مد الريال بالمجله صوب فطيم
-----: اندوج اختيه المجله، و هالاشكال ما تنعطا ويه زياده لانهم يخورونها...
فاطمه مارامت ترمس، فشششششششششششششششله
++ياللله من وين طلعلي هاذا؟ يالله ياالله لا يكون سمع كل شي، اكيد الحينه يتطنز عليه و ايقول هاي مقصه، او انه ايقول انه هاي ماصخه و راعيت حركات ويالسه اتزودها مع العامل....بصراحه بصراحه احس انه اريد الارض تنشق و تبتلعني!!! طلعت فاطمه من الكشك خطفت على ثلاجة الماي...و قالت بسير اشوف احمد اكيد انهم حجزوا سيارات و بركب يدتيه بالمره...اتجدمت شوي شوي..بس احمد مب واقف ارووحه واقف عداله ريال...نفسه نفسه اللي كان فالكشك من شوي...اكيد يعرف احمد اخويه ولا كيف يالس ايكلمه و يضحك معاه!!! يالله كملت بعد هاذا اللي ناقص يوصل خبريه عند احمد..ياربي سترك سترك زقرت احمد شوي شوي..الحمدلله انه سمعني..و تقرب صوبي
احمد: شوووه بلاج؟؟
فاطمه: هاذيه يدتيه..حاشره الدنيا تبا تركب السياره
احمد: انزين سيري هاتيها...
فاطمه: ليش انتو حجزتو سيارات؟
احمد: لا
فاطمه: عيل؟؟
احمد: علي حاجز جماسي...ثنينه واحد حق قوم عمتيه و واحد حقنا
فاطمه: منوه هاذا علي؟؟

الإهداءات

ماينجبر قلب على قلب

(همســــات قصص وروايات)